Бизнисменот Трифун Костовски јавно ја нападна обвинителката Катерина Коларевиќ, која покрена обвинение против него во случајот за Еуростандард банка.

„Пет и пол години пребарувате, испитувате, анализирате и се обидувате да пронајдете криминал и перење пари – пишува Костовски на Фејсбук. – Но, не најдовте факти за сторен криминал. Не најдовте перење пари. И што направивте на крајот? Најдовте начин да ме гоните за наводна несовесност“.

Кога фактите не се доволни за обвинение, системот, очигледно, бара друг изговор, тврди Костовски и се обраќа директно до Коларевиќ:

„Затоа отворено Ве прашувам, кому му служите?

Дали постапувате исклучиво според законот и доказите или под притисок на центри на моќ кои сакаат моето име, мојот углед и мојот живот да бидат уништени?

Верував во Вас. Верував дека функцијата јавен обвинител подразбира независност, совест и храброст. Но, според она што го гледам, моќта на сивата еминенција е голема, а Вие безрезервно ѝ давате поддршка. Затоа сметам дека најчесно би било да си заминете од функцијата јавен обвинител. Само така би можеле од себе да ја тргнете дамката на сомнежот дека наместо на правдата, сте му служеле на нечии туѓи интереси.

Ми крадете од животот што не сте ми го дале…“

Бизнисменот објаснува дека ова е извадок од неговата под наслов „Јуда живее во Македонија“.

The post „МИ КРАДЕТЕ ОД ЖИВОТОТ ШТО НЕ СТЕ МИ ГО ДАЛЕ“ Емотивно обраќање на Трифун Костовски до обвинителката Коларевиќ appeared first on plusinfo.mk.

Македонското Министерство за внатрешни работи учествуваше во големата меѓународна операција „FIRSTLIGHT 2026“, координирана од Интерпол, насочена кон сузбивање на онлајн измамите и перењето пари. Акцијата се реализираше од 15 јануари до 30 април годинава, а во неа беа вклучени надлежни институции од 97 држави и територии ширум светот.

Од МВР информираат дека во операцијата учествувале Секторот за компјутерски криминал и Секторот за меѓународна полициска соработка, со цел откривање и сузбивање на измами извршени преку т.н. социјален инженеринг, како и на активности поврзани со перење пари.

„Министерството за внатрешни работи, преку Секторот за компјутерски криминал во содејство со Секторот за меѓународна полициска соработка, активно учествуваше во меѓународната операција „FIRSTLIGHT 2026“, чија заедничка цел беше откривање и сузбивање на онлајн измами и поврзаните активности на перење пари“, соопштија од Министерството.

Во оваа категорија спаѓаат измами преку компромитирање на службена електронска пошта (Business E-mail Compromise), инвестициски измами, романтични измами, лажно претставување, сексуална уцена (sextortion), како и други облици на интернет-криминал, при кои сторителите ја злоупотребуваат довербата на граѓаните и компаниите за да дојдат до пари или доверливи информации.

Во текот на операцијата биле разменувани оперативни и разузнавачки информации, извршени биле претреси на повеќе локации, блокирани и замрзнати банкарски сметки и виртуелни паричници, а биле искористени и механизмите на Интерпол за брзо запирање на незаконските финансиски трансакции.

Според податоците на Интерпол, операцијата дала значајни резултати на глобално ниво. Уапсени се 5.811 лица, идентификувани се повеќе од 142.000 жртви, анализирани се 152.808 случаи, а решени се 23.715 предмети. Исто така, идентификувани се 15.606 осомничени лица, блокирани се 31.014 банкарски сметки, пресретнати се околу 293 милиони американски долари незаконски стекнати средства, а преку Интерпол се издадени 99 меѓународни известувања и дифузии.

The post ГЛОБАЛНА БИТКА ПРОТИВ САЈБЕР-КРИМИНАЛОТ Операција во 97 држави, уапсени над 5.800 лица во акција во која учествуваше и МВР appeared first on plusinfo.mk.

Шпанската полиција го уапси Доменико Павиљанити, познат како „Дон Мико“, осомничен мафијашки шеф поврзан со калабриската криминална организација Ндрангета. Уапсен е човекот кого италијанските власти со години го бараа низ Европа.

Акцијата била спроведена во градот Сорија, околу 200 километри североисточно од Мадрид, по повеќемесечна заедничка истрага на шпанските и италијанските служби.

Дрога, насилство и перење пари

Според истражителите, против Павиљанити во Италија се водат постапки за повеќе тешки кривични дела, меѓу кои трговија со дрога, насилни злосторства и перење пари.

