Јужната германска покраина Баварија вчера презеде чекори за да ѝ овозможи на полицијата да урива дронови, неколку дена откако кај аеродромот во Минхен беа забележани дрнови кои го попречија работењето на аеродромот.

Инцидентите од минатата недела, по слични случаи во Данска, поттикнаа дебата низ цела Германија за тоа како да се постапува со неидентификувани дронови во воздушниот простор на земјата.

Инцидентите најчесто се припишуваат на Русија, иако Москва го негира тоа, пренесе ДПА.

Соборувањето на дронови се смета за правно спорно и технички тешко, но баварската влада вчера усвои предлог-закон со кој на покраинската полиција ѝ се дава овластување да ги уништува дроновите ако се оцени дека тоа е неопходно.

Законот треба да биде одобрен во покраинскиот парламент во Минхен.

– Нема потреба од паника, но има причина за голема претпазливост, изјави премиерот Маркус Зедер, наведувајќи дека инцидентите со дронови „ја променија ситуацијата“.

– На крајот, подобро е да ги урнеме отколку да чекаме – рече Зедер, додавајќи дека полицијата мора да биде способна да ги неутрализира дроновите за да се обезбеди заштита на населението.

– Мораме да бидеме во можност и да ги вооружиме сопствените дронови – потенцираше тој.

Предлог-законот предвидува создавање нов Центар за компетентност и одбрана од дронови за баварската полиција. Центарот ќе биде лоциран во Ердинг, во близина на аеродромот, каде што германската војска веќе соработува со баварски технолошки компании.

Развојот на настаните во Баварија најверојатно ќе има паралели и на федерално ниво, бидејќи германскиот министер за внатрешни работи Александер Добриндт неодамна најави дека планира да воспостави заеднички центар за одбрана од дронови.

The post ПОЛИЦИЈАТА ЌЕ ИМА ОВЛАСТУВАЊЕ ДА СОБОРУВА ДРОНОВИ Германија се прилагодува на новата ситуација appeared first on plusinfo.mk.