Победникот на унгарските парламентарни избори, Петер Маѓар, денеска изјави дека испораката на руска нафта преку нафтоводот Дружба би можела да продолжи следната недела.

Тој рече дека од унгарската нафтена и гасна група МОЛ му рекла дека „врз основа на информации од нивните партнери, очекуваат нафтоводот Дружба да биде рестартиран следната недела“.

Унгарија и Словачка се исклучени од нафтоводот Дружба од крајот на јануари, откако руски напад со беспилотни летала оштети нафтовод во западна Украина.

Унгарија го блокираше европскиот заем за Украина поради Дружба, а словачкиот министер за надворешни работи Јурај Бланар вчера изјави дека Словачка ќе блокира нова рунда санкции на Европската Унија против Русија доколку не добие гаранции за испорака на нафта преку нафтоводот Дружба.

Украинскиот претседател Володимир Зеленски минатиот петок изјави дека Украина постигнала значителен напредок во реставрацијата на оштетениот нафтовод Дружба и дека поправките ќе бидат завршени пролетва.

-Ќе ги завршиме поправките бидејќи тоа е договорот. Им реков дека ќе ги завршиме оваа пролет – рече Зеленски.

The post ИСПОРАКИТЕ НА РУСКА НАФТА ЗА УНГАРИЈА ЌЕ ПОЧНАТ СЛЕДНАТА НЕДЕЛА Најавено рестартирање на нафтоводот Дружба appeared first on plusinfo.mk.

Маѓар дојде кај претседателот, излегоа на терасата со поглед на Дунав, а на балконот до нив – Виктор Орбан
Унгарскиот претседател Тамаш Шуљок го прими новоизбраниот премиер и лидер на Тиса, Петер Маѓар, во замокот Шандор утрово за да разговараат за деталите за промената на владата.

За време на средбата, Маѓар објавија видео од терасата на кое се гледа никој друг туку премиерот во заминување, Виктор Орбан.

Маѓар ја гледал панорамата на Дунав со Шуљок кога го забележал премиерот во заминување на соседната тераса.

“Az élet a legnagyobb rendező. Miközben a köztársasági elnök épp megmutatta a hivatalát, ahonnan hamarosan távozni fog, a leköszönő miniszterelnökre lettem figyelmes a szomszéd terszon.
Szerinted mit olvas Orbán Viktor?” M.P. pic.twitter.com/oIcTBNG3je

— László Kovács (@LszlKovcs159757) April 15, 2026

„Животот е најголемиот режисер. Додека претседателот на републиката само ја покажуваше својата канцеларија, од која наскоро ќе замине, го забележав премиерот во заминување на соседната тераса“, напиша Маѓар на Фејсбук, во придружба на сопствената видео екипа.

Унгарецот ги покани и своите следбеници да учествуваат во игра на погодување: „Што мислите дека чита Виктор Орбан?“

Меѓу понудените одговори биле „Говорот за збогум“, „Национален спорт“ и „Денешната изјава на американскиот претседател Доналд Трамп“.

The post 📽️ НЕОБИЧНА СРЕДБА ВО БУДИМПЕШТА Маѓар го „улови“ Орбан на соседниот балкон appeared first on plusinfo.mk.

Петер Маѓар, лидерот на партијата Тиса што победи на парламентарните избори во неделата, соопшти дека разговарал со претседателката на Европска комисија, Урсула фон дер Лајен, за деблокирање на замрзнатите европски средства за Унгарија.

Маѓар објави на Фејсбук дека во телефонскиот разговор е постигната согласност дека ослободувањето на парите е еден од приоритетите, со цел граѓаните на Унгарија што поскоро да добијат пристап до развојните фондови на Европската Унија.

Според него, Фон дер Лајен порачала дека Европската комисија ќе соработува со идната унгарска влада за во најкус рок да се постигнат конкретни резултати и да се овозможи користење на средствата од европските фондови.

Маѓар посочува дека милијардите евра за Унгарија се замрзнати поради, како што вели, корупција во унгарската власт, додавајќи дека ослободувањето на тие средства е од клучно значење за националното стопанство и за граѓаните.

Од Европската комисија потврдија дека Фон дер Лајен разговарала со Маѓар, оценувајќи дека соработката со идната унгарска влада е важна за напредок во користењето на средствата и за запазување на предвидените рокови.

Европска унија држи „замрзнати“ околу 17 милијарди евра наменети за Унгарија од фондовите за кохезија и за закрепнување по ковид-кризата. Причина за тоа се покренатите правни спорови со Будимпешта поврзани со владеењето на правото, независноста на судството, академските слободи, азилантската политика и правата на ЛГБТ заедницата во земјата.

