Саемот почна денеска, а ќе трае до недела. Штандовите на производителите се поставени на Плоштадот „Македонија“ кај Камениот мост.

Пчеларите апелираат посетителите да дојдат и да дегустираат, па ако им се допадне медот, да си одберат матичен производител.

Тоа е, велат, клучно, ако сакаат да бидат сигурни дека купуваат вистински мед.

Тие оценуваат и дека годинава е слаба во однос на производството, но одлична според квалитетот на медот. Од поддршката што им ја дава државата се генерално задоволни, но голем проблем, според нив, се фалсификаторите.

Цената на медот се движи околу 700 денари, а саемската е 650 денари.

– Обично велам, посетителите да дојдат тука не за да купат, туку за да си одберат матичен пчелар. Тие мора да стекнат доверба, да знаат дека човекот од кој купуваат не прави фалсификат. Еве, нека дојдат, нека пробаат, па ако им се допадне, да си одберат матичен пчелар како што имаат матичен лекар, месар, фризер, стоматолог,… Јас кога одам на бербер не му кажувам ништо, само седнувам и тој си ја знае работата. Така е и со медот, луѓето мора да имаат доверба, тоа е најважно. Мора да знаат кој е човекот од кој купуваат и што купуваат, измама не смее да има – вели претседателот на Пчеларската федерација на Македонија (ПФМ), Јане Марков.

Марков по професија е доктор, а пчеларството му е дополнителна дејност. Со сопругата имаат околу шест пчеларници со преку 100 пчелни семејства низ државата, во Плачковица, Македонски Брод, во Валандово,…, Секаде каде што е чисто.

– Годинава е слаба, веројатно ќе ја завршиме со по два до три килограма мед од пчелно семејство. Ништо повеќе. Беше сушно. Од почетокот тргна добро, се надевавме дека ќе има можеби по 15 килограми од пчелно семејство, но за време на пеколните горештини немаше цветови, немаше буквално ништо, па пчелите си го изедоа тој мед. Некои билки кога требаше, не замедија. Количината ќе биде мала, но квалитетот е одличен. Само 15-16% влага има во медот, што значи дека е многу квалитетен – вели Марков.

Според него, секој што ја намалува цената, а тоа не е рентабилно, сигурно интервенирал во медот.

– Медот во маркетите каде што цените се ниски, мислам дека е од Кина. Кинезите 60 години вршеле селекција за производство на пчели кои произведуваат матичен млеч. Тие се, всушност, насочени кон матичен млеч и вадат по 10 килограми од пчелно семејство по сезона. Тоа е човек навистина да се чуди, а медот го произведуваат „по пат“ и го продаваат буквално по еден долар – вели тој.

Интересот за пчеларење кај помладите, вели, се намалува.

– Едно време имаше голем интерес за семејно одгледување пчели, но како што се намалува количината на медот, голем број ќе почнат да се занимаваат со оваа дејност, па им поминува меракот. За да почне човек да заработува треба трпение, зашто мора да поминат години. Просекот за медот не се пресметува само од една година, туку за десетгодишен период, а некогаш има, некогаш нема производство. Климатските промени си го правата своето – оценува Марков.

Во врска со дивите препродавачи, нагласува дека тие и не се толку голем проблем, колку што се фалсификаторите.  Го продаваат по 300 денари, прават голема заработка, а ставаат, на пример, и чиста гликоза. Најбројни се, како што вели Марков, по патиштата, главно во кичевскиот крај.

Пчеларски саем се организира шеста година по ред од Пчеларската федерација на Македонија, главен покровител е Министерството за земјоделство, шумарство и водостопанство, а домаќин е Градот Скопје. 

The post ФАЛСИФИКАТОРИТЕ ИМ ГО ЈАДАТ ПРИХОДОТ НА ПЧЕЛАРИТЕ Време е секој да си одбере свој матичен пчелар appeared first on plusinfo.mk.

Шестиот по ред Пчеларски саем на Македонија, ќе се отвори денеска на плоштадот Македонија, а ќе трае до недела.

Организатор на саемот е Пчеларска федерација на Македонија, главен покровител е Министерството за земјоделство, шумарство и водостопанство, а домаќин е Градот Скопје.

Пчелари од целата држава на саемот ќе им понудат на посетителите мед, пчелни производи, како и пчеларска опрема.

Посетителите на саемот  ќе можат да дегустираат природен, вистински мед, за да можат да препознаат лажен, фалсификуван производ.

The post ПОЧНУВА ШЕСТИОТ ПЧЕЛАРСКИ САЕМ Ќе се дегустира природен мед за да се распознае фалсификуван appeared first on plusinfo.mk.