Основен кривичен суд Скопје. Archives - plusinfo.mk

СУДИР МЕЃУ ОБВИНЕНИЕТО И ОДБРАНАТА ЗА КЛУЧЕН ДОКАЗ Продолжува судењето за случајот „Жан Митрев“

плусинфо — Mon, 17 Nov 2025 11:55:27 +0000

Судењето за случајот „Жан Митрев“ во Основниот кривичен суд Скопје продолжи со изведување материјални докази предложени од Обвинителството.

На рочиштето беа презентирани финансиските резултати на Клиничката болница „Жан Митрев“ за периодот 2018–2021, според кои клиниката остварила значителна добивка, како и документи и објави од институции и медиуми поврзани со ковид-мерките и третманот со хемофилтрација.

Обвинителката Искра Хаџи Василева истакна дека сопственик и управител на клиниката е Жан Митрев, а доказите, според неа, упатуваат на јасни факти поврзани со обвинението.

Клучна точка на расправата беше одлуката на Судот да остане на претходната позиција – за еден од предложените докази, извештај за стручниот надзор за примената на хемофилтрацијата, ќе се одлучува по завршување на целата доказна постапка предложена од Обвинителството.

Обвинителката тврдеше дека доказот бил уредно доставен уште пред почетокот на судењето и дека Судот има пракса да прифаќа докази во таа фаза, истакнувајќи дека релевантноста на материјалот ја цени исклучиво Судот.

Одбраната остро се спротивстави на изведувањето на овој доказ, оценувајќи го како неважен и неповрзан со предметот, а постапувањето на Обвинителството како „импровизација“. Адвокатот Никола Додевски посочи дека доказот не се наоѓа во првичната листа на докази и дека не може дополнително да се воведе на овој стадиум, нагласувајќи дека Обвинителството нема право да ја надополнува листата. Одбраната, исто така, истакна дека материјалот бил вратен бидејќи не бил навремено предложен.

Правниот застапник на оштетените, адвокат Лејла Хаџију, зазеде спротивен став и поддржа изведување на доказот, оценувајќи го како клучен за клиентите и обвинувајќи ја одбраната дека го одолговлекува процесот.

Според обвинението, Жан Митрев се товари за продолжено кривично дело „измама“, но не за квалитетот на лекувањето, туку за наводно прикривање информации за хемофилтрацијата и доведување пациенти во заблуда со цел имотна корист. Постапката, која повторно започна поради процесни причини, продолжува на 21 ноември со сослушување сведоци.

The post СУДИР МЕЃУ ОБВИНЕНИЕТО И ОДБРАНАТА ЗА КЛУЧЕН ДОКАЗ Продолжува судењето за случајот „Жан Митрев“ appeared first on plusinfo.mk.

УСЛОВНА КАЗНА ЗА НАПАЃАЧОТ НА ДАНЕЛА Арсовска не побара отштета, Нуредини вети дека ќе се поправи

плусинфо — Fri, 31 Oct 2025 11:12:27 +0000

Основниот кривичен суд Скопје денеска му изрече условна казна затвор од две години на Реџеп Нуредини, кој во јуни ја нападна градоначалничката на Град Скопје, Данела Арсовска, во населбата Чаир. Казната нема да се реализира доколку во наредните пет години не стори ново кривично дело.

Судот ја донесе оваа одлука врз основа на признание на вина од страна на обвинетиот, кој во текот на судската постапка изразил искрено каење и се извинил за своето однесување.

Бранителот на Нуредини, адвокатот Насер Рауфи, по завршувањето на рочиштето изјави дека ваквата пресуда е резултат на соработката на обвинетиот со судот.

– Обвинетиот Реџеп Нуредини денеска покажа искрено каење за стореното и за грубото однесување кон оштетената. Градоначалничката покажа доблест и не се приклучи кон кривичниот прогон, ниту најави имотно-правно побарување. Тоа помогна да се изрече максимално алтернативна казна – изјави Рауфи, додавајќи дека Нуредини ветил дека ќе се воздржи од вакви испади во иднина.