The post УНГАРИЈА ЌЕ СОРАБОТУВА СО ЕВРОПСКАТА КОМИСИЈА ЗА ДА ГИ ДОБИЕ „ЗАМРЗНАТИТЕ“ 17 МИЛИЈАРДИ ЕВРА Маѓар разговарал со Фон Дер Лајен appeared first on plusinfo.mk.

The post КАДЕ ИЗЧЕЗНА СИЈАРТО? Едни го виделе во авион што летал кон Африка, други затворен во својата канцеларија appeared first on plusinfo.mk.

Доколку поранешниот премиер Никола Груевски биде екстрадиран во Македонија или самиот се врати по евентуалното укинување на азилот што му го даде Унгарија, тој прво ќе оди во затвор, и тоа 1,5 година за предметот „Насилство во Центар“ и 9 години за „Плацови на Водно“, а потоа повторно ќе му се суди за овие два предмета, затоа што судењата се одвиваа во негово отсуство.

Груевски избега од Македонија на 11 ноември 2018 година, два дена подоцна на Фејсбук објави дека е во Унгарија, каде истиот месец доби меѓународна заштита – политички азил, како жртва на политички прогон во неговата земја.

Прво во затвор, па на повторено судење

По падот на долгогодишниот унгарски премиер Виктор Орбан и најавата на идниот премиер Петер Маѓар дека Унгарија „повеќе нема да биде засолниште за меѓународни криминалци, меѓу кои и за Никола Груевски, кој е осуденик“, во Македонија се отвора прашањето кој би бил неговиот статус ако се појави во Македонија.

Според правниците, нема дилема, ќе биде однесен во затвор, од каде ќе може да бара пак да му се суди за оние предмети за кои му било судено во отсуство и кои досега не се застарени.

– Ако се појави Груевски, ќе биде упатен во затвор на издржување на затворската казна. Оттаму има право да бара повторување на судењето. Откако ќе му биде уважено барањето, Кривичниот совет ќе треба да донесе одлука за тоа. Верувам дека Кривичниот совет ќе постапи како и за сите вакви барања и ќе донесе одлука со која правосилните затворски пресуди ќе се стават вон сила. Тоа значи дека Груевски на повторените судења ќе се брани од слобода – вели адвокатот Владимир Туфегџиќ за „Плусинфо“.

Мицкоски не очекува Груевски сам да се врати

За да дојде до повторно судење на Груевски, тој или треба да се врати самиот или Унгарија му го укине азилот или пак, да биде екстрадиран на барање на македонските власти. Премиерот Христијан Мицкоски денеска ги прокоментира овие опции.

– Јас немам никакви очекувања, но ако се појави во Македонија, тој има правосилна пресуда и веднаш органите на редот ќе го обезбедат и ќе го упатат на отслужување на затворска казна. Ние сме Влада за којашто сите закони важат и Влада којашто мора да ги почитува законите и институциите во државата, а нормално секое лице има право да ги користи институциите, да ги користи своите права, да поднесува потоа жалби. А дали ќе се врати и кога ќе се врати, јас немам такви очекувања – рече Мицкоски.

Тој додаде и дека неговата екстрадиција е побарана уште во 2018 година, а Унгарија ја одбила во 2019 година.

– Постои процедура доколку лицето има право на азил поради определени причини. За дополнителни детали треба да се обратите во Министерството за правда – рече Мицкоски.

Заштитен е како жртва на политички прогон

Груевски побара и доби азил во Унгарија откако беше осуден на 2 години затвор за предметот „Тенк“, за набавката на владиниот „мерцедес“, со тврдење дека во Македонија е жртва на политички прогон.

Потоа македонското Министерство за правда побара негова екстрадиција за да ја отслужи 2-годишната казна, но во 2019 година Врховниот регионален суд на Унгарија донесе конечна одлука дека не се исполнети законските предуслови за тоа, бидејќи според Законот за меѓународна правна помош во правни прашања, лице на кое му е одобрен азил нема да биде екстрадирано во земјата што ја напуштило.

Азилот не може да се укине само со политичка одлука на Маѓар

Македонија може повторно да побара екстрадиција поради затворската казна од 9 години во предметот „Плацови на Водно“, но факт е дека Груевски е заштитен од предавање на македонските власти сè додека азилот му е активен.

Унгарија може да му го укине азилот, како што најави Маѓар, но земјата не може само политички „да си го смени мислењето“ без правна постапка. Новата унгарска власт може да иницира правна ревизија, а конечната одлука мора да ја донесе службата за азил по законска процедура.

