ТИТАН Усје денес го одбележа двегодишниот јубилеј на едукативниот центар „Иноваториум – Клуб на напредни знаења и вештини“, преку кој учениците од основните училишта стекнуваат практични знаења и вештини од областа на 3Д моделирањето, 3Д печатењето, роботиката и инженерството.

На завршниот настан од втората година од програмата за 3Д печатење присуствуваа повеќе од 500 ученици од осум основни училишта од Општина Аеродром, директорите на училиштата, професорите, претставници од Општина Аеродром, Технолошко Металуршкиот Факултет и партнери на проектот.

Обраќајќи се пред присутните, главниот извршен директор Константинос Николаоу истакна дека програмата претставува значајна инвестиција во знаењето, љубопитноста и потенцијалот на младите генерации.

На настанот пред присутните се обрати техничкиот директор Љупчо Дончев, коj истакна дека преку обуките за 3Д печатење во „Иноваториум“ , учениците имаа можност да се запознаат со 3Д печатење, роботика и основи на инженерство, но уште поважно – да учат преку истражување, експериментирање и создавање.

– Во ера на дигитализација, многу е важно на младите да им понудиме и можности за стекнување на дополнителни вештини и навики, покрај оние што ги добиваат во училиштата. Кога го формиравме „Иноваториумот“ нашата цел беше да креираме простор преку кој ќе поттикнеме поголема мотивација и градење на интерес кон СТЕМ науките кај учениците и основните училишта од овој дел на градот. Особено ни е драго што оваа година обуките ги проширивме и во Општина Аеродром, каде беа вклучени 524  ученици. Со програмата минатата година беа опфатени основните училишта од Општина Кисела Вода со учество на повеќе од 200 ученици. Ова е силна потврда дека младите имаат голема желба да учат, да истражуваат и да се запознаваат со современи технологии – истакна Љупчо Дончев.

Во реализацијата на програмата, партнери на ТИТАН Усје се Технолошко-металуршки факултет, локалната самоуправа и училиштата, а од компанијата посочуваат дека токму ваквите партнерства се клучни за создавање подобри можности за младите.

ТИТАН Усје повеќе од 70 години е дел од заедницата, а преку програмата „Партнерство со училиштата“, која се реализира од 2009 година, компанијата континуирано инвестира во подобри услови за учење и развој на учениците.

На крајот од настанот, учениците добија признанија за успешно завршените обуки, а од компанијата упатија порака младите да продолжат да истражуваат, да поставуваат прашања и да создаваат, бидејќи токму тие се иднината.

„Иноваториум – клуб на напредни знаења и вештини“ е лоциран во кругот на ТИТАН УСЈЕ, а за учениците е обезбеден и автобуски превоз. Дел од капацитетите на „Иноваториумот“  и научните помагала се ставени на располагање на сите наставници по математика, физика и хемија од општинските училишта, со што ќе можат да го користат и во текот на редовната настава.

The post ТИТАН УСЈЕ ОДБЕЛЕЖА 2 ГОДИНИ „ИНОВАТОРИУМ“ Едукативен центар за развој на дигитални и инженерски вештини кај младите appeared first on plusinfo.mk.

Покрај хартиените свидетелства, на крајот од тековната учебна година, учениците од прво до трето одделение за првпат ќе добијат и дигитални свидетелства како резултат на заложбите на Министерството за образование и наука за дигитализација на образованието. Ова е значаен чекор во процесот на модернизација на образовните услуги во државата и е поддржан од Македонски Телеком.

– Оваа учебна година започнуваме со етапно воведување на дигиталните свидетелства. Тие ќе имаат идентична важност како и хартиените кои постепено ќе се заменуваат, што ќе значи олеснување на административната работа на училиштата, намалување на трошоците за печатење и онлајн достапност на документот во секое време. Продолжуваме да ја дигитализираме образовната сфера. Задоволна сум од интензитетот на овој процес, затоа што речиси сите постапки за остварување на права и услуги се поедноставени и се реализираат по електронски пат. Преостанува уште уписот во високо образование, а со воведувањето на дигиталните свидетелства, се отвара можност за остварување и на оваа цел – изјави министерката Весна Јаневска за време на денешната посета на Македонски Телеком.

Македонски Телеком донираше електронски потписи  за сите 368 основни училишта во земјава со што ќе се овозможи поедноставна, побрза и поефикасна реализација на процесот на издавање дигитални свидетелства.

