Недостигот на паркинг места во Општина Центар со години претставува еден од најголемите проблеми со кои секојдневно се соочуваат жителите.

Јавното претпријатие „Паркинзи на Општина Центар“ (ПОЦ) управува со околу 6.100 паркинг места, додека во исто време се издадени над 16.000 повластени паркинг карти. Од претпријатието појаснуваат дека ваквата состојба произлегува од досегашниот модел, според кој секој жител што ги исполнува условите има можност да склучи договор за повластено паркирање.

– А со оглед на тоа што услугата беше бесплатна за сите жители со лична карта во Центар, интересот за користење на повластените услови беше огромен, додека бројот на јавни паркинг места останува ограничен. Токму ваквиот сооднос јасно го покажува притисокот врз јавниот простор во Центар и потребата од воведување пофер, поорганизиран и поодржлив систем на користење на паркингот – велат од ПОЦ.

Гаражите често се користат за други намени

Но, проблемот, како што се наведува, не е само во бројот на возила и ограничениот јавен простор, туку и во начинот на кој се користат постојните приватни капацитети.

Во пракса, дел од приватните гаражи и паркинг-простори во централното градско подрачје не се користат за паркирање, туку за други намени – како магацински простори, работилници, деловни простории или простори за издавање.

Во густо населените делови на Центар, како Капиштец, Дебар Маало, Буњаковец и потесното централно подрачје, голем број станбени единици, објекти и индивидуални куќи располагаат со приватни гаражи или гаражни места.

Но, наместо во нив да бидат безбедно паркирани нивните автомобили, честопати овие простори не се користат за нивната основна намена, додека возилата се паркираат на јавните паркиралишта и улиците.

Многу жители ги имаат пренаменето своите гаражи во магацини за приватни бизниси, ги претвориле во деловни објекти, или пак, водени од личен профит, ги издаваат по високи комерцијални цени на пазарот, бидејќи вредноста на гаражниот простор во Центар вртоглаво расте.

Па така, сопствениците кои имаат каде да го паркираат своето возило во сопствениот имот, избираат да го заземат резидентното место на улица. На тој начин се создава дополнителен притисок врз јавните паркиралишта и се намалуваат можностите за паркирање на оние сограѓани кои реално немаат друга опција и навистина зависат од отворените паркинг сектори.

Од ПОЦ порачуваат дека јавниот паркинг-простор мора да се третира како ограничен ресурс.

„Јавниот паркинг-простор во Центар е ограничен ресурс. Не е фер ниту одржливо јавниот простор да биде трајно окупиран, додека приватните гаражи стојат празни или се користат за други намени. Наш приоритет е жителите навистина да можат да најдат паркинг во близина на своите домови“, посочуваат од претпријатието.

Нови правила: повластени карти по адреса, не по жител

Новите правила за паркирање предвидуваат промени во начинот на издавање на повластените паркинг карти.

Наместо како досега – по жител, повластените карти отсега ќе се издаваат по станбена единица, односно по адреса. Првото возило ќе остане бесплатно, додека за второто и третото возило ќе се плаќа надоместок.

Целта, како што велат од претпријатието, не е казнување на граѓаните, туку воведување баланс и поправедна распределба на јавниот простор.

– Кога приватниот простор не се користи за својата основна намена, целиот товар паѓа врз улиците и јавните паркиралишта. Тоа создава дополнителен метеж и незадоволство кај граѓаните. Затоа ни се потребни јасни правила и фер систем кој ќе обезбеди поодговорно користење на просторот – велат од ПОЦ.

Од ЈП ПОЦ нагласуваат дека со ваквиот модел се поттикнува порационално користење на возилата, поголема употреба на постојните приватни гаражи и подобра заштита на јавниот паркинг-простор за оние жители на кои тој им е навистина неопходен.

The post ВО ЦЕНТАР ИМА 6.100 ПАРКИНГ МЕСТА, А ИЗДАДЕНИ СЕ ПОВЕЌЕ ОД 16.000 ПАРКИНГ КАРТИ Општината бара граѓаните да си ги користат гаражите за паркирање appeared first on plusinfo.mk.

Градоначалникот на Град Скопје, Орце Ѓорѓиевски, изјави дека не е планирано зголемување на цените за паркирање во главниот град, нагласувајќи дека фокусот на градските власти е воспоставување ред и еднаков третман за сите граѓани.

На денешната прес-конференција, Ѓорѓиевски одговори на новинарско прашање поврзано со цените на паркингот и повластените услови за одредени институции и вработени.

– Има институции што плаќаат по повластени цени за паркинг, меѓу кои и вработени во Град Скопје, тоа нема да продолжи. Таква работа нема да има. Вработените овде земаат плата и тие се исти како сите останати граѓани во Скопје. Ќе си плаќаат колку што е утврдено – истакна Ѓорѓиевски.

Тој посочи дека е недозволиво дел од корисниците да плаќаат значително пониски суми за месечна карта, додека останатите граѓани плаќаат повисока цена.

– Не може некој да плаќа 400 денари, а друг 1.400 денари за месечна карта. Секој ќе си плаќа ист износ. Тука толеранција нема да има. Но, тоа не значи зголемување на цените, туку воспоставување ред – нагласи градоначалникот.

Ѓорѓиевски најави и дека во план е воведување зонско паркирање на повеќе локации низ градот, со цел подобра организација на сообраќајот и поефикасно користење на паркинг-просторот.

The post 400 ДЕНАРИ ЗА ЕДНИ, 1.400 ЗА ДРУГИ, ДОСТА Е! Ѓорѓиевски најавува крај на повластените цени за паркинг appeared first on plusinfo.mk.