За голем број од точките за кои се преговара, како што истакна министерката, веќе се усогласени ставовите, останува дополнително да се доусогласат и останатите точки, како што се покачувања за дел од класното раководство, плаќање надоместок за пат на одредени наставници кои работат подалеку од училиштето, како и за некои други погодности кои ќе ги имаат членовите на СОНК.

– Денешниов состанок е еден од бројните кои ги одржувам со нашиот социјален партнер со цел подобрување на правата и можностите на вработените во основните и средните училишта. Низ тој континуиран процес со бројни разговори и преговори постигнуваме одредени заеднички ставови кои мислам дека ќе ги досредиме во иднина и ќе дојдеме до конечното решение за потпишување на новиот колективен договор – изјави министерката Јаневска пред почетокот на средбата и посочи дека е убедена оти релативно брзо ќе биде потпишан колективниот договор.

Министерката потврди дека мартовската плата на вработените во основните и средните училишта, која ќе се исплати во април, ќе биде покачена за седум проценти како што беше претходно договорено. Претходно во текот на минатата година имаа зголемување од пет проценти.

– Ова е второ покачување на платата и е во согласност со инфлацијата. Сметаме дека тоа е важно зашто платата на наставниците реално ќе се покачува за да ги покриваат непредвидените трошоци. Со овој договор обезбедуваме и континуитет на покачување на платите на наставниците и другите вработени во основните и средните училишта кои ќе се одвиваат во следните четири години – прецизира Јаневска.

Претседателот на СОНК потврди дека се во завршна фаза на преговори за колективните договор за основно и средно образование.

-Тоа се колективни договори кои не се обновени од 2008 година што само по себе укажува дека се комплексни и дека се многу важни за нашите членови и за вработените во основното и средното образование. Токму затоа бараат многу сериозен пристап за носење на нивните финални решенија – рече Неделков.

Како синдикат, додаде, со новиот колективен договор очекуваме многу повеќе привилегии за нашите членови кои не се опфатени со соодветен закон или некој друг колективен договор.

– Во новиот колективен договор се бараат зголемени права за нашите членови во однос на актуелни закони и колективни договори. Сè уште сме во фаза на завршни преговори, се работи најчесто за финансиски побарувања и права од финансиски карактер за кои сметам дека брзо ќе се договориме и ќе се потпишат колективните договори – посочи Неделковски.

Нагласи дека присуството на министерката Јаневска на работната средба покажува дека многу се посветува внимание на квалитетен текст на колективниот договор.

– Таргетот беше до денеска да ги потпишеме колективните договори, но заради обемноста на материјалните и заради немање закон за наставници и стручни соработници кои се битни за склучување на договорите ќе имаме мало доцнење. Тоа нема ништо да значи во негативна конотација за вработените во образованието и за нашите членови. Се работи за доцнење од две или три недели – рече Неделковски.

The post ПОВИСОКИ МАРТОВСКИ ПЛАТИ ЗА ВРАБОТЕНИТЕ ВО ОСНОВНИТЕ И ВО СРЕДНИТЕ УЧИЛИШТА Усогласени се дел од точките во новиот колективен договор appeared first on plusinfo.mk.

Има многу фронтови на кои истовремено продолжуваме да работиме. Изминатите шест месеци покажаа дека може да се постигне и да се надомести дел од тоа што е загубено. Продолжуваме со исто темпо да работиме и во следните месеци и не само да го надополнуваме она што е пропуштено, туку и да фатиме чекор на нормална работа која ќе придонесе за подобар квалитет на сите нивоа на образование во државата, изјави денеска министерката за образование и наука Весна Јаневска.

Во изјавата за медиумите по средбата со претставници на студентите и средношколците, министерката рече дека тековно ќе се распишуваат огласи за учебници односно ќе нема недостиг на учебници, потсетувајќи и дека на крајот на годината беше донесен Законот за учебници во основното и средното образование.

– Веќе се направени новите правилници, треба само да се потпишат и објават. Направена е анализа за учебниците за кои авторските права се по стариот закон и на оние кои треба да ги добиеме по новиот закон – рече Јаневска.

Соопшти дека на крајот на овој месец МОН ќе распише оглас и за учебници по странски јазик кои недостигаа на почетокот на оваа учебна година и, како што рече, „за сите други учебници кои им се потребни на учениците“.

Во плановите за 2025 е и продолжувањето на континуирано и постепено воведување на едносменска и целодневна настава и оптимизација на мрежата на училиштата.

