77-годишен жител на Радовиш починал на нива во атарот на радовишкото село Ораовица, откако врз него паднала гранка од топола што ја сечел 73-годишен маж.

Несреќата се случила вчера околу 10:30 часот. Според пријавеното, Т.Б.(73) од Радовиш со моторна пила сечел топола на нива во атарот на Ораовица. Со него на нивата бил и Н.Т.(77), исто така од Радовиш.

Откако тополата паднала, гранка го погодила 77-годишникот, при што тој се здобил со тешки повреди и починал на местото на настанот.

Смртта ја констатирал лекар од Итната медицинска помош од Радовиш.

По настанот, полицијата го привела 73-годишниот Т.Б. За случајот е известен јавен обвинител, а по негова наредба телото на починатиот е предадено на обдукција.

Увид на местото на несреќата извршила екипа од СВР Струмица – ОВР Радовиш, а случајот се расчистува.

The post ГРАНКА УСМРТИ 77-ГОДИШЕН РАДОВИШАНЕЦ Загинал додека со 73-годишник биле на нива кај Ораовица appeared first on plusinfo.mk.

Раиф Диздаревиќ, поранешен претседател и член на Претседателството на СФРЈ, истакнат југословенски дипломат, политичар и учесник во НОБ, почина денеска во Сараево.

Диздаревиќ беше член на Претседателството на СФРЈ од Босна и Херцеговина. Беше учесник во НОБ и општествено-политички работник на СФР Југославија.

Извршуваше голем број високи државни функции – претседател на Претседателството на СР БиХ од 1978 до 1982 година и претседател на Собранието на СФРЈ од 1982 до 1984 година како и фукцијата сојузен секретар за надворешни работи (1984–1988), каде што ја претставуваше Југославија на меѓународната сцена и одржуваше блиски врски со Движењето на неврзаните. Роден беше на 9 декември 1926 година во Фојница.

The post РАИФ ДИЗДАРЕВИЌ ПОЧИНА НА 100-ГОДИШНА ВОЗРАСТ Беше висок функцонер во СФРЈ appeared first on plusinfo.mk.

Клинички центар Штип синоќа пријавил во СВР Штип дека кај нив, со влошена здравствена состојба, околу 18:20 часот бил донесен Д.К.(69) од Штип, кој набргу потоа починал.

По барање на семејството на телото на починатиот ќе биде извршена обдукција, информира СВР Штип.

The post ШТИПЈАНЕЦ ПОЧИНА КРАТКО ПО ПРИЕМОТ ВО БОЛНИЦА Семејството бара обдукција appeared first on plusinfo.mk.

На булеварот „Туристичка“ во Охрид вчеравечер, во 22.30 часот лишен од слобода е И.М.(32) од Охрид, информира СВР Охрид.

„Управувајќи патнички автомобил „ренџ ровер” со чешки национални ознаки, И.М. не го сопрел возилото по даден знак од полициската патрола туку избегал и по дополнително преземени активности, бил застанат.

Притоа, полициските службеници во возилото го забележале С.П. (44) од Охрид кој веднаш проголтал опаковка со наркотична материја по што, му се влошила здравствената состојба. Од страна на полициските службеници, повикана е Итната медицинска помош со чие возило С.П. е пренесен во Општата болница во Охрид. Таму, и покрај преземените медицински мерки, тој починал.

По наредба на јавен обвинител, денеска ќе биде извршена обдукција во Општата болница во Битола. По насоки на јавен обвинител, се преземаат мерки за целосно расчистување на настанот“ – соопшти полицијата.

The post ОХРИЃАНЕЦ ПРОГОЛТАЛ ПАКЕТЧЕ ДРОГА И ПОЧИНАЛ! Го криел од полицијата appeared first on plusinfo.mk.

Македонија денес се простува и тагува по својот омилен пејач, глас што повеќе од три децении беше саундтрак на љубовите, разделбите, младоста и спомените на неколку генерации. Човекот, кој, како што напиша една обожавателка, „покажа како звучи љубовта на македонски“.

По веста дека по кратко боледување почина Владо Јаневски на 66-годишна возраст, социјалните мрежи се претворија во место на колективно сеќавање. Наместо формални пораки, илјадници луѓе почнаа да објавуваат стихови од неговите песни, фотографии од концерти, снимки од стари настапи и лични приказни поврзани со музиката што ја создаваше.

Меѓу првите што јавно се простија беше Калиопи, која со емотивни зборови се збогуваше со својот долгогодишен колега и пријател.

„Си замина тивко, без поздрав… кога беше најпотребен. Со тебе заминува едно време, а остануваат песните што ќе нè потсетуваат на твојата душа“, напиша таа.

Слични пораки пристигнаа и од бројни музичари, актери, новинари и јавни личности, кои не зборуваа само за неговата музика, туку и за човекот зад неа – скромен, духовит, образован и ненаметлив. Во нивните сеќавања често се повторуваше истата мисла: Македонија изгуби еден од своите најголеми автори.