Одбраната посочи дека обвинетиот придонел за ефикасно завршување на постапката, поради што судот го прифатил предлогот за условна казна и пробациски надзор.

Градоначалничката Данела Арсовска, пак, по излегувањето од судницата беше видно вознемирена и не даде изјава за медиумите.

Според обвинението, Нуредини се товари за кривично дело „насилство“ од член 386 став 1 од Кривичниот законик. Настанот се случил на 11 јули годинава, околу 11:30 часот, на улица Севастополска во Чаир, кога обвинетиот ја навредувал и ѝ се заканувал на градоначалничката за време на увид на дивоградба, со што предизвикал чувство на страв и несигурност во јавноста.

The post УСЛОВНА КАЗНА ЗА НАПАЃАЧОТ НА ДАНЕЛА Арсовска не побара отштета, Нуредини вети дека ќе се поправи appeared first on plusinfo.mk.

„ЈАВНОСТА МУ ПРЕСУДИ НА ВАСО, СУДОТ НЕ“ Дуковски тврди дека 12 години е првпат во историјата на Македонија

плусинфо — Mon, 06 Oct 2025 16:14:55 +0000

Адвокатот Сашко Дуковски, бранител на Васил Јованов, изјави дека казната од 12 години затвор, изречена за неговиот клиент за сообраќајната несреќа во која животот го загуби 22-годишната Фросина Кулакова, е резултат на притисок од јавноста, а не на правна анализа и судска пракса.

– Во овој случај се оди на лов на вештерки. Пресудата е донесена под огромен јавен притисок и важеше начелото „око за око, заб за заб“. Никогаш досега во историјата на македонското правосудство не е изречена ваква висока казна за ваков тип на дело – изјави Дуковски по денешната јавна седница пред Апелациониот суд Скопје.

Според него, судот во постапката испитува дали признанието на вина било дадено доброволно и дали каењето на обвинетиот било искрено.

– Не може четири пати да се каете. Ние приложивме видео снимка веднаш по несреќата каде што се слуша Јованов како вели ‘леле што сторив, греота за девојчето’. Тоа е искрено и човечки каење. Вештакот Маркециќ, кој со години работи за Обвинителството, потврди дека каењето е сериозно, лично и недвосмислено – рече Дуковски.

Тој потсети дека во други случаи на потешки сообраќајки, каде имало и бегство од местото на настанот и дополнителни повреди, казните биле значително пониски – околу осум години затвор.

– Тоа е целта на признанието – да се избегне долг и скап процес, обвинетиот да покаже одговорност, а државата да добие правна разрешница. Но, каков бенефит има со 12 години затвор? Јавноста му пресуди на Јованов, не судот. Не барам да му се даде орден, туку разумна казна во рамките на судската пракса. Сообраќајки имало и ќе има, но правдата мора да биде еднаква за сите – нагласи тој.

Пред Апелациониот суд Скопје денеска се разгледуваа жалбите на пресудата на Основниот кривичен суд Скопје од 13 мај годинава, со која Јованов беше огласен за виновен за делото „тешки дела против безбедноста на луѓето и имотот во сообраќајот“, врз основа на признание на вина.

Фросина Кулакова од Неготино беше прегазена на 29 јануари годинава додека поминувала пешачки премин на булеварот Партизански одреди во близина на Универзалната сала во Скопје. Дваесетгодишниот Васил Јованов управувал возило без возачка дозвола, под дејство на алкохол и минал на црвено светло, по што ја прегазил девојката, која почина на самото место.

The post „ЈАВНОСТА МУ ПРЕСУДИ НА ВАСО, СУДОТ НЕ“ Дуковски тврди дека 12 години е првпат во историјата на Македонија appeared first on plusinfo.mk.

