Децении наназад битолчани очекуваат да се најде финално решение за отпадните води во градот. Иницијативата за рехабилитација за канализациската мрежа и изградба на пречистителна станица во Битола датира уште пред 2016 година, за што потоа со помош на финансиски средства од Европската Унија се изготви и Оцена за влијанието врз животната средина за ваквиот проект. Податоците за состојбата со реката Драгор кои тогаш беа споделени со јавноста беа застрашувачки. Сепак, крајот за испуштањето на отпадните води во реката сѐ уште не е на повидок. За потребите на Студијата за оцена на влијанијата од проектот за изградба на колекторски систем, рехабилитација на канализациона мрежа и изградба на пречистителна станица за отпадни води во Битола, направена е анализа на примерок од вода, а таа покажува дека површинските води на река Драгор на местото за испуст одговараат на води со класа V.

„Загаденоста на Драгор е во III, односно IV и V група или вон класа и го добива епитетот ‘мртва река’. Реката е претворена во отворен канал што ги одведува комуналните отпадни води, вклучително и физиолошкиот отпад (фекалии и урина), отпадните води со отпадоци од домаќинствата и отпадните води од индустриските капацитети. Загадените и непрочистените води во некоја прочистителна станица од Драгор се вливаат во Црна и ја загадуваат. Водите, според степенот на загаденоста, спаѓаат во четврта и петта класа, кои се најсилно загадени води“, се вели во Студијата.

Загадувањето на водите во Општина Битола е резултат на испуштање на непречистени индустриски и комунални отпадни води. Овие води се слеваат во Црна Река и ја загадуваат, а загадените води се слеваат и во Тиквешко Езеро. Досегашните испитувања покажале дека количината на канализациона вода во Драгор е двапати поголема од количината на чиста вода.

„Употребата на загадени површински води за наводнување на земјоделските површини предизвикува долготрајно загадување на почвата и подземните води, што пак резултира со навлегување на полутанти во синџирот на исхрана“, се додава во образложението на Планот.

Дополнително, во однос на влијанието на здравјето, се истакнува дека доказите сугерираат дека со подобрување на нивото на услуги – безбедно управување со вода за пиење, подобрување на санитарните услови (како што се регулирано водоснабдување, пристап до канализација со третман на отпадните води), може драматично да се подобри здравјето и да се намали бројот на смртни случаи од стомачни болести. Во Планот се наведува и дека Институтот за јавно здравје во својот Извештај од 2021 година регистрирал и неисправни примероци на вода.

„Кај поголемиот број неисправни примероци на вода, утврдена е појава на матност, отсуство на резидуален хлор и во помал обем потрошувачка на KMnO₄, што укажува на зголемено присуство на органски материи во водата за пиење“, се додава во текстот.

Спасот се гледа во изградбата на колекторскиот систем, канализациската мрежа и пречистителната станица, со што ќе се овозможи соодветно третирање на отпадните води, кои сега без никаков третман се испуштаат во реката Драгор. Но, изградбата на канализациска мрежа тапка во место поради непознати причини. Надлежните институции последно информираа дека е склучен договор за изградба на пречистителната станица, но не и за канализацијата, која е втората фаза од целокупниот проект за отпадните води во согласност со европските практики. За изградбата на канализацијата постои можност и да се изгубат веќе доделените средства од европските фондови, зашто не е потпишан договорот со фирмата изведувач на градежните работи, иако тендерот е веќе одамна завршен.

The post БИТОЛСКИТЕ ОТПАДНИ ВОДИ СЕ НЕМИЛОСРДНИ КОН РЕКАТА ДРАГОР До кога ќе се ризикува со здравјето? appeared first on plusinfo.mk.

