Поранешниот функционер на СДСМ, екс-градоначалникот на Скопје Петре Шилегов, во гостување на „Тема на денот“ на Сител рече дека оваа опозициска партија „кадровски се испразнила“ и најави дека наскоро, како што рече, поголема група социјалдемократи ќе побара оставка од актуелното раководство.

– Ќе се обидеме да дојдеме до здрава политичка логика и да ги замолиме луѓето што ја раководат партијата, повеќе да не го прават тоа. Да дојдат некои други да ја раководат партијата – рече Шилегов.

Тој додаде дека тоа ќе биде „процес“ воден од луѓе кои политички израснале во СДСМ. Смета дека слабиот СДСМ ги тера критички настроените граѓани да ја бараат опозицијата во Левица.

– Кај граѓаните опозициското чувство е високо, но кај вака организиран СДСМ – безличен и без можност да привлече нови гласови, треба да се бара поинаков пристап – вели поранешниот градоначалник на Скопје.

The post „ЌЕ ГИ ЗАМОЛИМЕ ЛУЃЕТО ШТО РАКОВОДАТ СО СДСМ ПОВЕЌЕ ДА НЕ ГО ПРАВАТ ТОА“ Петре Шилегов најавува иницијатива на поголема група социјалдемократи appeared first on plusinfo.mk.

Директорот за комуникации на британскиот премиер Кир Стармер, Тим Ален, поднесе оставка,

поради скандалозната врска меѓу Џефри Епстин и поранешниот британски амбасадор во САД, Питер Манделсон, објавија светските агенции.

Ова се смета за уште еден удар врз раководството на лабуристичката влада во Лондон, предводена од премиерот Стармер, откако пред несели 24 часа оставката поднесе и шефот на неговиот кабинет Морган Мек Свини.

МекСвини поднесе оставка поради неговата улога во назначувањето на Питер Манделсон за амбасадор во САД, и покрај јавните врски меѓу Џефри Епстин и Манделсон.

Ален, кој ја извршуваше функцијата околу пет месеци, им посака успех на премиерот и на неговиот тим.

„Одлучив да се повлечам за да се овозможи формирање нов тим на Даунинг стрит 10“, рече Ален во кратка изјава.

Во исто време, портпаролот на Стармер посочи дека премиерот нема намера да поднесе оставка од својата функција и е посветен на својата работа за донесување промени во земјата.

Стармер, исто така, треба да се сретне со пратениците на лабуристите подоцна вечерва, поради растечкиот притисок врз него од страна на партијата.

The post ПОРАДИ ЕПСТИН УШТЕ ЕДНА ОСТАВКА ВО БРИТАНСКАТА ВЛАДА Се осипува кабинетот на Кир Стармер appeared first on plusinfo.mk.

Се појавија фотки од преписката меѓу љубовниците во секс-скандалот кој го тресе државниот врв во Црна Гора. Освен експлицитните видеа на кои се гледа поранешната државна секретарка во Министерството за човекови и малцински права, Мирјана Пајковиќ, на дел од материјалите се гледа и непознат маж.

„Јас не те одбив“, „Да не те видат моите очи“, „Сама си ја заврши кариерата, те мислев за поинтелигентна“, „Ќе дојдеш за нешто, кога-тогаш“, гласат дел од пораките.

Нејасно е дали љубовникот на снимките е поран Дејан Вукшиќ, поранешниот шеф на црногорската Служба за национална безбедност АНБ и екс-советник на претседателот Јаков Милатовиќ. Вукшиќ поднесе оставка во ист период со Пајковиќ и си разменија кривични пријави. Нејасно е и кој ги дистрибуирал фотографиите и видеата од мобилниот телефон на Вукшиќ, кои за кратко време станаа вирални на интернет.

@joksim♬ original sound – POGANI

Во интервју за веб-телевизијата „Дана“, Пајковиќ изјави дека откако таа одбила да ги исполни неговите барања, Вукшиќ отворено ѝ се заканил со компромитирачки материјал, губење на професионалниот интегритет и личната безбедност.

