Хрватска планира да воведе пензионерска картичка која вклучува попусти од оние за превоз , влезници, лекови, па дури и за спа-центри.

До крајот на годината, хрватското Министерството за труд и пензискиот систем треба да формира работна група која ќе работи на воведување на картичката на цела териотрија на земјата.

„Заинтересирани сме, во рамките на Националниот совет за пензионери и стари лица, за понатамошно развивање на предлог за воведување национална пензионерска картичка, што би им го олеснило остварувањето на дополнителни права и бенефиции на пензионерите. Исто така, сметаме дека е важно да се координираме со работодавачите за да се испита подготвеноста за воведување поповолни цени за пензионерите“, соопшти надлежното министерство.

Вака картичка веќе е воведена во Сплит, Сисак и Пула.

Идејата за воведување ваква картичка е на Партијата на пензионери од каде што велат дека се дискутираат повеќе модели. Меѓу другото, оној каде што сите пензионери би ја имале, но и моделот каде што картичката би се добивала во зависност од износот на пензијата. Отворено е и прашањето за финансирање.

Според Партијата на пензионерите, универзалната картичка треба да вклучува сè – од попусти за превоз, влезници, лекови, па дури и спа-центри.

Пензионерите би можеле да користат национални картички уште од следната година.

Во Хрватска, дури 37% од луѓето над 65 години се сиромашни. Во најголем дел, станува збор за постари самци, обично вдовици кои примаат семејна пензија и луѓе кои немале доволно стаж за време на работниот век, па сега преживуваат од социјални бенефиции.

The post ХРВАТСКА ЌЕ ВОВЕДЕ ПЕНЗИОНЕРСКА КАРТИЧКА Се разгледуваат повеќе модели за тоа кој би ја добил appeared first on plusinfo.mk.