Владејачката ВМРО-ДПМНЕ обвини дека СДСМ шири паника и хистерија во јавноста, злоупотребувајќи трагичен настан за политички напади.

„СДСМ повторно се обидува да шири паника и хистерија во јавноста, злоупотребувајќи трагедија за дневнополитички цели. Наместо почит кон жртвите и нивните семејства, тие се обидуваат да извлечат политички профит“, се наведува во реакцијата на ВМРО-ДПМНЕ.

Од партијата оценуваат дека опозицискиот СДСМ, наместо да покаже одговорност и сериозност, се обидува преку трагичен настан да води политичка кампања против институциите и против министерот за внатрешни работи Панче Тошковски.

„СДСМ шири паника и хистерија, со цел да создаде политички поени. Тие немаат кредибилитет да зборуваат за институционална одговорност ако се има предвид начинот на кој функционираше системот кога тие беа на власт“, наведуваат од ВМРО-ДПМНЕ.

Од владејачката партија додаваат дека трагедиите не смеат да се користат за политички маркетинг и дека институциите ќе продолжат да работат на целосно расчистување на случајот.

Оваа реакција на владејачката ВМРО-ДПМНЕ доаѓа по соопштението на СДСМ, во кое опозициската партија бара оставка од министерот за внатрешни работи Панче Тошковски по трагедијата во која животите ги загубија мајка и дете.

„Уште колку животи треба да згаснат за Тошковски да поднесе оставка?“, прашуваат од СДСМ.

Од партијата велат дека трагедијата е резултат на институционални пропусти и дека одговорноста мора да се утврди на највисоко ниво.

„Две години имало пријави за семејно, физичко и психичко насилство. Против сторителот имало 12 пријави, а во последниот случај кај него била пронајдена и дрога. И покрај сите овие сигнали, институциите не успеале да ги заштитат жртвите“, наведуваат од СДСМ.

Во соопштението опозициската партија упатува остра порака кон власта.

„Крвави ви се рацете. За ова мора да има одговорност. Поради тоа бараме оставка од министерот Панче Тошковски“, наведуваат од СДСМ.

The post СДСМ ШИРИ ПАНИКА И ХИСТЕРИЈА Ги обвинува ВМРО-ДПМНЕ и Тошковски за „окрвавени раце“ appeared first on plusinfo.mk.

Синоќа во Чаир се случи уште едно пукање. Со дури четири прострелни рани, тешко е повредено младо момче од 19 години, кое се бори за живот. Ова е втор пат за 1 месец млад човек да биде жртва, во септември исто така од пукање беше повредено уште едно младо момче. Состојбата со безбедноста на улиците е алармантно влошена. Тоа е учинокот на Владата на Мицкоски во изминатите 100 дена, реагираше СДСМ на обвинувањата на ВМРО-ДПМНЕ.

„Со Тошковски и со ВМРО-ДПМНЕ улиците станаа Див Запад, пукање има речиси секој ден, на секој чекор. Криминалните пресметки се во голем пораст, наместо ред и поредок се случува хаос. Неказнивоста и неефикасноста на МВР е празник за криминалците кои немаат страв од Тошковски и прават што сакаат.
Со Тошковски на чело на МВР досега има над 20 случаи на употреба на огнено оружје или остар предмет, околу 10 убиства и обиди за убиства .Криминалците не се плашат од Тошковски, тој не може ниту полицајците да ги заштити“, се наведува во соопоштението.

Од СДСМ велат дека после „сите скандали, после сите овие убиства, пукања, криминални пресметки без разрешница, Мицкоски веќе требаше да реагира и да го смени Тошковски, но очигледно го штити“.

The post СДСМ БАРА ОСТАВКА ОД ТОШКОВСКИ Пукање има на секој чекор appeared first on plusinfo.mk.