НОВИ 48 ЧАСА ПРИТВОР ЗА ОСОМНИЧЕНИТЕ ЗА ТРУБАРЕВО Четворица остануваат во „Шутка“, почнува увидот за пожарот

плусинфо — Wed, 17 Sep 2025 09:05:47 +0000

Судија на претходна постапка при Основниот кривичен суд Скопје донесе одлука со која се продолжува притворот за нови 48 часа за четворицата осомничени во врска со големиот пожар што избувна во Трубарево на 13 септември.

Од судот информираа дека на барање на Основното јавно обвинителство – Скопје, мерката е продолжена поради основано сомнение дека осомничените со заеднички дејствија учествувале во извршување на кривично дело „Загрозување на животната средина и природата со отпад“, предвидено во член 230 од Кривичниот законик.

„Нивните конкретни дејствија се испитуваат, но станува збор за 56-годишен управител и сопственик на две правни лица, 22-годишна управителка на трето правно лице, 42-годишник во својство раководител на подружница и 59-годишник вработен во правно лице. Се испитува и потенцијалната одговорност на други лица,“ наведоа од судот.

Од таму додадоа дека увидот на лице место за причините за пожарот во Трубарево започнува денеска и ќе биде координиран од јавен обвинител. По негово наредување, екипи на СВР Скопје веќе работат на прибирање на докази и анализа на документација.

„Во континуитет се преземаат повеќе дејствија за обезбедување и анализа на документација“, стои во соопштението на ОЈО.

Пожарот избувна во саботата попладне околу 14 часот во складиште за рециклирање отпад во Трубарево. Директорот на Дирекцијата за заштита и спасување, Стојанче Ангелов, вчера информираше дека пожарот е целосно изгаснат и дека опожарената површина е затрупана со песок и земја.

The post НОВИ 48 ЧАСА ПРИТВОР ЗА ОСОМНИЧЕНИТЕ ЗА ТРУБАРЕВО Четворица остануваат во „Шутка“, почнува увидот за пожарот appeared first on plusinfo.mk.

ОДЛОЖЕНО СУДЕЊЕТО ЗА ЖАН МИТРЕВ Тројцата сведоци не се појавија

плусинфо — Mon, 01 Jul 2024 11:03:36 +0000

Поради отсуство на сведоци, денешното рочиште за случајот против доктор Жан Митрев во Основниот кривичен суд во Скопје е одложено за 4 септември годинава.

Полицијата на двајца сведоци предложени од Обвинителството не можела да им достави покана на адресата на која живеат во Тетово и во Гостивар, додека третиот сведок со поднесок до Судот побарал да се ослободи од сослушување од здравствени причини.

Јавниот обвинител, за економичност на постапката, даде предлог овие сведоци да бидат повлечени, но таквиот предлог не беше прифатен од одбраната, според која не биле исцрпени сите законски можности за нивно обезбедување и дека доколку не може да се обезбеди нивно присуство во судницата поради заминување во странство, тие може да бидат сослушани преку видео врска.

Во однос на барањето на третиот сведок за негово ослободување од сослушување, Судот посочи дека во доставеното известување биле содржани копии од здравствени белешки и побара тие да бидат доставени во оригинал.

Предметот се однесува на измама, односно, како што соопшти своевремено ЈО, прикривање на клучни факти во однос на хемофилтрацијата, метод за кој пациентите не биле јасно информирани за сите позитивни и негативни ефекти, со што тие биле доведени во заблуда, со цел противправно прибавување на имотна корист.

Предметот е оформен по допрен глас, откако се објави документарец во кој се тврди дека приватната болница „Жан Митрев“ им наплаќала на пациенти високи суми пари за хемофилитрација при лекување од Ковид-19, по што беше отворен и предметот во ОЈО Скопје.

Процесот го води судијката Лидија Петровска, а застапник на обвинението е обвинителката Искра Хаџи Василева.