За него била издадена европска потерница уште во 2022 година, а доколку биде екстрадиран, го очекува казна затвор до 19 години.

Видео објавено од шпанската полиција покажува како 65-годишникот е спроведен со лисици без да пружа отпор.

Agentes de @policia han detenido en #Soria a D.P., presunto líder de uno de los clanes de la #Ndrangheta, en virtud de una #OEDE por delitos contra las personas, tráfico de drogas y blanqueo de capitales

Se enfrenta a 19 años de #prisión

Ha colaborado la Guardia di Finanza de… pic.twitter.com/fXffoR1tLt

— Policía Nacional (@policia) June 28, 2026

Живеел мирно, чуван од телохранители

Шпанските медиуми пишуваат дека тој со години живеел во Сорија, град со околу 40.000 жители.

Според „Ел Мундо“, бил под заштита на телохранители и водел мирен живот далеку од очите на јавноста.

Ова не е негово прво апсење. Првпат бил приведен во 1996 година, а во Италија бил екстрадиран во 1999 година. По речиси две децении зад решетки бил ослободен поради грешка во пресметката на казната.

Подоцна повторно бил уапсен во Мадрид, но повторно излегол на слобода.

Ндрангета важи за една од најмоќните мафии во светот

Ндрангета, со седиште во јужна Италија, се смета за една од највлијателните и најбогати криминални организации во светот.

Организацијата беше во центарот на крвавите клански војни во Калабрија во 1980-тите и почетокот на 1990-тите, период во кој загинаа околу 700 луѓе.

Италијанските власти очекуваат постапката за екстрадиција на „Дон Мико“ да започне во наредните денови.

The post 📽️ ВО ШПАНИЈА ПАДНА ЕДЕН ОД НАЈБАРАНИТЕ ИТАЛИЈАНСКИ МАФИЈАШИ Го пронајдоа по месеци тајна истрага appeared first on plusinfo.mk.

Во современите финансиски системи, механизмите за спречување перење пари (АМЛ – Anti-Money Laundering) претставуваат неопходен дел од глобалната финансиска безбедност. Нивната примарна цел е заштита на финансискиот систем од организиран криминал, нелегални финансиски текови, корупција и финансирање незаконски активности. Во теорија, станува збор за инструмент кој треба да ја зајакне стабилноста на државата, довербата во банкарскиот сектор и меѓународниот кредибилитет на економијата.

Но, во пракса, особено во помалите и институционално почувствителни економии како македонската, начинот на кој АМЛ механизмите се имплементираат во рамките на банкарскиот систем постепено создава сериозен структурен парадокс. Наместо прецизен инструмент насочен кон откривање финансиски криминал, АМЛ процедурите сè почесто се претвораат во административен филтер кој создава дополнителен товар врз обичните граѓани, студенти, малите и средни компании, фриленсерите, па дури и врз легитимните странски инвеститори.

Така се создава еден тивок, но исклучително важен судир помеѓу економските цели на државата и оперативното однесување на банкарскиот сектор. Додека државата се обидува да привлече инвестиции, да ја забрза економската активност и да создаде попривлечна бизнис клима, банките преку претерано рестриктивна и дефанзивна примена на АМЛ процедурите, создаваат дополнително триење кое ги забавува токму тие процеси.

Проблемот, притоа, не е во постоењето на АМЛ системот. Напротив, современа економија без механизми против финансиски криминал е практично невозможна. Суштинското прашање е начинот на кој системот се применува, односно институционалната логика според која функционира и степенот на аналитичка зрелост на банкарските структури задолжени за негово спроведување.

Современиот АМЛ модел во голем дел е управуван од автоматизирани системи за мониторинг, алгоритамски ризични проценки, регулаторни обврски и страв од санкции од надзорните институции. Во такви услови, голем дел од банкарскиот сектор постепено преминува од вистинска финансиска анализа кон таканаречена „дефанзивна усогласеност“ (Defensive Compliance). Тоа значи дека приоритетот е избегнување на регулаторен ризик и формална процедурална заштита на банката, наместо суштинско откривање реален финансиски криминал.

Во практиката, ова создава култура во која службениците за усогласеност (Compliance Officers) функционираат според едноставна институционална логика: “подобро е да се постават премногу прашања и да се пријават повеќе сомнителни активности отколку да се преземе ризик да се пропушти потенцијален проблем”. Резултатот  на ваква логика е систем што ја наградува процедурата, документацијата и административната претпазливост, а не систем што ја наградува аналитичката прецизност.