Реката Драгор и натаму ќе служи како депонија за отпадните води на битолчани и индустријата од Пелагонискиот регион. Во оваа река со години се испуштаат фекалиите и индустриските отпадни води од Битола и околните места. На територијата на Општина Битола околу 84% од вкупното население е приклучено на канализацијата, а во градот овој процент изнесува 99. Станува збор за повеќе од 30.000 домаќинства, кои во своите комунални сметки одвојуваат средства и за одлагање на отпадните води и одржување на канализацискиот систем. Сепак, канализационата вода од градот се слева во реката Драгор на излезот од градот, а т.н. Петти канал ги собира непречистените отпадни води од индустријата, кои исто така завршуваат во реката.

За овој долгогодишен проблем на битолчани, кој може негативно да влијае преку контаминација на подземните води и земјоделското земјиште, решението се бараше во изградбата на колекторски систем, рехабилитација на канализациската мрежа и изградба на Пречистителната станица за отпадни води во Битола. Општината во својот Локален еколошки акциски план предвиде проектот да започне со изградба во 2024 година и веќе целосно да биде пуштен во употреба во 2027 година.

„Дел од идентификуваните проблеми се нецелосна покриеност на територијата на Општина Битола со систем за собирање и одведување на отпадни води, дотраеност и загуби на канализациската мрежа, недостиг на третман на отпадни комунални води, отсуство на предтретман на технолошки отпадни води при испуштање во канализацискиот систем, излевање на отпадните води по улиците при поројни дождови, заради комбинираната фекална и атмосферска канализација и неизграденоста на ободните канали околу градот за зафаќање на пороите од околните возвишенија. Се препорачува подобрување на собирањето, одведувањето и пречистувањето на отпадните води, спречување на поплавување на улиците при поројни дождови и заштита од поплави“, се истакнува во Планот.

Сепак, наместо веќе да траат градежните активности и Битола да се доближува до европските стандарди, во практика работите се одолговлекуваат. Трошка надеж дека проектот го гледа светлото на крајот од тунелот предизвика информацијата дека е склучен договор за изградба на пречистителната станица. Локалните власти, но и Министерството за животна средина, соопштија дека реализацијата на пречистителната станица започнува, а изведувачи ќе бидат четири компании здружени во конзорциум. Според властите, овој проект ќе донесе подобри санитарни услови за жителите, ќе ја заштити реката Драгор, Вардарскиот слив и подземните води и ќе обезбеди ефикасен третман на урбаните отпадни води за над 110.000 жители. Но, она што е изоставено е да се изгради канализациската мрежа. Како што информираа од Министерството, допрва ќе се склучи и договор за градежни работи за рехабилитација и надградба на канализационата мрежа во Битола, како дел од целосниот проект за одржливо урбано управување со водите. Јавната набавка со која се планираше изградбата на нова канализациска мрежа е одамна завршена, но сѐ уште не е склучен договор со избраната компанија која ќе го изведува проектот. Па така, во ваква парадоксална ситуација, можеби порано ќе се изгради пречистителната станица, која веројатно ќе фаќа прашина ако не се изгради и канализацијата преку која ќе се спроведува отпадната вода. Дополнително, се ризикува и средствата да бидат повлечени назад. Парите за канализацијата се обезбедени преку ИПА 2 програмата и на располагање можат да бидат до крајот на годинава.

„За проектот со пречистителната станица да биде целосен неопходно е напоредно да се работи и на канализациона мрежа, односно да се спроведе и Планот од Директивата за управување со отпадни води. Со него, предвидена е реконструкција на канализационата мрежа во Горно Оризари, за реконструкција на дел од канализационата мрежа во градот Битола, изградба на главни колектори од Битола до главниот прифатен колектор, изградба на пумпна станица и притисочни цевководи за село Кравари, продолжување на канализационата мрежа до Долно Оризари и изградба на пумпна станица со притисочен колектор до Пречистителната станица за отпадни води“, се наведува во Локалниот еколошки акциски план.

Предвидено е Пречистителната станица да се гради две години со уште дополнителна една година гарантен период.

The post БИТОЛЧАНИ ДОЦНАТ СО ЕКОЛОШКИОТ ПЛАН Отпадните води ги поплавија роковите appeared first on plusinfo.mk.

