Гувернерот на Народната банка, Трајко Славески, во интервју за Радио Слободна Европа (РСЕ) најави значителни олеснувања за граѓаните во делот на банкарските трошоци. Според него, од 2026 година ќе се воведат законски измени со кои ќе се намалат провизиите и трошоците за користење на основни банкарски услуги.

– Нашите плати и заштеди се кај банките и таму треба да има фер однос кон граѓаните. Големите и средните банки веќе почнаа да ги намалуваат провизиите, но ќе одиме чекор понатаму. Планираме платежна сметка за основни функции која ќе овозможува плаќање на сметки и подигање готовина со многу ниски или бесплатни трошоци – изјави Славески.

Тој појасни дека граѓаните ќе можат да подигнуваат готовина од банкомати без провизија четири пати месечно, со ограничена сума до 2.000 денари. Дополнително, плаќањата преку мобилно и електронско банкарство ќе бидат значително поевтини, што ќе обезбеди полесен пристап до основни банкарски услуги и ќе ги намали трошоците за корисниците.

– Ова ќе важи за секој граѓанин и очекуваме ефективност од почетокот на 2026 година – додаде гувернерот.

Славески истакна дека овие мерки се дел од пошироката стратегија за подобрување на пристапот до финансиски услуги и намалување на трошоците за граѓаните, додека во исто време каматните стапки остануваат ниски поради високата ликвидност во банкарскиот сектор.

– Со стабилизирање на инфлацијата и нејзино намалување под три проценти, граѓаните ќе имаат појасни и поодржливи услови за користење на кредити и други банкарски услуги – рече Славески.

The post БАНКАРСКИТЕ ТРОШОЦИ СЕ НАМАЛУВААТ ОД 2026 Гувернерот Славески најавува бесплатни повлекувања и поевтини услуги appeared first on plusinfo.mk.

Народната банка објави посебна информативна брошура за граѓаните заради нивно информирање за можностите за отворање и користење на платежната сметка со основни функции.

„Новиот Закон за платежни услуги и платни системи, којшто стапи на сила на 1 јануари 2023 година, покрај тоа што содржи одредби коишто ќе ја поттикнат конкурентноста кај давателите на платежни услуги, предвидува и повеќе решенија за подобра заштита на потрошувачите. Меѓу нив е и воведувањето на платежната сметка со основни функции, преку која граѓаните ќе можат да извршуваат платежни трансакции за намирување на вообичаените обврски или пренос на парични средства на друго лице.

Платежната сметка со основни функции овозможува неограничен број уплати и повлекување готовина и неограничен број платежни трансакции во денари, но не е дозволено пречекорување, односно навлегување во таканареченото „минусно салдо“.

За користењето на оваа платежна сметка се плаќа надоместок, но висината на вкупниот месечен надоместок не смее да биде повисока од 0,1% од подвижниот просек на просечната месечна исплатена нето-плата во земјата за претходните 12 месеци. Во моментот овој надоместок изнесува околу 31 денар во согласност со последните податоци објавени од страна на Државниот завод за статистика за исплатена нето-плата во земјата. Платежната сметка со основни функции ќе биде без надоместок за група корисници на законски права (законска издршка, надоместок на штета настаната поради нарушување на здравјето или намалување, односно губење на работната способност и надоместок на штета за загубена издршка поради смрт на давателот на издршката; надоместок поради телесно оштетување според прописите за инвалидското осигурување; парична помош од социјална заштита; привремена невработеност; додаток на деца, стипендија, кредит и помош на ученици и студенти).

Граѓаните може да бараат трансформирање на „обичната“ платежна сметка во платежна сметка со основни функции кај својата банка или штедилница. Исто така, банките и штедилниците се должни бесплатно да ги информираат граѓаните за платежните услуги и надоместоците коишто ги наплатуваат за користењето на платежната сметка со основни функции, за што се должни да им дадат информативен документ пред склучување рамковен договор за отворање на платежната сметка со основни функции“, велат преку соопштение од Народната банка.

The post НЕМА ОДЕЊЕ ВО МИНУС Народна банка објави брошура за користење платежната сметка appeared first on plusinfo.mk.

Како што соопшти НБ, една од новините е  воведување платежна сметка со основни функции, преку која граѓаните ќе можат да извршуваат платежни трансакции за намирување на своите вообичаени обврски или трансфер на парични средства на друго лице.

„За извршувањето на овие трансакции, граѓаните ќе плаќаат разумна висина на надоместоци, не повисоки од 0,1% од просечната исплатена нето-плата во земјата во претходните дванаесет месеци (или околу 30 денари), во кои ќе биде вклучено месечното одржување на сметката и најмалку пет платежни трансакции месечно кон примач кај истата банка. Платежната сметка со основни функции ќе биде без надоместок за корисниците од ранливите категории“, се наведува во соопштението.

Со Законот за платежни услуги и платни системи, додаваат од НБ, се предвидуваат и повеќе други механизми за заштита на потрошувачите поврзани со надоместоците.

„Склучување унифицирани рамковни договори и предвидени видови надоместоци, ограничување на заменските надоместоци за плаќање со картички, поголема транспарентност и споредливост на надоместоците за услуги поврзани со платежната сметка. Исто така, во областа на платежните услуги би се вклучиле нови даватели на платежни услуги, што би придонесло за намалување на цените за услугите“, се наведува во соопштението.

The post СЕ ВОВЕДУВА ПЛАТЕЖНА СМЕТКА СО ОСНОВНИ ФУНКЦИИ ЗА ТРАНСФЕР НА ПАРИ Граѓаните ќе плаќаат 30 денари надоместок за 5 транскации месечно appeared first on plusinfo.mk.