На патниот правец Тетово – Бањиче, пред ресторанот „Лумаре“, има падната голема карпа на коловозот со опасност од дополнителни одрони, соопшти Центарот за управување со кризи (ЦУК) и додаде дека се преземаат мерки за расчистување.

ЦУК извести за состојбата во земјава до 18.30 часот по обилните врнежи.

Најавено е расчистување и кај каменоломот на патниот правец Гостивар – Маврово, каде е евидентиран одрон.

Во ридско-планинскиот дел се интервенира со два камиона на патните правци Кавадарци – Мушов Гроб – Мрежичко, Мушов Гроб – Михајлово и Страгово – Горна Бошава. Сите патишта се проодни во зимски услови. Висината на снежната покривка е до 15 см.

Патот од селото Пелинце до граничниот премин Пелинце беше подмрзнат и небезбеден, по што е извршена интервенција и патот е расчистен.

Интервенирано е на патот кон манастирот „Св. Јоаким Осоговски“ поради одрон.

Патот од селото Пклиште до селото Герман е затрупан со снег и е испратена механизација за расчистување. Делницата е со кашаст снег и со отежнато движење.

На патните правци Истибања – Делчево – граничен премин, Виница – Берово и Штип – Неготино има помали одрони кои редовно се расчистуваат.

Реката Сушица е ставена под контрола со насип. Сè уште има поплавени подруми и дворови на повеќе локации во Охрид.

Во селата Мислешево и Калишта во Струшко има поплавени дворови. Санирањето е отежнато поради непречено истекување на водата.

Реката Радика во Дебар има зголемен водостој без опасност од излевање. Има помали одрони на патните правци Жировница – Дебар и Дебар – Струга, кои редовно се расчистуваат.

Водостоите на Зајашка река и Треска во Кичево се намалени и нема опасност од нови поплави. Во тек е состанок на општинскиот кризен штаб за проценка на штети и планирање на санација.

Поради оштетување на мостот на Боишка Река, локалниот пат кон селото Мренога е затворен за сообраќај.

Состојбата во градското подрачје е нормализирана. Во околните места водата се повлекува од поплавените површини.

Во Крушево сите локални и регионални патни правци се исчистени, посолени и проодни.

Во Ресен се поплавени земјоделски површини, но водата се повлекува. Во тек е интервенција со градежна механизација за расчистување на коритото на Голема Река.

Нивото на река Црна во Новаци изнесува 320 см и се следи континуирано.

The post ГОЛЕМА КАРПА ПАДНАТА НА ПАТОТ ТЕТОВО – БАЊИЧЕ Одрони, поплави, надојдени реки низ целата земја appeared first on plusinfo.mk.

Центарот за управување со кризи информира за за состојбата во Македонија со обилните врнежи од дожд.

– Во Општина Кочани е забележан значително зголемен водостој на реките и на каналите во полскиот дел. Кочанска Река има локално излевање кај селото Горни Подлог, каде интервенира КЈП „Водовод“ Кочани со механизација. Зрновска Река се излеа пред вливот во реката Брегалница. Оризарска Река се излеа кај селото Грдовци, каде состојбата е најкритична. Поплавени се неколку подрумски простории на куќи во близина на реката. Водостопанство „Брегалница“ интервенира со тешка механизација, а МВР го забрани сообраќајот за моторни возила на северниот влез во селото – информира ЦУК.

Злетовска Река и Брегалница имаат зголемен водостој, но засега нема излевање.
Водостоите во горните текови се стабилизираат и имаат тенденција на опаѓање, додека во средните и долните текови состојбата останува критична.

– На патниот правец Македонска Каменица-рудник САСА, поради одрон сообраќајот се одвива по една коловозна лента во должина од околу 200 метри. Во Пробиштип, поради излевање на реката Киселица на патниот правец меѓу селата Неокази и Петришино, сообраќајот е отежнат – соопшти ЦУК.

Во Охрид е одржан состанок на Кризниот штаб, со одлука да се стават на располагање сите човечки и материјални ресурси.

– Населбата Далјан е поплавена поради излевање на реката Далја. Екипи со тешка механизација ја пренасочуваат водата кон езерото, а со пумпи се врши испумпување од подруми, дворови и деловни простории. Преку бројот 112 се примени поголем број пријави од оваа локација.
Проблеми се евидентирани и на Коселска Река кај селото Ливоишта, каде надојдената вода го подјадува патот кај мостот кон селото Вапила. Надлежните институции се известени – велат од ЦУК.

Во Кичево, водостојот на реките се намалува, но на одредени локации состојбата сè уште е критична. Околу 120 лица од улицата Прилепска и натаму се евакуирани и сместени во спортската сала „Христо Узунов“. Во текот на утрешниот ден ќе се изврши увид на оштетените објекти.

– Во Битолско, градското подрачје е нормализирано, освен во населбата Стрчин, каде има наноси од земја и чакал. Во селата Кравари, Жабени и Породин поплавени се земјоделски површини, но нема опасност по станбени објекти. Регионалните и магистралните патишта се проодни, со повремени наноси кои се расчистуваат. Сите јавни претпријатија и надлежни служби интервенираат со механизација и човечки ресурси – информира ЦУК.

Во Ресен, како последица на врнежите, поплавени се земјоделски површини, дворови и помошни објекти во повеќе села. Ангажирани се екипи со пумпи и механизација, а водостоите постепено се намалуваат.

– Во Крушево и во Демир Хисар има локални излевања на реките Црна и Обедничица, со поплавени дворови, земјоделски површини и локални патишта. Дел од патната инфраструктура е оштетена, а општинските штабови се во постојана координација и интервенираат на критичните точки – додава ЦУК.

Во Тетовско се пријавени свлечишта на локалните патишта кон селото Ѓермо и месноста Бањиче, кои моментно се непроодни. Општината интервенира со механизација. Во Мала Речица е пријавено уривање на потпорен ѕид, при што е предизвикана материјална штета. Случајот го обработуваат надлежните служби. Во општина Желино, пријавено е излевање на реката Вардар во селото Стримница, каде е испратена механизација од ЈКП.

Во Скопскиот и во Кумановскиот регион нема излевање на реките.

The post СЕ ИЗЛЕАЈА РЕКИТЕ КОЧАНСКА, ЗРНОВСКА, ОРИЗАРСКА, ЦРНА, КИСЕЛИЦА, ОБЕДИЧНИЦА… Одрони во Тетовско по обилните врнежи appeared first on plusinfo.mk.