Градоначалничката на Град Скопје Данела Арсовска денеска повторно преку пренос во живо информира за нелегален ископ на песок и бесправна експлоатација на коритото на реката Вардар од фирма која, како што тврди, нема никаква лиценца и одобрение за работа.

Арсовска ги повика Министерството за внатрешни работи и надлежните институции да постапат, а најави и дека ќе поднесе пријава поради заканите по нејзиниот живот и животот на нејзиното семејство од страна на сопственици на фирма од Долно Коњари.

„Во општина Аеродром, затекнати при нелегални активности на бесправна експлоатација на коритото на реката Вардар, од фирма која нема никакви лиценци, елаборати, дозволи и одобренија ниту за работа, ниту за механизацијата со која ги извршуваат овие злодела против природата, а што потенцијално претставува и опасност по здравјето на граѓаните. Почитуван Министер Тошкоски, ова сметајте го и за пријава против лицето Ќамил Османовиќ и неговите соработници кои упатија пред сведоци закани по мојот живот и по животот на моето семејство, за што и формално ќе поднесам пријава до вас. Никој не им се плаши, но убаво би било да видиме дали ќе постапите бидејќи неказнивоста и непостапувањето предизвикува да мислат дека се недопирливи пред законот. За случајот се известени Министерството за животна средина и просторно планирање, МВР и сите надлежни институции“, стои во објавата на Фејсбук.

Во објавата, Арсовска посочува дека создадено е езеро од отпадни води од кое потоа се загадува реката Вардар. Пријавата, како што посочува, е од невладина организација и граѓани.

Локацијата, како што наведува во објавата, се наоѓа после мостот во Долно Лисиче, спорти Опитното поле

The post 📽️ ЕЗЕРО ОД ОТПАДНИ ВОДИ ВО АЕРОДРОМ Арсовска обвинува фирма без лиценца за загадување на Вардар appeared first on plusinfo.mk.

Подобро собирање и третирање на отпадните води, менаџирање на цврстиот отпад, отворање на граничниот премин „Маркова нога“, се само дел од активностите што ќе се реализираат во Преспанскиот регион во рамките на проектот „ЕУ4Преспа“ финасиран од Европската унија и УНДП.

Проектот, како што истакна на денешната промоција во Ресен, евроамбасадорт Дејвид Гир, а на која присуствуваа и претставник на УНДП, Армен Григориан, градоначалникот Јован Тозиевски, првиот вицепремиер и министер за животна средина и просторно планирање, Изет Меџити, и министерот за земјоделство, Цветан Трипуновски, вклучува и поддршка за локалните невладини организации и за институциите, со цел да се заштити природното и културното наследство на Преспа.

– Комбинацијата на ефекти од глобалното затоплување и човечката активност има драматичен удел врз нивото на водата на Преспанското Езеро, а следствено на тоа и на опкружувањето кое живее тука. Време е за акција да се обидеме да го свртиме овој тренд. Сите чинители во Северна Македонија, Албанија и Грција, националните и локалните власти, граѓанското опоштество, бизнис заедницата и меѓународната заедница треба заедно да работат да ја постигнат истата цел, а тоа е зачувување на ова извонредно место и зачувување на егзистенцијата на луѓето што живеат тука – рече Гир.

Со спроведување на активностите, нагласи, ќе се изгради одржлива иднина за Преспа.

– Успехот зависи од силната политичка посветеност од централната и од локалната власт вклучувајќи инвестиции и од државниот буџет. Крајно време е да се заживее ова – истакна Гир, повикувајќи ги сите релевантни партнери да се ангажираат во интерес на целиот Преспански регион.

Вкупната вредност на програмата е 21,5 милиони евра, од кои 18 милиони евра се обезбедени од Европската Унија, кои, според Гир, ќе овозможат зазеленување на бизнисите на локалните земјоделци и на туристичките провајдери и да ги креираат своите работни места.

Преспанското Езеро, како што нагласи претставникот на УНДП, Армен Григориан, е дом на над 2.000 различни видови кои се под закана поради сите негативни влијанија, затоа се потребни големи напори да се заштити езерото.