Азилот на Груевски законски може да се укине ако повеќе не постои ризик од политички прогон, или ако се констатира дека околностите во Македонија се промениле. Самото укинување мора да биде правно образложено, инаку би паднало на суд, а Груевски ќе има право на жалба или да ги користи европските правни механизми.

Од 8 предмети, само 2 стигнаа до правосилност

На поранешниот премиер му се судеше во 8 предмети што ги отвори поранешното Специјално јавно обвинителство врз основа на индиции во прислушкувани телефонски разговори: „Тенк“, „Насилство во Центар“, „Плацови на Водно“, „Титаник“, „Талир 1“, „Талир 2“, „ТНТ“ и „Траекторија“.

Од нив, правосилни пресуди има за „Тенк“ – 2 години затвор, за „мерцедесот“, за „Плацови на Водно“ – 9 години затвор, за перење пари и противправно стекнување и прикривање имот за купопродажба на парцели на Водно и за „Насилство во Центар“ – 1,5 година затвор, за организирање вандализам и насилства пред Општина Центар во јуни 2013 година. Од овие предмети, „Тенк“ е застарен, за „Насилство“ застареноста ќе настапи во 2027 година, а за „Плацови“ дури во 2043 година.

Делото застарува кога ќе помине двојно време од должината на изречената пресуда, сметајќи од денот кога пресудата станала правосилна.

За предметот „ТНТ“, за рушењето на комплексот „Космос“, Груевски доби неправосилна затворска казна од 9 години затвор, но предметот застаре со измените на Кривичниот законик усвоени во 2023 година.

Без пресудени казни му застаре и „Траекторија“, за договарање провизија при договорите за изградба на автопатиштата, како и „Титаник“, за изборни нерегуларности, каде застаре делот од обвинението за кривичното дело Злосторничко здружување.

Во судница останаа само делови од „Талир“

Застаре и обвинението за делото Злоупотреба на службената положба во предметот „Талир“ кој се однесуваше на незаконско финансирање на ВМРО-ДПМНЕ, а продолжува судењето за делото Перење пари. Предметот „Талир 2“, за изградбата на партиското седиште на ВМРО-ДПМНЕ ќе застари во август оваа година.

Од овие предмети целосно во отсуство се судеа „Плацови на Водно“ и „Талир“. Груевски беше присутен во првите фази од судењата за „Тенк“, „Титаник“, „ТНТ“, „Траекторија“ и „Шамари во Центар“, а потоа судењата продолжија во негово отсуство.

Предистрагата за бегството на Груевски заврши така што Јавното обвинителство заклучи дека нема докази дека службени лица од Македонија му помогнале да избега.

Груевски го чека и евентуално обвинение за предметот „Организатори на 27 април“, за кривичното дело Терористичко загрозување на уставниот поредок и безбедноста за настаните во Собранието на 27 април 2017 година. Во овој предмет два пати им се судеше на Миле Јанакиески, Спиро Ристески на Трајко Вељаноски, кои првиот пат добија затворски казни, а на повтореното судење по мислење на ОЈО ГОКК, Судот им го прифати барањето за нив да важи Законот за амнестија, но не и за Владимир Атанасовски од УБК. Во истрагата за овој предмет беа опфатени и Груевски и ексразузнавачот Никола Бошковски, но бидејќи не беа достапни за органите за прогонот против нив не беше покренато обвинение заедно со останатите.

The post АКО ДОЈДЕ, ГРУЕВСКИ ПРВО ЌЕ МОРА ДА ОДИ ВО ЗАТВОР, ПА НА ПОВТОРНИ СУДЕЊА Сè додека има азил во Унгарија не може да биде испорачан во Македонија appeared first on plusinfo.mk.

Американскиот потпретседател Џеј Ди Венс изјави дека е „тажен“ поради поразот на унгарскиот премиер Виктор Орбан на изборите, притоа нагласувајќи дека САД се подготвени да соработуваат со неговиот наследник, конзервативецот Петер Маѓар.

– Ме растажува што изгуби, но сигурен сум дека ќе соработуваме многу добро со следниот унгарски премиер – рече Венс во интервју за Фокс њуз.

– Многу добро знаевме дека постои голема веројатност Виктор да изгуби на овие избори – додаде тој неколку дена откако лично ја посети Будимпешта за да ја изрази поддршката на САД за Орбан.

Ватикан треба „да се држи до моралните прашања“, додаде Венс, откако папата Лав XIV изјави дека не се „плаши“ од владата на САД.

– Да, мислам дека во некои случаи би било подобро Ватикан да се држи до моралните прашања и да му препушти на американскиот претседател да ја одредува американската политика – рече Венс во интервјуто.