И токму заради тоа, највидливиот товар на АМЛ системот денес паѓа врз средната класа, малите компании и обичните граѓани. А мали меѓународни трансакции, фриленсерски приходи, хонорарни плаќања, нестандардни девизни приливи или повлекување готовина предизвикуваат дополнителни проверки, административни процедури и барања за документација, иако реалниот ризик од финансиски криминал е минимален.

Причината лежи во фактот што современите АМЛ системи во значителна мера функционираат врз основа на статистички отстапувања и автоматизирани индикатори, а не врз основа на реална економска логика. Системот не анализира дали трансакцијата има суштинска економска оправданост, туку дали отстапува од „очекуваниот шаблон“ на однесување. На тој начин се создава феноменот на таканаречен „процедурален сомнеж“, каде формата добива поголема важност од суштината.

Дополнителен проблем, кој ретко се отвора во јавноста, е ограничениот аналитички капацитет во дел од AML секторите. Во многу случаи, службениците за усогласеност (Compliance Officers) се солидно обучени за регулаторни процедури, документација, административни протоколи и формална усогласеност. Но современиот финансиски криминал денес бара сосема поинаков профил на експертиза, како на пример, форензичка финансиска анализа, препознавање мрежни шеми, разбирање корпоративни структури, проценка на економска логика и способност за аналитичко поврзување комплексни финансиски текови.

И тука се создава суштинскиот институционален јаз: современиот финансиски криминал станува сè пософистициран, стратешки организиран и правно структуриран, додека голем дел од АМЛ системите остануваат административно ориентирани и процедурално фокусирани.

Поради тоа, системот станува исклучително ефикасен во откривање процедурални неправилности кај обични клиенти, но значително послаб во препознавање комплексни финансиски операции прикриени зад формално исправна документација.

Особено е важно да се разбере дека големата корупција денес ретко функционира преку класични „сомнителни“ трансакции. Напротив, современите коруптивни модели најчесто се движат низ легални економски структури, јавни набавки, инфраструктурни проекти, консултантски договори, подизведувачки мрежи, корпоративни услуги и институционално легитимирани финансиски шеми.

Средствата најпрво влегуваат во системот преку формално легитимни економски активности. Потоа се распределуваат низ компании, подизведувачи и посреднички структури. Документацијата ја легитимираат адвокати, ревизори и сметководители, а трансакциите формално изгледаат усогласени со деловната активност. Во такви услови, банкарските системи ги третираат трансакциите како нормална корпоративна активност, бидејќи формално не постои јасна или видлива отстапување.

Токму тука лежи еден од најголемите парадокси на современиот АМЛ модел: системот е значително поефикасен во откривање „неправилни поединци“ отколку во откривање институционализирана корупција интегрирана во формално легални економски структури.

Дополнителен притисок врз банките создава и самиот меѓународен АМЛ систем, предводен од организации како Financial Action Task Force, International Monetary Fund и European Union. Во пракса, земјите се оценуваат според бројот на извештаи за сомнителни трансакции, постоењето на формални процедури и степенот на регулаторна усогласеност. Ова создава системски стимул за квантитет наместо за квалитет, односно за масовно административно пријавување наместо за вистинска финансиска интелигенција.

Последиците од ваквиот модел не се само административни, туку и економски. Во услови кога државата настојува да привлече инвестиции и да ја зголеми економската динамика, прекумерната банкарска претпазливост создава забавување на процесите, одложување на отворање сметки, дополнителни проверки, блокади и неизвесност кај инвеститорите.

Особено значаен е феноменот на „de-risking“, односно ситуација во која банките однапред избегнуваат цели категории клиенти, економски сектори или трансакциски профили поради проценет регулаторен ризик. Наместо управување со ризикот, се создава систем на избегнување на ризикот. Последицата е намалена банкарска достапност дури и за целосно легитимни економски субјекти.

Во такви услови, прашањето за банкарската ефикасност повеќе не е само финансиско или техничко прашање, туку станува директно прашање на економска конкурентност. Меѓународните споредби покажуваат дека суштинската разлика не е помеѓу „строг“ и „слаб“ АМЛ систем, туку помеѓу интелигентен и ретардиран административен АМЛ модел.

Сингапур успеа да изгради високо аналитички систем каде нискоризичните клиенти имаат брзи и ефикасни процедури, додека високоризичните структури се предмет на длабинска анализа. Швајцарија функционира врз основа на институционална дисциплина, висока професионализација и селективен банкарски пристап. Обединетите Арапски Емирати, пак, долго време ја фаворизираа брзината на капиталните приливи, пред постепено да воведат построги AML механизми под меѓународен притисок.

