Претседателот на Левица Димитар Апасиев денеска од Уставниот суд побара да донесе итна мерка и да го стопира Упатството за радиодифузерите за локалните избори 2025, што го донесе АВМУ, со кои се определува времето за рекламирање на политичките партии во медиумите за време на кампањата, а според кое, Левица нема да добие време за рекламирање.

Според Апасиев, ова е скандалозното и досега невидено однесување на органите на власта кон една парламентарна политичка партија.

– Од сите вонпарламентарни и парламентарни партии за прв пат во историјата на независна Македонија само на една партија ѝ е забрането политичко претставување, односно платено рекламирање во приватните медиуми. Скандалот да е уште поголем – не само што ни се забранети државните пари кои по закон ни следуваат, туку и доколку би имале наши пари, ние не можеме да се рекламираме, затоа што со едноставно пропуштање, односно неспомнување во четирите законски предвидени пакети, ние сме изоставени комплетно како да не постоиме на политичката сцена – рече пратеникот Апасиев.

Според него, премиерот Христијан Мицкоски му пратил абер на директорот на АВМУ, Зоран Трајчевски да го донесат упатството за „да ѝ ги скратат крилата на Левица“.

– Ова нема да помине, напротив, ќе има обратен ефект на бумеранг, бидејќи народот гледа како на една партија ѝ се прави класична неправда! Ќе поднесеме тужба со времена мерка за стопирање на ова упатство и бараме од Уставниот суд веднаш уште денеска да се произнесе – рече Апасиев,

Тој додаде дека овој случај ќе заврши во судот во Стразбург, но тоа би траело две-три години.

Апасиев објасни дека станува збор за искривоколчено толкување на членот 75-ѓ од Изборниот законик кој предвидува двете најголеми партии во власта и двете во опозицијата да добијат најмногу секунди за рекламирање, но тоа не значи дека треба да добијат сè.

– Тие толкуваат и се држат за зборот „двете“, а ние се држиме за зборовите „најмногу“ и „може“. Значи, може, но не мора да добијат сè, затоа што законот треба да се приспособи на реалноста, а не реалноста на законот. Во овој случај имаме и трет субјект – ЗНАМ во власта и Левица во опозицијата, но утре може да има и четврти и петти субјект и не може секогаш да се менува законот. Треба да се толкува за да се приспособи на реалноста. Тоа постоечкиот закон го дава како можност, со термините „може“ и „најмногу“. Пропорционално, најголемиот дел од тие предвидени минути треба да ги земат тие, а остатокот ние, Но, тие го толкуваат ригидно, граматички, и се држат за зборот „двете“ и одбиваат да најдат решение со кое добиваат сите партии.

Апасиев предлага наместо 240-те секунди што им следат на двете најголеми партии во опозицијата да се делат 120 со 120 секунди, да се поделат 120 со 80 со 40. Тоа би значело дека најголемата опозициска партија не губи ништо, а втората по големина би изгубила 40 секунди, кои би ги добила третата.

– Така треба да се толкува, тоа е правилното правно толкување, а тие одбиваат да го сторат тоа. За тоа ќе има штета, но ќе има кривични пријави против персоналниот состав на АВМУ. Ќе има тужба за отштета лично против сите членови на АВМУ, со барање на солидарна одговорност, така што, процесот ќе трае, а за овие избори ние ќе бидеме оштетени – рече Апасиев.

Тој додаде и дека вчера партијата поднела барање за итни измени на Изборниот законик, но, претседателот на Собранието Африм Гаши, како што рече, „абер нема да свика седница“.

Според член 75-ѓ од Изборниот законик, телевизиите и радијата можат во секој час програма максимално да емитуваат 9 и пол минути политички реклами. Од нив, 4 минути се за двете најголеми владејачки партии според освоени пратеници во парламентот на последните избори, а 4 минути се за двете најголеми парламентарни опозициски партии. Една минута реклами е наменета за партиите кои освоиле пратеници, но помалку од 5 колку што се потребни за формирање пратеничка група, а 30 секунди се наменети за партиите кои не се застапени во Парламентот.

Овој член има системска слабост и не ги предвидува партиите кои не се меѓу двете најголеми на власт или двете најголеми во опозиција. Во актуелниот пратенички состав ЗНАМ има 5 пратеници и е во власта, а Левица со 6 пратеници е во опозицијата.

Истиот принцип на поделба на минутите во ИЗ е предвиден и за рекламирањето во порталите и во весниците.

Агенцијата за аудио и аудиовизуелни медиумски услуги денеска соопшти дека го донела Упатството за радиодифузерите за Локалните избори 2025.

Со Упатството се опфатени правилата за лимитите за платеното политичко рекламирање, означувањето на нарачателот на рекламирањето, распределбата на времето во вести кај Јавниот радиодифузен сервис, бесплатното политичко претставување на Собранискиот канал и обезбедувањето пристапност на содржините за изборниот процес за лицата со попреченост, соопшти Агенцијата.

„За време на изборната кампања за првиот круг на гласање, радиодифузерите може да емитуваат вкупно 9 минути и 30 секунди дополнително време за политичко рекламирање на реален час емитувана програма. Во Упатството е точно утврдена распределбата на овие минути меѓу учесниците во изборниот процес“, соопшти АВМУ.

