Извршителите на тестаментот на осудениот финансиер Џефри Епстин се согласија од неговиот имот да се исплатат до 35 милиони долари за решавање на колективната тужба во која неговите двајца блиски соработници се обвинети за помагање и поддржување на трговија со млади жени и малолетнички, се наведува во судски поднесок објавен вчера.

Спогодбата ја објави адвокатската фирма „Боис Шилер Флекснер“ (Boies Schiller Flexner), која ги застапува жртвите на Епстин, во документ поднесен до сојузниот суд во Менхетен. Доколку судот го одобри договорот, со тоа ќе заврши тужбата поднесена во 2024 година против долгогодишниот личен адвокат на Епстин, Дарен Индике и сметководителот Ричард Кан, кои воедно се и извршители на неговиот тестамент.

Претходно веќе беше воспостави фонд за отштета од кој на жртвите од тестаментот им беа исплатени вкупно 121 милион долари, со дополнителни 49 милиони долари преку поединечни спогодби.

Адвокатот на Индике и Кан, Даниел Х. Вајнер нагласи дека неговите клиенти не признале никаква вина во рамките на постигнатиот договор.

– Бидејќи не направија ништо погрешно, извршителите беа подготвени да се бранат на судење, но се согласија на медијација и спогодба за конечно да се решат сите потенцијални барања против имотот на Епстин – наведе Вајнер во писмена изјава.

Тој додаде дека договорот ќе овозможи „доверлив начин за финансиска компензација“ на жртвите кои претходно не ги решиле своите барања.

Џефри Епстин почина во затвор во Њујорк во август 2019 година, додека чекаше судење по обвиненијата за трговија со малолетнички. Неговата смрт официјално беше прогласена за самоубиство.

Во тужбата од 2024 година се наведува дека Индике и Кан му помогнале на Епстин да воспостави сложена мрежа на компании и банкарски сметки, што му овозможило да го прикрие злоставувањето и да им исплаќа пари на жртвите и посредниците, додека за својата работа биле „богато наградени“.

Адвокатската фирма „Боис Шилер Флекснер“ претходно исто така обезбеди спогодби во вкупна вредност од 365 милиони долари со банките „Џеј-Пи Морган Чејс“ и „Дојче Банк“ кои беа обвинети дека ги игнорирале предупредувачките знаци за активностите на Епстин, иако тој бил нивен профитабилен клиент.

The post 35.000.000 ДОЛАРИ ЗА ЖРТВИ НА МРЕЖАТА НА ЕПСТИН Се спогодија со извршителите на неговиот тестамент appeared first on plusinfo.mk.

Како одговорна компанија, Македонски Телеком чувствува обврска јавно да ги демантира невистинитите и неаргументирани тврдења изнесени во јавноста поврзани со постапката која се води пред надлежните институции, а произлегуваат од предметот помеѓу Македонски Телеком и Фокуснет. И покрај тоа што оваа постапка според Законот за Судски совет е тајна, во јавноста беа изнесени нецелосни и неточни информации од страна на суспендираната судијка Наташа Савовска Димитровска и нејзиниот полномошник, со што јавноста се доведува во заблуда.

Токму поради тајноста на постапката и законските ограничувања, компанијата не е во можност да ја достави на јавен увид целосната одлуката на Републичкиот судски совет, која на 73 страни ги аргументира причините за нејзино разрешување и суспендирање. Но, во интерес на точното информирање, базирано на факти, компанијата сака да ги појасни своите позиции во врска со овој предмет.

Имено, се работи за скоро дведецениски судски спор, кој Македонски Телеком го води со Фокуснет, за наводна штета што Македонски Телеком му ја нанел на Фокуснет. Фокуснет е компанија со блокирана сметка повеќе од 20 години. И покрај тоа, Фокуснет бара милионски суми отштета, за наводно претрпена штета за бизнис кој е непостоечки.

Првосетепениот суд го одбил тужбеното барање на Фокуснет и утврдил дека нема основа за наплата на штета. Во второстепената постапка по жалба на Фокуснет, Апелациониот суд во Скопје, без одржување на јавна расправа ја преиначува првостепената пресуда непосредно пред судската ферија и носи одлука дека Македонски Телеком треба да исплати штета на Фокуснет од речиси 4 милиони евра.

Македонски Телеком согласно законски расположливите средства, упати барање до Републички судски совет поради сомневањата за незаконско водење на второстепената постапка. Имено, во јавно објавените информации во Извештајот на комисијата за утврдување на факти при Судскиот совет од август 2024 година, утврдени се сериозни индиции за постоење на два записници заради кои Судскиот совет го алармирал Јавното обвинителство.

