Двајца мажи заработија кривична пријава откако со ратрак превезувале туристи на Попова Шапка без дозвола, а ситуацијата ескалирала кога се обиделе да ги спречат вработени од Националниот парк.

Како што информира МВР во дневниот Билтен, 41-годишен скопјанец и 54-годишен жител на тетовското село Брвеница организирале превоз на туристи, иако немале лиценца ниту договор со надлежните.

Кога вработени од паркот се обиделе да ги запрат, наместо да се повлечат – тие упатиле закани.

Ситуацијата дополнително се влошила кога едниот од нив, управувајќи ратрак, се обидел да ги оттурне службените лица, при што со механичката корпа удрил еден од вработените.

По случајот реагирала полицијата, а против двајцата е поднесена кривична пријава за спречување службено лице во вршење должност.

The post ДРАМА НА ПОПОВА ШАПКА Нелегално превезувале туристи, па со ратрак удриле вработен во паркот appeared first on plusinfo.mk.

Oдговорното лице на манастирскиот комплекс „Св. Наум Охридски“ на Попова Шапка во СВР Тетово пријави дека во манастирот затекнал малолетници кои со употреба на сила се обидувале да ја отворат металната каса за доброволни прилози.

– Утврдено е дека станува збор за четворица малолетници од скопско село, кои биле на организирана екскурзија. Тие заедно со нивниот одговорен наставник бea задржани на лице место и се преземаат мерки за целосно расчистување на случајот, велат од МВР.

The post МАЛОЛЕТНИЦИ СЕ ОБИДЕЛЕ ДА ОГРАБАТ МАНАСТИР Фатени се додека обивале каса appeared first on plusinfo.mk.

Aвто-мото сојузот на Македонија (АМСМ) информира дека сообраќајот на државните патишта се одвива во зимски услови, со претежно влажни коловози, а на некои планински делници се регистрирани и задржувања на снег.

Снег се бележи на Попова Шапка, особено на патниот правец од селото Лисец кон Попова Шапка, каде коловозот е навлажнет и со снежна покривка. Намалена видливост поради магла се регистрира на повеќе патни правци: до 80 метри на патот Штип – Неготино кај Серта, до 50 метри во Крушево, до 100 метри на планинскиот премин Стража и до 50 метри кај Маврово.

Интензитетот на сообраќај надвор од градските средини е умерен, додека на граничните премини од македонска страна нема подолги задржувања за влез и излез од државата.

АМСМ апелира до возачите на сите патишта, а особено низ котлините, речните долини и клисурите, да ја прилагодат брзината на условите на патот и да ги почитуваат сообраќајните знаци. Особено внимание се препорачува на делниците Катланово – Велес, Маврово – Дебар – Струга, Виница – Берово и Кочани – Делчево, каде постои ризик од одрони и заснежени коловози.

The post МАГЛА, СНЕГ И ВЛАЖНИ КОЛОВОЗИ Бидете внимателни, АМСМ ги предупредува возачите appeared first on plusinfo.mk.

Во изминатите 24 часа најмногу снег е измерен на Попова Шапка, каде висината на снежната покривка достигна 39 сантиметри, а воедно таму е регистрирана и најниската температура од -3 степени Целзиусови, соопшти Управата за хидрометеоролошки работи.

Според податоците на УХМР, минималните утрински температури на повеќе места низ земјава се движеа околу нулата и под неа. Во Лазарополе, Маврови Анови и Крушево беа измерени 0 степени, додека 2 степени се регистрирани во Радовиш – Пожар и Пожаране. Во Претор, Охрид, Крива Паланка, Ѓуриште и Тополчани минималната температура изнесуваше 3 степени, а во Тетово, Прилеп и Берово 4 степени. Во Битола и Виница се измерени 5 степени, додека во Скопје, Кавадарци, Струмица и Штип 6 степени. Највисоки утрински температури се регистрирани во Гевгелија со 9 степени.

Најмногу врнежи во изминатото деноноќие се измерени во Демир Капија со 14 литри на метар квадратен, по што следуваат Струмица со 13, Охрид со 12 и Берово со 11 литри на метар квадратен. Значителни количини воден талог се регистрирани и во Скопје, Крушево, Претор, Пожаране, Маврови Анови, Штип, Кавадарци и Прилеп.

Според најавите, во наредниот период се очекуваат променливи временски услови со повремени врнежи, а на повисоките места и планините ќе продолжат снежните врнежи.

The post НА ПОПОВА ШАПКА 39 САНТИМЕТРИ СНЕГ Се очекува снежните врнежи на планините да продолжат appeared first on plusinfo.mk.