Судскиот процес пред Основниот кривичен суд во Скопје започна во февруари лани, но поради истекот од 90 дена од последното одржано рочиште тој лани во ноември беше вратен од почеток. Процесот се наоѓа во фаза на доказна постапка, каде се изведуваат докази и се сослушуваат сведоци предложени од Јавното обвинителство.

The post ОДЛОЖЕНО СУДЕЊЕТО ЗА ЖАН МИТРЕВ Тројцата сведоци не се појавија appeared first on plusinfo.mk.

ПРВОСТЕПЕНА ПРЕСУДА ЗА СЛУЧАЈОТ „МАЏАР ТЕЛЕКОМ“ Три лица, странски државјани, добија по 8 години затвор

плусинфо — Tue, 21 Mar 2023 16:33:06 +0000

Основниот кривичен суд Скопје ја објави првостепената пресуда за предметот „Маџар Телеком“ против три лица, двајца Унгарци и еден Германец, на кои им се судеше во отсуство, бидејќи не се достапни за органите на прогон.

Тројцата обвинети се прогласени за виновни за кривичното дело несовесно работење во службата. Поранешните високи функционери во компанијата беа обвинети дека ги оштетиле буџетот и домашниот Телеком со склучување фиктивни договори за консултантски услуги со кипарска консултантска куќа.

Секој од обвинетите А.И.С., Р.П. и З.К. доби по 8 години затворска казна. Воедно, обвинетите се задолжени да ја надоместат штетата во висина од 67.407.760 денари за Македонија, како и судските трошоци за постапката.

The post ПРВОСТЕПЕНА ПРЕСУДА ЗА СЛУЧАЈОТ „МАЏАР ТЕЛЕКОМ“ Три лица, странски државјани, добија по 8 години затвор appeared first on plusinfo.mk.

СКОПСКИОТ КРИВИЧЕН СУД БИЕ БИТКА ЗА СТРАЗБУР Како да се спречат европските судии да пресудат дека еднаш дадено помилување не може да се поништи?

Бранко Героски — Mon, 07 Mar 2022 12:47:46 +0000

Апелациониот суд во Скопје денеска одржува јавна седница по жалбата на првостепената пресуда за предметот „Таргет-Тврдина“. Како што е познато, на 26 февруари минатата година, Џенета Бегтовиќ како прв судија, Владимир Туфегџиќ како втор и тројца судии поротници осудија 11 лица за аферата со масовно нелегално прислушување и им определија драконски казни од вкупно 55 години ефективен и 10 години условен затвор. Меѓу осудените се поранешниот директор на Управата за безбедност и контраразузнавање Сашо Мијалков (12 години затвор) и поранешната министерка за внатрешни работи Гордана Јанкуловска (4 години затвор). Сите осудени ќе ги образложат своите аргументи со кои ја оспоруваат судската пресуда, Основниот кривичен суд ќе се „брани“, а Апелација ќе донесе конечна одлука, најверојатно во текот на наредните денови.

Но, апелационите судии овој пат ќе имаат и уште една важна и деликатна задача. Тие ќе треба да одлучат дали Обвинителството, Кривичниот суд и Владата се обиделе во првостепената пресуда за „Таргет-Тврдина“ да изнесат на виделина нов наводен аргумент, со кој ќе ја зајакнат позицијата на македонските власти пред Европскиот суд за човекови права во Стразбур, кој треба да решава по апликациите на 11 лица од Македонија во врска со аболицијата на поранешниот претседател Ѓорге Иванов. Како што е познато, Иванов на 12 април 2016 година помилува 56 лица, меѓу кои и дел од сега неправосилно осудените во предметот „Таргет-Тврдина“, но по шест недели, под силен притисок, го поништи помилувањето, откако претходно Собранието со измена на Законот за помилување му оневозможи да помилува по итна постапка, по членот 11 од Законот.