Во помали балкански системи, доминира комбинација од прекумерна процедуралност, страв од регулаторни санкции, административна претпазливост и ограничен аналитички капацитет. И токму заради тоа, системот создава висок степен на административен товар, без притоа да покаже пропорционална ефикасност во борбата против финансиски криминал.

Така се создава суштинскиот парадокс на современиот АМЛ модел: доколку системот е премногу слаб, се намалува довербата кај инвеститорите и меѓународните финансиски институции; но доколку е премногу бирократски, ригиден и процедурално агресивен, се создава економско триење што ја намалува конкурентноста на економијата и ја забавува деловната активност.

Клучното прашање денес не е дали АМЛ треба да биде „посилен“ или „послаб“, туку дали може да стане попрецизен, поаналитички и институционално поинтелигентен?

Доколку Македонија сака истовремено да ја зајакне финансиската безбедност и да го забрза економскиот развој, неопходен е премин кон поинтелигентен АМЛ модел. Тоа подразбира вистинска ризична сегментација, каде нискоризичните граѓани и компании нема да се третираат со ист интензитет како комплексните високоризични структури. Потребно е и намалување на дефанзивната банкарска усогласеност преку појасни регулаторни насоки и поголема институционална сигурност за банкарските службеници.

Истовремено, неопходно е инвестирање во аналитички капацитети, форензичка финансиска анализа, дигитални алатки и специјализирана обука за современи финансиски истраги. Модерниот финансиски криминал денес бара аналитичари способни да препознаваат економска нелогичност и комплексни корпоративни шеми, а не само административни отстапувања.

Државата и банкарскиот сектор треба да создадат побрзи и попредвидливи процедури за легитимни инвеститори и компании, бидејќи во современата глобална економија брзината и предвидливоста на банкарските услуги веќе претставуваат дел од економската конкурентност на една држава.

АМЛ како пречка за инвестициската дипломатија и приливот на странски капитал

Дополнително загрижувачки е фактот што актуелната примена на AML механизмите во одредени случаи создава сериозни бариери токму кон оние пазари од кои државата активно се обидува да привлече капитал и инвестиции. Во изминатиот период, македонските институции интензивно ги промовираа економските потенцијали на државата пред земјите од Заливот, како Катар, Саудиска Арабија, Кувајт, Оман и Бахреин, претставувајќи ја Македонија како стабилна и атрактивна бизнис дестинација.

Паралелно со тие напори, реалноста во банкарскиот сектор испраќа сосема поинаква порака. Во пракса, значителен дел од клиентите и инвеститорите кои доаѓаат од овие држави автоматски се третираат како високоризични субјекти врз основа на ригидни и генерализирани алгоритамски проценки, без доволна индивидуална аналитичка проценка на конкретниот клиент или трансакција.

Последиците од таквиот пристап се сериозни: пролонгирани процедури, дополнителни проверки, блокирани трансакции, административни компликации и обесхрабрување на потенцијални инвеститори уште во првата фаза на контакт со финансискиот систем. Во пракса, тоа создава ситуација во која државата дипломатски и економски се обидува да привлече капитал од одредени региони, додека делови од банкарскиот систем фактички го отежнуваат или дури го оневозможуваат неговото нормално влегување во економијата.

Постојат бројни конкретни случаи што ја потврдуваат оваа појава и кои укажуваат дека проблемот не е изолиран инцидент, туку поширок структурен модел на претерана и недоволно прецизна ризична категоризација.

Затоа, реформата на АМЛ системот повеќе не треба да се гледа само како регулаторно или техничко прашање, туку како прашање од директен економски и стратешки интерес за државата. Времето за прецизна, аналитички понапредна и економски порационална реформа е сега, пред административната претпазливост да стане долгорочна пречка за економскиот развој и привлекувањето капитал.

Доколку Македонија успее да изгради попрецизен, аналитички пософистициран и економски порационален АМЛ модел, веднаш ќе ја зајакне сопствената финансиска репутација, да привлече посериозни инвестиции, да го намали непотребниот административен товар врз граѓаните и компаниите и да ја подобри реалната способност за борба против финансиски криминал. Доколку истиот пристап продолжи, постои реален ризик Македонија постепено да ја изгуби конкурентноста во однос на други регионални дестинации кои нудат побрзи, попредвидливи и пофункционални банкарски процедури за странски инвеститори.

