Министерството за транспорт ја презеде обврската да го реши проблемот со свлечиштето на патот за Теферич во Кисела Вода бидејќи проблемот е комплициран и бара поголема експертиза. Тендерот за изведувач сè уште трае, по изборот на изведувач ќе започнеме да работиме и очекувам за една година да го санираме лизгањето на земјиштето, истакна заменик претседателот на Владата и министер за транспорт, Александар Николоски во гостувањето на ТВ Телма.

– Таму има едно движење на земјиштето кое што е доста комплицирано, многу слично на она со коешто се соочивме на автопатот Кичево и имајќи предвид дека се работи за проблематика којашто е доста сложена, за проблематика каде што е потребна голема стручност, сметавме дека е добро тоа да го преземе Министерството за транспорт, со експертите кои што ги имаме и на тој начин да се санира проблемот. Иако, ако гледате буџетски, тоа не е некој голем проект, повеќе е инжинерски и технички и затоа решивме да го преземеме, затоа што секако експерти коишто се занимаваат со оваа работа има и во Министерството, ги има во Јавното претпријатие за државни патишта и ги консултираме за оваа работа. Во моментов има тендер за избор на изведувач. Ако не се лажам, тоа е 20. август. После тоа ние заедно со изведувачот ќе работиме и сум убеден дека проблемот ќе се реши. Многу е важно теренот да е сув, оставаме година дена, но треба да видиме и зимата каква ќе биде, но се претпоставува дека за година дена треба да се заврши  како што треба – истакна Николоски.

The post ЌЕ СЕ РАСПИШЕ ТЕНДЕР ЗА САНАЦИЈА НА ТЕФЕРИЧ Николоски очекува за една година да биде решен инженерскиот проблем appeared first on plusinfo.mk.

На граничниот премин „Богородица“ утрово се чека околу 20 минути за излез од државата поради зголемената фреквенција на возила, информира Автомото сојузот на Македонија (АМСМ).

Од АМСМ посочуваат дека на останатите гранични премини од македонска страна засега нема подолги задржувања ниту за влез, ниту за излез од државата.

Сообраќајот на државните патишта се одвива непречено и по суви коловози, но интензитетот на возила на патните правци надвор од градските средини е зголемен.

Од АМСМ апелираат возачите да ја прилагодат брзината на движење на условите на патот, да ја почитуваат сообраќајната сигнализација и да управуваат внимателно, особено на делниците низ котлини, речни долини и клисури, каде што постои можност од појава на одрони.

Особена внимателност се препорачува на патните правци Катланово – Велес, Маврово – Дебар – Струга, Виница – Берово и Кочани – Делчево.

The post ЗГОЛЕМЕНА ФРЕКВЕНЦИЈА НА „БОГОРОДИЦА“ За излез од државата се чека околу 20 минути appeared first on plusinfo.mk.

Изградбата на автопатот Прилеп-Битола се одвива со силна динамика, вели вицепремиерот и министер за транспорт Александар Николоски во гостувањето во поткастот „Ноќно студио“.

Според Николоски веќе следната година едната страна од автопатот ќе биде целосно завршена и граѓаните ќе можат да возат по нов асфалт, додека комплетното автопатско решение се очекува да биде финализирано до 2029 година.

– Автопатот Прилеп-Битола од една страна е нешто што е дамнешна желба. Од друга страна, веќе влезе во паневропските коридори. Тој коридор кога ќе биде завршен и од македонска и од грчка страна, ќе го скрати патувањето помеѓу Скопје и Атина за некаде до 3 часа, што многу ќе значи за економијата и за бизнисот. Едната страна од автопатот ќе биде целосно завршена веќе следната година, а комплетното автопатско решение заедно со сите споредни инфраструктурни објекти како: клучки, натпатници и споредни патишта, се очекува да биде финализирано до 2029 година – истакна вицепремиерот.

Според Николоски, новиот автопат ќе биде значајна алтернатива на Коридорот 10- д и ќе овозможи побрзо поврзување меѓу Скопје и Атина.

The post АВТОПАТОТ ПРИЛЕП-БИТОЛА ЌЕ ГО СКРАТИ ПАТУВАЊЕТО СКОПЈЕ-АТИНА ЗА 3 ЧАСА Следната година ќе може да се вози по една лента appeared first on plusinfo.mk.

Во акциска контрола спроведена вчера од страна на Мобилната единица за безбедност на сообраќајот, санкционирани се 43 несовесни возачи кои ја игнорирале брзината на патот. Контролата се одвивала од 14:00 до 20:00 часот, а полицијата посебно се фокусирала на возачите кои управувале моторни возила со брзина над дозволената.

