Левица не е поканета, ниту ќе биде поканета во Фронтот на вистина и правда, одговори СДСМ и дададе дека таму нема место „за ВМРО сателити“.

„Не сте поканети, ниту ќе ве поканиме. Фронтот на вистина и правда не е за приврзоци на ВМРО и сателити од типот на ЗНАМ и Левица – ЗНАМ верзија 2.0. Знаеме дека ве ангажира Мицкоски сега кога се распадна ЗНАМ и нивниот предводник, бугарскиот стопанственик Максим Димитриевски“, се наведува во соопштението од СДСМ.

Оттаму велат дека Левица е партија направена и финансирана од Мицкоски „за ништо – да глуми опозиција и да го напаѓа СДСМ кога е потребно.“

Пратеникот Амар Мециновиќ од Левица вчера изјави дека партијата нема да биде дел од фронтот на опозицискиот СДСМ за вистина и правда со кој опозициски партии, невладини орагнизации и групи граѓани ќе се борат против корупцијата. Мециновиќ смета дека СДСМ нема кредибилитет да повикува на некакво обединување, бидејќи, како што рече, има корумпирано и компромитирано раководство.

The post СДСМ НЕ ЈА ПОКАНИЛ ЛЕВИЦА ВО ФРОНТОТ НА ВИСТИНА Таму нема место за „сателити на ВМРО“ appeared first on plusinfo.mk.

По првиот круг од локалните избори, ВМРО-ДПМНЕ е апсолутен победник, освојувајќи 33 општини и мнозинство во советите во најголемиот дел од нив, оценува партијата.

Според Центарот за комуникации на партијата, вториот круг е нов предизвик, но нивните кандидати за градоначалници влегуваат во трката со значителна предност во 21 од вкупно 27 општини каде што изборниот процес продолжува.

Од партијата посочуваат дека нивниот кандидат за градоначалник на Град Скопје, Орце Ѓорѓиевски, има недостижна предност од над 60 илјади гласа пред противкандидатот. Како што додаваат, предност имаат и кандидатите Дејан Митески во Аеродром, со околу 9.500 гласа повеќе, и Сотир Лукровски во Карпош, со предност од приближно 1.500 гласа.

„Битката во вториот круг продолжува и во Шуто Оризари, каде што одиме со голема мобилизација за пресврт и победа“, се вели во соопштението на ВМРО-ДПМНЕ.

Партијата наведува дека за неа „нема мала или голема општина“, и дека се залага за секој граѓанин, без разлика дали живее во рурална или урбана средина.

„Од друга страна, за функционални локални самоуправи кои ќе реализираат проекти и ќе ги решаваат проблемите на граѓаните, важни се општинските совети. И тоа е предусловот кој е исполнет во првиот круг од изборите, каде што во скопските општини ВМРО-ДПМНЕ има убедливо водство и мнозинство“ – се наведува во соопштението.

Во однос на советничките места, според податоците на ДИК, во општина Аеродром ВМРО-ДПМНЕ освоила 15 советници, во Карпош 11, во Шуто Оризари 4, а во Советот на Град Скопје 18.

Од ВМРО-ДПМНЕ порачаа дека очекуваат масовна поддршка во вториот круг на 2 ноември, за, како што наведуваат, „да се заокружи победничката слика што ќе значи развој на општините, напредок и реализација на проекти“.

„Токму затоа, в недела на 2 ноември, што е можно помасовно, да се излезе на гласачките места и со пенкало во рака, зад параваните, да заокружиме број 9 за Орце, Сотир, Дејан и Ерџан и да ја испишеме историската победа на ВМРО-ДПМНЕ“ – се вели во соопштението на партијата.

The post В НЕДЕЛА ДА ЈА ЗАОКРУЖИМЕ ПОБЕДНИЧКАТА СЛИКА Во вториот круг ВМРО-ДПМНЕ влегува со голем оптимизам и со голема предност appeared first on plusinfo.mk.

По долгомесечните притисоци, јавни апели и политички битки за укинување на обврската за собирање потписи и право да учествуваат на локалните избори како независни листи, дел од најгласните граѓански иницијативи и невладини организации направија изненадувачки пресврт.

Наместо да се подготвуваат за настап како независни кандидати, тие тргнаа кон формирање политичка партија.

Причините што ги наведуваат се недоверба кон институциите, страв од нови измени „во последен момент“ и потреба од правна сигурност дека нивното учество нема да биде оспорено.

Но, овој чекор отвора и серија прашања: зошто, откако ја постигнаа целта за која се бореа, сега одлучуваат да станат дел од политичкиот систем што со години го критикуваа?

И дали со тоа ќе ја зајакнат граѓанската алтернатива или, напротив, ќе придонесат за уште поголемо раздробување на оној мал, но значаен изборен базен кој традиционално им припаѓа на помалите партии и на независните гласови?

Правилата се менуваат

Најгласните независни групи, како „Зелен хуман град“, „Шанса за Центар“ и „Независни за Карпош“, одлучија да не ја прекинуваат својата мисија да собираат потписи – не за кандидатури, туку за регистрација на политичка партија.

Новата платформа „Независни заедно“ веќе има конкретна цел: минимум 1.000 потписи и формален влез во партискиот регистар. Причината? Недоверба – и кон институциите, и кон процесот.

Според резултатите од анкетите што ги прават поголемите политички партии може лесно да се воочи дека сме на добар пат и дека уште сега сееме страв на политичката сцена.