Посочи и на новите модели на полагање на матурата што ќе биде олеснување на учениците од стручните училишта кои досега за матура требало да се спремат за материјал кој не го изучувале во текот на четири години.

– Во средните стручни училишта ќе полагаат средно стручна државна матура соодветно на општообразовните предмети коишто ги слушаат по наставен план и програма, и тој е помал од оние во гимназиските. Гимназиските ќе си полагаат гимназиска државна матура и на тој начин и едните и другите ќе можат, доколку сакаат, да се запишат во странство. Оние што ќе полагаат средно стручна матура ќе можат без приемен испит да се запишат на сродните нивни факултети. На пример, од електро-машинско училиште – и на Машински и на Електро. Но, ако сакат да се запишат на Медицински, на Филозофски или на друг таков факултет, тие ќе треба да полагаат државна гимназиска матура. Одлуката е нивна – изјави Јаневска.

Посочи и дека ќе направат „силни напори“ матурата оваа година да биде „спроведена регуларно и по закон“, затоа што, рече, матурските оценки од разни причини досега „не беа сосема реални“. За таа цел, оваа година матурата ќе биде во најголем дел организирана во амфитеатрите на универзитетите, освен во помали училишта во кои матурата ќе се организира во нивните простори.

– Со младите се договоривме и да почне една кампања за значењето на образованието и за вредносниот систем. Ќе ја направиме заеднички и ќе учествуваат оние кои се многу успешни и на своите пријатели и врсници ќе им кажат што значи да се има знаење, компетенции и вештини, што значи матурата и што значи заокружување на средното образование – рече Јаневска за планираната кампања во која ќе се вклучи МОН и наставниците.

The post СО НОВИТЕ ЗАКОНИ И НОВИ НАЧИНИ НА ПОЛАГАЊЕ МАТУРА Министерката Јаневска ветува дека ќе има учебници за сите appeared first on plusinfo.mk.

– Да, тој рок (за смена) би траел најмалку една година, евентуално нешто подолго, но би одел постепено, одделение за одделение, како што и сега се случува.

Според Јаневска интеграцијата на предметите не била прифатена од стручњаците, ниту од самите наставници.

Јаневска претходно најави дека предметите како историја, георафија, граѓанско образование и други ќе бидат одделни.

Во интервјуто таа најави дека интеграцијата може да се случи и кога предметите се одделни, бидејќи тема од еден предмет може да се обработува во друг. Таа вели дека „нè чека голема и сериозна работа“, а дека Бирото за развој на образованието(БРО) е согласно да се променат наставните планови, кои, како што вели, ги збунувале наставниците.

The post ЌЕ СЕ УЧИ ОД СТАРИТЕ УЧЕБНИЦИ ДОДЕКА СЕ МЕНУВА ПРОГРАМАТА Ќе треба најмалку една година за ревидирање, вели новата министерка за образование и наука appeared first on plusinfo.mk.

На поткастот на Плусинфо гостуваше д-р Мартин Поповски, доктор на науки од областа на филозофијата на науката, магистер од областа на методиката на наставата по филозофија и пионер во областа на филозофијата со деца во Македонија.

Мартин кажа нешто повеќе за воведувањето „Филозофија“ како изборен предмет за учениците во четврто, петто и во шесто одделение, од наредната учебна година. Тој појасни како ќе изгледаат часовите по филозофија и како ќе се разликуваат од часовите по другите предмети. Децата нема да изучуваат факти поврзани со филозофијата, туку ќе учат како да дискутираат, да го сослушуваат соговорникот, да развиваат емпатија, како и однос кон критичкото размислување, вели Мартин.

Д-р Поповски објасни зошто е важен овој предмет за децата во основно, зборуваше за стереотипите на родителите и на наставниците, како и за ред други нешта.

На прашањето „Зошто филозофија?“, Мартин даде интерсен одговор.

– Децата на овие часови не учат филозофија. Не ги оценуваме и не им велиме „Читај го Платон“ или „Читај го Кант“. Филозофи не се ни спомнуваат на овие часови, ниту, пак, нивни учења, ниту, пак, дефиниции… Не ги учиме децата филозофија, туку ги учиме да филозофираат. Дури не ги ни учиме. Тие природно знаат да филозофираат. Ние ги вежбаме да филозофираат, а филозофирајќи, тие вежбаат да мислат, да слушаат, да дискутираат и да соработуваат, што се значајни алатки во секојдневниот живот. Тие развиваат критичко и креативно размислување, чувство на зачуденост кое треба да следува со филозофирањето… Нивната имагинација и љубопитност се подобруваат. Што е многу интересно, а и многу истражувања го покажуваат тоа, се создава основа за подобар успех и по другите предмети – објасни тој.