Главниот аргумент на апликантите, кои се жалат на поништувањето на одлуките за помилување, се две клучни тези, кои тешко можат правно и на каков било друг логичен начин да се оспорат. Од една страна, Уставот и законот му даваат право на шефот на државата да помилува, но не и да го поништи сопственото помилување. Не се памети шефот на државата да даде милост, па да се предомисли. Од друга страна, апликантите аргументирано тврдат дека милоста што ја добиле од шефот на државата на 12 април 2016 година е нивно стекнато право, кое не може да се поништи. Правниците велат дека повикувајќи се на сопствените одлуки, Стразбур постапил одговорно што ги прифатил апликациите и одлучил да стапи во комуникација со македонските власти, во рамките на стандардната процедура за вакви случаи.

Духот излезе од шишето кога Црвенковски го аболицираше Заев

Првата половина од 2021 година ќе помине во успешни обиди на Владата на Зоран Заев да добие нови рокови за доставување на одговор на прашањата од Стразбур. Тука е и пандемијата како совршен изговор на одолговлекувањето на Скопје. И Основниот кривичен суд изгледа купува време, па така, иако пресудата за „Таргет-Тврдина“ е објавена на 26 февруари, таа ќе биде изготвена дури во јули-август лани. После долг молк, Владата испраќа одговор во Стразбур во јуни, во кој тврди дека аболицијата на Иванов никогаш и не произвела никакво правно дејство, бидејќи спорниот член 11 од Законот на помилување, кој му дава право на шефот на државата да помилува по итна постапка (надвор од редовната процедура), одамна не бил во правен промет.

Веројатно некои од вас се сеќаваат на дебатата што се поведе за ова прашање и во академската задница, но и во Уставниот суд. Со малу упростување, кое секако носат ризик од непрецизности, ќе ја опишам накусо таа дебата. Духот излезе од шишето кога во 2008 година Бранко Црвенковски итно го аболицираше Зоран Заев за аферата „Глобал“, повикувајќи се имено на членот 11 од Законот за помилување. Лути поради тоа, мудреците од власта на Никола Груевски во 2009 година го изменија Законот, го укинаа фамозниот член 11 и изнапишаа „барокни“ одредби за тоа кого и како може да помилува шефот на државата. Некаде во почетокот на 2016 година, на некои луѓе во ВМРО-ДПМНЕ сепак ќе им текне дека членот 11 би можел „да им се најде“ во периодот што претстои. Поведена е „независна“ иницијатива пред Уставниот суд, кој го укинува целиот „вмровски“ закон од 2009 година. По оваа одлука се отвора расправа дали со неа се враќа или не се враќа во сила фамозниот член 11. Мислењата се различни, но Владата на Заев пред Стразбур настапува со тврдењето дека овој член одамна е надвор од правен промет и немало ни потреба со законски измени, после аболицијата Иванов, да се принудува да го поништи сопствениот акт. Ако немало потреба, зошто е сторено тоа?

Како и да е, правните експерти блиски до Заев веројатно чувствувале дека целата оваа рашомонијада со фамозниот член 11 нема да биде уверлива за судиите во Стразбур, ако не им се покаже дека постои раширено, ако не и општо мислење меѓу македонските обвинители, судии и истакнати правници дека аболицијата на Иванов е ништовна. Добрите познавачи на правото знаат дека постои суштинска разлика меѓу поништувањето и утврдувањето ништовност. Во суштина, утврдувањето на ништовност е докажување дека еден акт не произвел правни дејствија. А апликантите во Стразбур лесно ќе докажат дека македонскиот правен систем не предвидел прецизна процедура за утврдување на ништовност на акт на шефот на државата.

Кој и како утврдил дека одлуките на Иванов за помилување се „ништовни“?

