Американскиот претседател Доналд Трамп денеска ја разреши државната обвинителка Пем Бонди од функцијата, поради растечкото незадоволство од нејзиниот учинок, објави „Ројтерс“.

Разрешувањето следува по критиките за бавното водење на истрагите, особено оние поврзани со покојниот финансиер и сексуален престапник Џефри Епстин, како и поради недостатокот на активности во гонењето на критичари и политички противници на Трамп.

За време на нејзиниот мандат, Бонди беше енергичен застапник на агендата на Трамп и ја демонтираше долгогодишната традиција на Министерството за правда за независност од Белата куќа во истрагите. Меѓутоа, повторените критики околу досиејата за Епстин, како и од сојузници на Трамп и некои републикански пратеници, ја направија контроверзна личност во правосудните кругови.

Бонди беше обвинувана дека лошо раководела со објавувањето на записите од истрагите за сексуалната трговија поврзана со Епстин, што создаде политички главоболки за Трамп, посебно поради неговото поранешно пријателство со Епстин.

Овој потег на Трамп може да доведе до промена на стратегијата во Министерството за правда и потенцијално до зголемен притисок врз американскиот правосуден систем во случаите поврзани со неговите политички и приватни ривали.

Бонди е втор висок функционер на Трамп што неодамна беше отстранет. На 5 март, претседателот ја разреши и министерката за внатрешна безбедност, Кристи Ноем, по критики за управувањето со агенцијата и имиграциската политика.

Пем Бонди, поранешна републиканска државна обвинителка на Флорида, тврдеше дека нејзиниот приоритет бил да се насочи Министерството за правда кон борба против насилниот криминал и да ја врати довербата кај поддржувачите на Трамп, но нејзиниот мандат беше проследен со остри забелешки поради отстранувањето на искусни обвинители и критики за транспарентноста во објавувањето на материјалите поврзани со Епстин.

The post ТРАМП ЈА РАЗРЕШИ ОБВИНИТЕЛКАТА БОНДИ Претседателот на САД бил незадоволен од бавното гонење на неговите противници, а и поради Епстин appeared first on plusinfo.mk.

Главната американска обвинителка Пам Бонди изјави дека се објавени сите досиеја на поранешниот финансиер и осуден сексуален престапник Џефри Епштајн и дека во документите се наведени повеќе од 300 имиња на познати личности.

Бонди тврди дека ниту еден од записите не е сокриен „поради срам, штета на угледот или политичка чувствителност“, објави Фокс њуз. Таа во писмо од саботата рече дека сите досиеја на Епштајн се објавени во согласност со Законот за слобода на информации.

Фокс њуз го доби писмото од претседателот на Комитетот за правосудство на Сенатот, Чак Грасли, републиканец од Ајова; конгресменот Дик Дарбин, демократ од Илиноис; претседателот на Комитетот за правосудство на Претставничкиот дом, Џим Џордан, републиканец од Охајо; и конгресменот Џејми Раскин, демократ од Мериленд.

Писмото содржи список од повеќе од 300 имиња на познати личности, вклучувајќи го американскиот претседател Доналд Трамп, поранешниот претседател Барак Обама и поранешната прва дама Мишел Обама, британскиот принц Хари, основачот на Мајкрософт, Бил Гејтс, актерот Вуди Ален, сопственикот на Фејсбук, Марк Закерберг, пејачот Курт Кобејн и Брус Спрингстин.

Некои од споменатите имиња имале обемен директен контакт преку е-пошта со Епштајн или неговата соработничка Гислен Максвел, додека други се споменати во дел од документот (вклучувајќи и пишувањето во медиумите) кој навидум не е поврзан со прашањата за Епштајн и Максвел, се наведува во писмото.