Таа тврди дека заканите ги сметала за особено сериозни, со оглед на тоа што доаѓале од лице кое во тој момент имало значителна моќ и влијание во државниот безбедносен апарат. Таа особено го критикуваше недостатокот на реакција од државните органи, нагласувајќи дека ниту обвинителството ниту кабинетот на претседателот на Црна Гора Јаков Милатовиќ не одговориле навремено на нејзините извештаи.

Според неа, претседателот Милатовиќ бил запознаен со кривичните пријави и наводите за однесувањето на неговиот советник од црногорското АНБ, Вукшиќ, но конкретна реакција следела дури откако медиумите поинтензивно се вклучиле во следењето на случајот.

Таа верува дека нејзиниот случај покажува дека законот во пракса не е еднаков за сите и дека жените во Црна Гора немаат соодветна институционална заштита.

Пајковиќ наведува дека заканите не биле упатени само кон неа, туку индиректно и кон нејзиното семејство, што дополнително ја зголемило сериозноста на ситуацијата. Таа тврди дека за сè навремено ги информирала надлежните институции, но дека реакцијата изостанала или била задоцнета. Според неа, дел од пријавите завршиле без конкретен епилог, сè додека аферата не излезе во јавноста преку медиумите.

Од другата страна, Вукшиќ ги негира обвинувањата за уцени и закани. Тој тврди дека нема никаква поврзаност со создавањето или дистрибуцијата на експлицитните снимки и дека неговиот мобилен телефон бил украден и подоцна злоупотребен.

Ова тврдење е дел од кривичната постапка што моментално ја разгледува Основното државно обвинителство во Подгорица.

Обвинителството потврди дека се водат одделни предмети по пријавите на Пајковиќ, како и по наводите што ги изнесе Вукшиќ. Засега не се соопштува дали истрагата е проширена и кон трето лице, но институциите најавуваат дека ќе ги проверат сите околности околу протекувањето на материјалите.

Ѓорѓе Савовиќ, уредник на ТВ Адрија Монтенегро, смета дека постојат индикации дека Вукшиќ е вклучен во скандалот. Тој вели дека секс-скандалот го одвлекува вниманието на јавноста додека Црна Гора има проблеми .

– Овој случај фрла сенка, што е контрадикторно, врз фактот дека Црна Гора има поголеми проблеми и клучни политички прашања со кои треба да се соочи. Во четврток имаме владина седница бидејќи прашањето е дали ќе продолжи да преживува, имаме преговори со ЕУ, имаме проблем со криминални кланови, корупција и криминал, немаме доволно судии и имаме селективен пристап кон обвинителството. Имаме недостаток на лекови, транспортерите ги блокираа сите премини во Црна Гора и постои закана од недостаток на храна и гориво. Сепак, оваа тема е доминантна – вели Савовиќ

The post 📷 ПРЕПИСКА МЕЃУ ЉУБОВНИЦИТЕ ОТКРИВА ДЕТАЛИ ЗА СЕКС-СКАНДАЛОТ ВО ЦРНА ГОРА Државната секретарка раскажа како ѝ се заканувале appeared first on plusinfo.mk.

На денешната седница на Извршниот одбор на СДСМ, на предлог на претседателот д-р Венко Филипче, заменик претседателката, потпретседателите, генералниот секретар, организациските секретари, како и сите членови на Извршниот одбор поднесоа оставки, објави партијата.

„Оставките се поднесени до Централниот одбор на партијата и до претседателот Филипче, кој го води процесот на внатрешни реформи во СДСМ.

Со овој одговорен и морален чекор раководството на СДСМ отвори простор за ново поглавје.

Следува период на кадровско освежување и зајакнување, вклучување и на нови лица, организациска поставеност, внатрешна мобилизација, за нова сила и нова енергија на СДСМ.

На една од наредните седници на Централниот одбор, претседателот Филипче ќе предложи избор за членови за органите на партијата, а за функциите ќе се бираат најкомпетентни личности“ – се вели во соопштението на партијата.

Претходно, во настап на ТВ Телма претседателот на партијата објави дека има намера да предложи распуштање на Извршниот одбор на партијата.

ФИЛИПЧЕ БАРА РАСПУШТАЊЕ НА ЦЕЛИОТ ИЗВРШЕН ОДБОР НА СДСМ Таму го гледа изворот на проблемите во партијата

The post УШТЕ ФИЛИПЧЕ ЗБОРОТ НЕ ДОРЕЧЕ… Сите членови на ИО на СДСМ си дадоа оставки appeared first on plusinfo.mk.