Од казнетите, 41 мерка била изречена за движење надвор од населено место, а една во населено место. Едно лице дури е лишено од слобода откако управувало возило во спротивна насока на автопат, што според полицијата претставува сериозно кривично дело и опасност за сите учесници во сообраќајот.

– Почитувањето на ограничувањата на брзината е клучно за заштита на животот и здравјето на граѓаните. Само со одговорно однесување можеме заеднички да придонесеме за побезбеден сообраќај – изјавија од МВР.

Полицијата најавува дека контролните акции ќе продолжат и во наредниот период, а апелот до возачите останува ист: да ги почитуваат правилата и да возат внимателно, за да се спречат несреќи и да се зачува безбедноста на патиштата.

The post БРЗИНАТА НА ПАТОТ СКАПО ГИ ЧИНЕШЕ Еден возач заврши зад решетки, други 42 добија казни appeared first on plusinfo.mk.

Слаби врнежи од снег има на Попова Шапка и во Крушево и на планинските премини Стража, Буково и Ѓавато. Според информациите од Јавното претпријатие „Македонија пат“ сите патни правци се проодни.

Сообраќајот се одвива непречено по влажни коловози, а внимателно возење се препорачува особено низ клисурите каде е можна појава од одрони.

The post СЛАБ СНЕГ ПАЃА НА ПОПОВА ШАПКА И ВО КРУШЕВО Возете внимателно на планинските превои appeared first on plusinfo.mk.

Системот „Безбеден град“ во текот на изминатата недела (16–22 февруари 2026) регистрираше вкупно 4.910 сообраќајни прекршоци на камери поставени низ градовите и на главните коридори.

Најголемиот број прекршоци беа за брзо возење – 4.691 возач управувал возило побрзо од дозволената брзина. За минување на црвено светло се регистрирани 16 прекршоци, што е значително намалување во споредба со минатата недела (33) и првата недела од месецот кога беа дури 163. Други 203 прекршоци се за управување со возило без важечка сообраќајна дозвола.

Исто така, полицијата изрече 117 мерки „забрана за управување со возило“. Од нив, 101 се за брзо возење, а 16 за минување на црвено. Во категоријата брзо возење, 75 возачи се движеле повеќе од 80 км/ч во населено место, 19 возеле над 10 км/ч повеќе од дозволеното, а седум возачи возеле над 170 км/ч на ненаселено место.

Податоците покажуваат дека најголемата опасност на патиштата сè уште е несоодветната брзина. Апелот до сите учесници во сообраќајот е едноставен, почитувајте ги правилата и придонесете за побезбедни патишта.

The post НОГАТА СЀ УШТЕ „ЛЕПИ“ НА ПЕДАЛОТ ЗА ГАС За една недела 4.910 казни од „Сејф сити“, најмногу за брзо возење appeared first on plusinfo.mk.

Сообраќајот на патиштата се одвива во зимски услови, по наместа влажни коловози. Врнежи од слаб снег со променлив интензитет се бележат на патниот правец Тетово-Гостивар-Маврово и на Попова Шапка, кој засега не се задржува на коловозот, информира АМСМ.

Интензитетот на сообраќај на патните правци надвор од градските средини е умерен, а на граничните премини од македонска страна, нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

The post СЛАБ СНЕГ ПАЃА НА ПАТНИОТ ПРАВЕЦ ТЕТОВО – ГОСТИВАР- МАВРОВО Внимавајте и на патот кон Попова Шапка appeared first on plusinfo.mk.

На скопските и регионалните патишта вчера и денес се случија три сериозни сообраќајни несреќи, при што едно лице загина, а две се со тешки повреди.

Првата несреќа се случи утринава околу 04:10 часот на крстосницата од бул. Александар Македонски, ул. 16 Македонска Бригада и ул. Интернационални Бригади во Скопје. Патничкото возило „форд“ со скопски регистарски ознаки, управувано од 45-годишниот Б.С., излетало од коловозот. Возачот со тешки телесни повреди бил пренесен со Итна помош во Градската општа болница „Св. Наум Охридски“, каде што лекарите констатирале смрт.

Втората несреќа се случила вчера во 15:43 часот во Кочани, на улицата Маршал Тито. Патничкото возило „фолксваген голф“ со кочански регистарски ознаки, управувано од 34-годишниот А.П. од с. Чешиново, исто така излетало од коловозот. Возачот добил тешки телесни повреди и по првата помош во Општа болница Кочани бил пренесен во Комплекс клиники „Мајка Тереза“ во Скопје за понатамошно лекување.