– Се надеваме, како дел од проектот, дека ќе успееме да го возобновивме и зачуваме биодиверзитетот на едно од најстарите слатководни езера во светот, кое е во опасност поради негативните влијанија, неодржливите земјоделски практики, климатксите промени, загадувањето и испуштањето на отпад и нетретиран отпад – рече Григориан.

Реализацијата на предвидените активности, како што посочи, ќе ја зајакнат заштитата на биоразновидноста во Преспанското Езеро и ќе ги унапредат заложбите за одржливо земјоделство и туризам истовремено работејќи на поголеми инфраструктурни интервенции во однос на отпадните води и управувањето со отпадот.

Проектот ЕУ за Преспа ќе се спроведе во партнерство со министерствата за животна средина и просторно планирање, земјоделство, шумарство и водостопанство и за европски прашања на Северна Македонија, како и локалната самоуправа во Ресен.

– Единствено заеднички можеме да ги оствариме најдобрите можни исходи и долгорочни добри резултати во однос на екологијата и на економијата. Проектот ќе помогне заедно да се справиме со загадувањето на водата и на почвата, а ќе се зголеми и заштитата на сите видови кои се во опасност во Преспанското Езеро – подвлече Григориан.

Посочи дека ќе се работи и на промоција на одржлив туризам обезбедувајќи директна финансиска поддршка за проекти за зголемување или за подобрување на капацитетите за
сместување, набљудувње на птици, и различни прошетки низ регионот, изградба на патишта и велосипедси патеки за да може да се ужива во убавините на Преспа, во нејзината богата култура и историја, истовремено одржувајќи постојан фокус на заштитата на животната средина.

За првиот вицепремиер и министер за животна средина и просторно планирање, Меџити, реализацијата на активностите од проектот, кој забележа дека е колку четири годишни буџети на Општина Ресен, ќе придонесат за подобрување на туризмот и на земјодлестото во Преспа, кои, како што нагласи, се двата главни столба.

– Се надевам дека ќе го запреме бегањето на младите и ќе работиме исцрпно да ја интегрираме Македонија во Европа, а не граѓаните во Европа – истакна Меџити.

Министерот за земјоделство, Трипуновски, појасни дека во делот на производството на јаболка ќе се применуваат добри земјоделски практики и имплементација на агроеколошки мерки, ќе се направи надградба на системот за рано предупредување за заштита на растенијата и оптимизација на наводнувањето, со цел рентабилно земјоделско производство, како и воведување органско производство со цел конкурентност на пазарите.

– Убеден сум дека заедно со градоначалникот ќе ја постигнеме целата Преспа да биде повторно одржлива и земјоделците од регионот повторно да имаат одржлив равој и просперитет во наредниот период – рече Трифуновски.

Градоначалникот Тозиевски изрази благодарност што денеска може да се видат првите плодови од проектот „ЕУ за Преспа“, кој е еден од најзначајните за развој на регионот Преспа.

– Очекуваме во наредниот период, заеднички со надлежните министерства УНДП и ЕУ, да ги реализираме и останатите компоненти од програмата „ЕУ за Преспа“. Да ја вратиме Преспа како најголем бисер во нашата држава, а бенефитот пред сѐ да биде најголем за граѓаните на Преспа, но и за сите жители на Македонија и регионот – истакна Тозиевски.

Преспанскиот регион веќе е корисник на програмата „ЕУ4Преспа“ преку четири грантови доделени на локални граѓански организации и два договори за придонес потпишани со УНДП. Дополнително, 7,7 милиони евра финансиски средства од ЕУ во рамките на програмата за прекугранична соработка меѓу Грција и Северна Македонија се на располагање за повторно отворање на граничниот премин „Маркова нога“.

The post ДА ГО ЗАЧУВАМЕ ПРЕСПАНСКОТО ЕЗЕРО Што сѐ опфаќа проектот „ЕУ4Преспа“? appeared first on plusinfo.mk.

