Претседателот на Србија Александар Вучиќ оцени дека светот е на почетокот на голема војна што би можела значително да се прошири. Тој ја презентираше својата проценка во поткастот „MD MEETS“ на извршниот директор на германската компанија Axel Springer, Матијас Депфнер.

Вучиќ одговараше на прашањето дали светот е на работ на значително поголем конфликт или „војна меѓу Европа и автократи како Русија“.

– Ако ме прашате што лично мислам, а нема да објаснам зошто, мислам дека сме на почетокот на голема војна. Затоа се надевав дека некој досега ќе направеше нешто за да воспостави мир. Тоа не се случи и нема да се случи наскоро. Тоа значи дека сме на работ на многу, многу поголема војна. Мразам да го кажам тоа – рече Вучиќ.

Идни глобални односи

Вучиќ оцени дека во иднина државите ќе се стремат кон поголема независност и намалена зависност од надворешни фактори. Тој ги наведе САД и Кина како клучни играчи, а Европската Унија како потенцијален трет столб.

– Од едната страна имате две големи сили, САД и Кина. Постои и трет столб, кој е или барем треба да биде – ЕУ. Не сум сигурен дали Европа ќе успее да се наметне како тој трет столб, иако се надевам дека ќе успее. Како четврти фактор се Русија, Индија и други огромни континентални или регионални сили – рече тој.

Вучиќ, исто така, коментираше за формирањето нови сојузи. Тој верува дека сојузот на Турција, Пакистан и Саудиска Арабија ќе создаде „сосема различни поделби и атмосфера во целиот свет“.

На прашање за идните улоги на Европа, Кина и Америка, тој одговори со прогноза за следните 5 години.

– Би рекол дека сè уште ќе бидеме во процес на „дефинирање на себеси со поразорни средства“. Добро е што сè е дигитализирано, па некој ќе може да ги процени моите зборови после 6 години – рече Вучиќ.

За посетата на Зеленски и односите со Русија

На тврдењата дека посетата на украинскиот претседател Володомир Зеленски е „предавство на партнерството со Русија“, Вучиќ одговори дека неговата цел не е да им угоди на никого освен на сопствениот народ.

– Не сум тука да им угодам на Русите, Украинците или на некој друг освен на Србите. Не разговарав за доаѓањето на Зеленски со рускиот претседател Владимир Путин, бидејќи не ги објавувам моите политички планови на никого. Србија не е ничија марионета – додаде тој.

Тој нагласи дека истото важи и за средбите на Путин со американскиот претседател Доналд Трамп, претставникот Стив Виткоф, Џаред Кушнер или европските претставници.

– Ние сме независна земја и ќе останеме такви во иднина – рече Вучиќ.

„Го гледав Путин неколку пати годишно“

Зборувајќи за неговиот однос со Путин, Вучиќ рече дека се гледале неколку пати годишно.

– Имавме меѓусебно почитување. Разговарав со него, не знам точно, 21 или 22 пати, и често ја посетував Русија. И тој доаѓаше во Србија – рече Вучиќ.

Тој изјави дека Србија и Русија имаат традиционални врски кои секогаш ќе постојат и го спомена заедничкото одбележување на Денот на победата на 9 мај поради улогата на руската армија во ослободувањето на Србија.

Тој го опиша Путин како интелигентен и силен човек.

– Не знам дали му се допаѓа да го чуе тоа или не, но можеше да слушне различни ставови. Барем беше подготвен да ме слушне кога размислував поинаку – рече Вучиќ.

Прогноза за војната во Украина

Кога беше прашан за целите на Путин во војната, Вучиќ рече дека не може да зборува во негово име.

– Можеби имам некои свои предвидувања, но би било неодговорно јавно да зборувам за тоа – рече тој.

Сепак, додаде дека верува оти Путин сака да ја преземе контролата врз целиот регион Донбас и дека тогаш ќе биде подготвен да ја заврши војната. Кога водителот изјави дека Украина се покажала посилна од очекуваното, Вучиќ се согласи.

Тој оцени дека раководствата на Украина и на Русија се под огромен притисок.

– Не е лесно за никого кога губите десетици или стотици војници секој ден – рече тој.

Неговата прогноза не е оптимистичка.

– Не го гледам крајот на војната оваа година, па дури ни пред следната пролет. Ќе ви кажам зошто: верувам дека едната страна мора да биде супериорна и некако да победи, за да заврши војната. Инаку, со оглед на сегашниот ќор-сокак, не гледам никаква можност за компромис – рече тој.

Како причина ја наведе таа што никој не сака мир.

– Сите сакаат да ја видат другата страна поразена.

Повик за компромис

Вучиќ предупреди дека не треба да се бара пораз на Русија и повика на прекин на огнот.

– Не би чекал руските трупи да бидат целосно исцрпени или момент кога ќе веруваме дека Русија ќе стане значително послаба поради оваа војна. Не знам како Русија може да биде поразена бидејќи не верувам дека тоа ќе се случи лесно. Русија е нуклеарна сила и не може да биде нападната од кој било. Ни треба компромис, а не пораз на која било страна – рече тој.

Прашан за руските закани кон Европа, Вучиќ одговори дека Европа исто така води „хибридна војна против Русија“.

– Ја вооруживте Украина и воведовте санкции врз Русија. Финансиски ја поддржувате Украина – што е ова ако не хибридна војна – праша тој.

Тој се согласи дека Украина не ја започнала војната и дека жртвите и сторителите не треба да се мешаат.

„Ја избравме српската столица“

Вучиќ нагласи дека разговорите со Зеленски биле корисни за двете земји, а се разговарало и за учеството на украинска компанија во инфраструктурни проекти во Србија.

– Знам дека никој не ја сака ваквата политика. Сите велеа: „Имате премногу столчиња, мора да изберете едно“. Да, ја избравме. Тоа е српската столица. Имаме своја стратешка цел, а тоа е полноправно членство во Европската Унија – нагласи тој.

На прашање зошто го покани Зеленски во Белград, тој одговорил дека и Русите и Украинците се традиционални пријатели на Србија, а Украина е партнер со кој трговската размена расте.

– Западните медиуми претеруваат кога ја опишуваат Србија како руска марионета. Тоа не е вистина, ние сме суверена нација – рече тој.

The post НА ПОЧЕТОКОТ СМЕ НА ГОЛЕМА ВОЈНА Никој не направи ништо за да воспостави мир appeared first on plusinfo.mk.