Понатаму, од страна на Комисијата за утврдување на факти при Судскиот совет во август 2024 година, констатирано е дека во жалбениот предмет се најдени доверливи интерни документи на Македонски Телеком, кои не биле изведени како докази ниту во првостепена, ниту во второстепена постапка, ниту се јавно достапни. На ваков незаконски начин Апелациониот суд Скопје ја преиначи одлуката на првостепениот суд и на компанија со блокирани сметки повеќе од 23 години и без вработени ѝ досуди отштета од речиси 4 милиони евра.

Македонски Телеком верува дека надлежните институции ќе постапат согласно законот и дека владеењето на правото ќе биде во целост применето.

The post МАКЕДОНСКИ ТЕЛЕКОМ ЈА ДЕМАНТИРА СУДИЈКАТА САВОВСКА Невистините и манипулациите не менуваат ништо, причините за нејзината суспензија остануваат appeared first on plusinfo.mk.

Претседателот на САД, Доналд Трамп, поднесе тужба против „Џеј Пи Морган Чејс“ и нејзиниот извршен директор Џејми Дајмон, барајќи најмалку 5 милијарди долари отштета, тврдејќи дека банката неправедно ги затворила неговите сметки од политички причини.

Тужбата е поднесена во судот во округот Мајами-Дејд и претставува ескалација на долгогодишниот конфликт меѓу Трамп и најголемата американска банка, околу наводното ускратување на банкарски услуги поради политички ставови. Според тужбата, „Џеј Пи Морган“ се дистанцирала од Трамп и неговите компании по неговото заминување од Белата куќа во 2021 година, одлука која тој ја опишува како политички мотивирана.

Се наведува дека на 19 февруари 2021 година банката ги известила Трамп и поврзаните субјекти дека ќе затвори повеќе сметки во рок од два месеци, што им предизвикало финансиска и репутациска штета. Трамп, исто така, тврди дека Дајмон наредил тој и неговите компании да бидат ставени на внатрешна „црна листа“.

Од „Џеј Пи Морган“ соопштија дека тужбата е неоснована и дека сметките не се затвораат од политички или религиозни причини, туку поради регулаторни правила. Банката додаде дека ќе се брани пред суд.

Тужбата е поднесена еден ден откако Дајмон на Светскиот економски форум во Давос упати пофалби за одредени политики на Трамп, но истовремено предупреди дека неговите економски планови носат сериозни ризици.

Ова е дел од серијата правни постапки што Трамп ги покренува во рамки на својата нова претседателска кампања, додека води правни битки против медиуми и институции што ги смета за противници.

The post ТРАМП ЈА ТУЖИ „ЏЕЈ ПИ МОРГАН“, БАРА 5 МИЛИЈАРДИ ДОЛАРИ ОТШТЕТА Тврди дека банката ги затворила неговите сметки од политички причини appeared first on plusinfo.mk.

Претседателот на САД, Доналд Трамп, поднесе тужба од 10 милијарди долари против Би-Би-Си за манипулирање на неговиот говор на 6 јануари 2021 година, во документарецот „Панорама“.

Трамп го обвини британскиот јавен радиодифузер за клевета и кршење на законите за трговски практики, според судските документи поднесени во Флорида. Тој бара отштета од пет милијарди долари за секое од двете обвиненија. Би-Би-Си му се извини на Трамп минатиот месец, но го отфрли барањето за отштета, велејќи дека нема „основа за тужба за клевета“.

Адвокатите на Трамп тврдат дека Би-Би-Си го клеветела претседателот со „намерно, злонамерно и измамничко манипулирање на неговиот говор“. Би-Би-Си сè уште не коментирала за тужбата. Трамп минатиот месец објави дека ќе ја тужи Би-Би-Си поради документарецот, кој се емитуваше во Обединетото Кралство пред претседателските избори во САД во 2024 година.

– Мислам дека морам да го направам тоа. Тие измамија. Ги сменија зборовите што излегоа од мојата уста – им рече Трамп на новинарите, зборувајќи за тужбата. Во говорот на 6 јануари 2021 година, непосредно пред немирите во американскиот Капитол, Трамп им рече на толпата: „Одиме во Капитол и ќе ги бодриме нашите храбри сенатори и претставници“.

Повеќе од 50 минути подоцна во истиот говор, тој додаде: „И се бориме. Се бориме до крај“.

Програмата „Панорама“ емитуваше клип од Трамп како вели: „Одиме во Капитол… и јас ќе бидам таму со вас. И се бориме. Се бориме до крај“. Би-би-си призна дека уредувањето создало „лажен впечаток“ дека Трамп „директно повикува на насилни дејствија“, но го отфрли тврдењето дека тоа претставува клевета.