Во документот се наведени широк спектар на материјали, вклучувајќи информации за организации и мрежи наводно поврзани со трговијата со луѓе и финансиските операции на Епштајн во корпоративните, непрофитните, академските и владините сфери, како и внатрешни е-пораки, преписки и белешки од состаноците на Министерството за правда за тоа дали да се поднесат обвиненија, да се отфрли или да се продолжи истрагата. Документите, исто така, вклучуваат записи поврзани со потенцијалното уништување или прикривање на релевантен материјал и документација поврзана со притворањето и смртта на Епштајн, вклучувајќи извештаи за инциденти, интервјуа со сведоци и извештаи од медицински испитувач и обдукција, објавува Танјуг.

Поединци чии имиња се редигирани од чувствителност не се вклучени, се вели во писмото, додавајќи дека процесот на редигирање бил обемен, вклучувајќи консултации со жртвите и нивните адвокати.

The post СИТЕ ДОКУМЕНТИ НА ЕПСТИН СЕ ОБЈАВЕНИ, ИМА НАД 300 ИМИЊА Ништо не е сокриено, тврди главната обвинителка на САД appeared first on plusinfo.mk.

Министерството за правда на САД повторно ја објавило фотографијата со Доналд Трамп која привремено била отстранета од досиејата поврзани со Џефри Епштајн. Одделот образложил дека одлуката за бришење била донесена „од претпазливост“, по барање на обвинителите во Њујорк, кои се сомневале дека сликата може да открие идентитет на жртви, пишува „Гардијан“.

– По прегледот, беше утврдено дека нема докази дека на фотографијата се прикажани жртви на Епштајн и затоа таа е повторно објавена без никакви измени – соопштило Министерството преку мрежата Икс.

„Немаше политичко влијание“

Заменик-генералниот обвинител Тод Бланш изјавил дека отстранувањето на сликите, меѓу кои и една со Трамп, „нема никаква врска со претседателот“. Тој нагласил дека 16-те повлекувања биле направени по препорака на групи за заштита на жртвите.

– Немаме совршени информации. Кога добиваме приговори за чувствителни материјали, ги тргаме привремено и ги прегледуваме – рекол Бланш за „Meet the Press“ на Ен-Би-Си.

„Системот ги изневери преживеаните“

Адвокатката Глорија Олред оценила дека системот „ги изневерил преживеаните“, бидејќи во документите се појавиле имиња кои не требало да бидат јавно достапни.

– Видов имиња на преживеани кои никогаш не требаше да бидат објавени – изјавила Олред за Си-Ен-Ен.

Таа додала дека некои од сликите содржат непристојни фотографии кои не биле соодветно редактирани.

„Пем Бонди, дали е ова вистина?“

Откако фотката исчезнала од официјалната страница на Министерството, демократските членови на надзорниот комитет на Претставничкиот дом побарале објаснување од главната обвинителка Пем Бонди.

„Пем Бонди, дали е ова вистина? Што друго се прикрива?“, напишале тие на Икс, додавајќи дека „ова е прикривање од страна на Белата куќа“.

Министерството одговорило дека сите материјали ќе продолжат да се прегледуваат „со голема претпазливост“ и дека секоја слика ќе биде повторно објавена по завршувањето на проверката.

Клинтон и Трамп пак во жижата

Делумното објавување на досиејата повторно ги вратило во фокус поранешните претседатели Трамп и Бил Клинтон. Во некои документи се појавиле слики од Клинтон со Гислен Максвел во џакузи, што предизвикало нов бран на шпекулации.

Републиканците возвратиле дека демократите „се обидуваат да освојат политички поени на сметка на жртвите“.

Сенаторот Тим Кејн од Вирџинија изјавил за Ен-Би-Си дека сите поврзани страни треба „да ги изнесат фактите на маса“, додавајќи:

– Ајде да ги видиме сите материјали, па јавноста сама нека пресуди.

The post ОТСТРАНЕТАТА ФОТКА НА ТРАМП СО ЕПШТАЈН ПАК ОБЈАВЕНА Американското министерство објасни зошто ја криело appeared first on plusinfo.mk.