The post АМЛ системот, кочница на македонскиот економски развој appeared first on plusinfo.mk.

Апелациониот судија Ѓоко Ристов, кому истражителите му најдоа 350.000 евра скриени во ѕид во домот на неговите родители во Неготино, денеска на почетокот на судскиот процес во Кривичниот суд се изјасни како невин за кривичните дела што му се ставаат на товар.

– Не се чувствувам виновен ниту за првото, ниту за второто кривично дело со оглед на правната квалификација – изјави Ристов пред судот.

Обвинителката Искра Хаџи Василева, пак, тврди дека  рече дека Ристов свесно презел дејствија спротивно на одговорноста на која го повикува судската тога. Обвинителството, како што беше кажано, ќе докажува дека Ристов како судија во Апелационен суд, дал лажни податоци за својата имотна состојба, а ќе се докажува и за прикривање на податоци за имотот на обвинетиот. Ќе се докажува дека Ристов го користел делот од куќата каде биле најдени парите, кои биле криени, според обвинението, зад кујнски елементи.

Обвинетиот, за кого беше кажано дека е женет, татко на две деца, рече дека разбрал што му се става на товар, но, не се чувствува виновен ниту за првото, ниту за второто. Ристов нагласи и дека за перење пари мора да има кривично дело од кое потекнуваат тие пари.

Од одбраната на Ристов, во судницата денеска беа присутни бранителите Ѕвонко Давидовиќ и Душко Јанковиќ. Давидовиќ, меѓу другото, рече дека одбраната во текот на оваа постапка ќе се судри со теоријата на Обвинителството наречена „ѕидовите зборуваат, а доказите молчат“. Тој наведе дека за среќа, чувствата во судница не зборуваат, туку зборува ладнокрвноста на доказите.

– Мојот клиент со децении професионално ја извршувал својата професија и пред да се појави во судницата, во јавноста веќе беше осуден – додаде бранителот во неговиот говор во судницата.

Ниту еден доказ, како што подвлече тој, не ги поврзувал Ристов и неговата функција.

Давидовиќ рече дека во текот на постапката, одбраната на судот ќе му докаже за легалното потекло на имотот на родителите на обвинетиот. Според одбраната, легалните докази ќе покажат дека неговите родители легално го спечалиле овој имот.

Давидовиќ рече и дека неосновано е поврзувањето на парите со обвинетиот.

На 17 април, Јавното обвинителство на Репбулика Северна Македонија соопшти дека биле преземени повеќе дејствија и претреси, при кои на 18.01.2026 година во дом на родители на судија во Неготино, пронајдени биле вкупно 350.000 евра за чие потекло, тој немал доказ и не ги пријавил.

„Парите беа пронајдени спакувани во 13 поединечни пакувања, и тоа вкупно 610 банкноти во апоени од по 500 евра и 225 банкноти во апоени од по 200 евра, од кои дел со обележани рачно испишани износи на средствата, скриени во заѕидан простор во шуплините од цигли во ѕидот на една од собите. Ова предизвика основано сомнение дека овој осомничен во периодот од 10.02.2020 година, како службено лице судија во Апелациониот суд Скопје, спротивно на законската должност за пријавување на имотна состојба или нејзина промена давал лажни податоци за својот имот и имотот на неговото семејство и не пријавил имот, кој во големи размери ги надминува неговите законски приходи“, објави ЈО.

Притоа Обвинителството информираше дека од поведувањето на постапката, јавниот обвинител презел повеќе дејствија, со кои обезбедил цврсти докази во однос на сопственоста на паричните средства.

Судскиот процес го води судијката Билјана Коцевска.

Следното рочиште е на 9 јуни.

The post СУДИЈАТА РИСТОВ НЕГИРА ВИНА ЗА СОЅИДАНИТЕ 350.000 ЕВРА Одбраната ќе докажува дека парите ги стекнале неговите родители appeared first on plusinfo.mk.

Катерина Коларевиќ, обвинителката која ја стопираше истрагата за случајот „Мазут“ тежок 167 милиони евра, според ВМРО-ДПМНЕ е дел од мрежа на блиски релации меѓу СДСМ, ДУИ и обвинителско-судскиот систем.

Дали Коларевиќ по насока на шефот на ОЈО ГОКК Ислам Абази и насока на Венко Филипче, Зоран Заев и Али Ахмети ја стопирала постапката, прашува ВМРО-ДПМНЕ.

