Нов сериозен безбедносен инцидент го потресе стратешки важниот Ормуски Теснец, откако неидентификуван проектил погоди комерцијален танкер за време на неговата редовна пловидба. Нападот денеска официјално го потврди Агенцијата за поморски трговски операции на Обединетото Кралство (UKMTO).

Според официјалното соопштение на британската агенција, нападнатиот брод претрпел материјални оштетувања на командниот мост. За среќа, сите членови на екипажот поминале без повреди и во моментов се наоѓаат на безбедно. Од UKMTO додаваат дека по ударот не е забележано загадување на морето, а во тек е истрага за откривање на сторителите.

Овој последен поморски инцидент доаѓа во моменти на сериозна воена ескалација во регионот, која се разгоре само неколку часа претходно. Во текот на изминатата ноќ, САД изведоа обемни воздушни напади врз јужниот брег на Иран, таргетирајќи ги тамошните воени позиции.

Пентагон официјално потврди дека во американската операција биле погодени ирански ракетни и радарски системи, како и бази за беспилотни летала. Вашингтон овој потег го образложи како директен одговор на претходниот ирански напад со дрон врз контејнерскиот брод „Ever Lovely“, кој плови под сингапурско знаме.

Официјален Техеран не чекаше долго за да возврати на американските воздушни удари. Иранското Министерство за надворешни работи соопшти дека нивната војска покренала „одбранбени напади“ врз воени цели кои се директно поврзани со американските сили во регионот. Притоа, Иран го обвини Вашингтон за грубо кршење на Повелбата на ОН и на неодамна постигнатиот Меморандум за разбирање од Исламабад, со кој Техеран претходно се обврза на траен прекин на воените операции во ова подрачје.

Дополнително, воената криза се префрли и на копно, откако утрово се огласи и Кралството Бахреин. Властите во Манама упатија најостра осуда до Техеран, откако неколку ирански дронови во раните утрински часови го повредија бахреинскиот воздушен простор и нападнаа објекти на нивна територија.

Бахреин порача дека Иран со ваквите потези директно ги поткопува тешко постигнатите мировни напори и веќе официјално побара итна интервенција од Советот за безбедност на ОН за да се запре натамошното ширење на воениот судир во Персискиот Залив.

The post НОВ НАПАД ВРЗ ТРГОВСКИ БРОД ВО ОРМУСКИОТ ТЕСНЕЦ Иран и САД разменуваат оган, примирјето пропаѓа appeared first on plusinfo.mk.

Меѓународната поморска организација на Обединети нации (ИМО) ја стопира планираната евакуација на повеќе од 11.000 морнари од Ормуска Теснина откако во мореузот беше нападнат товарен брод.

Товарниот брод, што плови под знаме на Сингапур вчера беше погоден од непознат проектил на 75 наутички милји југоисточно од оманското пристаниште Дахит.

САД тврдат дека врз бродот пукала иранската армија.

Директорот на ИМО Арсенио Домингез истакна дека бродот не пловел по рутата за евакуација на Меѓународната поморска организација.

Корпусот на исламска револуционерна гарда (ИРГЦ) вчера предупреди дека секој брод што поминува низ Ормуска Теснина мора да има одобрение. ИРГЦ се закани дека врз бродовите кои немаат одобрение, а ќе се обидат да поминат низ мореузот ќе бидат преземени „соодветни мерки“.

– Единствена одобрена рута за транзит низ Ормуска Теснина е таа што ја објави Исламската Република Иран. Секое поминување без одобрување е неприфатливо и опасно и ќе има последици, се наведува во соопштението на ИРГЦ.

Стотици бродови и илјадници морнари се блокирани во Персиски Залив од 28 февруари, кога САД и Израел го нападнаа Иран. Според потпишаниот Меморандум за разбирање помеѓу САД и Иран, Техеран треба да обезбеди безбеден премин за комерцијални бродови.

The post ТОВАРЕН БРОД ВО ОРМУСКИОТ ТЕСНЕЦ ПОГОДЕН ОД НЕПОЗНАТ ПРОЕКТИЛ Запрена евакуацијата на илјадници морнари appeared first on plusinfo.mk.

