Министерот за внатрешни работи Панче Тошковски денеска присуствуваше на финалната проверка на новиот паметен систем за автоматска детекција на брзината на возилата, кој е дел од проектот за зголемена безбедност во сообраќајот.

– Станува збор за систем кој МВР го развиваше со цел да се намалат сообраќајните незгоди, повредите и загубените човечки животи. Во процесот на тестирање се проверува јасноста на снимките, прецизноста при читањето на регистарските таблички и точноста на податоците што системот ги регистрира. Според стручните служби, отстапувањата во мерењето на брзината се минимални и значително под законски дозволената толеранција, што гарантира висока сигурност и доверливост на системот – изјави Тошковски.

Министерот истакна дека со овој систем се поставуваат повисоки безбедносни стандарди на патиштата и дека целта е јасна, помалку незгоди, помалку повредени и повеќе спасени човечки животи.

Во првата фаза, камерите ќе бидат поставени на локации со зголемен ризик, додека во текот на годината системот постепено ќе се проширува на целата држава. Паралелно, ќе се користат и возила на МВР опремени со мобилни камери, кои ќе делуваат особено на „црните точки“ на патиштата.

– Системот работи автоматски и непристрасно, камерата не прави разлика меѓу луѓе, туку евидентира прекршок. Законот важи еднакво за сите, а безбедноста на граѓаните е наш врвен приоритет – нагласи министерот.

Од МВР додаваат дека примената на системот веќе покажува позитивни ефекти, сообраќајната дисциплина се зголемува, а ризикот на патиштата се намалува.

The post ЗА ПОМАЛКУ ЖРТВИ НА ПАТОТ „Безбеден град“ работи автоматски и непристрасно, вели Тошковски appeared first on plusinfo.mk.