Јана Белчева Шанса за Центар

Горјан Јовановски од „Зелен хуман град“ вели дека последните настани само ја потврдиле перцепцијата дека партиите во Собранието и нивните луѓе во институциите и понатаму се однесуваат несериозно, менувајќи ги правилата од ден за ден.

– Денеска важи едно, утре друго – може ќе се среди, може нема, може ќе има закон, а може и нема. Затоа сметаме дека единствен начин да си обезбедиме учество на локалните избори е да ја формираме оваа политичка партија. Тоа е нашиот пат напред, за никој повеќе да не си игра со нас – појаснува Јовановски.

Сличен став дели и Јана Белчева од „Шанса за Центар“, која во разговор за Плусинфо вели дека според реакциите на поголемите политички партии се препознава дека новоформираната политичка партија составена од независните уште сега котира високо во анкетите.

– Ние немаме пари за да плаќаме агенции за да ни го мерат рејтингот, но според резултатите од анкетите што ги прават поголемите политички партии може лесно да се воочи дека сме на добар пат и дека уште сега сееме страв на политичката сцена. Како и да е, моравме да се одлучиме на овој чекор само за да се заштитиме себеси и да не дозволиме следниот пат повторно да бидеме манипулирани и изиграни. Сметам дека ова е храбар чекор, нѐ има навистина во голем број и се надеваме дека ќе забележиме добри резултати на изборите – изјави Белчева.

На прашањето до каде е процедурата со собирање потписи за формирање политичка партија и дали сѐ ќе биде навреме завршено, таа ни одговори дека крајниот рок за доставување на документацијата е 28 август, но признава дека се соочуваат со тешкотии.

– Прво, многу е жешко и на луѓето не им се излегува од дома. Второ, сѐ уште трае екот на летната сезона и многу луѓе се заминати на одмор. Трето, нотарите работат само до 15 часот додека луѓето се на работа и ретко кој може да излезе во текот на работното време… Тешко е, ама ќе успееме, верувам во тоа – истакна Белчева.

Чии гласови ќе се прелеат?

Формирањето на политичка партија составена од невладините организации отвора едно многу важно прашање – од кого ќе црпи гласови?

Одговорот, според политичките аналитичари, е повеќе од јасен:

Најголемиот дел од гласовите што ќе ги освојат независните ќе бидат гласови од опозицискиот СДСМ, која е скоро пред згаснување.

Синиша Пекевски Политички аналитичар

– Ако се формира политичка партија од невладините, таа нема да им земе гласови на големите и стабилни партии, бидејќи тие имаат своја цврста база и јасна структура. Напротив, ваквата иницијатива најчесто црпи поддршка од политичкиот спектар каде што постои слабост – од разочарани гласачи на помалите или нестабилните партии, од оние кои се колебаат или бараат алтернатива. Тоа значи дека ударот нема да биде врз силниот, туку врз оној што веќе има проблем да ја консолидира својата поддршка.

Политичкиот аналитичар Синиша Пекевски во разговор за Плусинфо смета дека политичката партија составена од независните листи ќе добијат прилично добар дел од гласовите на претстојните локални избори.

– Најголемиот дел од гласовите што ќе ги освојат ќе бидат гласови од опозицискиот СДСМ, која е скоро пред згаснување. Второ, голем дел од гласовите ќе ги земе од независните интелектуалци кои се огромно јадро, а кои не сакаат да бидат ни лево ни десно. И трето, гласови ќе освојат од разочараноста од оние гласачи кои веќе креваат раце од партиите кои веќе 33 години не ги исполнуваат ветувањата – објаснува Пекевски.

Најголемиот губитник на овие локални избори, додава тој, дефинитивно ќе биде СДСМ.

– Партијата на Венко Филипче е веќе мртва партија и не би ме чудело ако во некое догледно време СДСМ се изедначи со Македонски концепт којашто има тројца гласачи или со Демократски сојуз на Павле Трајанов којашто има 300 гласачи. СДСМ ќе го загуби влијанието. Според мене, излезноста на овие избори ќе биде најниска, а независните листи ќе освојат најдобар резултат од нивното постоење – вели Пекевски.

Како и кога настана проблемот?

Проблемот за независните настана откако минатата година беа донесени измени на Изборниот законик, со кои им се наметна повисок законски праг за да се кандидираат на избори.

Имено, наместо 1.000 потписи од избирачи во конкретна изборна единица, на независните кандидати им беше наложено да обезбедат потписи од најмалку 1% од вкупниот број запишани избирачи, доколку станува збор за парламентарни избори.

За локални избори претходно на независните кандидати за градоначалници и советници им се бараа меѓу 100 и 1.000 потписи во зависност од бројот на жители во општината.

По измените на Изборниот законик, треба да соберат најмалку еден процент потписи од вкупниот број на запишани избирачи во општината, односно во Градот Скопје.

Но, во мај Уставниот суд ги укина одредбите кои ги регулираа условите за потребни потписи, а Собранието оттогаш не донесе нови измени. Така се направи правна празнина што го проблематизира учеството на независните кандидати на изборите.

The post НЕЗАВИСНИТЕ ЌЕ ИМ ГО ЗЕМАТ И ТОА МАЛКУ ШТО ИМ ОСТАНА НА СОЦИЈАЛДЕМОКРАТИТЕ Формирањето на партијата „Независни заедно“ е лоша вест за СДСМ appeared first on plusinfo.mk.