Партијата обвинува дека таткото на Коларевиќ е еден од „семејните кадри“ унапредени во времето на СДСМ и ДУИ и дека унапредувањето е типична политичка номинација, а не професионален развој.

„Павле Марков, во 1998 година од тогашната влада на СДСМ е избран за државен правобранител, додека, пак, мајка ѝ Вера Маркова, во 2004 од коалицијата СДСМ и ДУИ е избрана за уставен судија“.

Понатаму во текстот се спомнува блискоста на Ислам Абази со шефот на ДУИ, Али Ахмети, како комшии во Зајас.

„За блискоста на Ислам Абази со Ахмети како комшија од Зајас, на кого според јавно достапни фотографии може да се види како на глава му седи неговиот брат Фекри Ахмети, сите знаат“.

ВМРО-ПМНЕ обвинува дека обвинителката Коларевиќ, блиска до СДСМ и ДУИ, добро знае дека во економскиот криминал или штета на државниот буџет, како што е случајот со ТЕЦ Неготино, се утврдува со економско вештачење, а не со изјави дадени од некомпетентни и неовластени лица вработени во ЕСМ.

„И од ЕСМ јасно потенцираа дека испитаните лица во постапката, не биле ниту одговорни, ниту компетентни лица да проценат штета и да утврдат економски криминал со набавката на мазутот.

Но, со скандалозната одлука за стопирање на истрагата за овој случај тежок 167 милиони евра за кој постојат силни индиции и сомнежи за перење пари и тендерски криминал, станува јасно дека решението на Абази и Коларевиќ не е поткрепено со правно-обвинителски аргументи, туку веројатно е добро подмачкано со прескапиот мазут“, соопшти ВМРО-ДПМНЕ.

Понатаму, ВМРО-ДПМНЕ прашува:

„Од овие прости причини се јавува потребата да се постави прашањето, дали поради тоа обвинителката Коларевиќ во случајот со мазутот тежок 167 милиони евра, не постапувала со главен мотив да ја открие вистината, туку за да го заташка, како што ја стопираше постапката, за од кривична одговорност да ги спаси Васко Ковачевски, Адријан Муча, Асмир Јахоски и другите блиски до Ахмети, Заев и Филипче“.

Оттука ВМРО-ДПМНЕ го тврди следното:

„Или подиректно, дали Коларевиќ како обвинителка поради свои интереси и по насоки од блискиот до ДУИ, Ислам Абази, кои доаѓаат директно од врхушката на СДСМ и ДУИ, односно од Ахмети, Заев и Филипче, ја сопре постапката за овој случај вреден 167 милиони евра?

Очекуваме одговори, затоа што јавноста има право и заслужува да ја знае целата вистина, додека Советот на јавни обвинители има обврска да го истражи работењето и постапувањето и на Абази и на Коларевиќ.

За да се воспостави правна држава и да се врати довербата на граѓаните во правосудството, која сега е минорни 2%, потребно е и обвинителите да подлежат на професионална, дисциплинска и кривична одговорност, доколку се докаже нивно противправно делување.

Македонија заслужува правда и одговорност“,

The post ИСПЛИВА „СЕМЕЈНАТА“ ВРСКА НА СДСМ И КОЛАРЕВИЌ Дали „Мазут“ е стопиран по налог на Абази, СДСМ и на ДУИ? appeared first on plusinfo.mk.

Врховниот суд за борба против корупцијата во Украина му изрече превентивна мерка – притвор на поранешниот шеф на претседателската администрација на Володимир Зеленски,  Андриј Јермак, со можност да плати кауција од 140 милиони гривни (3,2 милиони долари) – објави „Укринформ“ повикувајќи се на судијата Виктор Ногачевски.

Судијата Ногачевски, пренесува ДПА, денеска пресуди дека Јермак треба да остане во притвор како почетен период од 60 дена, со можност за ослободување со кауција.

Јермак се соочува со обвиненија за перење пари. Тој и пет други осомничени се обвинети дека се дел од организирана група, која наводно испрала речиси девет милиони евра (10,6 милиони долари) поврзани со луксузен градежен проект во близина на Киев, појаснува ДПА.

Јермак категорично ги негира обвинувањата изјавувајќи дека нема финансиски средства да ја плати кауцијата, која е еквивалентна на 2,72 милиони евра.

Тој поднесе оставка на функцијата кон крајот на ноември минатата година поради корупциски скандал по претресите на неговиот дом. Тој му беше долгогодишен најдоверлив човек на украинскиот претседател Володимир Зеленски и ја водеше претседателската канцеларија од 2020 година.

