Нашата цел е да покажеме дека ова е чесна и одговорна професија, која отсекогаш била гордост на земјата. Денес, таа се извршува со почитување на законите и соработка со институциите изјави претседателот на Македонската асоцијација за рударство (МАР) Диме Петроски на средбата со министерката за енергетика, рударство и минерални суровини, Сања Божиновска.

Петроски посочи дека рударската професија последниве години е под силен јавен притисок, но и дека рудниците работат според законите.

– Заработката е важна, но уште поважни се угледот, добриот имиџ и јавната перцепција за рударството како дејност која рамноправно се грижи и за животната средина – рече тој.

Во однос на идниот развој на секторот, Петроски истакна дека е важно рударството да се третира како двигател на економскиот развој и благосостојбата на граѓаните.

– Оваа земја ни дала многу и тоа мора да го користиме одговорно – рече тој.

На средбата беше нагласена важноста од отворен дијалог и партнерство меѓу институциите и рударскиот сектор, со цел воспоставување доверба и создавање конструктивна атмосфера за идната соработка.

Министерката Божиновска рече дека Министерството е посветено да создаде подобри услови за работа во секторот, но и да ја гарантира заштитата на јавниот интерес и природните ресурси.

– Разбираме дека рударскиот сектор бара подобри услови за работа, но должни сме да обезбедиме фер правила, транспарентност и заштита на ресурсите. Ќе се работи на намалување на административните бариери и усогласување со европските стандарди – рече Божиновска.

а Божиновска нагласи дека поддршка ќе добиваат токму оние компании што инвестираат во еколошки прифатливи технологии и вложуваат во локалните заедници.

-Нашата цел е да изградиме фер и транспарентна регулатива која ќе гарантира и економски развој и заштита на животната средина. Во новите законски решенија и стратегии за рударство и геологија, приоритет е воспоставување на најстроги еколошки стандарди при истражувањето, експлоатацијата и преработката на минералните суровини, јакнење на обврските за рекултивација, поддршка на локалните заедници и обезбедување поголема контрола и транспарентност во секторот. Важен е и развој на човечкиот капитал. Особено значајна е соработката со универзитетите и стручните училишта за да изградиме нови генерации квалификуван кадар за рударскиот сектор – рече таа.

На средбата беше нагласена и потребата од нови инвестиции и модернизација со воведување современи технологии за почисто и поефикасно производство.

– -Современиот начин на живот носи зголемена потреба од минерали и ресурси, што ја прави модернизацијата и одговорното рударство неопходни – рече Петроски.

И двете страни се согласија дека вложувањето во локалните заедници и транспарентното работење се клучни за јакнење на довербата меѓу јавноста и рударските компании.

Како следни чекори, беше договорено дефинирање заеднички активности и динамика на соработката, меѓу кои формирање тематски работни групи, организирање редовни состаноци и подготовка на меморандум за соработка.

The post РУДАРСКИОТ СЕКТОР БАРА ДА НЕ СЕ ТРЕТИРА КАКО УНИШТУВАЧ НА ЕКОЛОШКАТА СРЕДИНА Божиновска вели ќе се поддржат само одговорните компании appeared first on plusinfo.mk.