Оман синоќа соопшти дека ги координирал своите активности со Меѓународната поморска организација (ММО) за да обезбеди привремен поморски коридор за бродовите што сакаат да поминат низ Ормускиот Теснец.

Бродовите што сакаат да го користат привремениот коридор ќе мора да се усогласат со ММО врз основа на координатите објавени од организацијата и властите на Оман.

Мерката има цел да гарантира слобода на пловидба низ мореузот во согласност со меѓународното и морското право, што ја штити слободата на пловидба без наметнување транзитни такси.

The post ОМАН ОБЕЗБЕДИ ПРИВРЕМЕН МОРСКИ КОРИДОР НИЗ ОРМУСКИОТ ТЕСНЕЦ Бродовите ќе можат да поминат без транзитни такси appeared first on plusinfo.mk.

Милијарда барели нафта исчезнаа од светскиот пазар за време на војната во Иран, но цените останаа далеку под катастрофалните прогнози. Многу аналитичари причината ја гледаат во Кина, која со резервите, намалената потрошувачка и електричните возила помогнала да се ублажи глобалниот шок.

Додека САД и Иран разговараат за трајно отворање на Ормускиот Теснец и за враќање на нормалниот проток на нафта, погледите сè повеќе се насочуваат кон Пекинг.

САД ги укинаа санкциите за Иран на 60 дена што влијаеше на пазарите. Но, што е со кинеското влијание?

„Невидливата рака“ на Пекинг

Некои прогнози предвидуваа дека цената на нафтата може да достигне 200 долари за барел. Наместо тоа, суровата нафта „брент“ остана значително пониско и деновиве повторно падна под 78 долари за барел.

Аналитичарите од „Сосиете Женерал“ оценуваат дека зад овој парадокс стои „невидливата рака“ на Кина.

Пекинг успеал да го намали увозот за околу 3 милиони барели дневно, количина речиси еднаква на целокупната побарувачка на Јапонија.

Резерви наместо паника

Пред почетокот на војната, Кина натрупала огромни резерви на сурова нафта, делумно благодарение на поевтините испораки од Русија и од Иран.

Според процените, земјата располага со повеќе од милијарда барели во стратешки и во комерцијални резерви.

Кога цените почнале да растат, наместо да купува скапа нафта на пазарот, Кина почнала да ги користи сопствените залихи.

Електричните возила го менуваат пазарот

Дополнителен фактор е брзиот раст на електричните возила. Речиси секој втор нов автомобил продаден во Кина денес е возило на нова енергија.

Според процените на Меѓународната агенција за енергија, кинеската флота на електрични возила минатата година ја намалила потрошувачката на нафта за околу милион барели дневно.

Аналитичарите сметаат дека токму комбинацијата од резерви, ограничен увоз и забрзана електрификација помогнала да не дојде до нов глобален ценовен шок.

Од недостиг до вишок?

Додека пред само неколку недели светот стравуваше од недостиг на нафта, сега се појавуваат предупредувања за спротивно сценарио.

Меѓународната агенција за енергија проценува дека следната година понудата би можела да ја надмине побарувачката за 4,7 милиони барели дневно, особено ако Ормускиот Теснец целосно се отвори и ако производството на Блискиот Исток се нормализира.

Во таков случај, повторно ќе се постави истото прашање што денес го поставуваат аналитичарите:

Што сака да купи Кина?

The post ДАЛИ КИНЕСКАТА РАКА ГО СПАСИ СВЕТОТ ОД НАФТЕН ШОК? Додека САД и Иран преговараат, Пекинг влече конци appeared first on plusinfo.mk.

„Ќе направиме што мора ако Иран не се држи до својата страна од договорот“.

Вака изјави претседателот на САД Доналд Трамп предупредувајќи дека договорот мора да се почитува од двете страни.

САД и укинаа санкциите кои со горини го притискаа Иран на 60 дена, додека Вашингтон и Техеран се обидуваат да постигнат траен договор по средбите во Швајцарија.

САД дозволија до 21 август Иран повторно да продава нафта и сродни производи и да добива плаќања за нив. Одлуката претставува прв чекор од пакетот економски олеснувања предвидени со привремениот договор.