Третата несреќа се случила истото попладне во Гостивар, на регионалниот пат Маврово – Дебар, кај Ростушки мост. Патничкото моторно возило „фолксваген туран“ со албански национални ознаки, управувано од 40-годишниот И.Т. од Албанија, излетало од коловозот и се превртело. Сопатничката С.Т. (69) од Албанија се здобила со тешки повреди и била пренесена во Медицинскиот центар „Св. Еразмо“ во Охрид.

The post СКОПЈАНЕЦ ЗАГИНА ВО АВТОКОМАНДА Три страшни сообраќајни несреќи, еден починат и двајца тешко повредени appeared first on plusinfo.mk.

Вицепремиерот и министер за транспорт Александар Николоски денеска изврши увид во работните активности на ЈП „Македонија пат“, во рамки на подготовките и справувањето со снежните наноси кои се очекуваат во наредниот период. Тој ги посети пунктовите на јавното претпријатие на планинските превои Стража и Пресека.

Николоски изјави дека сите државни патишта се проодни, нагласувајќи дека тоа е резултат на континуираната и пожртвувана работа на екипите на „Македонија пат“, кои секојдневно се на терен и се справуваат со обилните снежни врнежи.

– Денеска сум на терен и можам да потврдам дека состојбата е добра и дека сите патишта во државата се проодни. Сакам да им се заблагодарам на овие луѓе од „Македонија пат“ кои навистина даваат сè од себе за патиштата да бидат чисти и безбедни. Денеска сум на Стража, претходно бев на Пресека, а увидот ќе продолжи и на други локации – изјави Николоски.

Тој упати благодарност до сите вработени во јавното претпријатие, но и апел до граѓаните кои планираат патување да возат внимателно и да ги почитуваат сообраќајните прописи.

– Ги замолувам сите учесници во сообраќајот да користат задолжителна зимска опрема, зимски гуми, а каде што е потребно и ланци, и да ја прилагодат брзината на условите на патот. Ние ќе направиме сè што е во наша моќ патиштата да останат проодни и ова невреме да се почувствува минимално – апелираше вицепремиерот Николоски.

The post СНЕГ НА ПРЕВОИТЕ, ПАТИШТАТА ОТВОРЕНИ Николоски уверува дека екипите на „Македонијапат“ се подготвени appeared first on plusinfo.mk.

По обилните врнежи од дожд во изминатите денови, на територијата на Македонија се јавија поплави, излевање на реки и свлечишта на повеќе места, но засега нема сериозни критични ситуации.

Штип и Скопје:

Во Штип зачестени се одроните од камења и свлечишта на коловозите, додека во Скопскиот регион нема пријавени нарушувања на редовната состојба.

Охрид и Струга:

Во Охрид нема пријави за поплавени објекти, а надлежните служби го проверуваат критичниот дел на реката Далјан кај селата Орман и Дебелополе. Излеана е Сушица во делот на ул. Прилепска, а ЈП Нискоградба е на терен со механизација за запирање на водата. Има опасност од излевање на реката Далјан кај Косел и село Вапила.
Во Струга поплавени се дворови во 4-ти Реон, а ТППЕ Струга е на терен со пумпи за испумпување на водата. На патот Дебар–Струга има одрони, кои се расчистуваат од Македонија Пат.

Велес:

Во велешкиот регион нема нарушувања на редовната состојба поради врнежите.

Битола и Крушево:

Во селата Кравари, Жабени и Породин се поплавени земјоделски површини. Излеана е Елешка река, но нивото на водата се повлекува. Патот за Буковски манастир е раскопан, а ЈП Нискоградба интервенира со градежна механизација. Поради оштетување на мостот на Боишка река, локалниот пат за село Мренога е затворен. Во Крушево Црна река е покачена, но стабилна, а насипите се зајакнуваат. ЕЛС Крушево ќе формира комисија за пријавување штети од поројните врнежи.

Прилеп и Долнени:

Во селата Лажани и Пешталево поплавени се дворови и приземни простории, како и тутунски насади. Градежна механизација интервенира за расчистување на каналите.

Ресен:

Поплавени се земјоделски површини, дворови, куќи и магацини за складирање јаболка. Голема Река се зголеми од 1,40 м на 1,65 м. Екипите на ЈП и ЕЛС Ресен се на терен со градежни машини и пумпи за црпење вода.

Струмица, Куманово, Тетово:

Во овие региони засега нема пријави за штети, излевање на реки или одрони. Сите патни правци се проодни, со влажни коловози.

Надлежните служби постојано ја следат состојбата и интервенираат каде е потребно, а граѓаните се повикуваат на внимателност при движење по влажни коловози и на критични точки.

The post ПОРОЈНИ ВРНЕЖИ ГО ПАРАЛИЗИРААТ ЗАПАДОТ И ИСТОКОТ Реки излегуваат од коритата, патишта затворени appeared first on plusinfo.mk.