Во врска со конечниот извештај на Државниот завод за ревизија за работењето на Фондот на пензиското и инвалидското осигурување на Македонија за 2024 година, Фондот ја информира јавноста дека станува збор за редовна годишна ревизија која се спроведува секоја година согласно закон и го опфаќа финансиското работење, усогласеноста на постапките и управувањето со средствата на институцијата.

Важно е да се нагласи дека предмет на ревизија е работењето на Фондот во текот на целата 2024 година.

Во првите девет месеци од ревидираниот период со Фондот управуваше раководен кадар именуван во време на претходната Влада предводена од СДСМ и ДУИ, додека актуелното раководство ја презеде одговорноста за управување со институцијата во последниот квартал од годината.

Поради тоа, најголемиот дел од ревидираните постапки, одлуки, договори, административни процеси и утврдени состојби се однесуваат на период кога Фондот функционирал под раководство на претходниот менаџмент.

Дополнително, значителен дел од забелешките на ревизорите се однесуваат на состојби кои се провлекуваат со години и биле нотирани и во претходни ревизорски извештаи, што укажува дека станува збор за наследени системски слабости.

Фондот на ПИОМ нагласува дека по преземањето на функцијата, актуелниот менаџмент веднаш пристапи кон анализа на сите ризични процеси и воведе конкретни мерки за надминување на утврдените слабости.

Во делот на јавните набавки отстранети се сите недостатоци забележани во наодите и се воспоставени дополнителни контролни механизми, зајакнати се процедурите за планирање и реализација на набавките и е воспоставен систем на повисока транспарентност и отчетност.

Истовремено, преземени се активности за средување на административните евиденции, подобрување на внатрешните контроли, унапредување на финансиското управување, зајакнување на институционалната дисциплина и подобрување на процесите поврзани со управувањето со средствата и имотот на Фондот.

Фондот на ПИОМ со полна одговорност оценува дека слабостите кои се однесуваат на тековното административно работење и на системот на јавни набавки се веќе надминати, а механизмите воспоставени на крајот на 2024 и во текот на 2025 година, значително го намалуваат ризикот од повторување на констатираните состојби во иднина и ова е нотирано во извештајот на ДЗР во прилот на забелешките од Фондот на ПИОМ.

Воедно, во јавноста се отворија прашања поврзани со обврските кон Фондот за здравствено осигурување и трансферите кон пензиските друшва од вториот столб.

Во таа насока Фондот на ПИОМ смета дека е потребно да се истакне дека зголемувањето на овие обврски е директна последица на историски најголемото зголемување на пензиите во државата.

Со одлуките донесени во изминатиот период, пензиите беа зголемени номинално за околу 7.000 денари месечно за сите 347.000 пензионери. Тоа значи дополнителни средства за пензионерите во износ од околу 30 милијарди денари на годишно ниво.

Бидејќи придонесот за здравствено осигурување на пензионерите се пресметува како процент од исплатената пензија и изнесува 11,8 проценти од нето исплатената пензија, а делот за вториот столб е 6 проценти од вкупните придонеси за пензиско осигурување, сосема очекувано е со растот на пензиите да се зголемува и обврската по овој основ кон Фондот за здравствено осигурување.

Оттука, Фондот на ПИОМ нагласува дека зголемените обврски се директен резултат на повисоките пензии и подобриот животен стандард на пензионерите, а не последица на нарушена финансиска стабилност или нефункционирање на системот.

Исплатите по овие основи зависат од висината на средства обезбедени во буџетот на ПИОМ и реализацијата на овие стапки во буџетот на Фондот за 2024 година изнесува 82,24 проценти за ФЗО и 92,95 проценти за Вториот столб.

Фондот на ПИОМ смета дека најважно е што во ниту еден момент не е доведено во прашање здравственото осигурување на пензионерите.

Сите пензионери непречено и континуирано ги остваруваат своите права од здравственото осигурување и редовно ги добиваат здравствените услуги под исти услови како и досега.

Фондот на ПИОМ целосно ги прифаќа препораките на Државниот завод за ревизија и континуирано работи на нивна имплементација.

Истовремено, Фондот на ПИОМ останува посветен на принципите на законитост, отчетност, транспарентност и домаќинско управување со средствата на осигурениците и пензионерите.

Граѓаните и пензионерите треба да бидат уверени дека финансиската стабилност на Фондот, редовната исплата на пензиите, непреченото функционирање на пензискиот систем и континуираното обезбедување на здравствените права на пензионерите не се доведени во прашање и остануваат врвен приоритет на актуелното раководство на ПИОМ и Владата на Република Македонија.

The post РЕВИЗИЈАТА НА ФОНДОТ ЗА ПИОМ СЕ ОДНЕСУВА НА ВРЕМЕТО НА ПРЕТХОДНОТО РАКОВОДСТВО Многу од утврдените слабости во меѓувреме се надминати appeared first on plusinfo.mk.

Агенцијата за супервизија на капитално финансирано пензиско осигурување МАПАС апелира граѓаните навремено да ги ажурираат своите податоци за да можат навремено да добијат информации од пензиските друштва за состојбата со нивните сметки.