The post ВЕНС Е ТАЖЕН ПОРАДИ ПОРАЗОТ НА ОРБАН, НО ЌЕ СОРАБОТУВА СО МАЃАР На Ватикан му порача да се држи до моралните прашања appeared first on plusinfo.mk.

Победникот на изборите во Унгарија Петар Маѓар денеска изјави дека како премиер планира да има добри односи со Македонија и со другите држави кои и досега имаа стратешко пријателство со Унгарија.

– Тоа што Владата на Виктор Орбан имала, на пример, блиски односи со некоја балканска држава, не значи дека под Владата на Тиса тие односи ќе се нарушат. Можам да кажам дека ако односите со некоја земја биле лоши, тие сега ќе се подобрат. Мислам дека е во интерес на сите да работиме заедно во наш заеднички интерес, за економски проспертитет и развој. Повторувам, нема да се мешаме во внатрешните работи на други држави и нема да влијаеме врз вашите избори, дали во Северна Македонија или на други места – изјави Маѓар на денешната прес конференција одговарајќи на прашање на грузиски новинари за односите на нивните две земји.

The post МАЃАР НАЈАВИ ДЕКА ЌЕ ГИ ЗАЧУВА ДОБРИТЕ ОДНОСИ СО МАКЕДОНИЈА Нема да се меша во внатрешните работи на други држави appeared first on plusinfo.mk.

По речиси три часа заврши првата прес конференција на новоизбраниот лидер на Унгарија Петер Маѓар. Се очекува дека преземањето на власта може да потрае до два месеца поради законските процедури во земјата.

– Мојот прв пат ќе ме води во Полска, заради зајакнување на илјадагодишното полско-унгарско пријателство. Вториот пат ќе ме води во Виена. А третиот во Брисел, за да ги вратиме средствата од Европската Унија кои им припаѓаат на Унгарците – најави Маѓар во својот победнички говор во неделата.

По повеќе од 2 часа и 50 минути, Маѓар го заврши говорот и одговорите на прашањата и замина да им телефонира на другите европски лидери.

За абортусот и за ЛГБТ заедницата

На прашањето за неговите ставови за абортусот и за ЛГБТ правата, вклучително и тоа дали би дозволил одржување на Паради на гордоста, Маѓар изјави дека ја поддржува слободата на собирање и вели дека прашањето за абортусот е веќе решено.
За ЛГБТ лицата, тој вели:
– Јасно кажавме дека, според Тиса и милионите Унгарци кои ја поддржуваат, секој може да живее со кого сака, сè додека не ги крши законите и не им нанесува штета на другите. Мислам дека тоа е суштината, без потреба да објаснувам какви било детали.

„Го гасиме информативниот програм на државната ТВ“

Маѓар вели дека ќе ги згасне програмите на државната телевизија и радио за да ја запре „пропагандата“ на Фидес. Како уште еден показател колку тој и неговата партија Тиса се подготвени брзо да тргнат во демонтирање на системот на Орбан, порача дека ќе ја „запре пропагандата финансирана од буџетот“.

Тој ги исмеваше новинарите на државните медиуми, порачувајќи им да ги „ажурираат своите биографии“, додавајќи дека „не можеле да го следат неговото темпо“ за време на кампањата.
Наведе дека „една од првите мерки ќе биде запирање на информативната програма на јавната телевизија и радио“, а дека новата власт ќе се обиде да воспостави „тело кое ќе ја гарантира независноста на државните медиуми“, по примерот на BBC „или на некој друг начин“.

„Ако Путин се јави…“

Маѓар изјави дека неговата идна политика кон Русија ќе биде прагматична, со напомена дека „географијата не може да се смени“ и дека Унгарија и понатаму е изложена на руските енергенси, како и дека во тек е проширувањето на нуклеарната централа Пакс. Тој додаде дека неговата администрација ќе ги преиспита сите постоечки договори и, доколку е потребно, дури и ќе ги раскине.
Говорејќи за можниот контакт со рускиот претседател, Маѓар рече:

– Ако Путин се јави, ќе му се јавам на телефон, но не мислам дека тоа ќе се случи. Истакна дека во тој случај би му порачал да „престане со убивањето по четири години и да ја заврши војната“, оценувајќи дека судирот нема смисла ниту за Русија.
– Веројатно тоа би бил краток телефонски разговор, но и понатаму се надевам дека Путин ќе биде принуден да ја прекине војната – заклучи лидерот на Тиса.