Јермак во Украина и во странство се сметаше за втор најмоќен човек во Украина.

Доколку кауцијата биде платена, на Јермак ќе му бидат доделени голем број обврски: да се појави на секое барање на истражителот, детективот, обвинителот и судот; да го извести истражителот, инспекторот, обвинителот или судот за каква било промена на местото на живеење и местото на работа; да не го напушта Киев без дозвола на истражителот, обвинителот и судот; да ги предаде своите документи за патување во странство на надлежните органи; да носи електронски уред за следење.

Дополнително, доколку се плати кауцијата, поранешниот шеф на претседателската администрација ќе мора да се воздржи од комуникација со голем број осомничени во случајот, особено со поранешниот вицепремиер Олексиј Чернишов и бизнисменот Тимур Миндич, како и со голем број сведоци.

The post УАПСЕН И ПРИТВОРЕН ПОРАНЕШНИОТ ПРВ ЧОВЕК НА КАБИНЕТОТ НА ЗЕЛЕНСКИ Андриј Јермак е обвинет за перење пари appeared first on plusinfo.mk.

Украинските антикорупциски власти открија наводна шема за перење пари во која е вклучен поранешниот шеф на претседателскиот кабинет, Андриј Јермак, јави ДПА.

Националното биро за борба против корупција на Украина (NABU) и Специјализираното обвинителство за борба против корупција (SAP) вчера соопштија дека организирана група наводно испрала еквивалент на речиси девет милиони евра (10,6 милиони долари) во врска со луксузен градежен проект во близина на Киев.

Јермак е осомничен дека е дел од групата, наведе германската агенција.

Тој поднесе оставка кон крајот на ноември минатата година поради корупциски скандал по претресите на неговиот дом.

Јермак со години беше еден од најдоверливите луѓе на украинскиот претседател Володимир Зеленски и ја водеше претседателската канцеларија од 2020 година. Тој се сметаше за втор најмоќен човек во Украина, потсетува ДПА.

The post НЕКОГАШ ВТОР НАЈМОЌЕН ЧОВЕК НА УКРАИНА, СЕГА ОСОМНИЧЕН ЗА ПЕРЕЊЕ ПАРИ Поранешниот шеф на кабинет на Зеленски фатен во криминал appeared first on plusinfo.mk.

Претседателот на СДСМ Венко Филипче на вчерашната прес конференција беше поканет од новинар на ТВ Алфа да гостува во нивната телевизија во термин по негов избор и да ги изнесе сите свои ставови. На ова Филипче рече дека ќе дојде да гостува во ТВ Алфа, но откако претходно „ќе ја ослободи“ телевизијата од „канџите во кои е ставена“ и од „црните пари кои доѓаат од Унгарија“.

– Господине Филипче, јас сум од медиумот телевизија Алфа, па би сакала и да ви упатам покана да дојдете кај нас во емисија, во вести или било кој формат. Повеќе пати сте поканети, па, ако сакате отворени се вратите на Телевизија Алфа, се што сакате да порачате слободно може да дојдете кај нас секако порачате и еве би сакала да добијам одговор дали ќе дојдете, кога ќе дојдете, сакате ли да дојдете – рече новинарката на Алфа.

Наместо културен одговор на културна покана за гостивање и соочување на аргументи, Филипче повторно возврати со директен напад и закана.

– Ќе дојдам кога ќе ве ослободам. Ќе ве ослободам од канџите коишто се ставени врз вашиот медиум, од црните пари коишто доаѓаат од Унгарија. Поради тоа што има доказано или барем сомнеж дека таа телевизија се користи за перење пари. Кога ќе ве ослободам од тој наратив што го ширите антиевропски и дискредитациони политики кои што ги креирате и ги спроведувате, ако се прашува Телевизија Алфа, јас сум хипер-корумпиран човек којшто гради згради во Дубаи и има куќи. Не знам каде низ Скопје ваши новинари одат и се сликаа пред куки во Нерези што нема никаква врска со мене – рече Филипче.

Откако новинарката го праша дали тој ќе се извини што на јавна сцена ја оцрнува телевизија, Филипче кратко одговори со контрапрашање.

– А, дали ќе се извините кога сѐ ова што тврдувате ќе се докаже дека е невистина?  Јас сум спремен да дебатирам на било која тема – рече Филипче.