Затоа тие повеќе функционираат по автархичниот систем на таканаречените „cadre партии“ – кај нас одомаќен израз би бил султан партии – односно мали групи или кадровски врхушки со неограничена партиска моќ, но и со сите формални „нишани“ на современа политичка партија: органи, тела, програми и др., но само како маска пред јавноста. Автократската надмоќ и апсолутизмот во внатрешните „политики“ на партијата пред сѐ на „лидерот“, а потоа и на врхушката околу него како штит и поддршка за сите негови будалаштини, е вгнездена во македонските политички партии од самиот почеток на осамостојувањето и воведувањето на мултипартијноста во државата.

Што е уште поинтересно, јавноста никогаш не е информирана – а всушност и не може да биде! – за чудните „господови“ патишта по коишто во Македонија се појавуваат партиски лидери, по кои и какви канали (често и оние најнечистите) се движат нивните номинации, кои и какви служби и амбасади или лоби групи ги мешаат шпиловите и фаворитите итн. Тие нешта подоцна се откриваат низ лидерските „политики“ и „проекти“ но, велат, така е и во многу други држави слични на Македонија. Економските олигарси, службите и, веројатно, геополитичките притисоци имаат своја улога.

Но кај нас сето тоа експоненцијално расте до максимален степен на политички некомпетентни и некомпетитивни „лидери“ кои потоа, кога ќе добијат моќ/власт на државно рамниште, разнебитуваат сѐ што ќе допрат. Ја претвораат извршната власт, а најчесто и законодавната и судската, во пеколна авторитарна триглава машина впрегната во остварувањето исклучиво на лично-групни интереси.

Но, од друга страна, и покрај сѐ, се чини дека, барем кај нас, два фактори се од круцијална важност за развојот не само на демократијата (вклучувајќи ја и партиската) туку и на сите други битни државни сегменти: личната (не)култура разбрана во нејзиниот најширок опфат односно културните, цивилизациските и моралните вредности и норми како база за секој личен и општ прогресивен и просветителски развој, и провинцискиот ментален склоп. Зашто, од некултурни поединци, од нецивилизирани и непросветени билмези и „лидери“ на кои во главите и понатаму им шумоли провинцијата… не можете да очекувате вредности достојни за дваесет и првиот век! Поточно: можете да ги очекувате, но никогаш нема да ги добиете.

Или, ако баш сакате: дали последнана провинциска бламажа на еден актуелен „угледен“ и еден бивш „угледен“ партиски „лидер“ во Дубаи говори нешто друго? И дали не баш така одамна не сведочевме и на слична таква белградска лумперајка на трет нивен компањон од истата партија? Не знам дали поводот беше истата „ѕвезда“ во ликот и делото на Харис Џиновиќ, ама сигурно беше – некој сличен. А сите тројца де факто беа во континуитет од „небесата“ спуштани на македонската политикантска сцена како кукли на конец.

И сега, дали овие луѓе навистина ја претставуваа(т) партијата? И таа нивна партија се согласува со таквото нивно однесување и сериозно мисли дека простачкиот одговор на Филипче на новинарско прашање за бламажата во Дубаи дека тој „не коментира приватни прашања“ е – соодветно? И дали онаа актуелна провинциска врхушка која стоеше позади него додека „лидеро“ даваше такви „одговори“ смета дека тоа е културно однесување или пак (и) тие умираат од завист што не биле со него и Заев во Дубаи?

Или, бидејќи темата бара уште попрецизни прашања: зарем од такви луѓе јавноста очекува(ла) реформи, водење на држава, развој, економски просперитет, евроинтеграции…? Зарем партија со толкава „државотворна“ традиција и десетици илјади членови е спуштена на тоа и такво рамниште на простотилак „ала Џиновиќ“, Заев/Филипче и компанија? Па и ако е, зарем и цела држава треба да клекне толку ниско? И зошто?

И токму тоа е проблемот: зошто ние се согласуваме со тоа? Зашто она во Дубаи е само уште една парафраза на сите изминати три децении на македонската самостојност и независност. Колку такви од „форматот“ на тандемите Заев-Филипче, Љубчо-Циле, Груевски-Ахмети… видовме во минатото? Се разбира дека демократските вредности не паѓаат од небо туку се учат – триесет години се сепак краток период – но кај нас 1992-та година не беше баш прва средба со демократијата. А впрочем, како оттогаш кај нас на челни позиции континуирано доаѓаа луѓе со страотни фалинки во знаењата, однесувањето, културата, моралот…, разликувањето на доброто и лошото, црното од белото, цивилизацијата и провинцијата?

Останува фактот дека „партиите“ на Аца Лукас, Харис Џиновиќ, Теа Таировиќ и Цеца… се најбројни и најсилни во Македонија. Но тие нема да нѐ однесат подалеку од оваа балканска кал и провинција. Барем во културна и политичка смисла, а тоа е сепак најважно.

Но целата онаа партиска – или е и државна? – бламажа има уште една димензија, онаа евроинтегративната. Или, ако сакате, кога видеата и сториите од простачкото дивеење на највисоките претставници на една „државотворна“ партија и аспирант за повторно брзо враќање на власт ќе допрат до политичкиот врв на еу (малите букви се… знаете веќе што), што мислите, какви ќе бидат коментарите? И најмалку што сакам е да бидам разбран дека такви нешта во Европа не се случуваат. Ама во онаков формат, со онаква простачка жар, со свест – ако воопшто постоела – за улогата во политичкиот живот во земјата и можноста сето тоа многу бргу да се појави во јавноста…? Или, „нашиве“ на тоа би одговориле во свој стил: ма кој ги е..?!