Според д-р Поповски, на овој предмет им се зголемува самодовербата на децата бидејќи некој ги прашува што мислат, а не репродуцираат материја како што се бара од нив на училиште.

– Критичкиот дух потешко се поттикнува кај возрасните со дефинирани ставови. Децата по својата природа се критички настроени. Кога се развиваат, тие се збунети од светот околу нив. Бараат смисла во светот и се обидуваат да одговорат на основните прашања. Возрасниот потешко ќе го навратите да филозофира, да размислува за основните нешта. Кај децата тоа е многу поприродно. Побрзо и подлабоко навлегуваат во филозофските прашања. Оние со поголеми деца забележуваат дека детето честопати прашува „Зошто?“ Детето прашува тешки и длабоки филозофски прашања. Ќерка ми, која има 7 години, завчера ме праша „Дали секогаш ќе има години?“ Сакаше да праша „Дали времето ќе трае засекогаш“ – на смеа раскажуваше Мартин.

Во продолжение, последете го целото видео од поткастот.

The post 🎥 ДЕЦАТА ПРИРОДНО ФИЛОЗОФИРААТ, А ВОЗРАСНИТЕ ИМААТ ДЕФИНИРАНИ СТАВОВИ Поповски објаснува зошто предметот „Филозофија“ е важен за децата во основно училиште appeared first on plusinfo.mk.

Крај на учебната година на 17 јуни беше предвидено за сите ученици, но Министерството за образование и наука излезе во пресрет на барањето на Сојузот на средношколци.

– Во Законот за основно образование се одредени точен број работни денови (180) во основното образование. Во Законот за средно образование не е одредена законска обврска за точен број работни денови. Сите одлуки се донесуваат во консултација со тие што се засегнати. Сојузот на средношколци побара освен пролетниот распуст, заради административните постапки на запишување на децата во високото образование, средното образование да заврши на 10 јуни. Тоа го дозволуваше законот и ние тука постапивме – рече пред два месеца министерот за образование и наука Јетон Шаќири.

И основците и средношколците првпат годинава имаа пролетен распуст од 29 април до 6 мај 2024.

Матурантите во изминатите две саботи ги полагаа двата екстерни испита од државната матура и резултатите треба да ги очекуваат најдоцна до 8 јули.

На полуматурантите, пак, овој месец им претстои запишување во средно образование. Пријавувањето и запишувањето на учениците во јунскиот уписен рок ќе биде во две пријавувања. Според Конкурсот за запишување во средно образование, првото електронско пријавување ќе биде од 20 до 25 јуни и второто на 1 и 2 јули.

Аплицирањето е електронско преку линк до порталот за електронски услуги на Министерството за образование и наука (e-uslugi.mon.gov.mk).

The post КРАЈ НА УЧЕБНАТА ГОДИНА ЗА СРЕДНОШКОЛЦИТЕ Летниот распуст за основците ќе почне следната недела appeared first on plusinfo.mk.

Проектот е дел од четиригодишната Стратегија на Светска банка за партнерство со земјата за периодот 2019-2023 година и предвидува инвестиции од 21,5 милиони евра во основното образование, насочени кон подобрување на условите за учење и решавање на најприоритетните предизвици кои се директно или индиректно поврзани со развојот на човечкиот капитал.

„Ова е дел од излагањето на министерот за образование и наука Јетон Шаќири на денешната средба со Фадиа Саада, директор за човечки развој за Европа и Централна Азија, на која присуствуваа и министерот за финансии Фатмир Бесими, министерката за труд и социјална политика Јованка Тренчевска и министерoт за здравство Беким Сали“, соопшти МОН.

Шаќири посочи дека во изминатиот 18-месечен период, по спроведена анализа на потребите, набавени се таблети, опрема, нагледни средства и мебел за кабинетите по природни науки. Направена е проценка за реновирање на 118 основни училишта каде што ќе се изведуваат мали градежни работи – тоалети, пристапни рампи и слично. Исто така, спроведено е преттестирање за национално оценување за трето одделение на ниво на држава.

– Многу значајна активност е воведувањето на новите формули за распределба на буџетски средства во основното и средното образование, кои ќе помогнат во отстранувањето на повеќето неефикасности во постојното финансирање на образовниот систем во Северна Македонија. Во соработка со Светската банка и УНИЦЕФ веќе изработивме и студија за оптимизација на училишната мрежа – рече министерот.