Ова не е првпат Филипче да ја напаѓа телевизија Алфа, а нападите особено се засилија по смената на власта во Унгарија, по што СДСМ поднесе и кривична пријава за телевизијата. Неколку новинарски здруженија, како и Агенцијата за аудио и аудиовизуелни медиумски услуги изрази загриженост поради зачестените изјави на лидерот на СДСМ Венко Филипче, во кои изнесува обвинувања за политичка и финансиска зависност на ТВ Алфа.

Тие посочуваат дека јавното етикетирање и користење на медиумите во политички конфронтации не е во согласност со демократските принципи и слободата на изразување. Според нив, недозволиво е носители на јавни функции да користат дискредитирачка реторика која придонесува за поларизација и може да ја наруши довербата на јавноста во медиумите.

Во јавноста се појавија и шеговити монтажи и коментари, кои духовито ја коментираат пресметката на опозиционерот Филипче со приватната телевизија Алфа.

The post 🎥 ФИЛИПЧЕ ЌЕ ЈА ОСЛОБОДЕЛ ТВ АЛФА Па после ќе им дошол во студио нa дебата appeared first on plusinfo.mk.

Основното јавно обвинителство за гонење организиран криминал и корупција (ОЈОГОКК) денеска поднесе обвинение против судијата Ѓоко Ристов од Апелациониот суд Скопје, откако во домот на неговите родители во Неготино беа пронајдени 350.000 евра соѕидани во ѕид.

Обвинението за Ристов следи откако адвокатот Фехми Стафа се спогоди со судот за казна затвор од 1 година и 3 месеци за примање мито. Тој призна вина дека побарал вкупно 100.000 евра, а на 13.12.2025 година директно примил износ од 20.000 евра за да посредува со искористување на своето реално влијание врз судија од Апелациониот суд Скопје за укинување мерка притвор определена кон лице кое тогаш било недостапно на органите на прогонот.

Соочен со доказите на Oбвинителството, обвинетиот целосно ги призна и прифати наводите во обвинението, по што побара да се спогоди за висината на кривичната санкција.

Врз основа на постигнатата предлог-спогодба во која беа земени предвид сите отежителни и олеснителни околности, Основниот кривичен суд Скопје вчера изрече пресуда со која го осуди обвинетиот на ефективна казна затвор од 1 година и 3 месеци за кривично дело – Примање награда за противзаконито влијание од член 359 став 7 од Кривичниот законик.
Со прифаќање на предлог спогодбата, сега осудениот ги потврди и наводите во обвинението согласно кои побараните пари биле со намена со поткуп да влијае врз конкретен судија од Апелациониот суд во Скопје за да издејствува укинување на мерка притвор.

Иако во конкретниот случај адвокатот бил фатен „ин флагранти“ со дел од поткупот и тие пари не стигнале до судијата, јавниот обвинител презеде и повеќе други дејствија и претреси при кои на 18.01.2026 година во домот на родителите на судијата во Неготино, пронајде вкупно 350.000 евра за чие потекло тој нема доказ и не ги пријавил.

Парите беа пронајдени спакувани во 13 поединечни пакувања, и тоа вкупно 610 банкноти во апоени од по 500 евра и 225 банкноти во апоени од по 200 евра, од кои дел со обележани рачно испишани износи на средствата, скриени во заѕидан простор во шуплините од цигли во ѕидот на една од собите.

Ова предизвика основано сомнение дека овој осомничен во периодот од 10.02.2020 година, како службено лице судија во Апелациониот суд Скопје, спротивно на законската должност за пријавување на имотна состојба или нејзина промена давал лажни податоци за својот имот и имотот на неговото семејство и не пријавил имот кој во големи размери ги надминува неговите законски приходи.

Од поведувањето на постапката јавниот обвинител презеде повеќе дејствија со кои обезбеди цврсти докази во однос на сопственоста на парите, со што се потврдија елементите кои го исполнуваат битието на кривичното дело – Противправно стекнување и прикривање имот од член 359-а. Имајќи го предвид доказниот материјал за располагање со имотот во периодот од 2020 година до денес, во корелација со начинот искористен за криење на пронајдените пари, се обезбедија докази кои укажуваат на обележја и на кривичното дело – Перење пари и други приноси од казниво дело од член 273 од Кривичниот законик.

Надлежниот јавен обвинител продолжува да презема дејствија до целосно испитување на сите аспекти наy сомнежите за коруптивни дејствија и потенцијална инволвираност и на други лица.

The post ОБВИНЕНИЕ ЗА СУДИЈАТА СО ЗАЅИДАНИ 350.000 ЕВРА Обвинителството има цврсти докази чии се парите и дека се испрани appeared first on plusinfo.mk.