Но, реално е и прашањето: а зарем Брисел и Вашингтон посакуваат поинаков тип политичари? Некои од оние со интегритет, култура, морал, вредности…? Не сум сигурен. Поточно – не верувам. Па зарем во два милиони народ нема барем стотина такви кои би можеле да бидат распоредени на клучни места во државата? Или оние белосветски „политики“ на „китовите“ и „сардините“ само вака функционираат? Но, ако е така, тогаш какви беспризорни простаци ли се оние „интелектуалци“ кои им служат на интересите на вакви луѓе?!

Извор: Теодосиевски уметност

The post Провинциска бламажа appeared first on plusinfo.mk.

Партијата ГЕРБ-СДС води со 26.46% од гласовите, додека втора е проевропската либерална коалиција ПП-ДБ со 14.38%. Резултатите покажуваат дека коалиција меѓу двете водечки партии нема да биде доволна за формирање влада, поради што лидерот на ГЕРБ, Бојко Борисов, ќе мора да бара поддршка од најмалку уште три формации за стабилна влада, наведува Еуроактив.

На третото место се наоѓа радикалната проруска партија „Преродба“ со 13.65% поддршка. Партијата ДПС-Нов почеток, предводена од Делјан Пеевски, освои 11.18%, додека Алијансата за права и слободи (АПС) на Ахмед Доган има 7.29%. Во парламентот влезе и Бугарската социјалистичка партија (БСП) со 7.62%.

Партијата „Има таков народ“ на Слави Трифонов доби 6.94%, а радикалната партија МЕЧ, предводена од поранешниот пратеник Радостин Василев, освои 4.62%. Партијата „Величина“ има 4.04% и исто така го преминува изборниот праг.

Над 29 отсто од бугарските гласачи поддржаа радикални и популистички формации, покажуваат резултатите, наведува Еуроактив. Бугарските медиуми ја пренесуваат изјавата на Борисов, кој утрово им се заблагодари на гласачите и порача дека е подготвен да коалицира со сите, освен со радикалите од Препород.

Еуроактив оценува дека по изборите, единствена опција за Бојко Борисов е да бара коалиција со ПП-ДБ, луѓето околу Доган, како и со четврти партнер. Изборот овде се сведува на ИТН и БСП, при што социјалистите се чинат како поверојатна опција поради нивната поумерена реторика.

Борисов покажа дека знае добро да соработува со независните пратеници, кои можат многу брзо да се појават во случај на колапс на МЕЧ и Величина. Слично нешто му се случи еднаш на „Величина“ во претходниот парламент.

Втората опција пред ГЕРБ е да се бара коалиција со Пеевски. Според оваа опција, тој може да преговара со ИТН и БСП, повторно потпирајќи се на одвојувањето на независните пратеници од двете најмали партии.

Третата опција е влада без јасно мнозинство, којасе потпира на флуктуирачка поддршка во парламентот.

Политичкиот аналитичар на Галуп, Парван Симеонов, коментираше дека Борисов не би сакал да прекине „ниту една од неговите соработки со новиот почеток на Пеевски“ и да формира малцинска влада, потпирајќи се на променлива поддршка.

– Ако има нов почеток и во БСП, ова е одличен начин да влезе не преку предниот, туку преку службениот влез – рече Симеонов за Еуроктив и додаде: Борисов ќе смисли некој начин да вклучи секого и да ја разводни својата одговорност.

Според него, со серија избори доаѓа времето на претседателот Румен Радев.

– Доколку Радев ги плаши, треба да најдат потези што ќе водат еден кон друг. Радев го користат како страшило. Доаѓа време кога ќе се бара алтернатива за сите нив. Кога не ја играте вашата игра добро, излегува понаметлив и посвеж тим и може да ве победи следниот пат кога ќе се поделат картите. За овој партиски систем во Бугарија течат последните секунди, ако не најде сила да покаже дека го претставува народот – рече Симеонов.

ГЕРБ не сака да владее со ПП-ДБ бидејќи им се наметнуваат услови кои се неприфатливи за нив, како реформа на обвинителството, коментира за бТВ политикологот Даниел Смилов.

– Прашањето е дали ГЕРБ може да ја надмине оваа граница. Од друга страна, не сакаат да владеат без ПП-ДБ, бидејќи се плашат или од протести или од меѓународна реакција. Ги чекаме изборите во САД со надеж дека барем ќе се намали надворешниот притисок – рече Смилов.

Политикологот Андреј Раичев истакна дека доколку Доналд Трамп победи во САД, ГЕРБ ќе се чувствува посилно и можни се какви било потези, додека ако Камала Харис биде претседател, нема да има начин да ја заобиколат ПП-ДБ.

The post БУГАРСКИОТ ПАРЛАМЕНТ СЕ НАПОЛНИ ДО ВРВ СО ПОЛИТИЧКИ ПАРТИИ Тешко ќе оди формирањето коалиција appeared first on plusinfo.mk.

Енергетската сигурност и зелената енергија се два приоритета кои ќе треба да ги надминат партиските политики, порача денеска американската амбасадорка во земјава Анџела Агелер.