Говорејќи за предизвиците во образовниот сектор кои се адресирани со Стратегијата за човечки капитал 2022-2030, Шаќири се осврна на активностите за подобрување на квалитетот на образованието преку олеснување на пристапот на наставниците до програми за професионален развој, вклучувајќи подобрување на дигиталните вештини на наставниците за дигитална технологија и педагогија и, на долг рок, нејзино интегрирање во студиските програми на педагошките факултети.

„Во делот на фокусирањето на правична испорака согласно потребите на ранливите групи на население, МОН работи на одржување и зголемување на нивниот пристап до образование, преку институционализација на инструментите за намалување на загубите од учење и идентификување на учениците кои се изложени на ризик од напуштање на образовниот систем“, наведува МОН во соопштението.

Министерството нагласува и дека ја продолжува добрата соработка со Светска банка која, како што посочува, долги години е партнер на државата во повеќе области, а посебно е значајна помошта во создавањето квалитетно образование за секој ученик, со оглед на важноста на образованието за економскиот раст и вработливоста.

The post СВЕТСКА БАНКА ЗАДОВОЛНА ОД УНАПРЕДУВАЊЕТО НА ОСНОВНОТО ОБРАЗОВАНИЕ Шаќири вели дека проектот од 21,5 милиони евра добро се спроведува appeared first on plusinfo.mk.

– Јас кажав дека учебниците ќе бидат готови до октомври. Денеска имаме над 22 наслови само за основно образование, околу 15 се испечатени од економскиот оператор кој ја презема обврската да ги печати. Испораката на учебници започнува од утре, четврток – кажа Шаќири.

The post УТРЕ ЌЕ СТИГНАТ НОВИТЕ УЧЕБНИЦИ Шаќири вели оти кажал дека ќе бидат готови до октомври appeared first on plusinfo.mk.

– Нема поголема радост, првиот училишен ден да започне во ново училиште, во местото каде живеат. Нема поголема радост од детскиот џагор и смеа, кога се оди во училиште. Пред една година ветивме нова училишна зграда и тоа го реализиравме – изјави Шаќири.

Подрачното основно училиште „Михал Грамено“ во село Долно Блаце, општина Чучер-Сандево е инвестиција на Министерството за образование и наука (МОН) и за него се одвоени околу 4,7 милиони денари од буџетот. Објектот, како што велат од МОН, ги исполнува сите услови за непречено и современо образование, какво што заслужуваат сите деца.

Кон средината на следната календарска година, како што велат, и општина Бутел ќе добие нов училишен објект, во населбата Визбегово.

– Како Влада и Министерство ние ја ветивме оваа инвестиција. Таа чини речиси 107 милиони денари и интензивно се реализира. Градежните активности се одвиваат според планот, така што, очекувам доколку сé биде во ред како и досега, од наредната учебна година, од септември во 2023 година, овој училишен објект да ги прими првите ученички генерации кои тука ќе се едуцираат – рече Шаќири.

Тој посочи дека МОН посветува подеднакво внимание на сите општини каде има потреба од инвестиција и додаде дека сега останува на младите вредно и посветено да учат, да стекнуваат знаења и вештини кои ќе им бидат потребни во животот. Потенцира дека вложувањето во образовната инфраструктура, како еден од основните услови за квалитетна настава и едукација на младите е еден од приоритетите на МОН.

The post ДОЛНО БЛАЦЕ ДОБИ НОВО УЧИЛИШТЕ, ВО ВИЗБЕГОВО СЕ ГРАДИ Шаќири и Груби во посета на градежните работи appeared first on plusinfo.mk.

– До крајот на неделата ќе имаме состаноци и пред почетокот на второто полугодие ќе се има и ставот на Комисијата за заразни болести и на Кризниот штаб. Ги имаме предвид и повиците од УНИЦЕФ, кое е за физичко присуство на настава, а и ние сите, и наставниот кадар, свесни сме за придобивките од физичкото присуство. И според податоците, во првото полугодие, имавме многу мал број на заразени деца. Нашата одлука ќе беше лесна ако ја имавме истата варијанта од вирусот како што беше во септември и октомври. Сега има нова варијанта, но и тоа не значи дека почетокот на второто полугодие со физичко присуство ќе го зголеми бројот на заразени – изјави Шаќири.

