Ставот на оваа Влада во врска со уставните измени е јасен и непроменет, рече денеска премиерот, Христијан Мицкоски и додаде дека се надева дека дијалогот со Бугарија на крајот ќе вроди со плод.

– Што се однесува до уставните измени, нашиот став како Влада е јасен и тој е непроменет. За жал, поради експозициите и антидржавната политика на претходната влада на СДСМ и Демократската унија за интеграција, ние сега имаме политички услов, а тоа се уставните измени, иако многупати во тоа време како опозиција предупредувавме да не влегуваат во такви авантури. За жал, тоа не го послушаа и сега ние можеби сме единствениот пример во кој, покрај оние суштински реформи што треба да ги спроведеме, имаме и политички услови. Но, тоа е што е, ние го водиме дијалогот со нашиот источен сосед. Се надевам дека тој дијалог на крајот ќе вроди со плод и ќе можеме да зборуваме за процес што, конечно, 21 година по стекнувањето кандидатски статус и 26 години по потпишувањето на договорот за стабилизација и асоцијација, ќе можеме да почнеме со процесот на преговори – рече Мицкоски, кој денеска беше на настан во Пирава.

Евроамбасадорот Михалис Рокас, вчера на прес-конференција потврди дека имаме значителен напредок во реформите оваа година, а премиерот Мицкоски посочи дека во извештајниот период не се ставени реформите што ги имаме завршено до 31 август. Неговите очекувања се дека в година ќе имаме уште подобар извештај и дека уште еднаш ќе се потврди дека имаме реформска Влада.

– Амбасадорот вчера на прес-конференцијата рече дека во суштина, во споредба со минатогодишниот извештај, имаме значителен напредок оваа година. Но, важно е да се каже дека извештајниот период не ги опфаќа оние реформи што веќе се направени во меѓувреме и ќе се направат до крајот на годината, особено кога станува збор за борбата со корупција и владеењето на правото, бидејќи извештајниот период завршува до 31 август. А во процесот на реформската агенда ние направивме многу реформи, кои исто така се дел од она што е важно и што претставува дел од овие извештаи на самата Европска Унија. Така што, очекувам в година да имаме уште посилен извештај, со што ќе се потврдат напорите и амбициите на оваа Влада да биде реформска влада – рече Мицкоски.

The post НЕМА ПРОМЕНИ ВО СТАВОТ ЗА УСТАВНИТЕ ИЗМЕНИ Само Македонија има политички услов во ЕУ поради антридржавната политика на претходната влада appeared first on plusinfo.mk.