Со искази на сведоци, оштетени во пожарот во дискотеката „Пулс“ во Кочани денеска во големата судница на Кривичниот суд во Идризово ќе продолжи главната расправа за катастрофалниот пожар во кој загинаа загинаа 63 лица, а над 210 беа повредени.

Се очекува да сведочат петмина оштетени, Тоше Трендафилов, Мартин Китанов, Алберто Миладинов, Иван Данилов и Кристијан Панов. Сите беа присутни во дискотеката во време на пожарот, дел од нив беа повредени и загубија блиски членови на семејството.

Претходното рочиште, закажано за 14 јануари беше одложено по барање на бранителката на обвинетиот Аднан Џаферовски, адвокатката Сузана Јошевска Анастасовска, која беше избрана за член на Судскиот совет, а со цел Џаферовски да има доволно време да ангажира нов бранител и тој да се запознае со предметот.

На претходното рочиште, што се одржа на 29 декември 2025 година, сведочеа три мајки на загинати во пожарот, Марија Петрушева, Ирена Минова и Габриела Наунова. Тоа рочиште помина во тешка атмосфера, исполнета со плач од присутните родители, поради траорното сведочење на мајките за смртта на нивните деца. Судењето го одбележа и тежок инцидент, кој настана откако Наунова им порача на сите 35 обвинети дека без разлика на исходот на судењето за нив тие се убијци на нивните деца, на што градежниот инспектор Огнен Георгиев ѝ дофрли дека и таа е виновна затоа што ја пуштила малолената ќерка во диско, по што сите родители скокнаа и почнаа да го пцујат, да го колнат и да му се закануваат дека ќе му летне главата на некој пешачки премин во Кочани. Судијката Диана Груевска Илиевска побара обезбедувањето да ги смири родителите и им рече дека доколку го нарушуваат редот во судницата нема да им дозволи да присуствуваат на рочиштата.

На 16 март 2025 година, за време на настап на групата ДНК во дискотеката „Пулс“ во Кочани, од употреба на пиротехника избувна пожар. Јавното обвинителство обвини 35 физички и 3 правни лица и сите нив ги товари за Тешки дела против општата сигурност. Сите обвинети се изјаснија дека не се чувствуваат виновни според таа квалификација. Обвинети се сопственикот и управителите на дискотеката, обезбедувањето, градежни и пазарни инспектори, проектантка на објектот, поранешни градоначалнци на Кочани, поранешни директори на Дирекцијата за заштита и спасување, поранешни министри за економија и административци во Министерството за економија. Сите тие, според Обвинителството, од 2012 година до денот на трагедијата направиле верижни пропусти што довеле до трагедијата.

The post ЌЕ СВЕДОЧАТ ПЕТМИНА ОШТЕТЕНИ ВО ПОЖАРОТ ВО ДИСКОТЕКАТА „ПУЛС“ Продолжува судењето за предметот „Кочани“ appeared first on plusinfo.mk.