Во текот на ноември на сите Белгијци на возраст од 17 години ќе им бидат упатени писма со детали за можностите за доброволно служење во редовите на Вооружените сили на Белгија, најави белгискиот министер за одбрана Тео Франкен.

Иницијативата има за цел да ги поттикне младите да се решат на доброволно отслужување на воен рок во траење од една година. Таа е дел од планот на Франкен за привлекување нови регрути во белгиската Армија.

Како што соопшти Франкен, ќе бидат испратени информативни писма до околу 130.000 млади Белгијци, по што ќе се организираат презентации за можностите за служење војска, како во живо, така и онлајн.

Заинтересираните кандидати, кои мора да бидат на возраст од 18 до 25 години, ќе можат да се пријавуваат од јануари идната година. Селекцијата на потенцијалните регрути ќе се изврши во текот на летото, а избраните ќе почнат со отслужување на воениот рок од септември 2026 година. Доброволните војници ќе примаат нето месечна плата од 2.000 евра.

Се предвидува во рамките на оваа програма на трите рода на белгиската Армија во 2026 година да ѝ се приклучат 500 доброволци, а во 2027 – 1.000, по што нивниот број би продолжил да се зголемува во следните години до најмногу 7.000 војници.

The post СИТЕ 17-ГОДИШНИ БЕЛГИЈЦИ ЌЕ ДОБИЈАТ ПОКАНА ЗА ВОЈСКА Доброволните војници ќе примаат плата од 2.000 евра appeared first on plusinfo.mk.