Светскиот пазар на нафта повторно влегува во суфицит, бидејќи извозот од Персискиот Залив се опоравува побрзо од побарувачката, а понудата ќе ја надмине побарувачката до крајот на годината, објави денеска Меѓународната агенција за енергија (ИЕА).

Според новата месечна прогноза на агенцијата, понудата на нафта во четвртиот квартал од 2026 година ќе ја надмине побарувачката за 1,7 милиони барели дневно, што претставува значителен пресврт во споредба со претходната проценка, според која се очекуваше дефицит.

Агенцијата соопшти дека пазарот ги покажал првите знаци на ребалансирање, бидејќи глобалното производство повторно ја надминало потрошувачката за прв пат од почетокот на војната на Блискиот Исток.

Опоравувањето е последица на побрзиот раст на извозот на нафта од земјите од Персискиот Залив, кој беше нарушен од почетокот на војната на крајот на февруари.

Производството на сурова нафта од ОПЕК плус достигна 41,23 милиони барели дневно во октомври, што е за околу 2,04 милиони барели повеќе отколку во септември и приближно 97% од нивото од февруари, пред војната.

Според проценките на агенцијата, светската побарувачка за нафта ќе се намали за 2,7 милиони барели дневно во 2026 година, на просек од 102,3 милиони барели, додека во 2027 година се очекува да се опорави за два милиони барели дневно.

Агенцијата предвидува дека глобалната понуда ќе се зголеми следната година за 6,6 милиони барели дневно, на 108,1 милиони барели, првенствено благодарение на понатамошното закрепнување на производството во земјите од Персискиот Залив.

Агенцијата сега проценува дека глобалниот вишок на пазарот на нафта следната година би можел да достигне околу 3,8 милиони барели дневно, пренесува Танјуг.

The post РАСТЕ ИЗВОЗОТ НА НАФТА ОД ПЕРСИСКИОТ ЗАЛИВ Први знаци на стабилизација на пазарот на сурова нафта appeared first on plusinfo.mk.