Пат кон траен договор

Потпретседателот на САД Џеј Ди Венс изјави дека разговорите поставиле добра основа за конечен договор, иако Техеран негира дека преговарал за својата нуклеарна програма.

„Поставивме многу добра основа за успешен конечен договор“, изјави Венс.

Според медијаторите, двете страни се согласиле во рок од 60 дена да изработат рамка за траен договор.

Ормускиот Теснец повторно во фокусот

Договорен бил и механизам за безбеден премин на комерцијалните бродови низ Ормускиот Теснец, еден од најважните светски енергетски коридори.

Сообраќајот на танкери низ теснецот веќе почнал да расте, додека Оман ја потврдил поддршката за слободна и безбедна пловидба.

Паралелно со разговорите за Иран, договорено било и продолжување на затишјето во Либан. Израел, кој не е дел од мировниот договор меѓу Вашингтон и Техеран, се согласил на нов прекин на огнот во јужен Либан.

Пазарите го следат развојот

Војната меѓу Израел и Иран предизвика силни потреси на светските пазари и раст на цените на нафтата. По најавата за договорот и за намалување на тензиите, цените на суровата нафта почнале да се стабилизираат.

Во наредните два месеца вниманието ќе биде насочено кон тоа дали привремениот договор ќе прерасне во трајно решение за една од најголемите кризи на Блискиот Исток.

The post „НЕ СОРАБОТУВААТ? ЌЕ НАПРАВИМЕ ШТО МОРА“ Трамп вели дека санкциите за Иран можат да се вратат appeared first on plusinfo.mk.

САД треба да бидат внимателни со своите изјави, изјави главниот ирански преговарач со САД во швајцарското одморалиште Обирген, претседателот на иранскиот парламент, Мохамед Багер Галибаф.

– Соединетите Американски Држави треба да бидат внимателни со своите изјави. Нашите вооружени сили се подготвени да реагираат – рече Галибаф.

Иранската делегација протестирала до американската делегација по заканите што претходно денеска ги упати американскиот претседател Доналд Трамп.

Трамп прво му се закани на Иран дека ќе го „удри уште посилно“ ако не го запре својот сојузник во Либан – Хезболах, а потоа упати закани и до иранските преговарачи дека „нема да се вратат во својата земја“ ако Техеран повторно го блокира Орускиот Теснец.

Според информации од иранските државни медиуми, на преговорите во Швајцарија треба да се финализира нацрт-компромис за санкциите врз иранската нафта.

Но, иранската страна предупредила дека доколку не заврши воената интервенција на Израел во Либан, преговорите за какви било други прашања меѓу САД и Иран нема да продолжат.

АКО ГО ЗАТВОРИТЕ ОРМУС, НЕМА ДА СЕ ВРАТИТЕ ВО ИРАН! Трамп жестоко им се закани на преговарачите од Техеран

The post САД ДА ВНИМАВААТ СО ЗАКАНИТЕ, ИРАН Е ПОДГОТВЕН ДА ВОЗВРАТИ Галибаф му одговори на Трамп appeared first on plusinfo.mk.

Американскиот претседател Доналд Трамп денеска се закани дека САД би можеле „да го преземат Ормускиот Теснец“ ако не се постигне договор со Иран и упати ссеризни закани до иранската делегација што преговара во Швајцарија.

– Можеби ќе го преземеме Ормускиот Теснец, доколку е потребно. Ако не постигнат договор, ќе наплаќаме за премин – рече Трамп во телефонско интервју за Фокс њус.

Иранските државни медиуми вчера објавија дека иранската воена команда одлучила да го затвори Ормус, поради израелските прекршувања на прекинот на огнот во Либан и затоа што САД „не ја спроведоа“ првата точка од привремениот договор за завршување на војната.

– Затворете го Ормускиот Теснец и повеќе нема да имате земја. Нема ни да се вратите во вашата е…а земја. Можеби ќе го преземеме теснецот ако треба. Ќе го дигнеме во воздух. По истекот на 60-те дена, можам да правам што сакам – изјави Трамп.

Тој повтори дека САД би можеле да станат „ангел чувар“ на Ормус и да земаат 20 проценти од нафтата што поминува низ него.