Обраќајќи се на 7. Македонски енергетски форум (МЕФ) што се одржува во Скопје, Агелер истакна дека земјава во голема мера закрепна од неодржливото енергетско опкружување, но допрва претстојат вистински предизвици. Според неа, земјава треба да го заврши грчко-македонскиот гасовод кој ќе ги елиминира, како што рече, зависноста од Русија и заканите на одредени прекини во снабдувањето.

– Со интерконекторот Северна Македонија ќе може да гради централи со погон на гас и да ја олесни транзицијата од јаглен кон други извори – рече Агелер, потсетувајќи дека земјава ја има поддршката од САД за спроведување на зелената транзиција.

На форумот ќе стане збор за воспоставување енергетска сигурност и безбедност во регионот, трансформација на енергетската инфраструктура, еколошка одржливост, примена на технологија и иновации, како и за финансирање на реформите кон зелена транзиција.

Евроамбасадорот Дејвид Гир уште еднаш ја искажа европската поддршка за реформите на земјава кон зелената транзиција.

The post „ЗАВРШЕТЕ ГО ГАСОВОДОТ ЗА ДА НЕ БИДЕТЕ ЗАВИСНИ ОД РУСИЈА“ Агелер советува во енергетиката да нема партиски надмудрувања appeared first on plusinfo.mk.

Една четвртина од сите приватни средства донирани на политичките партии во ЕУ биле наменети за екстремно десничарски, екстремно левичарски и популистички партии.

Порталот за истражувачко новинарство „Follow the money“ (FTM), во соработка со британски Гардијан и 26 други европски медиумски партнери, анализираа како од 2019 до 2022 година биле финансирани повеќе од 200 политички партии во 25 земји на ЕУ.

Резултатите од истражувањето покажуваат дека политичките партии во ЕУ во тој период примиле донации од 941 милиона евра, но дека јавноста не знае кој дал 71% од тие пари или 664 милиони евра.

Меѓу европските земји има големи разлики во законите и практиките кога станува збор за транспарентноста на политичките донации. Транспарентноста е на најниско ниво во западните земји како Германија, Франција и Шпанија.

Од 2019 до 2022 година германските партии примиле донации во износ од 641 милиона евра од компании, приватни лица и политичари, од кои 495 милиони (78 отсто) се со непознато потекло. Десничарската Алтернатива за Германија (АФД) пријавила 6,4 милиони евра приватни донации во 2022 година, од кои е познато потеклото на само 1,3 милиони.

Во Франција донациите се одвиваат целосно зад затворени врати и јавноста нема право да знае кој ги финансира партиите, а како причина е наведена приватноста на донаторите, бидејќи донациите веројатно би ги откриле нивните политички ставови.

Сепак, строгите правила во Франција забрануваат странски и анонимни донации од над 150 евра, додека индивидуалните донации се ограничени на 7.500 евра. Сите уплати над 150 евра мора да имаат хартиена трага што може да биде истражена од надлежен орган.

Партиите во Шпанија, исто така, се обврзани да го пријават идентитетот на донаторите до надзорниот орган, Судот на ревизори, но судот не мора да ги објавува овие информации.

Во 16 земји-членки на ЕУ, на сите или на некои донатори им е дозволено да останат непознати за пошироката јавност и медиумите, но износот над кој партиите мора да го откријат идентитетот на донаторите варира од земја до земја, од 500 евра на Кипар до 25.000 евра во Шпанија.

Од друга страна, земјите од Централна и Источна Европа се многу потранспарентни кога е во прашање финансирањето на партиите. Само Хрватска, Бугарија, Чешка, Естонија, Грција, Летонија и Полска бараат изворите на сите приватни донации да бидат јавно достапни.

Естонија е веројатно најтранспарентната земја во ЕУ. Имињата на речиси 50.000 членови на 13 партии, нивната месечна членарина, како и секоја донација се објавуваат на секои три месеци и се достапни за секого. И Естонија забранува странски донатори, додека пет членки на ЕУ, Белгија, Данска, Шведска, Луксембург и Холандија немаат директна забрана за странски донации, а во Германија тие се ограничени на 1.000 евра.

Екстремните политички групи и од десната и од левата страна на политичкиот спектар добиле поголем број износи на донации од 2019 година.

Податоците од истрагата откриваат дека најмалку 150 милиони евра приватни донации отишле за популистичките партии, додека повеќе од 97 милиони евра за екстремно десничарските партии.
Додека повеќето политички партии сè уште се потпираат на јавно финансирање, во земји како Франција, Унгарија и Италија, на пример, приватните донации сега претставуваат повеќе од половина од приходот на партиите со поекстремни ставови, објави ФТМ, додавајќи дека пред европските Парламентарните избори следната недела, анкетите предвидуваат и поголема поддршка за екстремистичките и популистичките партии низ ЕУ.

Трите екстремистички партии во Франција, вклучително и Националниот собор на Марин Ле Пен, забележаа драстично зголемување на финансиската поддршка – од 13% од приходите од донатори, членарини и придонеси од нивните партиски кандидати и функционери во 2019 година на 38% во 2022 година.

Во Летонија, каде што се очекуваат поголем број антиевропски и популистички европратеници по изборите во јуни, тие приходи се зголемија од 9% на 36% за 4 години.

Анализата покажува дека десничарските, левичарските и популистичките партии вкупно добиле повеќе од половина од донациите во Словенија, Италија, Полска, Унгарија, Португалија и Грција.

The post ОД КАДЕ ДОАЃААТ ПАРИТЕ? Потеклото на 71% од приватните донации за европските партии е непознато за јавноста appeared first on plusinfo.mk.