Отпадните води од домаќинствата и индустријата создаваат огромен притисок врз животната средина. Во нашата држава постојат пречистителни станици што воопшто не функционираат, а постојат и такви кои работат неефикасно. Во моментот имаме дури 17 нефункционални станици! Итно се потребни нови пречистителни станици за најмалку 34 населени места кои немаат или за кои воопшто не е предвидена изградба на системи за собирање и третман на отпадни води. Ова е проблем кој сериозно влијае на квалитетот на живот, здравјето и животната средина, но доколку не се реши итно, ќе има трајни и големи негативни последици врз животот на населението и развојот на општеството во иднина.

Главната причина за овие проблеми е претпоставувате, недостигот на средства за инвестиции. Државата не предвидува такви средства ниту на државно, ниту на локално ниво. Но, на располагање стојат средства од околу половина милијарда евра за нови пречистителни станици од меѓународни фондови и ЕУ, доволни за неколку сериозно модерни пречистителни станици со голем капацитет. Се поставува логичното прашање – како да стигнеме до овие средства?

Првиот проблем со кој се соочуваат општините и јавните претпријатија е недостигот на стручни лица кои знаат да подготват проектна документација и апликации, како и да го водат процесот од идеја до изградба и ефикасно управување со процесите во пречистителните станици. Со други зборови, решението постои, но недостасува интерес и знаење. Доколку јавноста не биде гласна и не побара решение, локалните власти и јавните претпријатија ќе останат неми на овој повик за решение.

Како една од ретките можности за излегување од оваа крајно неповолна ситуација е програмата за пречистителни станици на RCDN (регионална мрежа на асоцијации од Западен Балкан поддржана од Германската агенција за интернационална соработка) и поддржана од SECO (Швајцарска агенција за развој и соработка), која спроведува обуки за трите најважни сегменти од овој проблем:

1. Oбука за градоначалниците, министерствата, директорите на јавните претпријатија да носат одговорни одлуки (бидејќи пречистителните станици се голема инвестиција со која не смеат да се прават никакви експерименти и импровизации);

2. Oбука за инженери и менаџери за тоа што сѐ е потребно и како да започнат со подготовки, пишување на проект и апликација и управување со тимовите во процесот на изработка на документацијата, и

3. Обука за персоналот во постоечките станици за надградба на знаења и вештини и зголемување на ефикасноста на работењето на станиците и нивното одржување, како и намалување на трошоците за третман на отпадните води.

Од тимот на RCDN споделуваат дека не е целта само да се изградат пречистителни станици, туку да се зголеми ефективноста и ефикасноста кај сите засегнати страни.

– Одржувањето повлекува трошоци, а во моменти на кризи како сега, јавните институции одлучуваат во целост да ги исклучат пречистителните станици со цел заштеда на енергија. Наместо тоа да резултира со фрапантно загадување на животната средина поради испуштање необработен отпад, постои алтернатива за попаметно користење на станиците преку која истите ќе трошат знаително помалку енергија, а отпадните води ќе бидат чисти и нема да бидат штетни за околината – велат од RCDN.

Одговорноста за здрава и чиста животна средина е на секој од нас. Поголема свесност за користење на природните ресурси ќе придонесе кон нивно зачувување и долгорочно користење. Мора да реагираме на ова веднаш! Времето истекува…

The post ВО МОМЕНТОВ ИМАМЕ ДУРИ 17 НЕФУНКЦИОНАЛНИ СТАНИЦИ! Пречистување на отпадни води – зошто и како? (ВИДЕО) appeared first on plusinfo.mk.

Владата усвоила одлука за спроведување постапка за јавна набавка за регулирање на одводниот канал во оваа општина.

„Исклучително важна инвестиција во вредност од околу 66 милиони денари во служба на квалитетниот живот на жителите на Арачиново“, објави министерот за политички систем.