Нема да му се јави на Трамп

Маѓар рече дека САД се многу важен партнер со кој на Унгарија ѝ се потребни добри односи. Тој наведе дека нема да го бара Трамп, но дека неговата администрација ќе биде достапна за разговор доколку се јават од Белата куќа.

Орбан повеќе нема да може да биде премиер?

Победникот на изборите во Унгарија ветува ограничување на два мандата за премиерот, со што практично би се спречило враќање на Виктор Орбан.

Маѓар, кој и претходно најавуваше дека сака да воведе ограничување од два мандата за премиерот и тоа да го вгради во уставот, вели дека тоа правило би се применувало и ретроактивно, што практично би му оневозможило на Орбан некогаш повторно да се врати на премиерската функција.

Орбан помина вкупно 20 години на таа функција.

Постојат многу правни документи за кои унгарската јавност не знае

Маѓар тврди дека постојат многу правни документи за кои унгарската јавност, па дури ни тој, не знае, вклучувајќи ги и оние за меѓународните обврски и кредитите во странство.
– Постојат меѓународни договори, тајни одлуки на владата донесени за време на Орбан, документи за кои ништо не знаеме, за многу обврски кои Унгарија ги презела, кредити кои Орбан ги подигнал со камати за кои ништо не знаеме. Најважната задача ќе биде да ги набавиме сите документи, сè што останало по уништувањето, за нашата влада да остане функционална – вели Маѓар.
Тој додава дека неговата влада ќе се обиде да ги направи јавни кога и да е тоа можно, без кршење на клаузулите за доверливост, за дополнително да се расветли дејствувањето на досегашната власт.

Маѓар го обвини Сијарто: „Сечат документи, но тоа нема да им помогне“

Маѓар изнесе тешки обвинувања на сметка на унгарскиот министер за надворешни работи Петер Сијарто.
Во еден момент за време на прес-конференцијата, Маѓар доби лист со порака. Потоа рече дека дознал дека министерот за надворешни работи Петер Сијарто, кој неодамна беше под лупа поради неговите врски со Русија, наводно се наоѓа во министерството за надворешни работи и „уништува документи кои имаат врска со санкциите“ против Русија.
– Ги сечат документите, но тоа нема да им помогне. Ова е само за да ви дадам контекст за ситуацијата во Унгарија – рече тој.

Тој го спореди ова со обидите за уништување јавни записи „како во старото комунистичко време“.

Очекува уште неколку мандати

Маѓар очекува исходот од изборите на уште неколку места да се сврти во нивна корист и да добијат уште неколку мандати.

– Ова е невиден број луѓе кои гласале за една партија. Станува збор за три милиони и триста илјади гласови, тоа е голема одговорност. Фидес падна на една петтина и би сакал да нагласам дека добија толку мандати само затоа што пропагандната машинерија потроши повеќе милијарди форинти за да ги поддржи нивните лаги. Да не ја користеше машинеријата за свои цели, како што е разузнавачката служба, немаше да има ниту олку мандати – наведе Маѓар.

Тој рече дека гласачите „испишале историја“ и го повика претседателот што побрзо, веќе на 5 мај, да го свика новиот парламент.
Истакна дека граѓаните гласале „не само за промена на власта, туку и на системот“, со порака дека новата администрација ќе презема одговорност за своите грешки. Нагласи дека Унгарија останува цврсто определена за ЕУ и дека „стои зад мирот“, отфрлајќи ги обвинувањата за воена политика.

Нов буџет

Според ветувањата, партијата „Тиса“ ќе изработи нов буџет. Тој ќе вклучува намалување на даноците, воведување данок на имот повреден од една милијарда форинти, како и зголемување на пензиите и детскиот додаток.
– Расипничките престижни инвестиции како Пакс или железницата Будимпешта-Белград, мора веднаш да се преиспитаат. Мора да се запре продажбата на државен имот и зградите на министерствата, а ќе покренеме и сеопфатна истрага во системот за заштита на децата, каде во многу случаи ниту зголемувањето на платите не може да чека – рече Маѓар говорејќи за плановите за првите 100 дена.

