Централната команда на вооружените сили на САД (СЕНТКОМ) соопшти дека американските сили уништиле 16 ирански пловни објекти наменети за поставување мини во близина на стратешки важниот Ормуски Теснец.

Акцијата е извршена вчера, откако претходно американскиот претседател Доналд Трамп му се закани на Техеран со сериозни воени последици доколку се одлучи да го минира клучниот коридор за транспорт на нафта и гас.

„Американските сили уништија неколку ирански бродови, вклучително и 16 минополагачи во близина на Ормускиот Проток“, објави СЕНТКОМ на социјалната мрежа „Икс“.

Претходно, Трамп предупреди дека доколку се потврдат извештаите за иранските активности за минирање на протокот, ќе следува жесток одговор.

„Ако од која било причина бидат поставени мини и тие не бидат веднаш отстранети, воените последици за Иран ќе бидат на невидено ниво“, напиша тој на својата платформа „Трут соушл“ (Truth Social), иако додаде дека засега нема независна потврда дека преминот е веќе миниран.

Според извори на Си-Ен-Ен, Иран во изминатите денови поставил десетина мини во стратешките води. Експертите предупредуваат дека иако дел од флотата е уништен, Техеран сè уште располага со капацитети за поставување стотици мини долж бродските рути. Ормускиот Теснец, широк околу 55 километри, се смета за една од најкритичните точки во светот за снабдување со енергенси.

Британската трговска морнарица извести денеска дека проектил од непознато потекло погодил товарен брод во близина на Ормускиот теснец.

Инцидентот се случил 25 наутички милји (46 км) северозападно од Рас ал-Хаима во Емиратите, во близина на Ормускиот теснец. Нема жртви или повредени, а екипажот е безбеден, соопшти организацијата, објаснувајќи дека штетата сè уште се проценува.

The post САД ТВРДАТ ДЕКА ПОТОПИЛЕ 16 ИРАНСКИ БРОДОВИ ЗА ПОСТАВУВАЊЕ МИНИ Британците пријавија погоден трговски брод во Ормускиот Теснец appeared first on plusinfo.mk.

Иранската војска минатиот месец натоварила подводни мини на бродови во Персискиот Залив, со што дополнително се зголемиле загриженостите во Вашингтон дека Техеран се подготвува да го блокира Ормутскиот теснец по серијата израелски воздушни напади врз цели низ Иран, пренесуваат британските медиуми повикувајќи се на двајца американски претставници.

Според тие извори, кои зборувале под услов да останат анонимни поради чувствителноста на информациите, минирањето било откриено од американските разузнавачки служби, а се случило неколку дена по нападот на Израел врз Иран на 13 јуни.

Иако минираните бродови не се активирани во теснецот, ваквиот потег сугерира дека Техеран сериозно размислува за блокирање на еден од најважните водни патишта на светот, што би имало огромни последици по светската трговија и енергетскиот пазар.

Ормутскиот теснец е клучна артерија за околу 20% од глобалната трговија со нафта и гас. Секоја блокада може да предизвика нагло зголемување на цените на енергијата. Иако цените на нафтата паднаа за над 10% по американските напади врз иранските нуклеарни постројки, опасноста од прекин во снабдувањето останува висока.

На 22 јуни, иранскиот парламент го поддржа затворањето на теснецот, откако американската војска уништи три клучни ирански нуклеарни постројки. Одлуката не беше обврзувачка, но беше знак дека иранските власти сериозно го разгледуваат потегот, кој во последна инстанца би го одобрил Врховниот совет за национална безбедност.

Иако Техеран и претходно се заканувал со блокада на теснецот, таквиот чекор никогаш не бил реализиран. Американските претставници не исклучуваат можност минирањето да било намерна заблуда – дел од стратегија за психолошки притисок врз Вашингтон, без реална намера за напад.

Ормускиот теснец ги поврзува Персискиот со Оманскиот Залив, и во најтесниот дел е широк само 34 километри. Самата бродска линија по која минуваат танкерите е широка околу 3 километри во секој правец. Теснецот е од клучно значење за извозот на нафта од членките на ОПЕК, како Саудиска Арабија, Кувајт, Ирак и ОАЕ, како и за испораките на течен гас од Катар и Иран.

Иако иранската економија зависи од истиот теснец, Техеран во изминатите години вложувал значителни ресурси за да биде во состојба да го блокира при потреба – што го прави ова стратешко подрачје постојана точка на глобална тензија.

The post ИРАНСКА ЗАМКА ВО ПЕРСИСКИОТ ЗАЛИВ Техеран ќе го блокира Ормутскиот теснец, поставува мини кај најважниот нафтен премин appeared first on plusinfo.mk.