Во сенка на руската инвазија, Украина е погодена од сериозен корупциски скандал што натера двајца министри да поднесат оставка и го принуди претседателот Володимир Зеленски да преземе вонредни мерки против еден од своите блиски соработници.

Станува збор за афера што открива проневера тешка околу 100 милиони долари во енергетскиот сектор — еден од најчувствителните системи на земјата во услови на војна. Случајот се оценува како една од најтешките политички кризи со кои се соочил Зеленски од почетокот на руската агресија во 2022 година.

Скандалот ескалираше во понеделникот, кога Националното антикорупциско биро на Украина (NABU) соопшти дека спровело повеќе од 70 претреси во рамките на долго подготвувана истрага под кодното име „Операција Мидас“. Истражителите откриле криминална шема за систематско извлекување пари од државната нуклеарна компанија „Енергоатом“, со која подизведувачи биле принудувани да плаќаат 10 до 15 проценти мито од вредноста на договорите за да не им бидат блокирани исплатите и да го задржат статусот на доверливи партнери.

Досега се уапсени петмина осомничени, меѓу кои поранешен советник во Министерството за енергетика и висок кадар во „Енергоатом“. Истрагата открила дека во компанијата била воспоставена паралелна, неформална структура на одлучување со т.н. „раководители во сенка“, кои во суштина решавале за распределбата на партие и за склучувањето договори.

Најголемата пресвртница настапи кога беше откриено името на лицето што се смета за организатор на шемата – 46-годишниот бизнисмен Тимур Миндич, долгогодишен соработник и пријател на Зеленски и ко-сопственик на продуцентската куќа „Квартал 95“. Според истражителите, Миндич во комуникацијата користел кодно име „Карлсон“ и лично го контролирал перењето и распределбата на парите. Тој ја побегна од Украина непосредно пред да започнат претресите, и најверојатно заминал во Израел.

Миндич е осомничен и дека вршел притисок врз високи владини функционери, меѓу кои и врз поранешниот министер за одбрана Рустем Умеров, кој сега е секретар на Советот за национална безбедност. Од Кабинетот на претседателот за Франс прес изјавиле дека Зеленски бил „изненаден“ од обвинувањата против неговиот поранешен партнер и дека целосно ја поддржува истрагата.

Под притисок на се поголемото незадоволство на јавноста, Зеленски побара оставки од министерот за правда Герман Галушченко и од министерката за енергетика Свитлана Гринчук. Двајцата поднесоа оставки во средата. Галушченко — кој претходно го водеше токму Министерството за енергетика — се соочува со обвинувања дека добивал лични бенефиции, а Гринчук засега не е директно инкриминирана, но важи за негова блиска соработничка.

Иако Европската Унија сè уште нема упатено официјална реакција, Фридрих Мерц, канцеларот на Германија, земја сојузник на Киев што обезбедува значаен дел од европската финансиска поддршка, јавно побара Зеленски „енергично да ја искорени корупцијата“.

Корупцијата останува еден од најтешките системски проблеми во Украина, иако земјата во последната деценија направи забележлив напредок. Од 2022 година наваму беа откриени неколку скандали: оставката на министерот за одбрана Олексиј Резников поради злоупотреби при набавка на униформи и храна; апсења поврзани со набавка на дефектна муниција; како и сериозни неправилности во системот за мобилизација, поради кои Зеленски во 2023 година ги разреши сите регионални раководители задолжени за регрутирање.

Односите меѓу претседателството и антикорупциските институции периодично се влошуваат. Летово властите се обидоа да го ограничат нивниот степен на независност, но се повлекоа по силни реакции од граѓанските организации и од западните партнери.

Според Индексот за перцепција на корупцијата на „Транспаренси интернешнел“ за 2024 година, Украина се наоѓа на 105. место од вкупно 180 држави — значително подобро од 2014 година, кога беше на 144. место, но сè уште е далеку од европските стандарди.

Западните критики кон Украина најконкретно ги изрази вчера шефот на полската дипломатија, Радослав Сикорски, кој предупреди дека за Украина „најбрзиот начин да ја изгуби поддршката од Западот е толерирање на корупцијата“.