Градоначалникот на Скопје Орце Ѓорѓиевски сподели сведоштво за ширината на Владо Јаневски, кој со само еден збор му го отстапил правото на Ѓорѓиевски да го користи неговиот безвременски хит „Ова е само наше Скопје“ да биде употребен како еден вид химна во неговата кампања.

Но најемотивни беа реакциите на обичните луѓе. На социјалните мрежи илјадници обожаватели ги споделуваа песните со кои растеле и ги одбележале најважните моменти во животот.

„Нема генерација што не пораснала со барем една песна на Владо.“

„Замина човекот што нè научи како звучи љубовта на македонски.“

„Вакви автори не се раѓаат често.“

Ова беа само дел од пораките што се ширеа низ интернетот во текот на денот.

„Евергрин“, „Ако не те сакам“, „Две души и месечина“, „Некогаш и негде“, „И тогаш некоја будала“, „Еден бакнеж“, „Дома си е дома“… За многумина тие не се само хитови, туку песни што ги следеле низ целиот живот – од првата љубов, преку свадбите, до тивките ноќни возења кога токму неговиот глас бил најдобро друштво.

Владо Јаневски беше еден од ретките домашни кантавтори чии песни успеаја да го надживеат времето. Роден во Скопје, дипломиран филолог, музичар што свиреше повеќе инструменти и автор на десетици безвременски композиции, тој остави неизбришлива трага не само на македонската, туку и на регионалната поп-сцена. Во 1998 година стана и првиот официјален претставник на независна Македонија на Евровизија со песната „Не зори зоро“. За многумина ова беше едно од најдостоинствените македонски претатавувања на Евросонг, со неговиот глас, држење и манири, остави незаборавен впечаток, а македонската публика се гордееше со својот претставник, без оглед на постигнатиот пласман.

Неговата музика никогаш не се потпираше на минливи трендови. Наместо тоа, носеше поезија, мелодија и искреност што не стареат. Затоа неговите песни ги сакаа и родителите и нивните деца – ретка привилегија што ја имаат само најголемите автори.

Во часовите по веста за неговата смрт, музиката на Владо Јаневски повторно одекнуваше во автомобилите, домовите, кафулињата и на радиостаниците. На социјалните мрежи многумина признаваа дека не можат да слушнат ниту една негова песна без да им се насолзат очите.

Можеби токму еден краток коментар, кој илјадници пати беше споделен, најдобро го опиша чувството што денес владее во Македонија:

„Луѓето си заминуваат, но има песни што одбиваат да остарат.“

Токму такво наследство остава Владо Јаневски – музика што ќе продолжи да живее долго откако ќе стивнат аплаузите. Затоа што големите уметници не исчезнуваат кога ќе заминат. Тие продолжуваат да живеат секогаш кога некој ќе ја пушти нивната песна.

The post ЗАМИНА ЧОВЕКОТ ШТО НЀ НАУЧИ КАКО ЗВУЧИ ЉУБОВТА НА МАКЕДОНСКИ Македонија со тага се простува од својот вечен романтичар appeared first on plusinfo.mk.

Телото на 64-годишен скопјанец било пронајдено синоќа во летниковец на Средно Водно, на местото познато како „Видиковец“, откако претходно бил пријавен за исчезнат.

Станува збор за Б.П. од Скопје, кој според пријавата се оддалечил од својот дом пред да биде пронајден без знаци на живот.

На местото интервенирала Итна медицинска помош, чиј лекар ја констатирал смртта.

По наредба на јавен обвинител, телото на починатиот е дадено на обдукција со цел да се утврдат причините за смртта.

The post МРТОВ СКОПЈАНЕЦ ПРОНАЈДЕН КАЈ „ВИДИКОВЕЦ“ Телото најдено во летниковец на Водно appeared first on plusinfo.mk.

Македонскиот актер Кирил Поп Христов-Кили почина вчера на 58-годишна возраст во Еквадор, каде живееше од 2014 година.

Кирил Поп Христов-Кили беше македонски актер кој остави значаен белег во театарот, филмот и телевизијата. Роден е на 30 јули 1967 година во Скопје, каде што го поминал и поголемиот дел од својот живот и професионална кариера.

Дипломирал во 1989 година на отсекот за актерска игра, во класата на професор Љубиша Георгиевски. По дипломирањето започнал активно да работи во театарот и постепено се етаблирал како актер со силно сценско присуство. Од 1993 до 2014 година бил член на ансамблот на Македонски народен театар. Настапил во бројни претстави како „Ослободување на Скопје“, „Ревизор“, „Народен пратеник“ и други.

Покрај театарската сцена, Поп Христов оставил трага и во филмската уметност. Публиката го памети по неговите улоги во македонските филмови „Тетовирање“, „Бал-кан-кан“ и „Панкот не е мртов“.