Целиот овој долг вовед е нужен за да се разбере зошто во пресудата за „Таргет-Тврдина“, подготвени кон крајот на ланското лето, за прв пат се вели дека одлуките на претседателот Иванов за помилување се ништовни и никогаш не произвеле правно дејство. На овој битен момент на денешната јавна седница на Апелациониот суд посочи Влатко Илиевски, бранител на Гордана Јанкуловска, која исто така се повикува на помилувањето од Иванов како стекнато право да не биде кривично гонета.

Ставот на судот, наведен во образложението на пресудата за „Таргет Тврдина“, дека одлуките за помилување се ништовни и никогаш не произвеле правно дејство, за адвокатот Илиевски се, најблаго речено, проблематични.

– Не е јасно од каде ја црпел судот својата стварна надлежност кога утврдил ништовност на акт донесен од страна на претседателот на Републиката и во која постапка била утврдена таа ништовност? Дали и каде е објавена таквата одлука за ништовност и дали засегнатите лица имале можност да вложат правен лек за оспорување на ваквата одлука за ништовност на помилувањето? – праша бранителот на Јанкуловска.

Ниту еден македонски суд и судија до оваа пресуда не го оцениле актот на претседателот Иванов за помилување како „правно ништовен“. Напротив, постојат обратни примери, имено одлуки во кои ништо не се зборува на таа тема.

Ставот на судот за ништовност на одлуката за помилување е во спротивност со досегашните одлуки на истиот Основен кривичен суд – Скопје, за кого никогаш до сега не беше доведена под знак прашање валидноста на одлуките за помилување до моментот на нивното поништување. И токму затоа, судот во повеќе свои решенија секогаш се повикуваше токму на фактот дека таквите одлуки за помилување престанале да важат кога истите биле поништени со одлуките за поништување на одлуките за помилување.

Две такви решенија што ја засегаат Јанкуловска донел токму истиот суд, Основниот кривичен суд – Скопје. Со првото Решение КОК ПП бр. 105/16, донесено на 25.04.2016 година, кога сè уште била во правна сила одлуката за помилување (пред истата да биде поништена неколку недели подоцна), судијата на претходна постапка го отфрлил барањето на СЈО за изрекување на мерки за претпазливост, со образложение дека Јанкулоска е помилувана за кривичното дело (353 ст. 5 од КЗ) за кои се води истрага во предметот „Тврдина“ и за кое се бара изрекување на мерката. На ова Решение не е поднесена жалба и тоа станало правосилно. Второто е Решението КОК-ООА бр. 28/17, за оценка на Обвинителниот акт за предметот „Тврдина“, каде Советот за оценка на обвинителниот акт јасно истакнува дека „правното дејство на Одлуката за помилување – ослободување од гонење за Гордана Јанкулоска и на Тони Јакимовски, било во правна сила од 12.04.2016 до 27.05.2016 година“.

Треба да се спомне и решението VI KOK-17/15 од 15.04.2015 година (донесено исто така во време кога не биле поништени одлуките за помилување). Со ова решение Судот одлучил по службена должност да ја запре кривичната постапка за предметот „Пуч“ повикувајќи се на одлуките на претседателот Иванов за помилување на обвинетите – Зоран Заев е еден од нив! Тоа што ова Решение потоа по жалба ќе биде укинато и вратено на повторно одлучување, поради тоа што во меѓувреме Иванов ќе го поништи помилувањето, не менува ништо битно во поглед на ноторниот факт дека Основниот кривичен суд – Скопје сметал дека одлуките за помилување биле валидни до моментот на нивното поништување.

Обвинителството, Судот и Владата фатени во „копи-пејст“ операција

Интересно е тоа дека прв пат тезата за ништовноста на помилувањето се спомнува во завршните зборови на обвинителството за предметот „Тортура“, на 12 мај 2021 година. Адвокатот Илиевски открива фрапантна сличност и копи-пејст плагијат меѓу овој дел од завршните зборови на Обвинителството за „Тортура“ (страници 51-59 од записникот од судското рочиште) и делот од образложението на пресудата за „Таргет Тврдина“ (страници 329-346).

