Градоначалникот на Општина Центар, Горан Герасимовски, утрово излезе на терен заедно со општинските хигиеничари и затекна контејнери опколени со купишта ѓубре. Од лицe место тој испрати остар апел до Јавното претпријатие „Комунална хигиена“ редовно да го собира отпадот и да ја исполнува својата законска обврска.

– Вака Комунална хигиена си ја завршува својата работа. Како изминативе години, така и денеска, центарци се будат во ѓубре. Нашите хигиеничари се постојано на терен и го расчистуваат она што Јавното претпријатие не го прави. И по овој апел, сигурен сум дека повторно ќе слушнеме демант дека си ги завршуваат обврските навремено – изјави Герасимовски.

За време на утринската акција, екипите на ПОЦ го исчистија просторот околу контејнерите, а градоначалникот најави дека Општина Центар ќе продолжи да работи во интерес на своите жители, иако дел од работите не се во нивна надлежност.

– Нашите 120 хигиеничари секојдневно се на терен и ја завршуваат работата за која граѓаните плаќаат на Јавното претпријатие. Продолжуваме со чистење, но и со тоа што го ветивме, нова опрема. Во наредниот период ќе бидат набавени две цистерни за миење улици, нови метларки и дополнителен камион. Верувам дека после толку апели, конечно ќе се свестат и дека вакви слики со ѓубре нема да има на улиците на Центар – додаде градоначалникот.

The post 📽️ ГРАЃАНИТЕ ПЛАЌААТ, А ЃУБРЕТО ОСТАНУВА Герасимовски затекна купишта смет кај контејнерите appeared first on plusinfo.mk.