– Дигитализацијата на образованието е една од најважните инвестиции во иднината на државата. Денешните ученици се генерации кои ќе живеат, учат и работат во целосно дигитален свет и затоа е важно да создадеме современ, ефикасен и достапен образовен систем. Како лидер во дигиталната трансформација, Македонски Телеком има одговорност активно да ги поддржува процесите што носат долгорочни придобивки за општеството. Со обезбедувањето електронски потписи за сите основни училишта, придонесуваме кон побрза, поедноставна и поефикасна дигитализација на образованието и остануваме силен партнер на институциите во создавање модерни услуги за младите генерации – изјави Горан Марковиќ, главен извршен директор на Македонски Телеком.

Со воведувањето на дигиталните свидетелства, учениците и нивните семејства ќе имаат полесен и побрз пристап до документите, додека училиштата ќе добијат поефикасен административен процес и трајна електронска архива, велат од Министерството за образование.

Секое дигитално свидетелство останува во трајна електронска архива и по потреба и на барање на ученик или неговото семејство, може да биде отпечатено од страна на училиштето. Во следните години, дигиталните свидетелства постепено ќе се воведуваат и за учениците од повисоките одделенија.

The post ДОАЃААТ ДИГИТАЛНИТЕ СВИДЕТЕЛСТВА ЗА ОСНОВЦИТЕ Ќе бидат трајно достапни онлајн appeared first on plusinfo.mk.

Три случаи на врсничко насилство во основни училишта биле пријавени вчера во СВР Куманово.

Првиот случај во СВР Куманово го пријавила триесет и едногодишната А.С. во 14:09 часот, посочувајќи дека во училишен двор на основно општинско училиште во Долно Којнаре, кумановско, нејзиниот малолетен син бил физички нападнат од друг малолетник.

Во 12:45 часот во СВР Куманово, М.С.(33) од село Доброшане, кумановско, пријави дека на 27 февруари, околу 13:30 часот во основно општинско училиште во Куманово, нејзината малолетна ќерка била физички нападната од нејзини соученици.

Вчера во 12:45 часот во СВР Куманово, 35-годишна жена од кумановско пријавила дека подолг период во основното училиште во Куманово, во кое учел нејзиниот 12-годишен син бил малтретиран од негов соученик.

– Според пријавеното, соученикот често го навредувал и се исмејувал на нејзиниот син, а во еден случај го наведувал да скокне од прозорец на училницата. Исто така, 35-годишната жена пријавила дека син ѝ го информирал педагогот во училиштето, но не било преземено ништо, ниту пак ја информирале неа. Над малолетникот биле извршени прегледи во кумановската болница и во Комплексот клиники „Мајка Тереза“, по што бил хоспитализиран на Клиниката за психијатрија, соопшти полицијата.

СВР Куманово, презема мерки за расчистување на случајот.

The post ЗДИВЕА УЧЕНИЦИТЕ ВО КУМАНОВСКИТЕ ОСНОВНИ УЧИЛИШТА Три случаи на врсничко насилство во само еден appeared first on plusinfo.mk.

Во основните школи, во осмо и деветто одделение, ќе се изучува истражувачко новинарство по предметот Граѓанско образование, кој треба да биде еден вид практична школа за демократија. Во улога на истражувачки новинари, учениците ќе обработуваат теми од заедницата, ќе поставуваат прашања и ќе бараат одговори, ќе работат во тимови и ќе пишуваат новинарски текстови.

Оваа новина во образованието беше претставена денеска во Собранието од ресорната министерка Весна Јаневска, а на настанот присуствуваа претседателот на Собранието Африм Гаши, амбасадорот на Швајцарија во Македонија Кристофер Зомер, претставници на Парламентарниот институт, Националниот демократски институт (НДИ), наставници и ученици.

Министерката Јаневска нагласи дека демократијата е темелна вредност на нашето општество, а преку образованието можеме да придонесеме за натамошно јакнење на демократските процеси.

– Неодамна добивме признание од Советот на Европа дека Македонија е зрело демократско општество, во кое владее правото. Тоа е голема чест за нашата држава и за Владата, што во основа покажува дека демократските принципи се вградени во институциите на системот и дека демократијата ја практикуваме, а не е само декларативна. Треба да продолжиме во таа насока – рече Јаневска.