– Што е уште поскандалозно, во дел од образложението на пресудата за „Таргет-Тврдина“ постои и преклопување со одговорот на Владата, односно на Министерството за правда, којшто беше испратен во Европскиот суд за човекови права, а во врска со апликациите поднесени од повеќе лица, вклучително и од обвинетите Гордана Јанкулоска и Тони Јакимовски, и тоа токму во врска со кривичниот прогон во овој предмет. Имено, наводите содржани на страна 339 параграф 5 од образложението на пресудата се речиси идентични со параграф 88-а од одговорот на Владата. Исто така, наводите содржани на страна 340 параграф 2 од образложението на пресудата се речиси идентични со параграф 88-ц од одговорот на Владата. Имајќи предвид дека овој одговор на Владата не е јавно достапен документ, како легитимен се јавува заклучокот дека Судот бил најблаго кажано брифиран од страна на Владата за ваквиот одговор, кој потоа бил „позајмен“ од Судот за потребите на образложението на пресудата. Ваквото однесување на Судот, да позајмува тези од Обвинителството и од Владата и истите да ги наведува како своја аргументација во образложението на пресудата, укажува на недостиг на отпорност на судството од надворешни притисоци. Не само што нема отпор, туку има и соработка, што создава впечаток на отсуство на независност и не нуди доволна гаранција за исклучување на легитимниот сомнеж дека судството е пристрасно – алармира Илиевски.

Накусо, постои оправдан сомнеж дека ваквата спрега помеѓу Судот, Обвинителството и Владата е направена со цел да се изгради што е можно подобра позиција на Владата во однос на спорот што се води во Стразбур во врска со апликациите поднесени по основ на продолжувањето на кривичниот прогон и покрај тоа што се донесени одлуки за помилување. Нема дилеми дека вордингот и резонирањето на Кривичниот суд, изразени во пресудата за „Таргет-Тврдина“ симптоматично се променети во периодот на кореспонденција на Владата и апликантите со Судот во Стразбур.

Зошто при објавувањето на пресудата Туфегџиќ не спомна ништо за ништовност?

Незаобиколен е и фактот дека при објавување на пресудата за „Таргет-Тврдина“, воопшто не беше споменато ништо во однос на наводната ништовност на одлуките за помилување. При објавувањето на пресудата од страна на судијата Владимир Туфегџиќ, беше речено дека „во оваа фаза на кривичната постапка одлуката за амнестија или помилување за дел од обвинетите, кој акт е поништен од доносителот, не произведува правно дејство во оваа кривична постапка, односно не претставува процесна пречка за понатамошно водење на кривичната постапка и завршување на кривичната постапка во прв степен“. Туфегџиќ не е судија од вчера (сега е адвокат) и бездруго знае што е ништовност. Во неговата објава нема ни збор такво нешто. А како и би имало?

Пресудата за „Таргет-Тврдина“ не е прва пресуда во која судот одлучувал за обвиненија за кои биле донесени одлуки за помилување од страна на претседателот Ѓорѓе Иванов. Имено, Основниот кривичен суд, пред да ја донесе оваа пресуда, донел уште три други пресуди во 2019 и во 2020 година – во нивните образложенија воопшто не се спомнува ни збор за наводната ништовност на одлуките за помилување. Станува збор за пресудите во предметите „Титаник 2“, „Насилство во Општина Центар“ и „Транспортер“. Во пресудата за „Титаник 2“, каде што еден од обвинетите е Мендух Тачи, чија одбрана се повикала на одлуката за помилување, Судот воопшто не ја ни коментирал таа околност во образложението на пресудата. Истиот пристап Судот го имал и во пресудата за „Насилство во Општина Центар“, каде што одбраната на обвинетиот Никола Груевски исто така се повикала на помилувањето. Во пресудата за предметот „Транспортер“, каде што е обвинет Владимир Талески, судот само се осврнал на фактот дека одлуката за помилување била поништена од страна претседателот, без воопшто да се осврне на тезата за наводната ништовност.

