Францускиот претседател Емануел Макрон го прогласи законот со кој се воведува правото на асистирано умирање, по години политичка и социјална дебата.

Законот беше објавен денеска во Службен весник, и формално стапи на сила, додека неговата практична примена ќе започне дури откако владата ќе ги донесе потребните прописи, објави Фигаро.

Законот, што минатата недела беше прогласен за уставен од Уставниот совет со одредени резерви, им овозможува на одредени пациенти, под строго дефинирани услови, да си администрираат смртоносна супстанца во присуство на здравствен работник.

Доколку пациентот не е во можност сам да го изврши дејствието поради неговата физичка состојба, здравствен работник може да го стори тоа наместо него.

Правото е наменето за возрасни лица кои се француски државјани или долгорочни жители на Франција и кои страдаат од „тешка и неизлечива“ болест во терминална фаза. Третманот не е достапен за странски „медицински туристи“.

Кој има право на оваа процедура?

За да му биде одобрена оваа процедура, пациентот треба да страда од сериозна, неизлечива и тешка болест која е во напредна или терминална фаза и директно го загрозува животот. Пациентот мора да се соочува со константни и неподносливи физички или психички страдања кои не можат да се ублажат со постоечките третмани. Психијатриските нарушувања и дегенеративните болести во рана фаза (како Алцхајмерова болест) се изземени од правото на оваа процедура.

Пациентот мора во моментот на барањето да биде во целосна свесна состојба и способен самостојно и слободно да донесе информирана одлука.

Процесот е строго регулиран низ неколку фази за да се спречат какви било злоупотреби. Пациентот лично му ја соопштува својата намера на лекарот. Лекарот свикува тим од здравствени работници и стручњаци кои ја разгледуваат медицинската документација и потврдуваат дали се исполнети условите. Лекарот има рок од 15 дена да донесе првична одлука.

Откако ќе се одобри барањето, на пациентот му се дава задолжителен рок од најмалку два дена за финална рефлексија. Пациентот може да се повлече во кој било момент.

Пациентот прима смртоносна супстанца. Основното правило е дека пациентот мора сам да си ја администрира супстанцата (асистирано самоубиство). Доколку лицето е физички немоќно и не може самостојно да го изврши дејството, супстанцата може да ја инјектира лекар или медицинска сестра (доброволна евтаназија).

Лекарите и фармацевтите имаат законско право на приговор на совеста и можат да одбијат да учествуваат во процедурата, по што пациентот се пренасочува кај друг медицински тим.

Бесплатно е!  

Француската влада го позиционира ова право како дел од пошироката здравствена грижа и хуманост на крајот на животот. Како дел од државниот здравствен систем на Франција, трошоците за медицинските консултации, конзилиумот, како и самата смртоносна супстанца и присуството на медицинскиот персонал ќе бидат целосно покриени од државното здравствено осигурување за сите прифатени пациенти.

За француските граѓани процедурата ќе биде бесплатна на местото на давање на услугата.

За да се одбие критиката дека државата нуди евтаназија како „поевтина замена“ за долготрајно лекување, претседателот Емануел Макрон најави дополнителна 1 милијарда евра инвестиции во палијативната нега во следните десет години. Целта е на секој терминално болен пациент прво да му се овозможи врвна нега против болки пред воопшто да размислува за асистирано умирање.

Практичната примена и првите процедури во француските болници ќе започнат веднаш штом владата во наредните месеци ќе ги донесе финалните подзаконски акти и технички прописи за медицинскиот персонал.

The post ФРАНЦИЈА ОДОБРИ БЕСПЛАТНО ПРАВО НА АСИСТИРАНО УМИРАЊЕ Пациентот сам ќе може да си вбризга смртоносна супстанца appeared first on plusinfo.mk.