Премиерот Христијан Мицкоски информираше дека Владата продолжува со реализација на реформската агенда и покрај, како што вели, наметнатиот билатерален спор кој го усложнува европскиот пат на државата.

Преку објава на својот фејсбук-профил, Мицкоски соопшти дека попладнево одржал работен состанок со својот владин тим, на кој фокусот бил ставен на реформите и исполнувањето на критериумите на Европската Унија.

„Борбата за критериумите на ЕУ продолжува и покрај наметнатиот билатерален спор. Силно сме фокусирани кон стандарди за подобар живот на граѓаните. Таа борба продолжува“, напиша премиерот.

Мицкоски порача дека Владата останува посветена на европските стандарди и реформите кои, според него, директно треба да резултираат со подобрување на квалитетот на живот на граѓаните, без разлика на политичките и дипломатските предизвици со кои се соочува државата.

The post РЕФОРМСКА АГЕНДА И ПОКРАЈ ПОЛИТИЧКИТЕ ПРИТИСОЦИ Премиерот Мицкоски уверува дека Владата не отстапува appeared first on plusinfo.mk.

Владејачката партија ВМРО-ДПМНЕ го промовира „Ново поглавје – Стратегија Македонија 2030“, документ кој според партијата треба да отвори деценија на стабилност, економски развој и модернизација на државата. Стратегијата, усвоена на 18-иот конгрес, содржи шест стожери преку кои партијата најавува дека Македонија до 2030 ќе стане „стабилна, силна и институционално зрела држава“.

Од партијата велат дека новиот документ ја поставува рамката за долгорочно управување и напуштање на „импровизациите“ во политичкиот систем.

„Ова е стратегија што ја гледа Македонија во иднината, а не од денес до утре. Со неа градиме држава која не реагира во криза – туку планира и води“, соопштија од ВМРО-ДПМНЕ.

Партијата најавува силен фокус на државната безбедност. Според документот, Македонија ќе треба да изгради модерна армија, национален систем за сајбер-заштита и подготвеност за справување со хибридни закани.

„Безбедноста е темел на секоја стабилна држава. Македонија мора да биде заштитена и од физички закани, и од дигитални“, велат од партијата.

Втор стожер е економската конкурентност, префрлање од модел на евтина работна сила кон економија заснована на технологија, иновации и знаење. Стратегијата предвидува поддршка за домашните компании, стабилен даночен систем и зелена енергетска транзиција.

Правната држава е третата точка: независно судство, департизирана администрација и системска борба против корупцијата, особено преку дигитализација.

„Корупцијата ја кочи државата. Ќе се бориме со систем, не со изолирани акции“, велат од ВМРО-ДПМНЕ.

Документот воведува и демографски политики, поддршка за младите, станбени програми, поврат на дијаспората и подобра грижа за постарите лица.

Во делот за надворешна политика, стратегијата поставува рамка на „партнерства со јасни црвени линии“.

„Нашата позиција е јасна: да за Европа, но без условувања кои задираат во идентитетот“, нагласуваат од партијата.

Шестиот стожер – образование, култура и идентитет, предвидува инвестиции во модерни наставни програми, дигитални кампуси, поддршка за науката и заштита на македонскиот јазик и културно наследство.

Стратегијата, според партијата, е „нова страница во развојот на државата“.

„Македонија знае, може и мора многу повеќе. Ова е државничка визија за силна и европска Македонија“, порачуваат од ВМРО-ДПМНЕ.

The post БЕЗБЕДНОСТ, ЕКОНОМИЈА И ЕВРОПА БЕЗ УСЛОВУВАЊА Власта со амбициозен план до 2030 година appeared first on plusinfo.mk.

Поранешниот министер за правда и висок функционер на Алијанса за Албанците, Кренар Лога, објави дека се повлекува од партискиот живот и од сите позиции што ги извршувал во партијата. Одлуката ја соопшти преку неговиот официјален Фејсбук профил, наведувајќи дека се работи за „тежок, но зрел чекор“.