Одбраната има сомнеж дека „коперниканскиот“ пресврт на Основниот кривичен суд – Скопје во поглед на третирањето на одлуките за помилување како ништовни сепак не е случаен. Напротив, тоа е смислен и пресметан чекор, во координација со Владата и со Обвинителството. Колку овој сомнеж е оправдан ќе се види и од поведението на Апелациониот суд.

Во крајната инстанца, судбината на „Таргет-Тврдина“ во голема мера ќе зависи од пресудата на ЕСЧП во Стразбур, кој треба да одлучи дали е согласно со европските стандарди шефот на државата, под принуда или не, да поништува помилување што го дал и на лицата подложени на кривичен прогон да им одзема стекнати права, кои за нив значат слобода или живот зад решетки.

The post СКОПСКИОТ КРИВИЧЕН СУД БИЕ БИТКА ЗА СТРАЗБУР Како да се спречат европските судии да пресудат дека еднаш дадено помилување не може да се поништи? appeared first on plusinfo.mk.

Доказите на англиски јазик на обвинителката Стефанова го одложија рочиштето за предметот „Плацеви на Водно“

плусинфо — Mon, 19 Jul 2021 08:35:18 +0000

Второто рочиште во судскиот предмет „Плацеви на Водно“ денеска се одложи на барање на одбраната поради превод на доказите од анлиски јазик на македонски како и поради зафатеност на адвокатот поставен по службена должност во предметот означен од обвинителството како „ТНТ“, соопштија од Основен кривичен суд Скопје.

Случајот го води судијата Илија Трпков, а застапник на обвинението е обвинителката Лиле Стефанова.

Според обвинението за случајот „Плацеви на Водно“, Груевски е обвинет за делата „перење пари и за противправно стекнување и прикривање на имот“, неговиот кум Ристо Новачевски, бизнисмените Ненад Јосифовиќ, Јордан (Орце) Камчев и Ратка Куновска Камчева се товарат за „перење пари“, а првиот братучед на Груевски и поранешен директор на УБК, Сашо Мијалков, е обвинет за „помагање при кривично дело перење пари и други приноси од казниво дело“.

The post Доказите на англиски јазик на обвинителката Стефанова го одложија рочиштето за предметот „Плацеви на Водно“ appeared first on plusinfo.mk.

Боки 13 на обвинителна клупа и за „Меѓународен сојуз“ поради измама и перење пари

плусинфо — Tue, 12 May 2020 12:26:16 +0000

Советот за оценка на обвинителен акт на Основниот кривичен суд Скопје го одобри во целост обвинението против правното лице Меѓународен сојуз и пет други физички лица за кривичните дела „измама“ и „перење пари и други приноси од казниво дело“, информира Основен кривичен суд Скопје.

– Советот за оценка на обвинителен акт на Основниот кривичен суд Скопје кој постапува во оценка на обвинението со КОК ООА 1/20, на Обвинителството за гонење организиран криминал и корупција, против правното лице Меѓународен сојуз и пет други физички лица за кривичните дела „измама“ и „перење пари и други приноси од казниво дело“, по одржана нејавна седница како и разгледување и ценење на фактите и доказите во актот, донесе решение со кое обвинителниот акт се одобрува во целост – се наведува во соопштението од Основен кривичен суд Скопје.

По веќе одобрениот обвинителен акт, како што посочуваат од Судот, ќе биде оформен предмет кој согласно АКМИС – системот ќе биде распределен на понатамошно постапување кај судија од Одделот за организиран кирминал, а по насрочена главна расправа странките и јавноста ќе бидат дополнително известени.

The post Боки 13 на обвинителна клупа и за „Меѓународен сојуз“ поради измама и перење пари appeared first on plusinfo.mk.