Илузија е дека Русија ќе се откаже од хибридните напади врз европските земји, рече претседателот на Чешка, Петр Павел, пред кадетите од Средното воздухопловно училиште во Куновице.

– Русија нас, како држави и членка на НАТО, нè означува како непријател и би било наивно да се преправаме дека тоа не е случај. Русија е земја, која, за жал, се однесува како империја и се обидува да владее и да ги контролира земјите околу неа – истакна Павел.

Тој предупреди дека е голема илузија дека во Европа ќе завладее мир откако ќе заврши војната во Украина и дека Русија ќе се однесува како пријателска држава.

– Не велам дека Русија, откако ја заврши војната во Украина веднаш ќе почне војна со НАТО, но може да продолжи со хибридна војна, а тоа и ќе го прави – посочи Павел.

The post НЕМА ДА ЗАВЛАДЕЕ МИР ВО ЕВРОПА КОГА ЌЕ ЗАВРШИ ВОЈНАТА ВО УКРАИНА Русија се однесува како империја, предупредува чешкиот претседател appeared first on plusinfo.mk.

Чешкиот милијардер и сојузник на унгарскиот премиер Виктор Орбан, Андреј Бабиш, е именуван за нов премиер на Чешката Република. Решението го потпиша претседателот Петр Павел, со што официјално заврши повеќемесечниот период на политички преговори.

– Чешка нема да продолжи со финансирање на воената помош за Украина – изјави Бабиш по назначувањето, додавајќи дека државата ќе се фокусира на „внатрешни економски интереси“.

Тој најави можност за стопирање на извозот на муниција и оружје од чешко производство кон Украина, но избегна да каже дали ќе го укине меѓународниот проект што веќе има поддршка од претседателот Павел.

Бабиш, кој предводи популистичка партија АНО, формираше влада со крајнодесничарската Слобода и директна демократија и со Партијата на возачите, движења кои отворено се против климатските политики на Европската Унија и се залагаат за проруска неутралност. Тие заедно располагаат со 108 пратеници во парламентот.

Седумдесет и едногодишниот поранешен премиер се враќа на функцијата по четири години во опозиција. Во тој период, неговата реторика се помести кон европските конзервативни и суверенистички сили.

За да го избегне судирот на интереси, Бабиш формално го пренесе својот концерн „Агроферт“, кој обединува над 200 компании, на доверителна структура, чекор што му овозможи да добие зелено светло за мандатот.

Политичките аналитичари предупредуваат дека Чешка со ова може да се придвижи кон групата на „суверенистички“ влади во Европа, предводени од Орбан и словачкиот премиер Роберт Фицо.

The post МИЛИЈАРДЕРОТ КОЈ ВЕТИ ДЕКА ЌЕ ЈА СЕКНЕ ПОМОШТА ЗА КИЕВ НА ЧЕЛО НА ЧЕШКА Расте „фронтот на Орбан“ во Европа appeared first on plusinfo.mk.

Претседателот на Чешка, Петр Павел, упати силна порака до Москва, предупредувајќи дека сојузниците во НАТО ќе мора да соборат руски авион доколку продолжат прекршувањата на воздушниот простор.

– Русија денес го тестира не само нашиот интегриран противвоздушен систем, туку и нашата решеност да се браниме. Со некои народи не можеш поинаку – мора да заврши лошо за да сфатат дека тоа не е исправен пат – рече Павел во дебата со ученици во градот Соколов, во западниот регион Карлови Вари.

Тој нагласи дека Русија го почитува исклучиво принципот на сила, додека воздржаноста ја толкува како слабост.

– Не велам дека секој упад треба да заврши со соборување на авион, но ако тоа биде неопходно, ќе мора еднаш да се случи за Русите да разберат дека постојат правила кои не смеат да се прекршуваат – изјави чешкиот претседател.

Павел потсети дека додека бил на чело на Воениот комитет на НАТО, Русија постојано го нарушувала турскиот воздушен простор.

– Тие провоцираа и тестираа додека Турција не се налути и не собори два-три авиони. Потоа настана мир. Русија разбра дека пред себе има противник кој нема да дозволи да му го нарушуваат воздушниот простор – нагласи Павел.

