Надојдената вода од реката Тркања вчера попладне однесе 120 јагниња и 100 овци од шталата на Никола Колев во селото Костурино, лоцирана на местото „Шепово“.

Според сопственикот, сѐ се случило за помалку од 10 минути, а надојдената вода влечела сѐ пред себе.

– Од брзата и надојдена вода, која достигна над два метра, не успеавме да ја отвориме шталата и да ги извадиме јагнињата и овците. Штетата е голема. Во еден момент постоеше опасност и нас да нѐ повлече водата, мене и брат ми Никола, но успеавме да се спасиме – раскажува Зоран Колев.

Тој денеска ја пријавил штетата во Општина Струмица, а загинувањето на јагнињата и овците го пријавил и кај другите надлежни служби, кои треба да излезат на терен и да ја утврдат висината на штетата.

The post НАДОЈДЕНАТА РЕКА ОДНЕСЕ 120 ЈАГНИЊА И 100 ОВЦИ Голема штета во штала во Струмичко appeared first on plusinfo.mk.

Обилните врнежи во Струмичко засега не предизвикуваат поголеми проблеми, единствено е забележано поплавување на дел од земјоделските површини и неколку дворови во селата Муртино и Сачево, информираа утрово од Регионалниот Центар за управување со кризи во Струмица.

Според информацијата оттаму, нивото на водите во реките се стабилизира, посебно на реката Тркања кој вчера преливаше пред влезот во Струмица, а екипи на ЈП „Плаваја“ од Радовиш работат на мостот на истоимената река меѓу селата Јаргулица и Покрајчево каде се регулира одвивањето на сообраќајот.

Во Валандово е излеана Калковска река преку регионалниот пат Валандово-Удово, но со интервенција на механизацијата се санира излевањето.

– Ангажирана е механизација на комуналните претпријатија за санирање на критичните места, а таму каде што е потребно се поставува и песок – информираа од Регионалниот ЦУК во Струмица.

Синоќа градоначалникот на Струмица, Петар Јанков, информираше преку својот профил на Фејсбук дека ги посетил критичните места во селото Муртино, а од вчера механизацијата на ЈПКД „Комуналец“ е на терен. Ангажирана е дополнителна механизација од приватниот сектор. Тој информираше дека вчера околу 17 часот состојбата е стабилизирана, а во текот на ноќта екипи останале на терен за следење на состојбата.

Според градоначалникот на Босилово, Ристо Манчев, во текот на вчерашниот ден и синоќа постоела опасност од излевање на реката Водочница кај Моноспитовскиот мост, но со брза реакција било спречено поплавување на селото Моноспитово.

Според утринските мерења на УХМР досега во Струмица наврнале околу 20 литри дожд на еден метар квадратен.

The post ПОПЛАВЕНИ НИВИ И ДВОРОВИ ВО МУРТИНО Во Валандово е излеана Калковска река appeared first on plusinfo.mk.