Неговото заминување претставува загуба за македонската културна сцена, а колегите и публиката ќе го паметат како посветен актер кој со својата работа и талент остави значајна трага во театарот и филмот

The post ПОЧИНА АКТЕРОТ КИРИЛ ПОП ХРИСТОВ – КИЛИ Имаше 58 години appeared first on plusinfo.mk.

По кратко боледување денеска во Скопје почина долгогодишен културен работник Никола Глигоров, директор на Дирекцијата за култура и уметност на град Скопје, објави дирекцијата на својата Фејсбук-страница.

„Неговата посветеност и придонес во развојот на културниот живот на Скопје ќе останат трајно врежани во нашата организација и во културната меморија на градот“ – се вели во соопштението.

Никола Глигоров беше ангажиран на организацијата на повеќе фестивали и манифестациии, како што се: Скопско лето, Музичката есен, Денови на европско Скопје, Матурска парада, како и на дочеците на на Нова Година на плоштадот Македонија.

The post ПОЧИНА ДОЛГОГОДИШНИОТ КУЛТУРЕН РАБОТНИК НИКОЛА ГЛИГОРОВ Беше директор на Дирекцијата за култура и уметност на град Скопје appeared first on plusinfo.mk.

Легендарниот актер и режисер Роберт Дувал почина на 95-годишна возраст. Неговата сопруга Лусијана, со која беше во брак повеќе од две децении, ја соопшти веста преку објава на Фејсбук. Таа напиша дека тој починал во неделата, мирно во својот дом, опкружен со љубов и спокој.

– Вчера се простивме од мојот сакан сопруг, драг пријател и еден од најголемите актери на нашето време. Боб замина мирно, дома, опкружен со љубов и топлина. За светот тој беше добитник на Оскар, режисер и раскажувач на приказни. За мене, тој беше сè – напиша таа.

Таа додаде дека неговата страст кон актерството била еднакво силна како и љубовта кон ликовите што ги толкувал, кон добрата трпеза и кон разговорите во друштво.

– Во секоја од бројните улоги Боб внесуваше целосна посветеност, оставајќи траен белег и сведоштво за човечкиот дух. Ви благодариме за поддршката што му ја дававте низ годините и што ни овозможивте простор и мир да ги негуваме спомените што ги остави зад себе – стои во објавата.

Препознатлив по своето мирно, но силно присуство на екранот, Дувал имаше кариера што се протега низ седум децении. Филмскиот пат го започна во 1962 година со улога во „Да се убие птицата подбивница“, а потоа следуваа низа улоги што ја освоија критиката и публиката.

Во текот на кариерата доби бројни награди и номинации. Единствениот Оскар го освои во 1984 година за улогата во драмата „Нежни милости“ од 1983 година, каде го толкуваше ликот на кантри-пејач во животна криза. Меѓу неговите најпознати улоги се Том Хејген, советникот на Вито Корлеоне, во „Кум“ и „Кум 2“, како и потполковникот Бил Килгор во „Апокалипса сега“.

Во подоцнежните години беше поретко присутен на филмското платно, но признанијата не изостанаа. Во 2015 година, на 84-годишна возраст, ја доби својата седма номинација за Оскар за улогата во филмот „Судијата“.

The post ПОЧИНА ЛЕГЕНДАРНИОТ АКТЕР РОБЕРТ ДУВАЛ Остави траен белег со своите улоги appeared first on plusinfo.mk.

Почина Коста Балабанов, доајен на македонската историја на уметноста и археологија, автор на повеќе од 200 стручни и научни трудови посветени главно на средновековната уметност, филмски и телевизиски сценарист. Долги години беше почесен конзул на Јапонија во Република Македодонија. Имаше 96 години.

Роден е на 5 април 1929 го Штип. Од 1953 работеше во Централниот завод за заштита на споменици од културата, во својство на историчар на уметноста-конзерватор. Во 1955 дипломира историја на уметноста со археологија на Филозофскиот факултет во Скопје.

Како стручњак за средновековната уметност, во 1955 ја објавува својата прва посебна книга посветена на истражувањата на Топличкиот манастир, Демир Хисар.

Со филм почнува да се занимава како автор на сценарија и на текстови за документарни филмови од областа на археологијата и средновековната уметност на територијата на Македонија. Соработувал со „Вардар филм“ и ТВ Скопје (МРТВ) и според неговите текстуални подлоги реализирани се 32 документарни филма (или епизоди), често синхронизирани на странски јазици.

Од 1981 работеше во Републичкиот завод за заштита на спомениците, а во 1994 беше именуван за почесен генерален конзул на Јапонија во Македонија и за директор на Јапонскиот информативен центар во Скопје.

Во 1989 година е пензионира. За своите активности има добиено бројни награди и признанија.

The post НА 96 ГОДИНИ ПОЧИНА АРХЕОЛОГОТ КОСТА БАЛАБАНОВ Зад себе остави 32 документарни филмa appeared first on plusinfo.mk.