Министерството за надворешни работи информираше дека има државјани од Северна Македонија во погодените подрачја во Турција, кои се наоѓаат на безбедни локации и меѓу кои нема жртви и повредени.

Почесниот конзулат, според информацијата од МНР, има подготвено планови за сместување, брза медицинска помош и поддршка со храна и пијалаци за наши државјани, доколку за тоа се појави потреба.

Владата го задолжи МНР, преку дипломатско конзуларните претставништва на Република Северна Македонија во Република Турција (Анкара и Истанбул), да ги координира активностите за евакуација на државјаните на Република Северна Македонија од погодените подрачја.

Владата, на предлог на Министерството за надворешни работи, на денешната 126 седница, донесе неколку заклучоци.

Се задолжува Министерството за финансии да подготви и до Владата да достави одлука за одобрување на средства од резервите на Буџетот на Република Северна Македонија за 2023 година, во износ од 6 милиони денари за помош на настраданите во катастрофалниот земјотрес.

Се задолжуваат Дирекцијата за заштита и спасување и Центарот за управување со кризи, во координација со министерот за внатрешни работи Оливер Спасовски, итно да подготват и до Владата да достават соодветна одлука за испраќање на сили/тимови за заштита и спасување, коишто ќе се вклучат во погодените подрачја, како и одлука за испраќање хуманитарна помош за заштита и спасување во Република Турција.

Се задолжува Министерството за одбрана во рамките на своите надлежности итно да подготви и до Владата да достави одлука за обезбедување соодветна помош во персонал, опрема во вид на механизација, шатори, душеци, ќебиња, грејни тела и друг вид соодветна помош.

Се задолжува Министерството за здравство, во рамките на своите надлежности, итно да подготви и до Владата да достави одлука за обезбедување помош во вид на медицински персонал, медицинска опрема и лекови.

Се препорачува, Црвениот крст на Република Северна Македонија во рамките на своите законски надлежности и можности, во соработка со надлежните институции, да се вклучи во акцијата за обезбедување помош на настраданите, со испраќање тимови и друг вид хуманитарна помош, соодветна за вакви природни катастрофи.

Владата го задолжи Генералниот секретаријат на Владата во соработка со МНР, да преземе активности во насока на итно префрlување на одобрените средства од Буџетот, како и да одржува редовна комуникација со Амбасадата на Република Турција во Република Северна Македонија, со цел спроведување на одлуката.

Владата, на предлог на Дирекцијата за заштита и спасување, донесе одлука во санирањето на последиците од земјотресот во Турција да се испратат 40 лица од Дирекцијата за заштита и спасување – припадници на републичките сили за заштита и спасување.

Од Дирекција за заштита и спасување се обезбедува и комплетна специјализирана опрема и материјално – текхнички средства за пребарување и спасување од урнатини, шест возила за транспорт на опремата и луѓето и две противпожарни возила.

Финансиските трошоци за оваа намена ќе се обезбедат од средства на Дирекцијата за заштита и спасување.

Владата, на предлог на Министерството за одбрана, донесе одлука за испраќање хуманитарна помош за заштита и спасување во Република Турција и тоа 10.000 ќебиња и 200 санитетски носила.

Владата, исто така на предлог на Министерството за одбрана, донесе одлука за испраќање тим за заштита и спасување од Министерството за одбрана во Република Турција, за учество во давање помош на Република Турција.

Во санирањето на последиците од земјотрес, се испраќаат вкупно 24 лица припадници на Министерството за одбрана – Армија на Република Северна Македонија, од кои 22 лица од Баталјонот за специјални сили и две лица водачи на службени кучиња, со две кучиња, од Командата за обука и доктрини на Министерството за одбрана.

Финансиските трошоци за оваа намена ќе се обезбедат од сопствените средства на Министерството на одбрана, се наведува во соопштението од владината прес-служба.

The post ВЛАДАТА ОПРЕДЕЛИ ПРВИЧНА ПОМОШ ЗА НАСТРАДАНИТЕ 6 милиони денари, 40 спасувачи, 24 војници, 10.000 ќебиња и 200 санитетски носила appeared first on plusinfo.mk.

Македонија се мобилизира да им помогне на настраданите во силниот катастрофален земјотрес од што ги погоди Турција и Сирија и предизвика големи материјални штети, повредени и човечки загуби.

Црвениот крст на Република Северна Македонија е во комуникација со Турската Црвена полумесечина и со Сириската арапска црвена полумесечина, на кои веднаш им е понудена првична помош.