Сообраќајот на државните патишта се одвива во зимски услови, по наместа влажни коловози. Намалена видливост поради појава на магла до 100 метри има на патниот правец Тетово – Скопје, од 30 до 40 метри на патниот правец Тетово – Попова Шапка и до 50 метри на планинските превои Буково и Ѓавато, соопшти ЈП Македонијапат.

Сите патни правци се проодни. На одредени патни правци кои поминуваат низ усеци и клисури можна е појава на поситни одрони.

ЈП Македонијапат апелира на внимателно управување со возилата, почитување на поставената сообраќајна сигнализација, како и прилагодување на брзината спрема условите на патот.

The post МАГЛА МЕЃУ ТЕТОВО И СКОПЈЕ, НА ПОПОВА ШАПКА, БУКОВО, ЃАВАТО… Се препорачува внимателно возење appeared first on plusinfo.mk.

Шпекулантско базично новинарство, базирано на еуфорија и сензационализам во корелација со несовесни лица од новопечениот Национален парк ги нарушуваат децениските туристички релации на Попова Шапка, каде фирмата која макотрпно управува со фрирајд операциите на Шар Планина речиси 20 години опслужува повеќе од 1.500 странски скијачи секоја сезона.

Скијањето со ратрак е изолиран и супер специјализиран туристички производ далеку од очите на македонската јавност, но сепак на видното поле на туристичките работници и најважно светската скијачка сцена долги години наназад, реагира СкиМакедонија во напис.

Поминале бројни патеписци и продуценти од познати и непознати медуми, угледни и авторитетни специјализрани травел магазини. Скијачки великани од Северна Америка, Западна Европа и Скандинавија.

Направена е невидена афирмација на Македонија и Шар Планина деценија наназад преку бројни насмeани лица, задоволни странски авантуристи скијачи, дипломати, амбасадори и македонски домашни гости.

Повеќето туристички капацитети односно хотели како и многу локално население директно и индиректно живеат токму од овој оператор и тие гости.

И сега наеднаш имаме некоја нова ултра бирократска институција каде наеднаш под превезот на екологија, биодиверзитет им смета се или сакаат да маваат таму каде што навидум некој може да трпи ќотек. Паралелно дозволувајќи загадување , сеча , градење диви објекти насекаде низ планината.

Во однос на најважната медиумска драма што се случи утринава каде операторот беше спречен заедно со странските гости да излезе на терен важно е да се напомене, не е точно дека полицијата интервенирала поради загрозување на безбедноста од страна на операторот, објави СкиМакедонија.

Напротив, полицијата беше повикана по дојава на самиот оператор, поради незаконско и присилно постапување на терен, по што ренџерите беа отстранети од местото на настанот, а не обратно.

Ваквото известување свесно или несвесно, а ите како непрофесионално извртување на фактите се создава лажна слика во јавноста, се нарушува угледот пред се на државата, дестинација Попова Шапка, потоа операторите, хотелите и индивидуалци со сериозни репутациски и финансиски последици.

Спротивно на изнесеното во објавите по медиуми, операторот постапувал согласно доставениот допис од Национален парк Шар Планина и нивниот официјален тарифник, врз основа на кој, по барање на самата установа, е извршена авансна уплата во износ од 5.000 евра, со образложение дека установата е самофинансирана и нема друг редовен прилив на средства.

И покрај ова, ратраците беа физички спречени да движат, без претходно навремено писмено решение, без формална забрана и без спроведување на соодветна законска постапка на лице место, што претставува пречекорување на овластувањата, а не законско постапување.

„Во овој контекст, основано сметаме дека станува збор за сплет на интереси помеѓу поединци вработени во установата Национален парк Шар Планина, како и за обид за саботажа и уништување на веќе воспоставен туристички производ, наместо за транспарентно и законско управување со заштитеното подрачје.

Логично се наметнува прашањето: зошто институција чија основна улога е развој и унапредување на одржливиот туризам во Националниот парк, игнорира препораки и настојува да спречи и уништи веќе постоечки, светски познат туристички продукт, наместо да го регулира и унапреди особено што се игнорираат многу барања од операторот кој наложува високи стандарди на работење?!

Остануваме цврсто определени за почитување на законите, заштита на природата и развој на одржлив туризам, но истовремено инсистираме на законско, транспарентно и непристрасно постапување, без селективност и без влијание на поединечни интереси”, вели операторот.

The post ПОЛИЦИЈАТА ГИ ОТСТРАНИЛА РЕНЏЕРИТЕ, А НЕ РАТРАЦИТЕ НА ПОПОВА ШАПКА Кому му пречат фрирајд скијачите? appeared first on plusinfo.mk.

Со автобуси на општинското претпријатие за јавен превоз „Тетово Транспорт“ од сабота повторно почнува превоз на релација Тетово – Попова Шапка и назад.