Владата на денешната седница, по предлог на министерот за животна средина и просторно планирање Насер Нуредини, ги усвои Информацијата за повеќегодишната јавна набавка за финансирање на активностите за изградба на фекална канализација во населеното место Страчинце, Општина Гази Баба, Информацијата за финансирање на активностите на Проектот – Регулација на дел од Ободен канал во населено место Арачиново, Општина Арачиново, како и Информацијата за финансирање на активности за реконструкција на системот за водоснабдување Богданци.

Овие проекти се дел од инвестициската програма на Министерството за животна средина и просторно планирање (МЖСПП), во делот за финансирање проекти за водоснабдување и изградба на примарна и секундарна канализација и се во согласност со стратешките приоритети на МЖСПП за развивање современа и функционална водоводна инфраструктура, заштита на животната средина и подигање на степенот на социјален развој и квалитет на живот во сите општини во нашата држава.

Покрај тоа, прифатено е барањето на Министерството за земјоделство за надомест на штета на земјоделците од поплавите во 2016, 2017 и 2018 година во вкупен износ од 10% од претрпената штета.

„За брзо време ќе започне и процесот на исплата на предвидените средствa“, додава Груби.

The post 1,1 МИЛИОНИ ЕВРА ЗА КАНАЛОТ ВО АРАЧИНОВО Груби се пофали дека конечно ќе се санира изливот на отпадните води appeared first on plusinfo.mk.

Европската комисија објави упатства за безбедно користење на пречистените урбани отпадни води за наводнување на земјоделско земјиште, поради екстремните суши со кои се соочува голем дел од Европа ова лето.

„Со неколку земји-членки сè повеќе погодени од суши, повторната употреба на водата од пречистителни станици за урбани отпадни води може да стане клучна алатка за обезбедување дополнителен безбеден и предвидлив извор на вода, истовремено зголемувајќи ја способноста на ЕУ да се прилагоди на климатските промени“, соопшти Европската комисија.

Европскиот комесар за животна средина, океани и рибарство Вирџинијус Синкевичиус рече дека ресурсите на свежата вода се оскудни и се повеќе загрозени и дека насоките на Комисијата можат да придонесат за безбедна циркулација на прехранбени производи кои се одгледуваат со искористена вода низ ЕУ.

-Во време на невидено високи температури, мора да престанеме да трошиме вода и да го користиме овој ресурс поефикасно со цел да се прилагодиме на климатските промени и да обезбедиме сигурност и одржливост на нашето земјоделско снабдување – рече Синкевичиус.

Екстремните суши предизвикани од климатските промени ги зголемуваат стравувањата дека ќе ги загрозат приносите на земјоделските култури, ќе ги попречат условите за производство и ќе ги зголемат цените на храната.

Рекордни суши беа забележани во Франција и делови од Англија во јули.

The post СУШАТА JA ВРАЌА ОТПАДНATA ВОДA НА НИВИТЕ Европската комисија објави упатство за штедење на вода appeared first on plusinfo.mk.

Во просториите на ЈП „Водовод и канализација“ – Скопје, денеска беа отворени тендерските понуди за дизајн и изградба на оваа пречистителна станица на која присуствуваа градоначалничката на Град Скопје, Данела Арсовска, директорот на ЈП „Водовод и канализација“, Златко Перински и претставници на Европската делегација, Европската банка за обнова и развој (ЕБОР), Европската инвестициона банка (ЕИБ) и Инвестиционата рамка за Западен Балкан (ВБИФ) – ИФИ Канцеларијата за координација (ИФИЦО).

Градоначалничката Арсовска истакна дека изградбата на оваа пречистителна станица е „најголем еколошко-капитален проект за Скопје и скопјани“, додавајќи дека на овој начин конечно ќе се овозможи третман на урбаните отпадни води согласно ЕУ стандардите.