Тој посочи дека градинките се постојано отворени, функционираат и други сектори, а за него како министер најважно е што децата одвај чекаат да почне учебната година.

Шаќири нагласи дека е важно да се почитуваат здравствените мерки и дека за заштита и претпазливост од ковид-19 не треба да се мисли само во училиштата, туку е важно и однесувањето надвор од нив.

– Не значи дека ако нема настава, повеќе ги почитуваме препораките отколку кога сме на настава, рече Шаќири на прес-конференција при посетата на Државниот универзитет во Тетово.

Каква и да биде одлуката, рече тој, МОН ќе биде во постојана комуникација и секој ден ќе има средби со директорите на основните и на средните училишта ако наставата биде со физичко присуство.

– До крајот на неделата ќе има конечна одлука и каква и таа да биде – физичка настава или онлајн, коментарите ќе бидат различни. Но, ќе се земат сите придобивки од двете варијанти, рече министерот за образование и наука.

Поради влошената епидемиoлошка состојба и проценката дека земјата се наоѓа на врвот на ковид-заразата, Владата на седница на 17 јануари донесе одлука за одложување на второто полугодие кое наместо на 20 јануари треба да почне на 1 февруари.

Одлуката за продолжениот зимски распуст за околу 255 илјади ученици Владата ја донесе по препорака на Главниот координативен кризен штаб, а на наредната седница го утврди и бројот на наставни денови во вонредни околности со кои учебната 2021/2022 година ќе заврши во редовниот термин – 10 јуни 2022.

The post ДАЛИ УЧЕНИЦИТЕ ЌЕ ОСТАНАТ ДОМА? До крајот на неделата ќе се знае дали и како ќе започне второтo полугодие appeared first on plusinfo.mk.

Перо Арсеновски, директор на основото училиште Лазо Ангеловски во скопската општина Ново Лисиче ќе биде реизбран да го води школото и по 3-ти февруари вгодина, иако зад себеси има досие за сексуално вознемирување на мајки на ученици и на вработени жени, јавува Телма. Тој имал и галерија од експлицитни слики на вработени во школото, кои на тој начин ја добивале работата.

Арсеновски пред медиумите ги отфрли обвинувањата.

„Помпезните содржини воопшто не соодвестуваат на вистината. Информациите кои сте ги добиле се резултат на една конструирана приказна со политичка заднина. Не постојат пријави, ниту пак имам скандалозно досие со напади и вознемирување на вработени и мајки на ученици. Една единствена пријава за која се води постапка е онаа на поранешна вработена во училиштето чие Решение од Основниот суд со кое се изречени времени мерки е укинато од страна на Апелациониот суд Скопје“, стои во писмената реакција на Арсеновски.

И додека скандалот ја тресе општина Аеродром, градоначалникот Тимчо Муцунски изјави дека нема да дозволи ова да продолжи и дека ќе назначи в.д. директор на училиштето.

„За оваа моја одлука го информирав и Министерството за образование и наука и доколку тие не одлучат да ја преиначат мојата одлука, во најбрз рок во училиштето ќе именуваме в.д. Директор од редот на вработените. Во иднина нема да дозволам несоодветни кадри да бидат поставувани на високи позиции, особено кога станува збор за образовни институции“, соопшти Муцунски преку Фејсбук-објава.

Што го натерало Училишниот одбор во ноември годинава повторно да го избере Арсеновски меѓу трите кандидати од огласот за директор? На гласањето на конкурсот, Арсеновски го победил најблискиот противкандидат со тесна разлика од 4:3 во негова корист. За нов мандат на контроверзниот директор гласале тројца наставници во школото и еден родител, додека двајца родители-членови на Училишниот одбор и претставникот на општина Аеродром гласале за друг кандидат.

За однесувањето на директорот Арсеновски алармирале повеќе вработени жени кои биле малтретирани и сексуално вознемирувани. Мајка на ученик за емисијата „КОД“ на ТВ Телма сведочела дека го отпишала детето од ОУ Лазо Ангеловски поради големите скандали и делењето на спорни фотографии, чии копии дури биле расфрлани пред учениците.

Коалиција Маргини и Хелсиншкиот комитет за човекови права уште во 2019 објавиле извештај во кој побарале институциите да го истражат проблематичното однесување на директорот, но ништо не било преземено.

The post ПАК ГО ИЗБРАЛЕ ЗА ДИРЕКТОР ИАКО ВОЗНЕМИРУВАЛ МАЈКИ Училиштето Лазо Ангеловски го тресе голем скандал appeared first on plusinfo.mk.