Отворање на досиејата и помирување

Според претходните изјави на претседателот на партијата „Тиса“, меѓу првите одлуки ќе биде отворањето на досиејата на тајните служби, како и поднесување закон за национално помирување. Целта е, како што е речено, „да се залечат раните кои меѓусебно си ги нанесовме“.
За помирувањето Маѓар за HVG изјави: „Не е народот против народот. И гласачите на Фидес подеднакво сакаат мир и ја сакаат својата татковина. Не се тие виновни што оваа власт е на власт.“

Јавност на владините одлуки

Партијата вети, иако без конкретен рок, објавување на записниците од седниците на владата од изминатите години, под услов со тоа да не се загрозуваат државните интереси. Освен тоа, ќе се преиспитаат тајните владини одлуки класифицирани со ознаки за тајност и од сите одлуки ќе се тргне ознаката за тајност каде што е тоа можно од аспект на националната безбедност.
Според најавите, веднаш ќе се прекинат информативните програми и соопштенијата на јавните медиуми додека не се спроведе нивна реорганизација на паритетна основа. Исто така, би вовеле мораториум на државното огласување, а потоа посебно тело би ја надгледувало рамномерната распределба на огласите на медиумскиот пазар.

The post АКО СЕ ЈАВАТ ТРАМП И ПУТИН ЌЕ ИМ КРЕНЕ, НО ТОЈ НЕМА ДА ГИ БАРА ПРВ Петер Маѓар одржа тричасовна прес конференција и се осврна на повеќе теми appeared first on plusinfo.mk.

Разводот на новиот лидер на Унгарија, Петер Маѓар, и поранешната министерка за правда Јудит Варга, со која има три сина, повторно исплива на површина откако Маѓар го собори својот политички татко Виктор Орбан на изборите во Унгарија. По сè што се случуваше за време на нивниот развод, кој Унгарците пред две години го следеа како сапуница, тешко е да се замисли дека Варга синоќа била меѓу оние што му честитале.

Петер Маѓар и Јудит Варга, обајцата 45-годишници и адвокати, беа во брак од 2006 до 2023 година и се разидоа без голема врева. Набрзо потоа, Варга поднесе оставка од функцијата министерка за правда поради контроверзниот скандал со помилување.

Во тој случај, маж кој учествувал во прикривање на педофилско злосторство во дом за незгрижени деца доби претседателско помилување, со сопотпис на Варга како министерка за правда. Скандалот сериозно го наруши угледот на власта, а недолго потоа Маѓар ја основа опозициската партија „Тиса“.

Приказната за разводот на Маѓар и Варга експлодираше дури во 2024 година, кога Маѓар го започна својот политички подем и одлучи да проговори, и тоа не само за политиката, туку и за сопствениот брак.

Маѓар, дотогаш поврзан со владејачките структури, ненадејно се сврте против системот и почна да изнесува сериозни обвинувања за начинот на функционирање на власта. Во тој контекст, јавно ги отвори и прашањата од приватниот живот, сугерирајќи дека политичките притисоци и односите во владејачките кругови имале влијание и врз неговиот брак.

Врвот на аферата се случи кога објави аудиоснимки кои брзо станаа централна тема во Унгарија. На нив, според неговите тврдења, можело да се слушне како високи функционери се обидуваат да влијаат врз правосудните процеси и да ги ублажат политички чувствителните случаи. Тие снимки дополнително ги разгореа сомнежите за злоупотреба на моќта и поттикнаа лавина политички реакции.

Обвинувања за насилство

Но, набрзо стигна одговор од другата страна. Јудит Варга јавно проговори за нивниот однос, изнесувајќи тешки обвинувања на сметка на поранешниот сопруг. Таа тврдеше дека за време на бракот трпела психичко и емоционално малтретирање и дека разводот бил неопходен излез од таквата ситуација.

Варга и во интервју на YouTube изјави дека Маѓар во повеќе наврати ја заклучувал во просторија без нејзина согласност, дека за време на бременоста ја турнал кон вратата и дека низ нивниот заеднички дом шетал со нож во рака. Во еден случај, тврди таа, лажирал самоубиство, но кога пристигнала итната помош, заминал со автомобил во пижами, поради што Варга морала да го врати медицинскиот тим назад.

Маѓар ги отфрли сите обвинувања како клевета и тврдеше дека Варга е под притисок на власта. Според неговите зборови, провладините медиуми се обидувале да го одвлечат вниманието од објавената снимка и да го дискредитираат во јавноста.

Според објавениот полициски извештај, Маѓар се однесувал агресивно, застрашувачки и заканувачки кон сопругата и околината во моментот кога таа, со помош на полицијата која ѝ била доделена како заштита поради функцијата, се обидела да ги одведе децата. Во извештајот се наведува дека се заканувал со предизвикување скандал кој би ја соборил владата.

По жестока расправија во нивниот дом, со автомобил се упатиле кон другата куќа каде што биле децата, возејќи несигурно. Маѓар се обидел да го сними настанот со мобилен телефон, но полицијата го спречила во тоа. На крајот се вратил дома, додека Варга ги однела децата кај нивните баби и дедовци. Маѓар, сепак, тврдеше дека полицискиот извештај е фалсификуван.