– Со изградба на оваа пречистителната станица за третман на отпадни води, Скопје конечно има можност да се развива во еколошка метропола која се грижи за животната средина и се грижи за скопјани. Ако досега отпадните води одеа директно во Вардар, притоа свесно загадувајќи ја животната средина и јавното здравје, сега конечно ќе имаме можност активно да делуваме, да ги менуваме работите и да ставиме крај на загадувањето на реката Вардар, на градот, но пред сѐ дa обезбедиме подобра вода за пиење на населението и да го подобриме квалитетот на живот на скопјани – рече Арсовска.

На настанот се обрати и претставникот на Европската инвестициона банка (ЕИБ) Алесандро Брагонзи кој истакна дека овој проект е од огромно значење за жителите и за Градот Скопје. Брагонзи посочи дека од голема важност е што проектот се одвива непречено и со одлично темпо и додаде дека со финализација на овој проект ќе се реши проблемот со отпадните води, ќе се зачува животната средина и граѓаните на Скопје ќе имаат почиста вода.

Директорот на ЈП „Водовод и канализација“, Златко Перински во своето обраќање ги презентираше постапките на реализација на овој значаен еколошко-капитален проект, осврнувајќи се на важноста на изградбата на пречистителната станица, за која вели дека ќе овозможи Скопје да има над 90 отсто прочистени води.

– Иницијативата за ваков тип на проект со кој што конечно ќе се воведе еколошки систем за прочистување на водите во Скопје е уште од 2007 година, повторно актуелизирајќи го ова прашање во април 2017 година, со изработка на Студија за финансирање, градење и работење постројка за третман на отпадни води за главниот град Скопје – Уникатен документ Студија за изводливост, како надградба на претходната Физибилити студија. По долг процес на консултации, изработка на техничка документација и активен ангажман на цел тим професионални во оваа област, денеска можеме конечно да најавиме дека сме во фаза пред отпочнување на изградбата на пречистителна станица за отпадни води во Скопје. Со овој проект инвестираме во Скопје, за нашите сограѓани, но креираме и подобра иднина за идните генерации – истакна Перински.

Перински се заблагодари на Европската банка за обнова и развој, Европската инвестициона банка и Инвестиционата рамка за Западен Балкан за финансиската поддршка за реализација на овој проект, додавајќи дека изградбата на пречистителната станица ќе започне годинава.

Пречистителната станица за отпадни води – Скопје ќе се простира на површина од 13 хектари, во општина Гази Баба, на левиот брег на реката Вардар, во реонот на Трубарево и ќе биде со капацитет од еквивалент на 500.000 жители.

The post СКОПЈЕ ЌЕ ДОБИЕ ПРЕЧИСТИТЕЛНА СТАНИЦА Ќе се решава проблемот со 90 отсто од отпадните води appeared first on plusinfo.mk.

Иако македонската влада вети дека до крајот на годината ќе почнат да се градат пречистителни станици за отпадни води во Тетово и во Битола, а во Скопје до првата половина на 2022 година, уште нема ни трага ни глас од ваквиот капитален проект. Меѓудругото, од нашиот пристап кон пречистувањето на урбаните води ќе зависи и нашиот пат кон ЕУ – која бара ваков тип на реформи во процесот на интеграција во Унијата.

Од соседите, Албанија им обезбедила на 33,6 отсто од своите граѓани пристап до пречистена отпадна вода во нивното место, Хрватска на 36,9 отсто, а Бугарија изненадува со нејзиниот скок од 36,1 на 63,7 отсто во периодот од 2000 до 2018 година, земајќи го предвид фактот, дека во 2008 таа стана членка на ЕУ и мораше да имплементира посериозни чекори во насока на пречистување.

Во ЕУ-земјите се пречистуваат речиси 100 отсто од отпадните води пред да влезат во поголема река, езеро или море. Тоа не треба да нè чуди, бидејќи уште во 1991 година ЕУ ја донесе Директивата за урбани отпадни води (91/271 ЕЕС).

Со оваа директива, на земјите-членки на ЕУ им се наложи до 2000 година да изградат станици за пречистување на отпадните води за сите населени места кои имаат 15.000 или повеќе жители.

The post Македонија најматна во Европа по пречистување на водите appeared first on plusinfo.mk.