Рехабилитацијата на патниот превој Пресека се одвива со засилена динамика, а целиот патен правец се очекува да биде целосно завршен до февруари, со што значително ќе се подобри безбедноста во сообраќајот, изјави заменик-претседателот на Владата и министер за транспорт, Александар Николоски.

Николоски денеска изврши увид во градежните активности на превојот Пресека, заедно со директорот на Јавното претпријатие за државни патишта, Коце Трајановски, пратеникот Ѓорѓи Сајкоски, како и градоначалниците на општините Кичево и Дебарца.

Според министерот, станува збор за значаен инфраструктурен проект што опфаќа рехабилитација на вкупно 15 километри патен правец, кој има клучна улога за безбедно и побрзо поврзување на главниот град со Охрид и Струга.

– Се работи на 11 километри кои целосно се рехабилитираат. Можам да кажам дека во однос на рехабилитацијата на патниот превој Пресека, кој претставува главна артерија, не само за поврзување на Кичево со Охрид и Струга, туку генерално и за спојување на Скопје со Струга и Охрид, работите се одвиваат со одлична динамика. До февруари месец целиот патен правец би требало да биде завршен, што значително ќе помогне за побезбедно и побрзо патување, сè додека не биде пуштен во целост автопатот Охрид–Кичево – истакна Николоски.

Тој потсети дека патниот превој Пресека бил во исклучително лоша состојба, оценувајќи ја како „навистина катастрофална“, и нагласи дека рехабилитацијата ќе има директен ефект врз зголемување на безбедноста и квалитетот на сообраќајот во овој дел од земјата.

The post КРАЈ НА КАТАСТРОФАЛНИОТ ПРЕВОЈ Рехабилитацијата на Пресека финишира до февруари appeared first on plusinfo.mk.

Лице од обезбедувањето на Јавното претпријатие „Државни патишта“ денеска околу 13 часот пријавило сомнителна активност пред канцелариите на претпријатието, лоцирани на плоштадот ВМРО во Скопје.

Според информациите од Министерството за внатрешни работи, на видеонадзорот биле забележани 2  лица кои го разгледувале просторот, при што едно од нив оставило куфер.

„Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен и не претставува закана по безбедноста“, соопшти полицијата.

The post СОМНИТЕЛЕН КУФЕР ОСТАВЕН НА ПЛОШТАДОТ „ВМРО“ Полицијата утврдила дека е празен appeared first on plusinfo.mk.

„Европскиот патен коридор 8 е многу значаен регионален коридор бидејќи поврзува повеќе градови од исток кон запад во државава и во повеќе држави во регионот. Токму затоа посветено работиме на изградба и на модернизација на овој Коридор. Во таа насока, известуваме дека проектот за изградба на автопатска делница Букојчани–Кичево, дел од патниот Коридор 8, наскоро може да отпочне“.

Ова го соопшти Јавното претпријатие за државни патишта (ЈПДП) и најави дека со средства, обезбедени со заем од Европската банка за обнова и развој, наскоро ќе ја отпочне изградбата на автопатската делница од Букојчани до Кичево во должина од околу 11,5 километри.

„Со цел да се изврши избор на најподобен Изведувач за изградба на автопатската делница, беше објавен тендер за претквалификација согласно со процедурите за набавки на ЕБОР.
Процесот на претквалификација заврши и претквалификувани се 9 фирми, кои добија покана за поднесување на понуди, со краен рок за доставување на понудите до 30 септември 2025 година, по што ќе следи детална евалуација на доставените понуди и избор на најподобен Изведувач на градежните работи за изградба на автопатската делница“, соопштија од ЈПДП.

Со изградбата на автопатската делница Букојчани-Кичево, велат од ЈПДП, како дел од Европскиот патен Коридор 8 на ниво на автопат значително ќе се подобри мобилноста и трговската размена, безбедноста на патот, ќе се скрати времето на патување и ќе се зголемат можностите за економскиот развој.

„Постоечката делница на државниот пат А2 од Гостивар до Кичево е проектирана пред повеќе од 50 години и изградена како единечен коловоз со 2 сообраќајни ленти во двата правца, а наместа на планинските превои има и трета лента за бавни возила. Сепак, поради зголемениот обем на сообраќај и недоволно добрите возно диманички услови, неминовно е надградување на оваа делница на ниво на современо автопатско решение по кое ќе се одвива брз, безбеден и непречен меѓународен и домашен превоз на патници и стоки“, се потенцира во соопштението.