– Доколку Украина толерира корупција, тогаш нема да влезе во Европската унија. ЕУ бара чесност и почитување на правилата. Клучно ќе биде како ќе реагираат украинските власти – рече Сикорски, додавајќи дека засега се чини дека истите реагирале „доста добро, бидејќи веднаш имало оставки и апсења“.

The post ДАЛИ АФЕРАТА ЌЕ СТАСА И ДО ЗЕЛЕНСКИ? Што се знае досега за големиот корупциски скандал што ја тресе Украина appeared first on plusinfo.mk.

Украинската премиерка Јулија Свириденко го суспендираше министерот за правда Герман Галушченко по обемната истрага за корупција во енергетскиот сектор што се води во земјата.

Антикорупциските агенции ја засилија истрагата за голема шема за подмитување и перење пари од 100 милиони долари, во која се вмешани високи функционери од енергетскиот сектор. Украинските власти досега обвинија седум лица за овој случај.

Галушченко, кој порано беше министер за енергетика, рече дека целосно се согласува со одлуката за негова суспензија. Медиумите објавија дека тој имал лична корист од криминалната шема.

Националното биро за борба против корупција (НАБУ) и Специјалното обвинителство за борба против корупција соопштија дека е вмешан и поранешен вицепремиер идентификуван по прекарот Че Гевара, со кого се поврзуваат незаконски трансфери на пари во вредност од над 1,2 милиони долари.

Претходно беше објавено дека шемата била раководена од Тимур Миндич, бизнисмен и соработник на претседателот Володимир Зеленски. Миндич наводно избегал во странство неколку часа пред истражителите да дојдат во неговиот дом во Киев. Миндич е косопственик на „Квартал 95“, продукциската компанија што Зеленски ја основал пред да стане претседател.

Според НАБУ, неколку лица формирале криминална банда и изградиле голема корупциска шема за да влијаат врз стратешките претпријатија од јавниот сектор, особено врз државниот оператор за нуклеарна енергија „Енергоатом“.

Корупцискиот скандал што изби во Украина го коментираше и портпаролот на Кремљ, Дмитриј Песков.

– Веруваме дека европските престолнини го забележаа ова, како и САД. На крајот на краиштата, ова се земјите кои се толку активни донатори на режимот во Киев. Овие земји, се разбира, сè повеќе почнуваат да разбираат дека значителен дел од парите што ги земаат од своите даночни обврзници се проневерени од режимот во Киев. Тоа е апсолутно очигледно. Сè повеќе луѓе го разбираат ова – изјави Песков пред новинарите.

The post КОРУПЦИСКИ СКАНДАЛ ТЕЖОК 100 МИЛИОНИ ДОЛАРИ ЈА ТРЕСЕ УКРАИНА! Паѓаат министри, се апсат функционери, Кремљ ликува appeared first on plusinfo.mk.

Британската јавна телевизија ја тресе скандал по откритието дека нејзината емисија „Панорама“ го монтирала говорот на американскиот претседател Доналд Трамп на начин што сугерирал дека тој директно ги поттикнал немирите на Капитол Хил во јануари 2021 година,.

Тим Дејви, генерален директор на Би-би-си, и Дебора Тарнес, извршна директорка на Би-би-Си Њуз, си заминаа по серија жестоки критики за уреднички пропусти со материјалот, јави самиот Би-Би-Си давајќи детали за нивното заминување.

– Би-би-си генерално работи добро, но направени се неколку грешки и како генерален директор ја преземам целосната одговорност – изјави Дејви.

Од управниот одбор соопштија дека ја почитуваат неговата одлука и дека институцијата ќе спроведе внатрешна ревизија на сите документарни продукции.

BREAKING: BBC Director Tim Davie & News CEO Deborah Turness have RESIGNED following backlash from the BC’s Donald Trump Documentary where they edited his January 6th, 2021 speech at the Capitol to make it look like he called on the people to “fight like hell”. pic.twitter.com/68PGHr1aVj

— Jack Danger (@JackDangerLIVE) November 9, 2025

„Сериозни обвинувања“ и притисок

Скандалот ескалирал по објавата на „Телеграф“ кој открил протечен внатрешен меморандум од поранешниот советник на комисијата за уреднички стандарди, Мајкл Прескот. Тој предупредил дека продукциската куќа „Октобер филмс“, која го снимала документарецот „Трамп: Втора шанса?“, споила два дела од говорот на Трамп за да создаде впечаток на повик за насилство.