Во ноември, беше протечена интерна белешка на Би-би-си во која се критикуваше начинот на монтирање на говорот, што доведе до оставки на генералниот директор на Би-би-си, Тим Дејви, и директорката за вести, Дебора Тернес.

Пред Трамп да ја поднесе тужбата, адвокатите на Би-би-си поднесоа долг одговор на обвинувањата на претседателот. Тие тврдеа дека немало злонамерност во монтажата и дека Трамп не претрпел никаква штета како резултат на емитувањето, бидејќи бил реизбран кратко време по неговото емитување.

Тие исто така тврдеа дека Би-Би-Си немала права да го дистрибуира документарецот во Соединетите Американски Држави, ниту пак го емитувала таму. Иако Панорама била достапна на BBC iPlayer, пристапот бил ограничен на гледачите во Обединетото Кралство.

Во тужбата, Трамп тврди дека Би-Би-Си имала договори со други дистрибутери за прикажување на содржината, вклучително и договор со трета медиумска компанија за која тврди дека имала лиценца за дистрибуција на документарецот надвор од Обединетото Кралство. Би-Би-Си не ги коментирала обвинувањата, ниту компанијата што наводно ги поседувала правата за дистрибуција.

Во тужбата понатаму се тврди дека жителите на Флорида можеле да го гледаат документарецот користејќи ВПН или преку услугата за стриминг БртиБокс.

„Промоцијата на документарецот Панорама, во комбинација со значителното зголемување на употребата на ВПН во Флорида од неговото емитување, сугерира дека е многу веројатно жителите на Флорида да пристапиле до документарецот пред Би-Би-Си да го отстрани“, се наведува во тужбата.

The post ТРАМП БАРА ОТШТЕТА ОД 10 МИЛИЈАРДИ ДОЛАРИ! Неговите адвокати поднесоа тужба против Би-Би-Си appeared first on plusinfo.mk.

Најмалку 20 луѓе загинаа, а 15 се тешко повредени откако се запали автобус во индиската сојузна држава Раџастан.

Со автобусот, кој сообраќал од Џаисалмер до Џодпур, патувале 50 патници.

Според индиските медиуми пожарот избил во задниот дел на автобусот и брзо се проширил, а патниците немале време да го напуштат возилото.

Премиерот на Индија, Нарендра Моди изрази сочувство до семејствата на жртвите и најави отштета од 200.000 рупии (околу 1.940 евра).

Индија е позната по исклучително ниска безбедност на патиштата. Според официјалните податоци во 2023 година регистрирани се повеќе од 480.000 сообраќајни несреќи, што резултирало со речиси 173.000 смртни случаи и 463.000 повредени.

The post СЕ ЗАПАЛИ АВТОБУС ВО ИНДИЈА, НАЈМАЛКУ 20 ЗАГИНАТИ Премиерот Моди вети по 1.940 евра отштета appeared first on plusinfo.mk.

Повеќе од 30 припадници на елитната 83-та руска воздушно-десантна бригада намерно се раниле себе и своите соборци за да лажираат повреди во борба и нелегално да соберат отштета до 37.000 долари по лице, откри истрагата на Главниот воен истражен оддел на Истражниот комитет на Русија, објави Јунајтед24.

Според истрагата, војниците намерно си нанеле рани од огнено оружје, кои потоа лажно ги претставиле како повреди здобиени во борба. Таквиот статус им овозможил да добијат финансиска отштета, платено отсуство и преференцијален медицински третман. Вкупната штета се проценува на повеќе од 2,5 милиони долари. Некои од повредите послужиле и како основа за доделување државни одликувања, како што се Орденот за храброст и Медалот „За храброст“.

Високи офицери биле дел од измамата

Високи офицери исто така биле вклучени во измамата, вклучувајќи го полковникот на гардата Артем Городилов, поранешен командант на бригадата, и потполковникот Константин Фролов, кој ја предводел групата за специјални операции. И двајцата се изјаснија за виновни и одлучија да сведочат против своите другари.

Повреди што вредат 37.000 долари

Судските записи откриваат дека Фролов официјално пријавил 4 борбени повреди за време на неговата служба, иако носел ознаки за 5 помали и 2 сериозни рани на униформата. Истражителите утврдиле дека ниедна од повредите не е здобиена во борба. Фролов признал дека ги замолил своите другари да пукаат во него, внимавајќи да ги избегне виталните органи, сè со цел да обезбеди исплата од 37.000 долари.

Полковникот Городилов сега се соочува со обвиненија за измама од големи размери, додека Фролов е обвинет за измама, поткуп, нелегално поседување оружје, муниција и за експлозивни направи.

