Од пекарската индустрија објаснуваат дека секојдневно нивните трошоците за производство растат, па нема можност цените на нивните производи да се намалат. Според нив, проблем е и цената на работната рака, недостигот на работници, а ако продолжи трендот на зголемување на цената на нафтата и другите енергенси, кои се користат во индустријата ќе растат и цените на суровините и на пекарските производи.

Граѓаните кои секојдневно купуваат бурек и бели печива коментираат дека цените на овие производи се високи, а не ги намали ниту владината акција за гарантирани цени.

– Брашното е поевтино, маслото за јадење исто, а нашите бурекџилници никако да ги намалат цените на бурекот и белите печива. Никогаш еден ѓеврек не чинел колку и килограм брашно. Еве споредба брашно има и за 27 денари килограм-Битолското, и за 35 денари – Воденичар, или за 39 денари – Кадино. И маслото поевтине, го има и за 100 денари, ама ѓеврекот го купувам секое утро за 40 денари. Навистина го има и за  30 денари оној обичниот, но тоа е колку половина или килограм брашно. Да не зборуваме за бурекот или баничките и тие држат цена и се продаваат зависоно од филот од 60 до 80 денари четврт. Па има ли инспектори да проверат каде одат цените во бурекџилниците – вели скопјанин.

Слични коментари за цените на пекарските производи има и на социјалните мрежи.

„Повторно Брашното е 25 денари. Зејтинот 60 денари. Се најде ли некој еснаф пекар што ги намали цените на бурекот и печивата? Никогаш цената на ѓеврекот не била колку еден килограм брашно. Три дена никој да не им влезе во дуќан ќе видите како можело бурекот да биде 50 денари и ѓеврекот 15“, коментира граѓанин во група на Фејсбук.

Од мелничко пекарската индустрија појаснуваат дека цените на пекарските производи се повисоки бидејќи трошоците за производство се пораснати во изминатиот период. Тие велат дека поскапеле другите суровини за производство, цената на работната рака, а голем удел во цената има и зголемената цена на енергенсите и транспортот.

– Пекарите не можат да размислуваат за намалување на цената на производите бидејќи нивните трошоци се драстично зголемени. Проблемот на пекарската индустрија е тоа што најголемиот број од нив се мали компании каде што процесот оди рачно, а има недостиг од мајстори пекари, па се принудени за да ги задржат да ги плаќаат поскапо. Згора на тоа цената на нафтата која се користи во производство, но и за транспорт ги зголеми трошоците за 100%. Истовремено се зголемија и цените на месото и млечните производи кои ги користат во производството, како и додатоците, сусамот и друго што секако влијае на крајната цена на производот. Значи во крајната цена на бурекот или ѓеврекот не влегува само брашното и маслото за јадење, туку и низа други производи и работната рака. Сето ова говори дека и да сакаат пекарниците не можат да ги намалат цените на производите – вели Горан Малишиќ, претседател на здружението на мелничко-пекарската индустрија на Стопанската комора.

Според него, доколку цените на енергенсите растат, што веќе е видливо поради војната во Израел, тоа ќе влијае и на цената на суровините во мелничко-пекарската индустрија, па неминовно ќе биде и цените на брашното и пекарските производи да растат.

– Цените на суровините сега на светските берзи сè уште се стабилни, но секој конфликт, како и овој последниот во Израел, влијае на берзите и ако потрае ќе значи зголемување на цената на пченицата, а со тоа и на брашното и пекарските производи. Поради конфликтот, но и поради доаѓањето на зимата секојдневно расте и цената на нафтата и другите енергенси кои се голем трошок во оваа индустрија бидејќи се користат во процесот на производство и за транспорт. Само транспортот во оваа индустрија се зголеми за 100% што не е мал трошок, а ако нафтата достигне цена од 150 долари за барел како што се предвидува, состојбата ќе стане уште подраматична. Сега засега цените се стабилни и на нашите крајни производи – брашното и пекарските производи, но доколку на пазарот и конкуренцијата од регионот за брашното се променат, ќе растат и нашите цени – вели Малишиќ.

Тој смета дека владата треба да ја следи состојбата и во одреден момент да ја помогне оваа индустрија, за да опстанат фирмите, а граѓаните да не јадат поскапи производи.

– Доколку владата планира и натаму да ги чува замрзнати цените на овие производи, тоа ќе значи пропаѓање на голем број мелници и мали пекарници. За да не се случи вакво сценарио владата ќе мора да изнајде начин да ја помогне индустријата за да опстане. Ова го говорам и од причини што најголемиот дел од компаниите во оваа индустрија, поради ниските цени на производите се на работ на профитабилност или се во загуба. Таквата состојба не може да трае долго, па ќе има или зголемени цени на производите или ќе се затвораат компаниите – вели тој.

Речиси  85% од пазарот на бели печива во земјава покриваат малите пекарници.

The post ОВА НИКОГАШ НЕ БИЛО, ЕДЕН ЃЕВРЕК ПОСКАП ОД КИЛОГРАМ БРАШНО! Ништо не може да ги запре цените на белите печива appeared first on plusinfo.mk.

Пекарската индустрија, како што информира денеска претседателот на Групацијата на мелничко пекарската индустрија  Горан Малишиќ има моментална загуба од 1,5 милиони евра, а до крајот на траење на владините одлуки 31 мај таа ќе изнесува повеќе од 4,5 милиони евра.

– Иако адвокатски тимови кои ги консултиравме утврдија дека последните одлуки на владата во врска со производството и цената на лебот се неуставни и незаконски, но со цел да се почитуваат потребите на граѓаните, пекарите одлучија да ги почитуваат последните две владини одлуки, но ќе поткренат правна постапка за надомест на штетата, бидејќи во наредните 3 месеци ќе се обидат да преживеат со намалено производство и намален број на вработени  – рече Малишиќ.