Активностите, пак, се додава, за автопатската делница од Гостивар до Букојчани се во тек, Бехтел и Енка веќе работат на изградбата, а засилена градежна активност има и на изградбата на автопатот Кичево-Охрид, сите дел од Коридорот 8.

Со ова ќе има целосно автопатско поврзување од главниот град Скопје до туристичкиот центар Охрид, информираат од претпријатието.

The post НАСКОРО ПОЧНУВА ИЗГРАДБАТА НА ДЕЛНИЦАТА БУКОЈЧАНИ–КИЧЕВО ДОЛГА 11,5 КМ Завршена претквалификацијата, следува избор на најповолен изведувач appeared first on plusinfo.mk.

Влада предводена од ВМРО-ДПМНЕ прави големи напори и интензивно работи автопатот Охрид-Кичево да биде пуштен во употреба до крајот на 2026 година, вели директорот на Јавното претпријатие за државни патишта Коце Трајановски.

– Во изминатите шест месеци интензивно работиме на придвижување на работите на овој патен правец – рече Трајановски во поткастот „ВМРО-ДПМНЕ Зборува“.

Трајановски рече дека во изминатите години немало доволно координација меѓу надзорот и изведувачот на градежните работи, но со присуството на директорот и јавното претпријатие на терен, резултатите се веќе очигледни.

– Ние сме доста ангажирани како јавно претпријатие, со оглед на тоа што немало координација меѓу надзорот и изведувачот и немало доволно присуство од јавното претпријатие. Мислам дека со нашето присуство и со мое лично присуство, скоро секоја недела сум таму на состаноци, сето тоа го дотеравме во ред и мислам дека резултатите веќе се гледаат и на терен. Се гледа кога одите кон Охрид дека има многу механизација, многу луѓе и на главниот пат и на пристапните патишта – рече Трајановски.

Тој потенцираше дека довербата на граѓаните нема да биде изневерена, а како доказ за тоа се делата и проектите.

– Во рок од 6 месеци оваа Влада на чело со премиерот Христијан Мицкоски, на чело со министерот за транспорт и врски успеавме да завршиме и да ги пуштиме во употреба два патни правци што се многу значајни. Јас можам да кажам дека кога е ВМРО-ДПМНЕ на власт, се гледа дека нешто се гради во Македонија и оставаме трага позади себе со готови проекти. Значи, ние затоа сме дојдени на власт и затоа сме на власт, за да на граѓаните коишто ни ја дале довербата да ја оправдаме таа доверба, ама да ја оправдаме со дела, со проекти, а не со зборување. И тоа мислам дека веќе го правиме, затоа што не се случило за првите 6 месеци да некој пушти два патни правци коишто се многу значајни – рече Трајановски.

The post АВТОПАТОТ ОХРИД-КИЧЕВО ЌЕ БИДЕ ГОТОВ ДО КРАЈОТ НА 2026 ГОДИНА Досегашниот застој беше поради лоша координација меѓу надзорот и изведувачот appeared first on plusinfo.mk.

Информациите објавени во последниот извештај на Државниот завод за ревизија, во однос на направената ревизија за реализација на капиталните инвестиции во ЈП за државни патишта и во ЈП за железничка инфраструктура, би можеле да бидат индиции за неодговорно трошење буџетски средства.

Вицепремиерот и министер за транспорт, Александар Николоски, Александар Јанев, директор на Бирото за јавна безбедност и дел од неговите соработници кои работат на предмети од областа на организираниот криминал и корупција, се состанале денеска и разговараше за индиции за сторен криминал и неодговорното трошење пари.

Овие индиции произлегоа од извештајот за реализација на капиталните инвестиции на Државниот завод за ревизија, а во следниот период ќе се разгледуваат и други предмети и активности во рамки на министерството за транспорт и институциите кои се под негова надлежност.

– Борбата со корупцијата и криминалот е главен приоритет на оваа Влада. Ќе се истражи целата работа и сиот можен криминал. Нема да дозволиме никој да ги краде народните пари и никој не смее да биде над законите – истакнал министерот Николоски по средбата.

The post ГОНЕЊЕТО НА КРИМИНАЛОТ ПОЧНУВА ОД ДРЖАВНИТЕ ПАТИШТА И ОД ЖЕЛЕЗНИЦАТА? Ревизорите открија индиции што ќе се истражуваат appeared first on plusinfo.mk.