Најновите обвиненија против Фролов се поврзани со откривањето на скривалиште во самопрогласената Народна Република Луганск, каде што складирал 3 конфискувани пиштоли, пушка, муниција и неколку мини и гранати.

Ниту посвоил девојче ниту командувал со најефикасниот снајперски тим

Истражителите, исто така, негираа некои медиумски извештаи за Фролов, вклучително и приказните дека посвоил девојче, спасено од гранатирање, или дека командувал со најефикасниот снајперски тим.

Овој случај се случува во време кога Русија, наводно, враќа поранешни воени заробеници директно на бојното поле кратко време по размената со Украина, честопати без потребната медицинска нега или формална демобилизација.

Исто така, имало случаи каде што истите војници биле повторно заробени во рок од само неколку недели.

The post ЕЛИТНИ РУСКИ ВОЈНИЦИ СЕ ПОВРЕДУВАЛЕ МЕЃУСЕБНО ЗА ДА ЛАПНАТ ОТШТЕТА Добиле и државни ордени и признанија appeared first on plusinfo.mk.

Општината Ѓорче Петров ѝ даде пет дена на градежната фирмата која градејќи зграда сруши ѕид на соседна висококатница да го врати ѕидот во првобитната состојба и да ја осигура оштетената градба. Работниците кои работеле на новиот објект го пробиле ѕидот на соседот и целиот бетон кој го нанесувале за плочата завршил по скалите на соседната зграда.Општината излезе со соопштение откако градежните инспектори извршија вонреден надзор на зградата на булеварот Партизански одреди.

„Констатирани се неправилности, изготвен е Записник од извршен инспекциски надзор и донесено е Решение со кое на инвеститорите им се наредува веднаш да ја прекинат натамошната изградба на објектот од втора категорија со намена А2 – колективна станбена зграда на улица Партизански Одреди бб, во рок од пет дена да го вратат во првобитна состојба фасадниот ѕид на соседниот објект и веднаш да ја обезбедат сигурноста на околната градба“, се наведува во соопштението.

Во текстот се вели дека инцидентот настанал при бетонажа на ѕид од источната страна на објектот кој се гради.

Претходно општината го повика станарите да побараат отштета и дека изведувачот и инвеститорот ќе добијат соодветна казна заедно со обврската да го санираат проблемот.

„Бидејќи се работи за штета со можен основ за надомест, жителите имаат право да побараат и дополнителна правна заштита преку надлежните судови“, порачаа од општината.

The post ФИРМАТА КОЈА ГРАДЕЈЌИ СРУШИ ЅИД НА СОСЕД ДОБИ 5 ДЕНА ДА ЈА САНИРА ШТЕТАТА Општината бара да се осигура стабилноста на оштетениот објект appeared first on plusinfo.mk.

Европската Унија  ја разгледува можноста за ревидирање на правилата со кои се регулираат правата на патниците во авионите во случај на доцнење или откажување летови.

Ова наиде на одобрување од авиокомпаниите и остра реакција од здруженијата на потрошувачи.

Предложената промена на европските правила за компензација во случај на доцнење на летовите може да го ускрати правото на компензација на 85% од патниците, предупредува Европската организација на потрошувачи (BEUC).

– Комисијата предложи промена на временската рамка за добивање обештетување. Наместо 3 часа, сега ќе биде 5, 9 или 12 часа, во зависност од должината на летот – изјави за Euronews правниот експерт на BEUC, Стивен Бергер.

Сега за доцнење подолго од 3 часа може да се добие отштета од 250 до 600 евра.

Новите правила го скратуваат и рокот за поднесување барање за надомест.

– Според сегашниот предлог, патниците би имале само три месеци да поднесат барање за компензација или да бараат почитување на нивните права, што е прекраток период – нагласува Бергер.

Од друга страна, авиокомпаниите сметаат дека овој документ сè уште претставува добра основа за преговори.

Здружението Airlines4Europe (A4E), кое ги претставува компаниите кои управуваат со 70% од европскиот воздушен сообраќај, тврди дека „компромисниот предлог на Европската комисија од 2013 година ќе им ја даде потребната флексибилност на авиокомпаниите подобро да управуваат со прекините, овозможувајќи им да заштедат летови и подобро да одговорат на главниот приоритет на патниците – да стигнат до нивната дестинација што е можно поскоро“.

А4Е исто така истакнува дека „сегашните регулативи се нејасни, што создава несигурност за патниците, авиокомпаниите и судовите“.