Тој додаде дека правните тимови кои ги консултирала оваа индустрија укажале дека има последните две владини одлуки немаат законска основа бидејќи сите извештаи од инспекциските служби направен во периодот декември март, кои ги поседуваат и компаниите кои биле контролирани, покажуваат дека биле почитувани претходните мерки.

– Спротивно на одлуката се потврдува со записниците од инспекторатите дека од 1 декември па сè до крајот на февруари се почитуваат сите мерки и претходните одлуки што владата ги донела – рече тој.

Малишиќ констатира дека штом се дозволи овие одлуки на владата за лебот  да поминат сега владата има можност да  ги замрзне цените и на други прехранбени производи и да доведе во загуба и други прехранбени индустрии.

– Тоа денеска го најави и премиерот Димитар Ковачевски во изјавата во која рече дека се прават анализи и за други производи од прехранбениот сектор – додаде тој.

The post ОД УТРЕ ЌЕ ИМА ЛЕБ ВО ПРОДАВНИЦИТЕ Пекарите на суд ќе бараат владата да им ја плати штетата appeared first on plusinfo.mk.

Ова се ставовите на претставници од прехранбената индустрија кои од утре, преку „ЕСМ продажба”, треба да добиваат струја по субвенционирана, фиксна цена од 80 евра за мегават час.

Компаниите ја поздравуваат мерката како почеток за целосно решавање на проблемот во нивната индустрија. Тие сметаат и дека регулираната цена на струјата, комбинирана со мерката за маржите во малопродажбата, ќе даде ефект.

Мелничарите и натаму се на ставот дека со активирање на стоковните резерви би се постигнал поширок бенефит.

-Можеме да соопштиме дека од утре, 1 декември, граѓаните ќе може да имаат леб по подостапна цена од 32 денара, а во наредниот период, по пресметките, ќе се направи корекција и на цените на другите пекарски производи која би била за околу 10 отсто во овој сектор. За да можеме уште повеќе да излеземе во пресрет на потребите на граѓаните, а воедно да не ја загрозиме ликвидноста на компаниите, сметаме дека активирање на стоковите резерви е мерка со која би се постигнал поширок бенефит. Според информациите кои ги имаме за залихите со кои располагаме како држава, треба да е доволно и за овој период, а не би требало да има поголеми проблеми и наредната година, бидејќи Србија од каде се прави најголемиот узвоз има доволни количини. За трендот на движење на цените на пченицата не може однапред да се дадат подолгорочни прогнози, бидејќи се работи за берзански производ и зависи од пошироките глобални движења и случувања – изјави за МИА потпретседателот на Сојузот на стопански комори (ССК) и претседател на Агро-бизнис комората, Горан Ѓорѓиевски.

The post ЛЕБОТ ОД УТРЕ И ЗА 32 ДЕНАРА Пекарниците добиваат струја од 80 евра за мегават час appeared first on plusinfo.mk.

Лебот и во екот на летото поскапе за 8 до 10 денари. Во продавниците не може да се најде леб под 50 денари. ’Ржаниот леб се продава по цена од 93 денари, а интегралниот 84 денари. Белиот леб на парчиња има цена од 56 денари. Маркетите велат дека новите цени се резултат на повисоката производствена цена, а пекарската индустрија се правда дека новата цена на енергенсите главно струјата и гасот кои поскапеа за 100 отсто се виновни за новите цени на нивниот производ.

– Новите цени на лебот се резултат на зголемените трошоци во пекарската индустрија каде што цената на струјата драстично поскапе. Помалите пекарници сега се во четвртата категорија на потрошувачи на струја каде што цената им порасна од 2 на 11 денари. Кај поголемите пекари кои имаат над 1.000 вработени дополнително има и поскап гас. Порано тие плаќаа 55 денари нормален метар, а сега цената им скокна на над 100 денари. Со тоа трошоците се зголемени, а тоа мора да се одрази и на цената – вели претседателот на Асоцијацијата на мелничко-пекарска индустрија во Стопанската комора Горан Малишиќ.

Тој додава дека ако има нови цени на струјата и на гасот до крајот на годината ќе има ново зголемување на цената на лебот.

Според него, моментално цената на брашното како суровина во пекарниците нема промена, но тоа нема многу да потрае бидејќи над 100.000 тони пченица треба да се увезе по берзанска цена.

– На домашниот пазар обезбедивме 55.000 до 60.000 тони пченица и тоа влијае моментално да нема нови цени на брашното, но сѐ ќе зависи од цената на пченицата која моментално се увезува а која има берзанска цена. Ако расте цената на берзата ќе расте и цената на брашното. Овде влијание ќе има и конкуренцијата на увезеното брашно, но мелниците, ако им се исплати ќе работат, ако не ќе затворат – вели Малишиќ.

Тој очекува владата која ги ограничува цените на прехранбените производи и нивните маржи да ги субвенционира енергенсите со цел да се одржи пристојно ниво на цени.

– Нашето барање од претходно за субвенционирање на енергенсите останува. Ако владата може да ги регулира цените на прехранбените производи, тогаш мора да ги помогне компаниите да опстанат. Тоа може да го направи само преку помош која ќе ја даде за енергенсите, бидејќи дел од фирмите нема да можат да ги плаќаат високите сметки и нема да работат. Тоа пак ќе се одрази и на пазарот – додава тој.

The post ЌЕ ГО ЈАДЕМЕ ВО ТРОШКИ Стотка за леб, ќе вивне и цената на брашното appeared first on plusinfo.mk.