Силно невреме повторно ја погоди Далмација, каде циклон над Јадранското Море донесе пороен дожд, грмотевици и силен јужен ветер, а морето почна забрзано да се крева и да навлегува по крајбрежјето.

Најкритична состојба вчеравечер беше забележана во Каштела, Сплит и Трогир, каде поради циклонската плима нивото на морето значително се зголеми. Според локалните медиуми, врвот на влошувањето на времето бил регистриран во текот на ноќта.

Невремето веќе остави последици и на северот. Во Истра врнеше дожд проследен со грмотевици, а локално наврнаа околу 20 литри дожд на квадратен метар. Во исто време, силен јужен ветер дува по целиот Јадран, со бурни налети на одделни места.

Најсилни удари од југ се измерени во северна Далмација и северниот дел од Јадранот, каде налетите достигнале околу 90 километри на час. И во Сплит ветерот дуваше многу силно, што доведе и до прекини во поморскиот сообраќај.

Иако атмосферскиот притисок е низок, експертите велат дека не се очекуваат екстремни плими како во претходните недели. Сепак, морето моментално е околу 60 сантиметри над просекот, а засилениот јужен ветер создава високи бранови, особено на изложените делови од брегот.

Под влијание на циклонот, силна плима е забележана и на островот Чиово, како и во Сплит и Каштела, каде морето продрело подлабоко од вообичаено во крајбрежната зона.

Особено погоден беше долно-каштеланскиот брег, каде водата се излеа на патот и во пристаништето во Каштел Нови, како и на плажата Габине. Според сведоштва на жители, најсилните налети на југ биле вчера околу 17 часот, по што граѓаните почнале да поставуваат импровизирани брани од штици и вреќи со песок.

Метеоролозите предупредуваат дека во текот на ноќта налетите на јужен ветер на море може да достигнат и до 100 километри на час. Невремето веќе се доближува до Задар, а силниот фронт се движи кон југ.

За петок навечер се најавува нагла промена — ветерот ќе сврти на трамонтана, со продор на студен воздух. Поради падот на температурите, можно е дождот да премине во снег, а лапавица се очекува и во далматинската заднина.

Според прогнозите, во текот на петокот времето постепено ќе се смирува, особено во вториот дел од денот, што би можело да означи почеток на постабилен период.

The post 📽️ ДРАМА НА ЈАДРАНСКИОТ БРЕГ Жители креваат бариери додека морето расте appeared first on plusinfo.mk.