По 120 секунди ќе добијат владејачките ВМРО-ДПМНЕ и Вреди, како и двете најголеми опозициски партии СДСМ и Левица.

За време на првиот круг од изборната кампања Собранискиот сервис секој ден ќе обезбеди вкупно 3 часа за бесплатно политичко претставување на кампањите на политичките партии застапени во Собранието, како и вкупно еден час секој ден за бесплатно политичко претставување на кампањите на подносителите на листи кои не се застапени во Собранието.

Јавниот сервис и телевизиите на државно ниво што ќе објавуваат платено политичко рекламирање, треба да емитуваат содржини поврзани со изборниот процес во формат пристапен за лицата со попреченост.

Упатството е објавено на веб страницата на АВМУ.

The post ЛЕВИЦА НЕМА ДА ДОБИЕ ВРЕМЕ ВО МЕДИУМИТЕ ЗА КАМПАЊАТА Апасиев бара Уставниот суд итно да го стопира Упатството за радиодифизерите appeared first on plusinfo.mk.

До Државната изборна комисија (ДИК) во предвидениот рок (три дена од распишување на изборите) за платено политичко рекламирање за локалните избори на 19 октомври се пријавиле 333 медиуми, но од Комисијата нагласуваат дека списокот не е конечен бидејќи барањата се проверуваат, а вечерва на полноќ истекува и рокот за доставување на ценовниците. Според Роковникот на ДИК, ценовниците треба да се потврдат и објават на веб страната на ДИК најдоцна на 24 август.

Според информациите на МИА, најмногу интернет портали се пријавиле за платено политичко рекламирање 257, а 4 доставиле Тековна состојба надвор од рокот. Во рокот се пријавиле и 43 радиостаници, 33 телевизии и осум печатени медиуми.

Од ДИК за МИА наведуваат дека овие барања подлегнуваат на проверка од страна на службите во Комисијата затоа бројката не може да се смета за дефинитивна. Појаснуваат дека печатените медиуми и електронските медиуми (интернет порталите) се должни ценовниците за платеното рекламирање да ги достават до ДИК, Државниот завод за ревизија (ДЗР) и до Државната комисија за спречување на корупцијата (ДКСК) во рок од пет дена од денот на распишувањето на изборите, а радиодифузерите да ги достават до ААВМУ, ДИК, ДЗР и ДКСК во рок од пет дена од денот на распишувањето на изборите, најдоцна на 14 август, 24:00 часот. Овој рок, посочуваат од ДИК, уште тече.

– ДИК е должна да ги потврди и објави на нејзината веб – страна доставените ценовници со просечно пресметаните цени утврдени од радиодифузерите и од печатените медиуми, како и да ги објави ценовниците со цените утврдени од електронските медиуми, (интернет порталите), согласно член 75-ѓ став (3) и (9) од Изборниот законик, во рок од 10 дена од истекот на рокот за доставување на ценовниците, најдоцна на 24 август. Имајќи го предвид гореспоменатото, потенцираме дека списокот од табелата не е конечен – посочуваат за МИА од ДИК.

The post 333 МЕДИУМИ СЕ ПРИЈАВИЛЕ ЗА ПЛАТЕНО ПОЛИТИЧКО РЕКЛАМИРАЊЕ Списокот не е конечен appeared first on plusinfo.mk.

– Од вкупно доставени 333 барања од медиумите за платено политичко рекламирање за претседателските избори, Државната изборна комисија ги потврди барањата на 37 телевизии, 35 радија, 11 печатени медиуми и 249 портали. Две телевизи и три радија ќе треба да достават корекција на ценовниците согласно чл.75 ѓ, ст.11 од Изборниот законик, соопшти ДИК.

Вкупно осум правни субјекти со 10 портали, еден поткаст и едно радио се одбиени поради, како што се наведува, неисполнување на законските услови за регистрација на медиуми за платено политичко рекламирање.

Од вкупно доставени 334 барања за платено политичко рекламирање за парламентарните избори, Државната изборна комисија ги потврди барањата на 37 телевизии, 35 радија, 11 печатени медиуми и 249 портали.

– Две телевизии и три радија ќе треба да достават корекција на ценовниците согласно чл.75 ѓ, ст.11 од Изборниот законик. Вкупно седум правни субјекти со 9 портали, еден поткаст и едно радио се одбиени поради неисполнување на законските услови за регистрација на медиуми за платено политичко рекламирање, се вели во соопштението.

Против решенијата за одбивање на медиумите кои не ги исполнуваат условите за регистрација за платено политичко рекламирање, незадоволната страна има право на тужба до Управен суд на Република Северна Македонија, во рок од 24 часа од приемот на решението.

Регистарот на медиуми кои ќе вршат платено политичко рекламирање и ценовниците ќе бидат достапни на веб-страната на Државната изборна комисија.

Изборната кампања за претседателските избори закажани за 24 април годинава, започнува на 4 април во 00:00 часот и ќе трае до 24:00 часот на 22 април, а кампањата за парламентарните избори, што треба да се одржат на 8 мај, ќе биде од 18 април до 6 мај.

The post ИЗБОРИТЕ ЌЕ ГИ СЛЕДАТ 37 ТЕЛЕВИЗИИ, 35 РАДИЈА, 11 ВЕСНИЦИ И 249 ПОРТАЛИ Толку барања за платено рекламирање се прифатени од ДИК appeared first on plusinfo.mk.