Граѓаните треба да ги проверат и ажурираат нивните лични податоци, да пријават евентуална промена на адреса или контакт информации.

-Со цел поголема транспарентност и континуиран увид во пензиските заштеди, пензиските друштва во Северна Македонија еднаш годишно доставуваат извештаи до своите членови кои се се уште вработени и пензионирани членови. Овие извештаи содржат детални информации за состојбата на индивидуалната пензиска сметка, доброволната индивидуална сметка, професионалната сметка и инвестициското портфолио. Извештаите се доставуваат во т.н. „зелен плик“, и ги опфаќаат податоците за претходната календарска година. Согласно регулативата, доставата се врши најдоцна до 31 март во тековната година – појаснуваат од МАПАС.

Оттаму велат дека е важно граѓаните да ги ажурираат податоците за да го добијат нивниот „зелен плик“ навремено и на точна адреса и затоа е важно да ги проверат и ажурираат лични податоци, да пријават евентуална промена на адреса или контакт информации.

Ова е особено значајно за членовите на вториот и третиот пензиски столб.

The post ДАЛИ ГО ДОБИВТЕ „ЗЕЛЕНИОТ КОВЕРТ“ ОД ВАШЕТО ПЕНЗИСКО ДРУШТВО? Еве што треба да направите за да го добиете appeared first on plusinfo.mk.

Зголемувањето на старосната граница за пензионирање е прашање на кое мора да му се посвети посебно внимание, а притоа да се земат предвид демографските показатели, животниот век и квалитетот на живот, велат од пензиските друштва.

Согласни се дека прашањето за зголемувањето на старосната граница за пензионирање е болно прашање, но сметаат дека за него треба да се отвори широка дебата во која ќе бидат вклучени сите засегнати страни.

– Во Македонија во просек старосниот век е понизок од светскиот просек. Во таа смисла, треба добро да се размисли за оваа мерка, бидејќи таа е поврзана и со економскиот развој и со можноста на луѓето да ги користат средствата во пензија. Сè додека е ваков животниот век на нашето население, пресметките укажуваат дека не е многу поволна мерка зголемувањето на старосната граница, бидејќи со тоа се скратува и периодот на користење на средствата. Но, тоа е прашање што треба да се следи и да се адаптира – смета Снежана Станковиќ од „Сава пензиско друштво“.

На 20-годишнината од реформата во пензискиот систем, претставниците на пензиските друштва се согласни дека најболниот период е поминат и дека треба да се продолжи со реформата.

– Проценките за населението забрзано се остваруваат. Првата проценка беше дека околу 2050 година ќе бидеме од милион и 900 илјади до два милиона жители, а денес во 2025 година сме еден милион и 800 илјади жители. Најновата проценка е дека 2050 година ќе бидеме милион и пол. Сето тоа зборува за неодржливоста на првиот пензиски столб, односно за недоволност на средства, како и за обврска да продолжиме со реформите за развој на задолжителниот втор капитално финансиран пензиски столб, како и за третиот кој има значајна улога за сигурни, стабилни и редовни пензии – вели Станковиќ.

На почетокот на пензиската реформа се одвојуваа 21,4 проценти за првиот пензиски столб од кои 7,42 проценти одеа за вториот пензиски столб, а сега тој процент е намален и изнесува 18,5 проценти од кои 6 проценти одат за вториот пензиски столб.

– Една студија покажа дека за стабилни и одржливи пензии е потребно во текот на целиот работен век да се одвојуваат средства од 7 до 10 проценти од бруто приходот на индивидуалецот. Тоа значи дека треба да се размислува или во насока на зголемување на делот во задолжителниот пензиски фонд или да почне плаќањето во доброволниот пензиски фонд – вели Весна Стојановска од КБ Прво пензиско друштво.

Пензиските друштва упатија порака до граѓаните дека пензиските столбови се сигурни и стабилни. Тие ги повикаа граѓаните да инвестираат во третиот доброволен пензиски столб.

– Третиот пензиски фонд е доброволен и луѓето може да одвојуваат средства согласно своите можности. Препораката е што порано да се штеди во третиот столб. За да имаме активна и квалитетна старост, треба да одвојуваме средства во третиот доборволен пензиски столб – вели Станковиќ.

Според податоците на МАПАС, што ги изнесе директорот Ремзи Бајрами, во вториот пензиски столб има над 620 илјади членови и над 170 милијарди денари средства, а во третиот пензиски столб има 35 илјади членови, а парите се на ниво од 4,7 милијарди денари.

На 20 годишнината од реформата во пензискиот систем, пензиските друштва ја најавија кампањата „Засади желба за стабилна иднина“.

The post ЖИВЕЕМЕ ПОКРАТКО ОД ПЕНЗИОНЕРИТЕ НИЗ СВЕТОТ И ЌЕ НЕМАМЕ ВРЕМЕ ЗА УЖИВАЊЕ НА ПЕНЗИИТЕ Повисока старосна граница за пензија не е добра опција, порачуваат пензиските друштва appeared first on plusinfo.mk.