Таа додаде дека низ воспитно – образовниот процес треба да подготвуваме нови генерации кои ги знаат, почитуваат и применуваат демократските принципи на еднаквост, слобода на говор и учество во носење одлуки. Децата од најрана возраст треба да учат дека сите, без разлика на раса, пол, религија или социоекономски статус, имаат еднакви права и можности. Вештините како критичко размислување, тимска работа и дијалог, кои гарантираат функционална демократија, најдобро се усвојуваат кога се интегрирани во наставните програми.

Јаневска упати благодарност до швајцарската Програма за парламентарна поддршка и Парламентарниот институт на Собранието за подготовката на модулот, кој веќе е одобрен од Бирото за развој на образованието како изборен за 8-мо и 9-то одделение и е достапен на училиштата.

The post ЌЕ СЕ УЧИ ИСТРАЖУВАЧКО НОВИНАРСТВО ОД МАЛИ НОЗЕ Новина во предметот Гаѓанско образование appeared first on plusinfo.mk.

Кумановските основни и средни училишта во второто полугодие ќе имаат 40 ученици помалку од тие што се запишале на почетокот на годината, соопшти Секторот за образование во Општина Куманово.

Најчеста причина за отпишувањето е иселувањето на нивните семејства од градот.

„Од основните училиште се испишале 38 ученици, од кои 29 поради преселба во друга општина во рамки на границите на државата и 9 поради преселба во друга држава. Во средните училишта во првото полугодие се испишале 2 ученика поради преселба во друга држава, заклучно со 5 февруари годинава“, соопшти Секторот за образование во Општина Куманово.

Трендот на иселување од Куманово во текот на учебната година продолжува и понатаму, но не со динамика како во предходните години. Минатата година пред второто полугодие се испишале 174 ученици, а во 2023/2024 година 130 ученици. За разлика од претходните години, кога семејствата заминуваа во странство, оваа година повеќето отишле во други градови во Македонија.

Во учебната 2025/26 година во средните училиште во Куманово се запишани 1.130 ученици во прва година, а во прво одделение 904 првачиња, 60 помалку од 2024/25 година.

The post ОД КУМАНОВСКИТЕ УЧИЛИШТА СЕ ИСПИШАЛЕ 40 УЧЕНИЦИ Со семејствата се отселиле во други градови или во странство appeared first on plusinfo.mk.

Во неколку основни училишта во Скопје и Куманово вечерва на електронските адреси пристигнале пораки за наводно поставени експлозивни направи, информира МВР. Полицијата веднаш изврши проверки, а учениците се безбедно евакуирани.

„Денеска (28.10.2025) околу 18:00 часот во СВР Скопје и СВР Куманово пријавено е дека на е-адресите во неколку основни училишта пристигнале пораки за поставени експлозивни направи. Во тек се проверки од страна на полициски службеници“, информираат од МВР.

Според извештаите, во Скопје по дојавите во училишта во Општина Аеродром беа прекинати сите попладневни активности, а учениците безбедно испратени дома. Од Секторот за образование во Куманово потврдуваат дека дојавите биле примени нешто после 17 часот, а полицијата веднаш интервенирала.

– Дојавата за бомби е испратена по електронски пат. Од училиштата повикале полиција која мошне бргу пристигнала, учениците безбедно се евакуирани. Останува на службите да ја проверат состојбата – изјави раководителот на Секторот за образование, Александар Јовановиќ.

Случајот продолжува да се истражува, а МВР апелира до граѓаните да останат смирени и да ги следат упатствата од надлежните служби.

The post ПАНИКА ВО СКОПЈЕ И ВО КУМАНОВО Дојави за бомби ги затворија училиштата appeared first on plusinfo.mk.

Министерката за образование и наука Весна Јаневска денеска соопшти дека едносменска настава има веќе во 150 училишта во коишто немало или имало малку градежни интервенции за да може да биде воведена.

Таа очекува овој процес да продолжи во 25 училишта во кои ќе има потреба од градежни зафати т.е. доградба на училници за да може да ги опфатат сите ученици во една смена.

– Сигурно почнуваме во пет, почнуваме во општините Ѓорче Петров и во Карпош, а потоа продолжуваме и во други. Оваа година очекувам да започнеме работи во 25 училишта кои, секако, ќе бидат подолготрајни и ќе преминат во следната година – изјави Јаневска одговарајќи на новинарски прашања по извршениот увид за изградба на училишна спортска сала во општина Петровец.