Зад нас остануваат години на лошо водење на земјата, трагични неуспеси и срамни скандали, дивеење на криминалот и на корупцијата, драматични поделби на народот, чувство на бесперспективност и разочарувачки егодус на илјадници млади луѓе од својата татковина.

За жал, дури и во оваа празнична ноќ не можеме да не се потсетиме на злото. И да прашаме – кој е виновен?

Веројатно многумина се спремни веднаш да ги обвинат партиите и политичарите, има и такви кои прстот ќе го вперат кон меѓународната заедница и кон странските дипломати, сигурно ќе се сетиме и на Грците, на Бугарите, на Албанците, или на некој друг…

Најтешко е да признаеме дека ние самите сме виновни. И дека ние, всушност, во овој момент, ја издржуваме казната за нашето одбивање да партиципираме во политиката.

Строго и праведно сме казнети за тоа што со години ја потценуваме политиката како таква и ја споредуваме со најстариот занает на светот. И за тоа што со децении ширевме стереотипи за политичарите како за нечесни и неспособни луѓе. Казнети сме затоа што ги стигматизиравме и така ги уривавме сите наши демократски институции. Трпиме и поради тоа што се убедивме дека „не вреди“ бидејќи „сите се исти“ и дека поинаку не може ни да биде.

Таа малодушност, тој цинизам, таа инсуфициенција на самопочит веројатно ја има кај сите народи, но кај нас Македонците е типична и хронична.

Остаревме стравувајќи дали Македонија „ќе ја биде“, скриено очекувајќи одговорот да биде „не“. Во последниве неколку години, во владината пропаганда доминира дискурсот на еден погубен антимакедонизам. Луѓе, впрегнати во таа пропагандна машинерија, отворено говорат дека Македонија треба да исчезне и дека единствениот начин нејзините жители да влезат во светот на успешните европски нации е, всушност, да се откажат од македонското во себе и од македонскоста во секоја смисла – да се деноминираат, да се откажат од својот национален идентитет, да станат единствената нација што ќе (од)умре по сопствена волја, со политичка одлука донесена во итна постапка и со европско знаменце.

И како одговараме ние на тие провокации?

Гледаме сеир.

Молчиме. Наведната глава сабја не ја сече.

Понекогаш ќе слушнеме цинични и недоветни коментари, од типот – да не им придаваме значење, дефокусираат, итн.

Наместо отпор кон овој антимакедонизам во јавниот дискурс, со кој беа одбележани и некои крупни политички одлуки во последните две години, ние цинично „мудрувавме“, криејќи ја својата апатија и неспремност да размислуваме со своја глава, да говориме слободно и да ги застапуваме своите ставови и мислења за политичките работи.

Платон вели дека казната за неучествување во политиката е тоа што со нас владеат инфериорните. И тоа навистина е така – сите тие инфериорни човечиња, сите тие медиокритети, сите тие необразовани и неспособни партиски апаратчици се на власт затоа што ние го дозволуваме тоа, одбивајќи да се занимаваме со важните политички прашања дури и тогаш кога политиката суштински ги определува околностите на нашето живеење.

Во 2024 година ќе имаме шанса тоа да го промениме.

Во следните 365 дена секој од нас ќе донесе многу важни и помалку важни лични одлуки кои ќе ги определат нашите приватни животи – нашите одлуки и нашите избори се тоа што ние, всушност, сме.

За човек да донесе правилна одлука, мора добро да размисли, но истовремено и да ја прегрне својата интуиција, а и малку среќа е добредојдена. Ви посакуваме во овој триаголник секој од вас да ги донесе најдобрите одлуки во приватниот живот.

Но, пред нас е и изборна година. Ова е година на надеж, можност секој од нас да учествува во политиката и да донесе правилна одлука за својата земја, одлука со која ќе може спокојно да живее. Нека прозвучи патетично, но ете, ќе речам – Македонија тоа го бара од секој од нас.

Во моментите на одлучување, најдоброто нешто што можете да го сторите е да донесете правилна одлука. Второто најдобро нешто што може да го сторите е да донесете погрешна одлука. Најлошото нешто што можете да го сторите е да не правите ништо.

Немојте да не правите ништо. Само тоа немојте, бидејќи ќе стаса нова казна. Кренете го својот глас, кажете го слободно своето мислење, избирајте и одлучувајте.

Учествувајте!

Најдобриот совет за правилно одлучување е да се водите од сопствените вредности, од сопствениот светоглед. Немојте нив да ги жртвувате во име на т.н. „голема слика“, во чие име од нас постојано се бараат некакви непринципиелни отстапки. Вистинската голема слика е во нас – таа е насликана со боите на нештата што ние ги сметаме вредни и важни, за нас, за нашите предци што не смееме да ги посрамотиме и за нашите потомци на кои сме должни да им оставиме огниште и достоинство во наследство.

Со еден збор, кога ќе избирате – а избирајте, вашите одлуки ве дефинираат и вас како личности – водете се од вашите вредности, надежи и очекувања

Или, како што вели Нелсон Мандела: „Гледајте вашиот избор да ги одрази вашите надежи, а не вашите стравови“.

Во тоа име, Плусинфо на сите читатели, деловни соработници, колеги и пријатели им ја честита новата 2024 година и им посакува многу доблесни и храбри одлуки, многу среќа и пред сè здравје и весели мигови.

The post Нова година, нова надеж appeared first on plusinfo.mk.

