Индиските власти предложија план за ослободување предатори како што се крокодили и отровни змии во речните делови од границата со Бангладеш, каде што поставувањето ограда е тешко. Тие треба да послужат како природна бариера за нелегална миграција и за шверц.

Границата меѓу Индија и Бангладеш, која е долга 4.096 километри, поминува низ еден од најтешките терени, а Њу Делхи заклучи дека е невозможно да се оградат делови од неа. Во интерен меморандум од 26 март, индиските гранични безбедносни сили (BSF) им наредија на своите војници да ја истражат „изводливоста на користење влекачи во ранливите речни празнини“.

Овој потег на индиската власт ги вознемири активистите за човекови права и за заштита на дивите животни, пишува Ал Џезира.

Во меморандумот гранични безбедносни сили им наложија на своите гранични единици строго да се придржуваат кон упатствата за истражување на употребата на влекачи во речните празнини. На службениците им е наредено и да известуваат за преземените мерки.

Министерството за внатрешни работи во својот извештај од минатата година изјави дека BSF, и покрај тешкиот терен, вредно ги сузбива нелегалните прекугранични активности и миграцијата на недокументирани лица од Бангладеш.

„Одредени проблематични области како што се речните и низинските зони, населбите во близина на границата, нерешените случаи на откуп на земјиште и протестите на граничното население го забавија поставувањето на оградата на некои делови од оваа граница“, се вели во извештајот.

Аналитичарите и активистите изразија загриженост за можноста за користење опасни животни како крокодили за одвраќање на бегалците и мигрантите.

– Ова би било смешно да не беше злокобно и опасно. Откако ќе ослободите отровни змии и крокодили, тие нема да можат да кажат дали некој е Бангладешанец или Индиец – вели Ангшуман Чудури, истражувач специјализиран за североисточните и источните гранични држави на Индија.

Ова е врвот на суровоста и дехуманизацијата кон недокументираните мигранти, додаде тој.

– Сосема нов начин на претворање на природата и животните во оружје против човечките суштества. Тоа е биополитичко насилство од нов вид и Ахилова пета на границата меѓу Индија и Бангладеш – изјави тој за Ал Џезира.

Индиската влада долго време тврди дека недокументираните мигранти претставуваат закана затоа што ја менуваат демографската слика на Индија.

Нема официјална статистика за бројот на недокументирани мигранти во Индија. Овој месец почна нов попис на населението, а последниот беше спроведен во 2011 година.

– Дури и ако бројот на недокументирани мигранти расте, Индија се одлучи за „вонсудски методи“ наместо да соработува со владата на Бангладеш и да следи законски постапки за нивно предавање – рече активистот за човекови права Харш Мандер.

Идејата за воведување крокодили и отровни змии во пограничните области, според него, е само продолжување на вообичаената политика кон индиските муслимани.

Крокодилите не се автохтон вид во речните области долж границата меѓу Индија и Бангладеш, порача Ратин Барман, раководител на стратегијата во Wildlife Trust of India.

– Ако се преместат во погранични области, можеби нема да преживеат. Истото важи и за отровните змии. Секоја манипулација со природното живеалиште на видовите не е добра. Ако ја наметнеме, можеме да го нарушиме целиот синџир или екосистем. Загрижен сум за другите суштества кои имаат еднакво право да живеат во овој свет и во тие области – рече Барман.

The post ИНДИЈА СО КРОКОДИЛИ И СО ОТРОВНИ ЗМИИ ЌЕ ЈА ЧУВА РЕЧНАТА ГРАНИЦА СО БАНГЛАДЕШ Суров начин за борба со илегалната миграција appeared first on plusinfo.mk.