Таа додаде дека воведувањето на едносменската настава е поврзано со оптимизација на училишната мрежа што, рече, „не е лесен процес“.

– Тој е почнат, добро се одвива и понатаму ќе се одвива. Верувам дека најголем дел ќе успееме да го завршиме во еден мандат, но верувам дека и тие што ќе дојдат после нас ќе го продолжат затоа што тоа е исклучително важно за квалитетот на образованието и во корист на учениците – посочи министерката за образование и наука.

The post ВО 25 УЧИЛИШТА ТРЕБА ДА СЕ ДОГРАДАТ УЧИЛНИЦИ Едносменската настава бара градежни зафати appeared first on plusinfo.mk.

По иницијатива на претседателот на ЗЕЛС, Орце Ѓорѓиевски, во соработка со НУБ ,,Св. Климент Охридски” – Скопје, почнува акција за дистрибуција на примероци од Правописот на македонскиот јазик во сите основни училишта низ државата.

„Оваа активност е важен придонес кон подобрување на наставниот процес, подигнување на јазичната култура кај учениците и зачувување на македонскиот јазик како суштински дел од нашиот национален идентитет. Акцијата следи откако во депоата на Националната и универзитетска библиотека „Св. Климент Охридски“ – Скопје беа откриени 2.600 примероци од второто издание на Правописот, кои цели седум години не биле дистрибуирани и биле чувани во несоодветни услови, иако првично биле наменети за сите јавни установи и институции, како и за лекторатите и библиотеките во земјава и странство, се наведува во соопштението од Кабинетот на Ѓорѓиевски.

По остварената средба меѓу претседателот на ЗЕЛС, Орце Ѓорѓиевски со директорот на НУБ ,,Св. Климент Охридски” – Скопје, Јовица Никчевски, како што се наведува во соопштението, се става крај на евидентираната институционалната негрижа и се обезбедува сите училишта во државата да поседуваат Правопис, ставен во функција на образовниот процес и грижата за македонскиот јазик.

НУБ ,,Св. Климент Охридски” ќе достави 1000 примероци на ЗЕЛС кои ќе бидат распределени во сите основни училилишта во земјава, а ќе бидат опфатени и сите 950 на централните и подрачните училишта.

The post СИТЕ ОСНОВНИ УЧИЛИШТА ЌЕ ДОБИЈАТ ПРАВОПИС 2.600 примероци стоеле во депоа 7 години appeared first on plusinfo.mk.

Според информациите од БРО, склучен е договор со економски оператор и истиот веќе ги испорачува свидетелствата за сите одделенија, а завршена е доставата за учениците од четврто и деветто одделение во основното образование, како и за учениците од завршните години во средното образование.

По целосната испорака, секое училиште индивидуално ги одредува датумите за доделување на свидетелствата за секое одделение. Апелираме тоа да се случи што поскоро по завршување на наставната година, која согласно Календарите за организација на работата на училиштата, за основците трае до 14 јуни, додека за средношколците до 9 јуни, соопшти МОН.

The post ЧУДНО, НО ВИСТИНИТО – СВИДЕТЕЛСТВАТА ГОДИНАВА НЕМА ДА ДОЦНАТ! Министерството уверува дека нема да се повторат ланските проблеми appeared first on plusinfo.mk.

„Со жалење сакам да ја информирам јавноста дека пред 10 минути во општинските основни училишта 25 Мај, Дане Крапчев, Григор Прличев, Кирил и Методиј и Крсте Мисирков се пристигнати дојави за поставени бомби. Спроведени се сите безбедносни протоколи, направена е евакуација и сите дечиња се на безбедно. Пријавено е во надлежните институции и се очекува да се проверат дојавите. Сакам да изразам најостра осуда кон испраќачите на овие дојави и барам од институциите час поскоро преку превземање на сите мерки кои им стојат на располагање да стават крај на ваквите појави“, напиша Стефковски на Фејсбук.

The post ДОЈАВИ ЗА БОМБИ ВО ПЕТ ОСНОВНИ УЧИЛИШТА ВО ГАЗИ БАБА Учениците се евакуирани, училиштата проверени appeared first on plusinfo.mk.