Забележан е раст од  околу 120%  на трансакциите на платформата за интероперабилност, информира денеска министерот за дигитална трансформација, Стефан Андоновски.

Тоа, според него, покажува дека институциите сè повеќе ги користат дигиталните канали за размена на податоци и дека системот постепено станува реална поддршка за поефикасна администрација.

-Интероперабилноста не е само технички проект. Таа е економска мерка, мерка за подобра деловна клима и начин да им помогнеме на компаниите да бидат попродуктивни, а институциите побрзи, попрецизни и поодговорни – рече Андоновски на отворањето на Третата регионална конференција на сметководители и овластени сметководители под мотото „Генерација со визија – Професија со иднина”..

Тој додаде дека секое намалување на административниот товар директно ја олеснува работата на сметководителите и на компаниите што тие ги поддржуваат, имајќи предвид дека нивната секојдневна работа е поврзана со рокови, документи, извештаи, финансиски податоци, даночни обврски, регистрациони постапки и комуникација со повеќе институции.

Андоновски  посочи дека платформата за интероперабилност е еден од клучните механизми преку кои институциите се поврзуваат, нивните системи меѓусебно комуницираат, а податоците што веќе постојат во една институција можат, согласно закон и со соодветна заштита, да се користат од друга институција.

Посебен акцент во обраќањето тој стави и на Националниот портал за услуги — uslugi.gov.mk, кој, како што истакна Андоновски, треба да биде централна точка преку која граѓаните и компаниите ќе можат полесно, побрзо и појасно да пристапуваат до услугите што ги нудат институциите.

– Националниот портал не треба да биде само дигитална табла со услуги. Тој треба да биде влезна врата кон поинаква јавна администрација — администрација ориентирана кон корисникот, кон поедноставување на постапките и кон реална услуга – рече Андоновски.

Министерот го поздрави фактот што ИСОС, како професионална организација, активно ја користи платформата за интероперабилност, но и услугите од Националниот портал како дигитална платформа за пристап до услугите што ги нуди за своите членови. Тој оцени дека тоа е позитивен пример што треба да биде поттик и за други организации и институции да ги дигитализираат своите услуги и да ги направат подостапни за корисниците.

The post РАСТ ОД 120% НА ТРАНСАКЦИИТЕ НА ПЛАТФОРМАТА ЗА РАЗМЕНА НА ПОДАТОЦИ МЕЃУ ИНСТИТУЦИИТЕ Андоновски смета дека ова директно ја олеснува работата на компаниите appeared first on plusinfo.mk.

Ќе се воведе единствен електронски број на граѓанинот, откако вчера на седница на Владата биле прифатени измени на Законот за Централен регистар на население – соопшти денеска министерот за дигитална трансформација Стефан Андоновски на панелот „Од интероперабилност до институционална отпорност, за искористување на потенцијалот на поврзаните податоци“.

– Тоа ќе биде репликација и во единствениот даночен број за граѓани, што значи ќе имаме анонимен број што ќе поврзува и ќе дава информација за секој граѓанин за да ги заштитиме граѓаните. Анонимизиран матичен број – истакна Андоновски.

Тој најави активности за поголема искористеност на Платформата за интероперабилност на Министерството за дигитална трансформација на која сега се приклучени само 78 државни институции, иако тоа е задолжително. За разлика од претходно, за тоа веќе е предвиден инспекциски надзор и прекршочни одредби. Тој очекува наскоро на платформата да се приклучат и коморите на нотарите, извршителите, адвокатите, а ги повика и приватните компании од кои досега има само десетина.

Според Андоновски, со надградбите од минатата година платформата се полесно се инсталира и користи на најбезбеден можен начин.

– Со Платформата за интероперабилност за разлика од многу држави ние веќе ја имаме технолошката основа која подразбира комуникација помеѓу себе. Има и поразвиени држави од нас кои ја немаат оваа платформа и за секоја услуга развиваат билатерални врски една со друга институција. Тоа кај нас е олесено и со зголемување на бројот на институции го подобруваме процесот на многу едноставен начин. Ако еднаш се прикачила УЈП на платформата за нтероперабилност може да го користи за многу различни процеси – рече Андоновски.

Според него, проблемот е во однесувањето на институциите, а не во приватниот сектор. Користењето на оваа платформа е задолжително за сите институции, но како што рече, тоа што го замерува на претходниците е што во ниту еден закон досега немало инспекциски надзор и прекршочна обврска за институциите доколку не се приклучат и не разменуваат податоци.

За поддршка на процесот за поголема интероперабилност направена е набавка на хардверска ифраструктура која се инсталира неделава со што според министерот ќе се забрза размената на податоци и безбедноста на системот.

The post ЌЕ СЕ ВОВЕДЕ ЕДИНСТВЕН ЕЛЕКТРОНСКИ БРОЈ НА ГРАЃАНИНОТ Ќе биде како и матичниот број, само анонимен appeared first on plusinfo.mk.