Министерката за култура Лиза Нанди изјави дека „обвинувањата се сериозни и мора да се расчистат“, нагласувајќи дека во јавноста расте сомнеж дека „во известувањето на Би-би-си постои системска пристрасност“.

Емоционална оставка на Тарнес

– Ја донесов тешката одлука дека повеќе не е моја улога да ве водам во заедничката визија – рече Дебора Тарнес во своето соопштение. – Контроверзијата околу документарецот достигна точка што ѝ штети на Би-би-си, институција која ја сакам.

Таа додаде дека „грешки се направени“, но ги оцени тврдењата за институционална пристрасност како „погрешни и неправедни“.

Од „Тефлон Тим“ до пад од врвот

Тим Дејви, на чело на корпорацијата од 2020 година, преживеал бројни кризи – од случајот со Гери Линекер до контроверзите околу извештаите за Газа. Но, овојпат не успеал да ја избегне одговорноста.

– Овој пат не можев да ја задржам довербата на јавноста – изјави тој, додавајќи дека ќе соработува во процесот на транзиција.

Би-Би-Си најави дека ќе објави јавно извинување и дека ќе ги засили контролите за уредничка точност и транспарентност во сите идни продукции.

The post ТЕЖОК СКАНДАЛ ВО БИ-БИ-СИ, ОСТАВКИ ПО ДОКУМЕНТАРЕЦ ЗА ТРАМП Еве како исечените реченици биле ставени надвор од контекст appeared first on plusinfo.mk.

Резултатот од локалните избори е најлош во историјата на Социјалдемократскиот сојуз на Македонија, изјави пратеникот и поранешен министер за внатрешни работи Оливер Спасовски, во интервју за телевизија Алсат-М. Тој порача дека партијата се наоѓа во сериозна криза која бара длабока анализа и редефинирање на нејзините политики.

– Резултатот од 126.000 гласови претставува дно и јас би сакал тоа да биде дното на кое сите ќе застанеме. Тоа ме загрижува, но и мотивира да видиме што треба да се направи понатаму – изјави Спасовски.

Тој нагласи дека СДСМ останува идеја со длабоки корени во македонското општество, но дека за нејзино опстојување се неопходни суштински промени – не само во кадровскиот состав, туку и во пристапот.

– Персоналните решенија во овој момент нема да ја решат работата. Ако мислиме дека само со заменување личности ќе дојдеме до посакуваниот ефект, тоа е погрешна логика – предупреди Спасовски, додавајќи дека не сака да навлегува во дебати за конкретни кадровски промени.

На прашањето дали ќе бара оставка или одговорност од актуелниот партиски лидер Венко Филипче, Спасовски одговори дека секој што се кандидирал за претседател презел одговорност и за најдобрите и за најлошите резултати.

– Оставките се личен чин, длабоко морален и високо етички. Но решението не е во јавни повици и медиумски дебати, туку во сериозна внатрепартиска анализа и разговор во рамките на партиските органи – изјави тој.

Спасовски оцени дека СДСМ мора да спроведе темелна реформа во три насоки: редефинирање на политичката платформа, промена на организациската структура и зајакнување на коалицискиот капацитет.

– Без внатрешна дебата нема да има ни решение. Имаме капацитет да разговараме и да го избереме она што е најдобро за СДСМ – рече тој.

Во врска со тврдењата за „таен договор“ меѓу СДСМ и ВМРО-ДПМНЕ за исходот на изборите, Спасовски предупреди дека перцепцијата е најопасното оружје во политиката.

– Кога една перцепција ќе се создаде, а не ја менувате, таа станува вистина. Сега се создаде перцепција за некаква соработка меѓу ВМРО-ДПМНЕ и СДСМ и ние мора да ја разбиеме ако тоа не е вистина – изјави тој.