Вака политичките аналитичари со коишто разговараше Плусинфо го коментираат забрзаното темпо на формирање нови политички партии кај Албанците, ако се земе предвид дека во рок од само еден месец беа создадени дури 3 нови политички субјекти.

Последната новоформирана политичка партија е Народното движење на пратеникот Скендер Реџепи-Зејд, кој на македонската јавност ѝ стана познат како пратеник од редовите на Алтернатива, а кој подоцна делуваше како независен пратеник.

Новите партии во моментов се парламентарни, но по изборите тие ќе згаснат исто толку брзо колку што се формираа, па никој нема ни да се сеќава дека постоеле.

Синиша Пекевски Политички аналитичар

Пред еден месец, партии регистрираа и поранешниот потпретседател на Беса и екс-министер за земјоделство, Аријанит Хоџа, како и „огнениот“ Изет Меџити, кој не успеа да издејствува внатрепартиски отчет на министрите од ДУИ. Партијата на Хоџа се вика Европска демократска партија, а на Меџити е Демократско движење.

Аналитичарот Синиша Пекевски смета дека на овој начин новопечените партиски лидери само се обидуваат да си ја зголемат својата цена и во игра е само личен бенефит и ништо повеќе.

– Формирањето нови политички партии нема да донесе никаков прогрес, ниту подобар живот за Албанците во Македонија. Новите партии во моментов се парламентарни, но по изборите тие ќе згаснат исто толку брзо колку што се формираа, па никој нема ни да се сеќава дека постоеле. Со самото тоа што нема да бидат избрани на следните парламентарни избори, така ќе згасне и нивното постоење. Тие немаат ни инфраструктура, а немаат ни време за да направат добра база, а исто така не верувам дека имаат некој добар потенцијал за да изненадат на политичката сцена – коментира Пекевски.

Сепак, додава тој, ова не важи за новоформираната партија на „огнениот“ Изет Меџити, бидејќи оваа партија уште сега покажува дека има сериозна потпора.

– Сосема друга е приказната со партијата Демократско движење на Изет Меџити, бидејќи оваа партија има сериозна потпора во Чаир и во Сарај. Партијата на Меџити веќе формираше коалиција со Алтернатива и со Беса, но не верувам дека оваа коалиција би се проширила и со другите новоформирани партии на Реџепи и на Хоџа. Верувам дека Изет Меџити, Африм Гаши и Билал Касами ќе формираат предизборен блок, но не верувам дека тој ќе трае многу долго. Мислам дека личните суети ќе преовладаат помеѓу нив и ќе дојде до разидување. Не може да функционираат 10 лидери, туку може да функционира само еден лидер – истакна Пекевски.

Политикологот Димитар Христов, пак, смета дека токму идејата за формирање една изборна единица е најголемиот виновник за формирањето нови политички партии.

Единствената опција за подолго опстојување на новите мали партии е да забележат успех на локално ниво, па дури потоа да размислуваат за влез во Собранието.

Димитар Христов Политиколог

– Убаво и демократски е да се формираат нови политички партии за да можат луѓето сами да си одлучат која политичка опција ја прифаќаат, а која ја отфрлаат. Сметам дека токму идејата за формирање една изборна единица е најголем виновник за формирањето нови политички партии, но тоа е само нож со две острици. Поради тоа што сѐ уште нема официјална промена во изборните единици, шансата за овие нови партии да влезат во Собранието барем со еден пратеник е минимална. Последната новоформирана партија во албанскиот блок, таа на пратеникот Скендер Реџепи, ќе одземе дел од гласачите на Алтернатива, со оглед на тоа што Реџепи ја напушти оваа партија во која беше избран за пратеник. Најголем ќар од новоформираните партии ќе има ДУИ, бидејќи математички гледано, во процесот на транформација на гласовите во пратеници, дел од гласовите ѝ се одземаат на Алтернатива и се претураат во сосема нова партија со минимални шанси за влез во Собранието. Автоматски тоа значи дека ќе има повеќе места за ДУИ, Беса и за Алијанса за Албанците – вели Христов.

И тој предвидува дека животниот век на новоформираните политички партии ќе биде прилично краток.

– Навистина би било убаво да предложат некои новитети, бидејќи доволно сме заситени од ВМРО-ДПМНЕ, СДСМ и од ДУИ. Но, реално гледано, многу тешко дека нешто може да се смени. Единствената опција за подолго опстојување на новите мали партии е да забележат успех на локално ниво, па дури потоа да размислуваат за влез во Собранието. Во спротивно, нивниот животен век ќе биде прилично краток, дури и незабележлив – објаснува Христов.

Сега во Собранието има 8 партии кои му припаѓаат на албанскиот политички блок.

The post ЛЕСНО Е ДА ФОРМИРАШ НОВА ПАРТИЈА ПРЕД ИЗБОРИ Оди влези во Собрание и биди фактор по изборите, да те видам! appeared first on plusinfo.mk.

Меѓу македонските граѓани доминира мислењето дека политичките партии и медиумите најмногу шират дезинформации. Голем дел од нив мислат дека можат да препознаат дезинформации, но признаваат дека понекогаш им се случува самите да споделат лажна информација. Граѓаните главно се информираат преку телевизијата, Фејсбук и веб-сајтовите, но многу малку им веруваат на медиумите.

Ова го покажуваат резултатите од истражувањето на јавното мислење за способноста на граѓаните да препознаат и да се справат со дезинформации, што Институтот за комуникациски студии (ИКС) го реализираше во текот на октомври како дел од проектот „Користи факти”.

