Граѓаните кои ги исполниле старосните услови за пензионирање, но им недостасуваат до 2 години работен стаж за законскиот минимум од 15 години, ќе можат сами да ги уплатат придонесите за овој период и да остварат право на пензија – изјави  министерот за социјална политика, демографија и млади Ѓоко Велковски во гостување во „360 степени“ на МРТ 1.

Законското решение е во владина процедура.

Право на откуп на стаж ќе имаат само оние лица кои имаат остварено минимум 13 години работен стаж, а веќе не се активни осигуреници на пазарот на трудот. Можноста ќе биде достапна за жени на возраст од над 62 и за мажи над 64 години. Тие ќе имаат обврска да го платат само придонесот за пензиско осигурување кој сега изнесува 19,9%.

-Откуп на стаж се однесува и ќе се однесува само на оние коишто веќе не се денеска осигуреници, наполниле 62 години з жени и 64 години за мажи ќе имаат право тие коишто имаат до 13 години работен стаж којшто го направиле во моментот кога ги наполниле годините на старост, значи 24 месеци да го откупат својот стаж, односно да платат за истиот – објасни Велковски.

Овие граѓани ќе треба да го подмират пензиското осигурување, а основицата за пресметка нема да биде цела, туку половина од просечната плата и тоа за претходната година.

-Значи од годината кога заминал, односно 2025 година во случајов ќе треба на таа плата придонес да се плати.  Зависно кој колку месеци му останале да замине во пензија, ќе има одредена сума којашто треба да ја уплатат самите граѓани, а потоа ќе ја добијат пензијата пресметана согласно законот- појасни Велковски.

Во практика тоа ќе изгледа вака: доколку станува збор за година во која просечната плата изнесувала 45 000 денари нето, придонесот од 19,9%о ќе се пресметува на 22 500 денари помножен по бројот на месеци што им недостигаат (а најмногу 24 месеци).

Или со стапката за пензиско осигурување од 19,9%, еден месец стаж би чинел околу 4.478 денари. За докуп на 12 месеци ќе бидат потребни околу 53.730 денари, додека максималните 24 месеци би чинеле околу 107.460 денари.

Откако ќе се изврши уплатата за стажот што недостасува, висината на пензијата ќе се утврдува според стандардната законска формула, односно врз основа на примањата кои осигуреникот ги имал во текот на годините кога бил работно ангажиран.

-Зависно колку имале во 13-те години, формулата која ќе произлезе – значи од 13 години колку штедел, на каква плата бил пријавен итн., ќе се покаже самата формула дополнително. Така што, ако бил на минимална, тогаш ќе има некои од минималните категории, нели коишто се 9 вкупно во системот. Ако земале, односно биле пријавени на повисока плата, така ќе се засмета – вели Велковки.

The post ЌЕ МОЖЕ ДА СЕ ОТКУПАТ ДО ДВЕ ГОДИНИ РАБОТЕН СТАЖ ЗА ПЕНЗИЈА Кои се условите за тоа? appeared first on plusinfo.mk.