Тој посочи дека е направена сериозна грешка што СДСМ немал свои кандидати за градоначалници во дел од општините, меѓу кои Кичево и Струга, што придонело за послаб изборен резултат.

– Ако имавме кандидати во сите општини, ќе имавме поинаков резултат и на советничките листи. Сакаме да се бориме за СДСМ, а не против некого – порача Спасовски.

Тој смета дека во вториот изборен круг требало да се обезбеди соработка со сите што не ја поддржуваат власта, а неутралниот став и оставената слобода за одлучување направиле штета на партијата.

– СДСМ мора да има јасен став и порака до членството. Не станува збор за соработка со ДУИ, туку за создавање опозициски фронт – истакна Спасовски.

Tој ја предупреди ВМРО-ДПМНЕ дека апсолутната власт секогаш претставува и врв и почеток на падот.

The post ДНО – ТОА Е РЕЗУЛТАТОТ НА СДСМ НА ОВИЕ ИЗБОРИ Оливер Спасовски заговара реформи во партијата и создавање опозициски фронт appeared first on plusinfo.mk.

Одржување на партиски конгрес до 20 декември е една од главните одлуки на Демократската унија за интеграција (ДУИ) која денеска во партиското седиште во Мала Речица одржа седница на Централното претседателство свикана од страна на партискиот претседател Али Ахмети.

– Дискутиравме за сите развои, за политичките развои и внатрешните развои во ДУИ, за колицијата итн. Имајќи предвид дека истечен рокот и за партиски конгрес, соочувајќи се со овие политички развои во државата е одлучено до 20 декември да се организираа партиски конгрес, истакна во изјава за медиумите потпретседателот и портпарол на ДУИ – Арбер Адеми.

На новинарско прашање дали се разговарало за оставки по резултатите од изборите, Адеми информира дека не се дискутирало по тоа прашање имајќи предвид дека ќе имаат внатрепартиски избори.

– Вчера на прес-конференцијата претседателот Ахмети кажа дека ние пораката ја примивме. На национално ниво сепак, остануваме најголемата политичка опција со над 23.000 гласа повеќе. За некои општини, да, тоа е резултат што веќе го имаме што вчера беше соопштен пред јавноста. И секако дека ДУИ влегува во процес на обнова и затоа се организира и партиски конгрес кој ќе треба да биде одржан до 20 декември, одговори Адеми.

Тој соопшти и дека на седницата е донесена одлука за формирање на организациониот одбор за конгресот во кој ќе членуваат осум партиски членови.

The post ВО ДУИ НЕ ПАДНАЛ МУАБЕТ ЗА ОСТАВКИ Најавен е конгрес и избори во партијата appeared first on plusinfo.mk.

Словенечката министерка за правда Андреја Катиќ и министерот за внатрешни работи Боштјан Поклукар му понудија оставки на премиерот Роберт Голоб, кој веднаш ги прифати. Голоб свика вонредна седница по трагедијата во Ново Место.

– Вакво нешто не смее да ни се случува. Надлежните министри ја прифатија својата одговорност. Ги прифатив двете оставки – потврди Голоб по состанокот со министрите.

Истрагата за кривичното дело, според началникот на полицијата Дамјан Петрич, сè уште е во тек, пишува 24ur.

Словенија завчера беше потресена од трагичен настан, во кој едно лице го загубило животот. Еден маж бил брутално претепан пред ресторан во Ново Место во петокот вечерта, а подоцна им подлегнал на повредите. За денеска беше најавен протест.

Според неофицијалните информации, младиот човек го повикал својот татко од клубот „ЛокалПатриот“ тврдејќи дека му се закануваат група луѓе, по што побарал да дојде да го земе. Неговиот татко веднаш пристигнал, и бил нападнат од група мажи, наводно членови на ромската заедница, кои му нанеле сериозни повреди на главата, по што со возило од брза помош бил пренесен во болница, каде им подлегнал на повредите.

РОМИ ПРЕТЕПАА ЧОВЕК ДО СМРТ ВО НОВО МЕСТО Насилството ги крена Словенците на нозе

The post „ВАКВО НЕШТО НЕ СМЕЕ ДА НИ СЕ СЛУЧУВА“ По бруталното убиство на граѓанин паднаа двајца министри appeared first on plusinfo.mk.