Лога изјави дека на одлуката ѝ претходела „долга анализа и рефлексија“, додавајќи дека партиската работа во последната деценија ја вршел со максимална посветеност.

– Ова не е лесна одлука за мене затоа што во текот на целиот пат ја вложив својата енергија, срце и душа, па дури и повеќе од тоа. Запознав искрени луѓе, верни соработници и пријатели со кои поминавме битки што оставија трага врз сите нас – порача Лога.

Во објавата, Лога се осврна и на критиките и судирите што ги имал низ годините, истакнувајќи дека секогаш ги изнесувал своите ставови без калкулации.

– Доколку некој се почувствувал повреден од мојот збор или однесување, искрено се извинувам. Но секогаш сум ја кажувал вистината, дури и кога тоа не беше популарно – вели тој.

Како генерален секретар, а потоа и потпретседател на Алијанса за Албанците, Лога ја нагласи благодарноста кон членовите, активистите и гласачите кои му ја дале довербата во изминатите години.

Посебно се осврна на неговото семејно и политичко наследство, нагласувајќи дека е израснат во средина која се борела против неправдите на југословенскиот режим.

– Воспитан сум со духот на национална преродба и патриотизам, дух кој секогаш ќе ме поддржува, без оглед на тоа што ќе ми го понуди животот – истакна Лога.

На крајот од пораката, тој им порача на граѓаните дека иако се повлекува од партиската структура, ќе продолжи да делува, но како независен глас.

– Ќе останам меѓу вас, но како солист, можеби потешко, но со слободен дух и љубов кон луѓето – вели Лога.

The post „ДА, ДАДОВ СЀ ОД СЕБЕ, ВРЕМЕ Е ЗА НОВ ПОЧЕТОК“ Лога се повлекува од политиката и ја напушта Алијансата appeared first on plusinfo.mk.

Владејачката ВМРО-ДПМНЕ вечерва го претстави својот натпартиски кандидат за градоначалник на Кочани – доктор Влатко Грозданов. Од партијата порачаа дека со оваа одлука испраќаат јасна порака дека интересот на граѓаните е над партиските разлики.

– Во Кочани, ВМРО-ДПМНЕ ќе застане зад натпартискиот кандидат д-р. Влатко Грозданов – изјави Марија Митева, член на Извршниот комитет на партијата, нагласувајќи дека тој претставува личност со интегритет и доверба кај жителите на градот.

Покрај оваа одлука, ВМРО-ДПМНЕ ги објави и останатите кандидати: Бети Стаменкоска Трајкоска за Кисела Вода, Мирослав Славковски за Старо Нагоричане, Илија Тентов за Дојран, Сашко Велјановски за Долнени и Даниел Павловски за Ранковци.

Од партијата велат дека се убедени оти со оваа кадровска структура ќе понудат квалитет и решенија за локалните заедници.

– Кандидатите за градоначалници убедливо водеа на сите внатрепартиски анкети и анализи. Сите кандидати на ВМРО-ДПМНЕ се посветени личности, подготвени да ги застапуваат интересите на секој жител, во секое населено место. Тие се луѓе кои имаат енергија и решителност да работат за подобро утре на граѓаните, сите се посветени и дополнително ќе бидат ангажирани за развој на општините и државата воопшто – рече Митева.

Сите тие ќе работат во насока на стабилни и силни општини, а воедно и за стабилна и силна држава.

– ВМРО-ДПМНЕ секој ден покажува дека работи за доброто на секој граѓанин, на секое населено место и на државата воопшто. Ги повикуваме граѓаните да ја поддржат визијата на ВМРО-ДПМНЕ, да изградиме подобра и поквалитетна иднина за сите – додаде Митева.

The post ВМРО-ДПМНЕ СО НАТПАРТИСКИ КАНДИДАТ ВО КОЧАНИ Соопштени имињата и за Кисела Вода, Дојран, Старо Нагоричане, Долнени и за Ранковци appeared first on plusinfo.mk.