Каков е тој човек?

Во јули 2025 година, Варга ги повтори своите обвинувања и поранешниот сопруг го нарече предавник.

– Каков е тој човек? Кога неговата сопруга веќе не може да ја поднесе неверојатната драма и малтретирањето низ кое поминува и објавува дека сака развод, тој се служи со вакви подли манипулации. Додека плаче и моли, истовремено ја застрашува дека не може да се разведе од него, а потоа почнува да ја уценува – изјави тогаш Варга.

Унгарските провладини политичари и медиуми тогаш остро го критикуваа Маѓар, а на социјалните мрежи политичари и јавни личности блиски до власта изразуваа поддршка за Варга.

Маѓар доследно ги негираше обвинувањата за семејно насилство и брзо реагираше на наводите на поранешната сопруга преку социјалните мрежи.

– Ниту сега, ниту во иднина не сакам да одговарам на овие повторувани пропагандни обвинувања. Ѝ посакувам на мојата поранешна сопруга мирен живот – порача тогаш човекот кој синоќа прослави голема изборна победа.

The post МАЃАР ТИВКО СЕ РАЗВЕЛ ОД СОПРУГАТА, А ПОТОА СЀ СЕ ДОЗНАЛО Ја заклучувал дома, шетал со нож во рака, лажирал самоубиство appeared first on plusinfo.mk.

Кога Петер Маѓар бил дете, на ѕидот во својата спална соба залепил фотографија од Виктор Орбан, тогаш антикомунистички бунтовник, воодушевен од првите демократски избори во Унгарија во 1990 година, пишува Си-Би-Ес од Сиднеј.

Само пред неколку години, Маѓар му аплаудираше на говорот на Орбан од првиот ред, пред да се појави како најсериозен предизвикувач на националистичкиот лидер во неговото 16-годишно владеење. Денеска, тој му стави крај на владеењето на Орбан на избори со рекордно висока излезност. Делумните резултати покажуваат дека партијата на Маѓар, „Тиса“ (Tisza) — чие име е акроним од зборовите за почит и слобода — ќе освои 137 пратенички места, односно двотретинско мнозинство во 199-члениот унгарски Парламент.

Унгарец по презиме

Роден во семејство на истакнати конзервативци, Маѓар, чие презиме буквално значи „Унгарец“, уште од рана возраст бил фасциниран од политиката. Имал само девет години кога паднал комунизмот. Маѓар раскажува дека во семејниот дом во Будимпешта ги украсувал ѕидовите со фотографии од водечки политички личности.

Орбан, тогаш млад адвокат, стана херој на унгарското продемократско движење кога во 1989 година јавно побара советските трупи да ја напуштат земјата. „Имаше бран енергија околу промената на режимот што ме понесе уште како дете“, изјави Маѓар минатата година за поткастот „Фокус-група“ (Fokuszcsoport).

За време на студирањето се спријателил со Гергељ Гуљаш, актуелниот шеф на кабинетот на Орбан во заминување, и ја запознал Јудит Варга, со која се оженил во 2006 година, а која подоцна стана министерка за правда во владата на Орбан. По краткиот период во Брисел, каде што Маѓар работел како дипломат за прашања поврзани со ЕУ, семејството се вратило во Унгарија во 2018 година. Тогаш Маѓар станал директор на државната институција за студентски кредити и член на управните одбори во повеќе други државни компании.

Речиси непознат за јавноста, Маѓар брзо се прослави кога скандалот со помилувањето на соучесник на осуден педофил ја потресе владата на почетокот на 2024 година, што доведе до оставка на претседателката како и до повлекување на неговата сопруга Варга од политиката. Иако тогаш Маѓар го отфрли прашањето за своите политички амбиции како „лоша идеја, дури и како шега“, само неколку недели подоцна го организираше својот прв митинг на кој присуствуваа десетици илјади луѓе.

Маѓар набрзо почна да се перцепира како „храбар, ориентиран кон акција и подготвен да презема лични ризици“, изјави за „Франс прес“ медиумската експертка Вероника Ковешди од универзитетот ЕЛТЕ во Будимпешта. Неговото обраќање преку социјалните мрежи „емоционално резонираше“ кај неговите следбеници, што му донесе „невиден органски досег“, додаде Ковешди, истакнувајќи дека многу негови поддржувачи го гледаат како „херој кој неуморно се бори за нив“.