Сите заинтересирани правни субјекти и граѓани можат да донираат парична помош на:

• Сметката на Фондот на солидарноста на Црвениот крст на РСМ: 300000001327966, даночен број: 4030984271620 АД Комерцијална банка со назнака: помош за населението во Турција и Сирија.
• како и да се донираат 100 денари со повик на телефонските броеви 143 400 на Македонски Телеком и А1.
• За донации на средства во странска валута:
  NAME OF THE ORGANIZATION: RED CROSS OF THE REPUBLIC OF NORTH MACEDONIAN
  BANK NAME: KOMERCIJALNA BANKA AD SKOPJE
  BANK ADDRESS: UL. ORCE NIKOLOV NO.3, 1000 SKOPJE, MACEDONIA
  BANK ACCOUNT: 300000000000133 25730522-11
  SWIFT CODE: KOBSMK2X
  IBAN CODE: MK07300701000001228

Претседателот на Заедницата на единиците на локална самоуправа (ЗЕЛС), Орце Ѓорѓиевски, апелираше и ги повика градоначалниците од сите општини ширум земјава, во рамки на финансиските можности на општините, да донираат за погодените од разорните земјотреси кои денеска ги погодија Турција и Сирија.

Во меѓувреме и претседателот на Советот на Град Скопје, Трајко Славески, соопшти дека на 8 февруари (среда) ќе се одржи итна вонредна седница на Советот, на која ќе се носи одлука за помош на настраданите. Во Град Скопје, за жал, дури и предлозите за помош на настраданите беа повод да се разгорат препирките меѓу политичките партии и градоначалничката Данела Арсовска. Од градската власт сепак се очекува да донесе одлука за помош од околу 100.000 евра.

Осум пожарникари од Општина Струмица, припадници на тимот за пребарување и спасување од урнатини, ќе заминат во спасувачка мисија во Турција, со надеж и уверување дека ќе им помогнат на настраданите во земјотресот.

По првичната најава на претседателот Стево Пендаровски за помош од Македонија, министерката за одбрана, Славјанка Петровска, на нејзиниот Фејсбук профил изрази сочувство и објави дека „македонската Армија е подготвена да даде секаква поддршка за да помогнеме во напорите со справување со последиците од оваа страшна катастрофа и спасување на колку може повеќе човечки животи“.

По веста за земјотресот, студенти од Турција кои студираат во  Скопје поставија шатор на плоштадот Македонија, каде што собираат материјална помош за преживеаните од земјотресот. Како што велат тие, граѓаните можат да донираат облека, вода или храна, кои потоа ќе ги испратат во Турција.

The post МАКЕДОНИЈА СЕ МОБИЛИЗИРА Не чекајте политичарите да се организираат, еве како може секој од нас да помогне! appeared first on plusinfo.mk.

Спасувачи од руското Министерство за вонредни ситуации со авуони „Иљушин-76“ најверојатно веќе се на пат за Сирија и за Турција. Претседателот Владимир Путин во текот на денот телефонски разговараше со сирискиот претседател Башар ал-Асад и со турскиот колега Таип Ердоган и изрази сочувство за смртта и уништувањата од земјотресот, чија јачина на ударот беше 7,8 степени според Рихтеровата скала, и е најлошиот земјотрес што ја погодил Турција во овој век. И турскиот претседател срдечно му се заблагодарил на Путин за неговата брза и искрена реакција и рекол дека дава инструкции до надлежните органи во земјата да ја прифатат помошта од руските спасувачи.

Рускиот министер за одбрана Сергеј Шојгу им нареди на руските сили во Сирија да помогнат во спасувачките напори. Министерството за одбрана соопшти дека 300 руски војници и 60 возила веќе помагаат во расчистувањето на урнатините во погодените подрачја во близина на турската граница.  Русија има поморска база во Тартус, на сирискиот брег, и управува со воздухопловната база Хамејм, северно од Тартус.

Американскиот претседател Џо Бајден изјави денеска дека неговата администрација тесно соработува со официјална Анкара, за да може Вашингтон најитно и најефикасно да одговори на последиците од разорниот земјотрес. Бајден изјави дека американските тимови брзо се распоредуваат за да започнат со поддршка на турските напори за пребарување и спасување.

„Тимовите на терен мора итно да ги решат потребите на повредените и раселените по земјотресот“, вели американскиот претседател во соопштение објавено од Белата куќа.

ЕУ најавува дека ќе формира и во Турција испрати тимови за пребарување и спасување, а воедно на располагање ќе ги стави и услугите на сателитскиот систем Коперник.

Претходно, шефот на европската дипломатија, Жозеп Борел и еврокомесарот за управување со кризи, Јанез Ленарчич, изјавија дека ЕУ е подготвена да им помогне и на погодените во Сирија преку своите програми за хуманитарна помош.

The post РУСИЈА, САД И ЕУ БРЗААТ ДА ИМ ПОМОГНАТ НА ТУРЦИЈА И НА СИРИЈА ПО ЗЕМЈОТРЕСОТ Путин и Бајден на нога, Брисел се координира appeared first on plusinfo.mk.