Директивата се однесува на сите летови кои поаѓаат од аеродромите на ЕУ, без оглед на националноста на авиокомпанијата, како и за летовите што пристигнуваат на аеродромите на ЕУ доколку се управувани од европска авиокомпанија.

Сепак, тој не се однесува на летови до Европа со кои управуваат авиопревозници кои не се членки на ЕУ, ниту пак на летови надвор од ЕУ со постојки во Европа.

Правилата ги опфаќаат сите земји-членки на ЕУ, како и Исланд, Норвешка и Швајцарија.

Надомест не се обезбедува во случај на „исклучителни околности“, како што се екстремни временски услови, ограничувања на контролата на летање, штрајкови кои не вклучуваат персонал на авиокомпанијата и политичка нестабилност.

Преговорите меѓу земјите-членки на ЕУ се засноваат на предлогот на Европската комисија од 2013 година.

Полска, која во моментов претседава со ЕУ шест месеци, ја презеде одговорноста за овие правила и сака да постигне што е можно поголем напредок во преговорите до јуни.

The post 85% ОД ПАТНИЦИТЕ НЕМА ДА ДОБИЈАТ ОБЕСШТЕТУВАЊЕ ЗА ДОЦНЕЊЕ НА АВИОНИТЕ Европската унија подготвува нови правила за авиокомпаниите appeared first on plusinfo.mk.

Судот ги прогласи за одговорни родителите за лошото воспитување, а училиштето за непреземање мерки за безбедност. Наредена е и исплата на судски трошоци. Пресудата може да се оспори со жалба до Апелациониот суд во рок од 15 дена. Оваа одлука се заснова на Законот за облигациони односи, кој предвидува одговорност на родителите, малолетниците и институциите за причинета штета.

Според податоците на српски Блиц, семејството Кецмановиќ поседува значително вреден имот. Се проценува дека нивниот недвижен имот во Белград вреди најмалку 700.000 евра. Оваа проценка не ја вклучува вредноста на автомобилите и на имотот во Ниш и во Параќин, како и имотот што не ѝ е познат на јавноста.

Владимир Кецмановиќ поседува:

• стан во Савски Венац, Белград (87 метри квадратни);
• Автомобил Mercedes, модел 2005 година.

Милијана Кецмановиќ поседува:

• стан во близина на Вуков споменик (47 метри квадратни) и паркинг простор;
• половина стан во Врачар (57 метри квадратни);
• половина стан во Ѕвездара (91 метри квадратни);
• половина од семејна куќа во Ниш;
• половина од помошен објект во Ниш (40 метри квадратни);
• околу 25 декари земјоделско и градежно земјиште во Ниш и областа Параќин;
• aвтомобил Fiat 500, модел 2017 година.

Во текот на судската постапка, на родителите им била изречена привремена забрана за располагање со парите од сметката, а привремено се задржани и паричните средства и хартиите од вредност. Точната сума не е позната.

The post РОДИТЕЛИТЕ НА КОСТА К. ТРЕБА ДА ИМ ПЛАТАТ 2 МИЛИОНИ ЕВРА НА СЕМЕЈСТВАТА НА ЖРТВИТЕ Еве што поседуваат Милијана и Владимир appeared first on plusinfo.mk.

Управата за финансиска полиција поднесе кривична пријава против Б.Ф. од Тетово и четири компании под негово управување, поради сомневање за даночно затајување во износ од 16.085.644 денари или над 260.000 евра.

Според информациите, осомничениот, кој е сопственик и управител на неколку компании, во периодот од 2013 до 2023 година, наводно, вршел финансиски трансакции во кои префрлал средства на свое и други компании без соодветно пријавување. Дополнително, не ги враќал позајмиците и не ги отфрлал застарените побарувања, со што ја намалувал даночната основа и избегнувал плаќање на данок на добивка.

„Во текот на истрагата утврдивме сериозни неправилности во финансиското работење на пријавениот и компаниите под негово управување. Овие активности довеле до избегнување на обврските кон државниот буџет, што претставува кривично дело даночно затајување“, информираат од Управата за финансиска полиција.

Пријавениот е сопственик и управител на неколку компании, меѓу кои „БИБАЈ ГРОУП“ ДООЕЛ, „БИБАЈ“ ДООЕЛ, „Про Тире“ ДООЕЛ и „РАЕН“ ДООЕЛ, сите со седиште во Тетово.

Финансиската полиција продолжува со истрагата, а предметот ќе биде доставен до Јавното обвинителство.

The post БИЗНИСМЕН 10 ГОДИНИ КРИЕЛ ДАНОК ПРЕКУ 4 ФИРМИ Тетовец му нанел милионски штети на Буџетот appeared first on plusinfo.mk.