Поранешниот инсајдер ја презеде дотогаш непознатата партија „Тиса“ за да може легално да учествува на европските избори во 2024 година, на кои го освои второто место, веднаш зад владејачката коалиција. Како што неговата популарност нагло растеше, Маѓар се соочи со „цунами од омраза и лаги“, како што самиот рече, исмејувајќи одредени обвинувања и негирајќи други, вклучително и оние за семејно насилство врз Варга. Овие напади „дополнително го легитимираа како лидер кој навистина е способен да донесе промена“, смета Ковешди.

Повремено, Маѓар имаше жестоки расправии со медиумите, обвинувајќи ги за погрешно насочување на фокусот. Луѓето кои лично го познаваат велат дека е перфекционист со „краток фитил“, но дека знае да се извини за своите недостатоци. Прашан во декември како се променил откако влегол во политиката, Маѓар алудираше на медиумските извештаи во кои го опишуваат како избувлив, велејќи: „Сега бројам до десет“.

Маѓар како лидер

Поразот на Орбан има значителни импликации не само за Унгарија, туку и за Европа. Од 2010 година, Орбан се обидуваше да го создаде она што тој го нарекуваше „нелиберална демократија“. Тој изгради цврсти односи со рускиот претседател Владимир Путин, како и со Трамп, но постојано се судираше со ЕУ, која му замрзна милијарди евра поради загриженост за демократските стандарди во Унгарија.

За разлика од него, Маѓар вети дека ќе ја обнови западната ориентација на Унгарија и ќе ја прекине зависноста од руската енергија до 2035 година, истовремено стремејќи се кон „прагматични односи“ со Русија. Тој вети и дека ќе ги „отклучи“ замрзнатите средства од ЕУ, што би помогнало во оживување на стагнирачката унгарска економија.

Вешт комуникатор, како на социјалните мрежи, така и на терен за време на кампањата, 45-годишниот конзервативец вети промени, велејќи дека „цигла по цигла“ ќе го расклопи целиот политички систем на Орбан, систем со кој и самиот имал длабоки врски сè до неодамна. „Уште првиот ден треба да донесеме антикорупциски мерки и да поднесеме апликација за пристапување кон Европското јавно обвинителство“, изјави Маѓар вчера наутро откако гласаше. Сепак, за време на изборната кампања тој внимателно чекореше, внимавајќи да не ги одврати поконзервативните гласачи.

Политиките на Маѓар

Во надворешната политика вети дека ќе ја направи земјата сигурен сојузник во НАТО и ЕУ, истовремено критикувајќи ја Русија. Сепак, како и Орбан, Маѓар исто така одбива испраќање оружје во Украина и се спротивставува на нејзиното брзо интегрирање во ЕУ, иако не ја споделува непријателската реторика на Орбан кон Киев. Аналитичарите велат дека тензиите меѓу Унгарија и ЕУ — дополнително засилени од ветото на Орбан за пакетот помош од 90 милијарди евра (149 милијарди долари) за Киев, би можеле да се намалат под власта на „Тиса“.

Тој има и построги антиимигрантски ставови од Орбан и вети дека ќе ја укине владината програма за „гостински работници“. Ставот на Маѓар за правата на ЛГБТК+ лицата е нејасен, но тој нагласува дека ја поддржува еднаквоста пред законот.

Маѓар во овие избори користеше методи од „прирачникот“ на Орбан, водејќи теренска кампања која го однесе и во руралните упоришта на Фидес. Неговите митинзи беа исполнети со голем број национални знамиња, во стилот на Орбан, апелирајќи до патриотизмот на унгарските гласачи. Неговите конзистентни и јасни пораки, како и вештата употреба на социјалните мрежи, придонесоа за неговиот брз подем, вели Габор Тока, постар истражувач во Архивите на отвореното општество „Вера и Доналд Блинкен“.

„Многу луѓе се успокоени од приказната за некој кој неповратно влегол во конфликт со системот и за кого нема враќање назад“, рече тој, мислејќи на раскинот на Маѓар со Орбан.

„Бидејќи е социјализиран во Фидес, постојат и сомнежи дали тој може да обезбеди вистински прекин со владеењето на Орбан“, изјави Анджеј Садецки, главен аналитичар во варшавскиот Центар за источни студии (OSW).

„Левичарските гласачи можеби нема да бидат целосно задоволни со неговата агенда, но сепак го поддржуваат бидејќи тој претставува најголема шанса за промена“, додаде тој.

The post МУ АПЛАУДИРАЛ НА ОРБАН, НЕГОВАТА СОПРУГА БИЛА МИНИСТЕРКА ЗА ПРАВДА ВО ВЛАДАТА НА ОРБАН Кој е Петер Маѓар и дали Унгарија ќе направи пресврт во политиката? appeared first on plusinfo.mk.