Граѓаните ќе имаат можност да користат два термини за поаѓање од Тетово кон Попова Шапка во 08:00 и од 10:00 часот и исто толку за враќање во 14:45 и во 16:00 часот. Повратен билет ќе чини 200 денари.

-Од сабота (17 јануари) ќе биде пуштена во употреба автобуската линија Тетово – Попова Шапка и обратно. Оваа линија ќе функционира само за време на викендите. Ги повикуваме сите граѓани да го користат јавниот превоз и да придонесат кон намалување на сообраќајниот метеж и заштита на животната средина, соопшти Општина Тетово.

За разлика од минатата скијачка сезона, односно од јануари 2025 кога имаше четири линии за патување кон скијачкиот центар сега има само две. Претходната ски сезона автобусите тргнувааа од 08:00, 10:00, 12:00 и 15:30 часот, а во градот се враќаа еден час подоцна од овие термини.

The post ОПШТИНА ТЕТОВО ВОВЕДУВА АВТОБУСИ ДО ПОПОВА ШАПКА Еве во кои термини ќе сообраќаат appeared first on plusinfo.mk.

Сообраќајниот метеж и блокадите што со години се повторуваат во зимските туристички центри Маврово и Попова Шапка, годинава треба да се спречат со засилени полициски мерки и поинаков режим на движење. Од СВР Тетово информираат дека и оваа сезона се применува кружен тек на сообраќај, со цел да се избегнат застои и целосно блокирање на патиштата.

Сепак, најголем проблем и понатаму се несовесните возачи кои не ги почитуваат правилата, како и возилата паркирани покрај коловозот. Токму таквото паркирање, велат од полицијата, го оневозможува чистењето на снегот и на одредени делници кон Маврово и целосно го укинува двонасочниот сообраќај.

Пред почетокот на зимската сезона, СВР Тетово одржала повеќе средби со сопственици и менаџери на хотели и угостителски објекти во Маврово и на Попова Шапка. На нив им било укажано да преземат мерки за безбедноста на гостите, но и да обезбедат доволен број паркинг места за посетителите, за да се избегне хаосот на патиштата.

Од полицијата потсетуваат дека во минатите години честопати биле принудени дополнително да ангажираат полициски службеници од други подрачја, кои рачно го регулирале сообраќајот и ги расчистувале блокадите. За да не се повтори тоа сценарио, граѓаните се повикуваат строго да ги почитуваат сообраќајните правила, да не паркираат на коловоз и да не тргнуваат кон планинските центри без задолжителна зимска опрема.

Во случај возилата да го попречуваат сообраќајот, ќе бидат ангажирани и пајак-службите од Тетово и Гостивар, а прекршителите ќе бидат санкционирани согласно законот.

Од СВР Тетово порачуваат дека само со одговорно однесување може да се обезбеди безбедно и непречено движење за сите посетители на зимските туристички центри.

The post 📽️ 📷 СТРОГ РЕЖИМ ВО МАВРОВО И НА ПОПОВА ШАПКА Кружен сообраќај и казни за несовесни возачи appeared first on plusinfo.mk.

Со снежните врнежи кои пристигнаа во нашата земја, започна ски сезоната скоро насекаде. Според најавите на Ски центарот Маврово, благодарение на снегот од денеска, 13 јануари, почнува ски сеозната и таму.

The post „СЕ ГЛЕДАМЕ НА СТАЗИТЕ“ Ски центарот Маврово од денеска достапен за скијачите appeared first on plusinfo.mk.

Ски Центарот Попова Шапка официјално ја отвора зимската сезона 2026 утре, во недела, на 11 јануари, со подготвени патеки, доволно снег и ски-лифтови кои ќе бидат во функција од раните утрински часови.

Од Ски Центар Попова Шапка информираат дека сите љубители на снегот и зимските спортови ќе можат да уживаат во новата сезона, при што ски-лифтовите ќе работат во периодот од 08:45 до 15:00 часот.

– Снегот е подготвен, патеките ве очекуваат и адреналинот започнува. Подгответе ја опремата и започнете со нас сезона полна со забава, спорт и незаборавни моменти – порачуваат од Ски Центарот.

Од управата дополнуваат дека сите посетители кои сè уште не обезбедиле сезонски билет, ќе имаат можност да го купат директно на билетарата на Попова Шапка.

Попова Шапка и оваа година останува една од најатрактивните зимски дестинации во земјава, подготвена да ги пречека скијачите, бордерите и сите љубители на планинската авантура.

The post СНЕГОТ Е ПОДГОТВЕН, АДРЕНАЛИНОТ РАСТЕ Утре стартува новата ски-сезона на Попова Шапка appeared first on plusinfo.mk.