Политичарите „прочитани” од различни генерации

Граѓаните сметаат дека политичките партии најмногу шират дезинформации во Македонија, а на второ место се медиумите, покажува испитувањето на јавното мислења. Според перцепцијата на испитаниците, помал дел од нив одговориле дека државните институции најмногу шират дезинформации, а 13 отсто одговориле дека политичките партии, медиумите и државните институции подеднакво шират лажни информации.

Ставот дека политичките партии најмногу шират дезинформации доминира кај повеќе од половината од популацијата над 55-годишна возраст. Од друга страна, пак, најчест одговор кај младите е дека тоа го прават медиумите, иако често се споменуваат и политичките партии.

Граѓаните се информирани ама не им веруваат на медиумите

Главните наоди укажуваат на тоа дека поголем дел граѓани повеќе пати дневно се информираат за случувањата од светот. На прашањето „Кои теми најмногу ве интересираат?” поголем дел испитаници ги избрале економијата и политиката, по што следуваат спортот, музиката и забавата, а на крај се климата и животната средина. Повозрасната популација најмногу ја интересира политиката, додека младите се најзаинтересирани за музиката.

Како извор на информирање најчесто се користи телевизијата, а на второ и трето место се Фејсбук и веб-сајтовите. Граѓаните на возраст од 18 до 44 години најмногу се информираат преку Фејсбук, додека пак телевизијата е најпопуларна кај групата граѓани од 45 до 64 и над 65-годишна возраст.

Што се однесува на довербата во медиумите, повеќе од половина од испитаниците изјавиле дека се сомневаат во сите вести што ќе ги прочитаат. Речиси третина проверуваат како е пренесена веста во другите медиуми, додека само 4 проценти од граѓаните имаат целосна доверба во медиумите и во вестите што ги читаат.

Колкава е способноста за препознавање дезинформации?

Повеќе од половина од граѓаните мислат дека понекогаш можат да препознаат дезинформации и сметаат дека понекогаш им се случува и тие самите да споделат неточни информации. Гледано според родот, мажите се посигурни дека секогаш можат да препознаат дезинформации во однос на жените.

Што се однесува на споделувањето дезинформации, една третина од граѓаните одговориле дека воопшто не им се случило да споделат, помал дел сметаат дека тоа им се случува често, додека повеќето сметаат дека понекогаш им се случува да споделат вести што се неточни.

Граѓаните најчесто се чувствуваат вознемирено во случаите кога ќе воочат дека прочитале дезинформација. На 30 отсто од испитаниците им е сеедно, додека по 10  отсто одговориле дека се многу лути или дека се смеат во таквите случаи. Чувството на лутина и вознемиреност е позастапено кај повозрасните групи  граѓани.

Сензациите најмногу „палат” кај најобразованите. На испитаниците во истражувањето им беа понудени неколку наслови за иста вест, а резултатите покажаа дека поголем дел испитаници би избрале да читаат вест со неутрален наслов. Доколку се анализираат податоците според нивото на образование, поголем дел испитаници со завршени постдипломски студии, докторат или специјализација би читале вест со сензационалистички односно лажен наслов. Од друга страна, пак, граѓаните со завршено основно, средно или високо образование најпрво би избрале да читаат вест со неутрален наслов.

Граѓаните се поделени и во врска со нивните ставови за теориите на заговор поврзани со Европската Унија. Па така, разликата помеѓу оние што се согласуваат дека ЕУ ги измислила вакцините за време на коронавирусот како механизам за контрола на граѓаните и оние што не се согласуваат со тоа е незначителна. Гледано според возраста, мнозинството граѓани на 25-34-годишна возраст (52 отсто) одговориле дека не се согласуваат со изјавата, додека во другите возрасни групи не се големи разликите помеѓу оние што се согласуваат и што не се согласуваат со веста.

Политичарите и медиумите да преземат одговорност

Резултатите од анкетата покажуваат дека во Македонија е потребно уште многу да се работи на зголемување на способноста на населението за препознавање на дезинформации и на нивните извори, но и на зајакнување на професионалноста во медиумите што би ја вратило довербата кај населението. Враќање на довербата е потребна и кај политичките партии. Очигледно е дека политичарите  први треба да ги засукаат ракавите односно да понесат одговорност и да се воздржат од ширење лажни вести за дневно-политички цели.

Истражувањето е реализирано преку телефонска анкета на примерок од 1.010 полнолетни граѓани во октомври 2022 година, со цел да се утврди свесноста на граѓаните за заканите од дезинформации и нивните извори, да се утврди знаењето и вештините за препознавање дезинформации, како и однесувањето на граѓаните во однос на дезинформациите.

Истражувањето го спроведе Институтот за комуникациски студии, во соработка со Институтот за демократија „Социетас цивилис”, како дел од проектот „Користи факти” кој е поддржан од Британската амбасада во Скопје. Проектот има цел да ја зајакне отпорноста на широката јавност и ранливите групи во Македонија кон дезинформациите.

Целиот Извештај од истражувањето на способноста на граѓаните за препознавање и справување со дезинформации прочитајте го ТУКА.

The post НАЈМНОГУ ЛАЖАТ ПОЛИТИЧАРИТЕ, ПА НОВИНАРИТЕ Граѓаните се информирани, ама не им веруваат на медиумите (АНКЕТА) appeared first on plusinfo.mk.