Претседателот на Франција Емануел Макрон го пречека папата Лав XIV на парискиот аеродром „Орли“, но зад протоколот и ракувањето стоеле неколку чувствителни политички и општествени теми.

Најжешката тема на посетата за Париз е францускиот закон за асистирано умирање. Неколку часа подоцна, пак, папата требало да испрати глобална порака од УНЕСКО – организација од која САД решија да се повлечат.

Лав XIV пристигна во четиридневна апостолска посета на Франција, со станици во Париз, Лурд и во Мец. Ваква широка папска посета на земјата немало речиси две децении.

Откако Маркон го пречека на „Орли“, двајцата заминале на разговори во Елисејската палата.

Меѓу Макрон и Папата стои законот

Франција е една од најсекуларните држави во Европа, а односот меѓу државата и религијата е поставен врз принципот laïcité. Токму затоа посетата на папата имала пошироко значење од вообичаената црковна агенда.

Франција годинава го отвори законскиот пат за таква можност под строго определени услови, додека Католичката црква се спротивставува на законски решенија што дозволуваат намерно предизвикување смрт.

Затоа зад средбата Макрон–Лав XIV стоел фундаментален судир на ставови за едно од најчувствителните етички прашања во Европа.

Ватикан ја претстави посетата како апостолско патување, а Светата столица најави разговор за француското општество, човечкиот живот, науката, технолошкиот напредок и за вештачката интелигенција.

Трамп излегува, папата влегува

Од Елисејската палата Папата требало да се пресели на уште една адреса со силна политичка симболика. Во Париз се наоѓа седиштето на УНЕСКО.

Лав XIV треба да стане првиот папа по Јован Павле Втори во 1980 година што ќе ја посети организацијата. Неговото обраќање закажано за денес попладне, 25 септември, ќе биде посветено на вештачката интелигенција, интегритетот на информациите, образованието, младите и на мирот.

Но посетата добила дополнителна геополитичка тежина по одлуката на администрацијата на Трамп САД да се повлечат од УНЕСКО.

Американското повлекување оставило дупка од околу 8% во буџетот на организацијата. Лав XIV, првиот Американец на чело на Католичката црква, практично пристигнува за да зборува за меѓународна соработка во институција од која Вашингтон решил да се тргне.

330.000 малолетници биле злоупотребени од свештеници

Папата во последниот период сè погласно зборуваше и за ризиците од вештачката интелигенција. Само неколку дена пред патувањето побара технологијата да не создава нови поделби и конфликти и повторно повикал на меѓународни правила за нејзиниот развој.

Се чини дека Париз е само првиот слој од посетата.

Во Лурд папата треба приватно да се сретне со 7 лица кои преживеале сексуална злоупотреба поврзана со Католичката црква. Француската црква и натаму се соочува со последиците од независната истрага од 2021 година, која проценила дека околу 330.000 малолетници биле злоупотребени од свештеници или други лица поврзани со црковните институции во периодот од 1950 до 2020 година.

Последната станица ќе биде Мец, каде Лав XIV треба да зборува за Европа, мирот и за единството. Ватикан токму европската иднина, различноста и мирот ги посочил како главни теми на завршницата од патувањето.

The post МАКРОН ГО ПРЕЧЕКА ПАПАТА, МЕЃУ НИВ СТОИ СПОРЕН ЗАКОН Лав XIV ќе го посети и УНЕСКО во време кога САД се повлекоа appeared first on plusinfo.mk.

Во Либан е уапсен сириски државјанин поврзан со „Исламска држава“, кој според информациите од либанските безбедносни служби добил задача да подготви атентат врз папата Лав XIV за време на неговата посета на земјата во 2025 година.

Мажот бил приведен во областа Батрун, во северниот дел на Либан, по операција на разузнавачката служба на либанската армија и подолготрајно следење на неговите активности. Според информациите што ги пренесуваат повеќе медиуми, тој во Либан влегол нелегално и одржувал контакти со припадници и раководители на „Исламска држава“ во Сирија.

Според неговото сведочење пред истражителите, една од задачите што му биле дадени била подготовка на напад врз папата за време на неговиот тридневен престој во Либан.

Папата Лав XIV ја посети земјата од 30 ноември до 2 декември 2025 година, во рамките на неговото прво патување во странство по изборот за поглавар на Католичката црква. Посетата вклучуваше средби со највисоки државни и верски претставници, посети на верски места, средба со млади луѓе и света миса во Бејрут.

Либанските безбедносни извори тврдат дека осомничениот почнал да се подготвува за операцијата, но не успеал да премине во фазата на нејзино извршување. Според една верзија, немал доволно ресурси за реализација на планот, додека други извештаи наведуваат дека строгите безбедносни мерки за време на папската посета го спречиле да го реализира нападот.

Според либански медиуми, осомничениот на терен ги следел местата низ кои требало да поминува папата и се обидувал да најде пропуст во безбедносниот кордон. По апсењето, неговиот мобилен телефон бил одземен и бил предаден на Воениот суд, според извештаите.

Покрај наводниот план за напад врз папата, безбедносните извори тврдат дека осомничениот добивал и други задачи поврзани со дестабилизација на безбедноста во Либан и ширење страв меѓу населението.

Либанските безбедносни служби предупредуваат дека и понатаму постои ризик од присуство на припадници на „Исламска држава“ или други екстремистички групи во земјата, но велат дека ситуацијата е под контрола.

– Некои луѓе од „Исламска држава“ или од други групи со такви убедувања претставуваат заспани ќелии, но ние секогаш сме на штрек – изјавил безбедносен извор, пренесуваат медиумите.

По почетокот на граѓанската војна во Сирија во 2011 година, Либан беше погоден од серија напади поврзани со екстремистички групи, меѓу кои самоубиствени бомбашки напади и напади со автомобили-бомби.

Иако „Исламска држава“ никогаш не воспоставила трајна територијална контрола во Либан, нејзини припадници и други екстремистички групи со години дејствувале долж границата со Сирија. Либанската армија во 2017 година спроведе операција против припадници на „Исламска држава“ и други вооружени групи во пограничниот регион.

Либанските власти во изминатите години уапсија повеќе лица осомничени дека се високи оперативци или членови на „Исламска држава“.

Во случајот со наводниот план за напад врз папата, истрагата продолжува, а информациите добиени од осомничениот треба да бидат споделени и со сириските власти, според објавените информации.

The post ПАПАТА БИЛ ЦЕЛ НА НАВОДЕН ТЕРОРИСТИЧКИ ПЛАН Осомничен член на „Исламска држава“ уапсен во Либан appeared first on plusinfo.mk.