Оставка на премиерот Еди Рама, техничка влада со едногодишен мандат и длабоки уставни реформи се најдоа на новиот список барања на организаторите на „Фламинго револуцијата“ во Албанија.

Демонстрантите порачаа дека протестите ќе продолжат мирно сè додека нивните услови не бидат исполнети.

Организаторите предлагаат по заминувањето на актуелната влада да биде формирана непартиска преодна влада која во рок од 12 месеци би подготвила политички и институционални промени.

Рама под нов притисок

Меѓу предложените уставни измени се ограничување на функцијата премиер на најмногу два мандата и воведување механизми кои, според демонстрантите, би обезбедиле еднаквост на граѓаните пред законот.

Промените би биле потврдени на референдум.

Демонстрантите бараат и поништување на повеќе законски решенија, меѓу кои измените на законите за заштитени подрачја и за културно наследство.

Tри недели хаос и буткање огради

Поминаа три недели откако избувнаа првите протести, откако булдожерите почнаа да ги расчистуваат шумите и древните дини за да го подготват теренот за изградба во заштитено подрачје спроти Сазан, според „Гардијан“.

Тензиите таму ескалираа кога противниците на проектот се судрија со обезбедувачите кои поставија ограда за да го блокираат јавниот пристап до областа. Во хаосот што следеше, обезбедувачите беа снимени како влечат локален земјопоседник по карпест терен со лисици.

Од проект до движење

Протестите започнаа поради контроверзниот проект за изградба на луксузен туристички комплекс поврзан со Џаред Кушнер, зетот на претседателот на САД Доналд Трамп.

Во меѓувреме, движењето ги прошири барањата и почна да се претставува како поширока граѓанска иницијатива за политички и институционални промени во земјата.

Дел од учесниците предупредуваат и на ниските плати, високите животни трошоци и иселувањето на населението, за што ја обвинуваат актуелната власт.

Поддршка и од дијаспората

Покрај протестите во Албанија, собири на поддршка се организираат и меѓу албанската дијаспора во САД, Велика Британија, Канада, Франција, Германија, Италија, Шведска и во Австралија.

Организаторите велат дека „Фламинго револуцијата“ ќе продолжи сè додека не се отвори процес за политички промени и за нов општествен договор меѓу државата и граѓаните.

The post „ФЛАМИНГАТА“ ВО АЛБАНИЈА БАРААТ ТЕХНИЧКА ВЛАДА Расте гневот против американскиот проект на островот Сазан appeared first on plusinfo.mk.

Политички земјотрес се наѕира во Тирана. Елиса Спиропали, до неодамна една од најмоќните фигури во владејачката Социјалистичка партија, јавно го доведе во прашање моделот на владеење на премиерот Еди Рама, анализира Independent Balkan News Agency (IBNA), регионална новинска агенција која покрива политички, економски и општествени теми од Југоисточна Европа, односно од Балканот.

Пораката на Спиропали е директна и алармантна – институциите, според неа, постепено се претвораат во алатки за контрола и притисок, наместо да функционираат како независни столбови на демократијата.

Критиката на Спиропали е жестока

Оваа критика не доаѓа од опозицијата, туку од „внатре“ – од човек кој со години бил дел од самиот врв на системот. Спиропали беше претседателка на парламентот и министерка за надворешни работи, што им дава тежина на нејзините зборови и ја прави ситуацијата политички чувствителна.

Според анализи во албанските медиуми, нејзиниот настап не е изолиран инцидент, туку симптом на подлабоко незадоволство во рамки на владејачката структура. Таа отворено зборува за ерозија на институционалниот легитимитет и за отстапување од внатрепартиската демократија – теми кои досега ретко се артикулираа од функционери на Социјалистичката партија.

Токму затоа медиумите и аналитичарите ја споредија со Петер Маѓар – фигурата која од внатрешноста на системот во Унгарија стана симбол на отпорот против владејачкиот модел. Во албански контекст, таа споредба има силна симболика: пораката е дека и во системи со долготрајна доминација на една политичка елита може да се појави внатрешен предизвик.