Во своето излагање пред учениците, чешкиот претседател ја истакна потребата НАТО да остане решителен и обединет во одбрана на своите територии, бидејќи само така може да се одврати понатамошна руска агресија.

Според најновата анкета, Петр Павел е втор најпопуларен претседател во историјата на Чешка – веднаш по Вацлав Хавел. Зад него е Вацлав Клаус, додека поранешниот шеф на државата Милош Земан е оценет како најнепопуларен меѓу граѓаните.

The post „ЕДНАШ ЌЕ МОРАМЕ ДА СОБОРИМЕ РУСКИ АВИОН“ Претседателот на Чешка со остра закана до Москва appeared first on plusinfo.mk.

Претседателот на Чешката Република, Петр Павел, синоќа, на отворањето на Прашкиот одбранбен самит, изјави дека надежите дека идниот американски претседател, Доналд Трамп, ќе може брзо да го реши конфликтот во Украина, како што вети, се нереални и предупреди дека веројатниот договор со рускиот претседател Путин ќе биде на штета на Украина и на Европа.

– Многу земји се надеваат дека Доналд Трамп ќе донесе промени, особено затоа што тој зборува за решавање на конфликтот за 24 часа. Тоа е нереално, но мислам дека ќе вложи напори да се договори со Путин. Тоа веројатно нема да биде во наш интерес или во интерес на Украина – рече Павел на дебатата на почетокот на тридневната конференција.

Чешкиот претседател, инаку пензиониран генерал и поранешен шеф на Воениот комитет на НАТО, рече дека е неопходно да се почекаат конкретни потези кога Трамп ќе дојде во Белата куќа бидејќи она што во моментов се дознава за мировниот план од советниците на Трамп изгледа како обично предавање на териториите, што ги окупираше Русија, на Русија, со забрана на Украина да се приклучи кон НАТО во следните 20 години, истовремено пренесувајќи ѝ ја одговорноста за евентуалната голема демилитаризирана зона на Европа.

– Резултатот е привремено отцепување на некои територии и воспоставување административна граница во конфликтот додека не успееме да постигнеме дипломатско решение – рече Павел.

Чешкиот претседател предупреди дека ситуацијата на бојното поле, каде Русија има предност, е таква што е тешко да се мотивираат завојуваните страни на преговори.

– Досега немаше никакви предлози за преговори. Ниту рускиот предлог ниту украинскиот план за целосна победа не беа предлози за преговори. Ниту, пак, Кина презентираше конкретен план за преговори – рече Павел и предупреди дека во мировните иницијативи треба да бидат вклучени и Индија и Кина, за да извршат притисок врз Русија.

Чешкиот претседател смета дека сегашната предност на Русија на бојното поле е резултат на бавната и слаба почетна поддршка на Западот за Украина кога Русија нападна.

– Руската агресија против Украина не е само уште еден конфликт во серија, туку го редефинира меѓународниот поредок и е од клучно значење не само за Украина, туку и за меѓународните принципи како суверенитетот и територијалниот интегритет. Поддршката за Украина не смее да ослабне – рече чешкиот претседател.

Според него, трансатлантските врски се неопходност за светот да се соочи со предизвиците и со заканите на авторитарните држави како Русија, Северна Кореја и други.

– Ја повикав Кина да игра поактивна улога. Да се ​​биде светска сила не само што носи придобивки, туку значи и одговорност – рече Павел.

Претседателот на Чешка апелираше Европа да не ги чека потезите на новата американска администрација, туку веќе сама да почне да учи дека мирот зависи од силна одбрана, дека отстапките заради мирот секогаш се само покана за натамошна агресија и дека нејзината безбедност не е загарантирана со самиот факт дека постои НАТО.

– Европа мора да инвестира повеќе во одбраната. Два проценти од БДП едноставно не се доволни. Европа ќе мора да направи повеќе без оглед на исходот од американските избори. Со Трамп можеме да го направиме тоа побрзо – рече Павел.

The post ЕВРОПА ЌЕ ГО НОСИ ЦЕЛИОТ ТОВАР НА ГРБ Чешкиот претседател стравува дека договорот меѓу Трамп и Путин ќе биде штетен за ЕУ appeared first on plusinfo.mk.