Децении наназад Општина Битола се соочува со предизвици во реализација на идејата за решавање на проблемот со отпадните води. Сѐ уште сета отпадна вода од канализацијата се излева директно во реката Драгор, што претставува и евентуален ризик по здравјето за битолчани. Сепак, со помош на Европската Унија беше изготвен проект за изградба на колекторски систем, реконструкција на канализациската мрежа и изградба на пречистителна станица, кој по долги години стагнација започна да се движи.

Летово беше потпишан договорот со конзорциумот кој ќе ја гради пречистителната станица кај Оризари, но засега недостасува изградбата на канализацијата. Иако јавната набавка е одамна завршена, договорот со изведувачот на канализацијата не е потпишан. Канализацијата во Битола е паралелен проект без кој се поставува прашањето за функционалноста на самата пречистителна станица која треба да започне да се гради. Односно, се јавува дилемата како отпадната вода од Битола ќе пристигне до пречистителната станица? Во Студијата за проектот се наведува дека овие два проекта треба да се одвиваат напоредно со цел да се заокружи модерното решение за третман на отпадните води во Битола. Ова се потврдува и со тендерската спецификација за изградба на канализациската мрежа.

„Главната цел на овој проект е да се обезбеди подобрување на собирањето и третманот на отпадните води во агломерацијата во Битола. Проектот предвидува мерки за надградба на постојниот канализациски систем, што би придонело за: подобрени хигиенски стандарди за населението; помалку проблеми во одржувањето на канализацискиот систем; заштита на водотекот; правилно функционирање на идната пречистителна станица во Битолско… Овој дел предвидува изградба на главен колектор до новата пречистителна станица. Проектот за изградба на главниот колектор треба да обезбеди прифаќање на отпадните води од постојните главни колектори во еден главен колектор преку кој отпадните води ќе се транспортираат до локацијата на новопредвидената пречистителна станица“, се наведува во тендерската спецификација за битолската канализација.

Неодамна од Општина Битола соопштија дека за првпат се состанал Управувачкиот kомитет кој ја следи реализацијата на проектот за изградба на пречистителна станица за отпадни води и реконструкција на канализационата мрежа во Битола. Во соопштението, акцентот беше поставен на изградбата на пречистителната станица, а отсуствуваше делот за канализациската мрежа.

„На состанокот беа презентирани тековниот статус и напредокот на проектот, кој во моментот е во фаза на идеен проект за пречистителната станица, кој веќе е и доставен од страна на Изведувачот до Надзорот. Се разговараше за предизвиците кои стојат пред проектот во наредната фаза, како што се Основниот проект, организацијата на градилиштето, мобилизацијата, безбедносни прашања на градилиштето, како и квалитетот на работата“, соопштија од Општината.

Оттаму додадоа дека на состанокот присуствувале претставници од Министерството за животна средина и просторно планирање, општина Битола, Јавното претпријатие „Нискоградба“, Министерство за финансии и Делегацијата на ЕУ. Изградбата на станицата, но и на канализациската мрежа, се финансира со средства од ИПА програмите, од претпристапните фондови на Европската Унија. Но, доколку наскоро не биде потпишан договорот за изградба на канализацијата, постои можност парите да бидат повлечени назад во Брисел. Ваквиот непосакуван чекор го саботира и правилното функционирање на пречистителната станица, а секако и конечното решение за третманот на отпадните води во Битола.

The post ЌЕ УСПЕЕ ЛИ ПРОЕКТОТ ЗА ТРЕТМАН НА ОТПАДНИ ВОДИ ВО БИТОЛА? Нов парадокс пред битолчани appeared first on plusinfo.mk.

– Временскиот период на присуството на вирусот во отпадните води во Солун, како што покажуваат мерењата, не е во согласност со мирната клиничка слика во болниците во градот, па така научниците проценуваат дека бројот на асимптоматски или умерено симптоматски случаи, на кои не им е потребна болничка нега, значително се зголемил, пишува грчката новинска агенција АНА-МПА, пренесувајќи го истражувањето и додава дека од 18 јуни биле известени надлежните власти за резултатите од мерењата.

Концентрација на геномот на коронавирусот во отпадните води во Солун била регистриран на крајот од април, а околу три седмици во месец мај немало никакво присуство, кога повторно се појавил на почетокот на јуни.

АНА-МПА пишува дека поради сериозноста на резултатите, научниот тим ги повторил анализите, а резултатот бил ист.

– Солунскиот Универзитет „Аристотелис“, заедно со компанијата за водоснабдување и канализација на Солун, ќе продолжи систематски да го следи присуството на геномот на вирусот во отпадните води како индикатор за нивото на ширење на вирусот кај населението, со цел да постои навремено, во рок од 24 часа, научно информирање и поддршка на државата во донесувањето на критични одлуки за справување со пандемијата, вели ректорот Никос Папајоану.

Научниот тим, со мерења трипати седмично ја следи концентрацијата на геномот на коронавирусот во отпадните води на влезот на Пречистителната станица за отпадни води во Солун.

The post Во отпадните води во Солун откриено присуство на геноми на коронавирусот appeared first on plusinfo.mk.

Научниците во Италија пронашле траги од коронавирусот во отпадните води собрани од Милано и Торино во декември 2019 година, што сугерира дека ковид-19 веќе циркулирал во северна Италија пред Кина да ги објави првите случаи.

Италијанскиот национален институт за здравство (ИСС) испитал 40 примероци од пречистителна станица за отпадни води во северна Италија помеѓу октомври 2019 и февруари 2020 година.

Во анализата објавена доцна синоќа се вели дека примероците земени во Милано и Торино од 18 декември покажале присуство на коронавирусот.

– Ова истражување може да ни помогне да го сфатиме почетокот на циркулирањето на вирусот во Италија – изјави Џузепина Ла Роса, експерт за еколошки отпадни води во Италијанскиот национален институт за здравство, кој учествуваше во истражувањето, се вели во соопштението во кое детално се опишани резултатите од истражувањето.

Помалите студии кои ги работеле научни тимови во Холандија, Франција, Австралија и други земји откриваат знаци дека вирусот што го предизвикува ковид-19 може да се открие во канализацијата, а многу земји почнуваат да користат истражувања на отпадни води за да го следат ширењето на болеста.

Кинеските власти ги потврдија првите случаи на крајот на декември. Првиот случај на Италија беше во средината на февруари.

Француски научници во мај соопштија дека тестовите на примероци покажале дека пациент кој бил лекуван од пневмонија во близина на Париз на 27 декември, всушност имал коронавирус.

Во меѓувреме, студија во Шпанија открила траги од вирусот во отпадни води собрани во средината на јануари во Барселона, околу 40 дена пред да се открие првиот локален случај на заразата.

Ла Роса истакна дека најновите откритија за присуството на вирусот во италијанските отпадни води не значи автоматски дека епидемијата потекнува од Италија.

The post Коронавирусот бил присутен во Италија во декември appeared first on plusinfo.mk.