Што му се става на товар на Еди Рама?

Самиот Рама веќе подолго време е предмет на контроверзии. Неговото владеење, кое трае повеќе од една деценија, често се опишува како централизирано и силно персонализирано.

Таканаречениот „рамизам“ се темели на силна извршна власт и брзи реформи, но критичарите предупредуваат на слабеење на институционалните контроли и на растечки притисок врз медиумите и јавниот сектор.

Дополнително, последните потези на владата отворија нови дилеми. На пример, иницијативата да се ограничи улогата на судството во суспендирањето на министри под истрага беше протолкувана како обид за политичко влијание врз правосудниот систем, што предизвика критики и дома и во меѓународната јавност.

Албанија ионака се наоѓа во деликатна фаза. Земјата е кандидат за членство во Европската унија, а реформите во владеењето на правото и борбата против корупцијата се клучни услови за напредок. Во таков контекст, секој сигнал за институционално назадување има многу поголема тежина – не само политичка, туку и геополитичка.

Може ли ова да биде најава на политички земјотрес во Тирана?

Во оваа равенка, настапот на Спиропали може да се чита како предупредување, но и како потенцијален почеток на нов политички процес. Таа веќе во свои јавни изјави укажуваше дека европските општества имаат капацитет да ги „коригираат девијациите“ во власта, алудирајќи дека истото може да се случи и во Албанија.

Прашањето е дали ова ќе остане изолиран глас или ќе се претвори во пошироко движење. Историјата на Балканот покажува дека токму ваквите „внатрешни бунтови“ често се првиот знак дека политичкиот систем влегува во фаза на трансформација.

Во меѓувреме, Тирана влегува во нова фаза на неизвесност. Ако Спиропали навистина стане „албанскиот Маѓар“, тогаш политичката сцена во земјата би можела да се соочи со најсериозниот предизвик за власта на Рама во последната деценија.

The post ДАЛИ ЕЛИСА СПИРОПАЛИ ЌЕ БИДЕ „АЛБАНСКИОТ ПЕТЕР МАЃАР“? Поранешната шефица на дипломатијата отвори фронт против Еди Рама appeared first on plusinfo.mk.

Одлуката на албанскиот парламент да го одбие барањето на Специјалното обвинителство против корупција и организиран криминал да ѝ се одземе пратеничкиот имунитет на Белинда Балуку предизвика реакции од Брисел и од неколку западни амбасади.

Европската комисија нагласи дека владеењето на правото и борбата против корупцијата се клучни за напредокот на Албанија на патот кон Европската Унија.

„ЕУ го следеше исходот од денешното гласање во албанскиот парламент. Обезбедувањето поволна средина за СПАК ефикасно да ја извршува својата работа е од суштинско значење за веродостојна поддршка на напредокот на Албанија кон членство во ЕУ“, се наведува во реакцијата на Европската комисија.

Слични пораки испратија и германската, британската и други западни амбасади во Тирана. Тие нагласуваат дека гонењето на корупцијата, дури и кога се работи за високи функционери, е неопходен услов за европската интеграција на земјата.

Албанскиот премиер Еди Рама реагираше на критиките, оценувајќи дека одлуката на парламентот е оправдана.

– Секој парламент во Европа би го сторил тоа – порача Рама.

Тој додаде дека стратегиската цел на владата останува непроменета.

– Нашата цел е јасна, Албанија да стане членка на Европската Унија до 2030 година – нагласи албанскиот премиер.

Албанскиот парламент со гласовите на владејачкото мнозинство го отфрли барањето на Специјалното обвинителство за одземање на имунитетот на пратеничката Белинда Балуку.

Обвинителството ја сомничи за корупција и бараше можност за нејзино апсење.

Балуку претходно беше разрешена од функциите вицепремиерка и министерка за инфраструктура и енергетика.

The post БРИСЕЛ ЈА ПРЕКОРИ ТИРАНА ПОРАДИ ЕДНА ОДЛУКА Секој европски парламент би го сторил тоа, возврати Рама appeared first on plusinfo.mk.