Прашан за изјавата на иранскиот претседател Масуд Пезешкијан дека Иран го задржува правото да збогатува ураниум, Трамп реагираше жестоко:

– Подобро да внимава што зборува. Подобро да се смири или ќе го преземеме остатокот од земјата.

Трамп претходно му се закани на Иран дека повторно ќе го „удри уште посилно“ ако не го запре својот сојузник во Либан – Хезболах.

Во Швајцарија денеска се одржуваат мировни преговори помеѓу делегации на САД и на Иран, за постигнување траен мир на Блискиот Исток.

ЛИБАН ЌЕ БИДЕ ГЛАВНА ТЕМА НА ПРЕГОВОРИТЕ МЕЃУ ИРАН И САД Иранците не се откажуваат од правото на збогатување ураниум

The post АКО ГО ЗАТВОРИТЕ ОРМУС, НЕМА ДА СЕ ВРАТИТЕ ВО ИРАН! Трамп жестоко им се закани на преговарачите од Техеран appeared first on plusinfo.mk.

Американската армија ја следи ситуацијата по претходно објавеното иранското соопштение за повторно затворање на Ормуската Теснина поради продолжените израелски напади во Либан.

Централната команда на американската армија за Блискиот Исток преку соопштение посочува дека американските сили остануваат „будни“ во однос на спроведувањето на договорот за прекин на огнот со Иран.

Според истите информации, денеска низ Теснецот поминале 55 трговски бродови.

Американската војска ги отфрли тврдењата на Иран дека Ормуската Теснина е затворена, нагласувајќи дека преминот е отворен и дека ситуацијата се следи.

„Иран не ја контролира Ормуската Теснина“, изјави портпаролот на американската Централна команда, капетан Тим Хокинс.

Тој додаде дека поморскиот сообраќај продолжува непречено и дека американските сили ќе продолжат да ја следат состојбата за да се осигураат дека тоа ќе остане така.

The post АМЕРИКА НЕГИРА ДЕКА ОРМУСКИОТ ТЕСНЕЦ Е ЗАТВОРЕН Иран не го контролира Ормуз appeared first on plusinfo.mk.

Заедничката воена команда на Иран денеска соопшти дека Ормуската Теснина повторно е затворена за пловидба, притоа наведувајќи ја како причина за таквата одлука продолжувањето на израелските напади во Либан и, како што се посочува, неисполнувањето на американската обврска да го окончи тој конфликт.

Во соопштение на Командата емитувано на Иранската државна телевизија, се наведува дека доколку продолжи израелската агресија во Либан, ќе бидат преземени и дополнителни чекори.

Претходно оваа седмица бродовите почнаа повторно да пловат низ Ормус откако беше склучен привремениот договор меѓу САД и Иран.

Во денешните израелски напади врз јужен Либан загинаа најмалку 16 лица, само неколку часа по извештаите дека е постигнат договор за прекин на огнот.

The post ОРМУСКИОТ ТЕСНЕЦ ПОВТОРНО ЗАТВОРЕН Причина се нападите на Изрел врз Либан appeared first on plusinfo.mk.

Откажувањето на средбите со Иран во Швајцарија во последен момент претставува сериозен удар за потпретседателот на САД Џеј Ди Венс, кој во изминатите месеци стана главен промотор на договорот со Иран во администрацијата на Доналд Трамп.

Уште повеќе, тоа би влијаело на следните избори во 2028 година кога Ди Венс, би можел да се кандидира за претседател.

Тимот на Ди Венс во последен момент го откажал патувањето за Швајцарија, пишува Си-Ен-Ен. Одлуката била донесена толку ненадејно што неговиот персонал и група новинари веќе биле собрани во воздухопловната база Ендрус, подготвени за летот.

Дел од американската делегација веќе пристигнала во Швајцарија.

„Логистиката на овие преговори никогаш не била едноставна или предвидлива. Во моментов, потпретседателот не заминува вечерва“, соопшти Белата куќа откако беа откажани разговорите кои биле договорени да се одржат 2 дена по потпишување.

„Не вреди ли да се проба?“

Според иранската агенција Тасним, Техеран сакал прво да види конкретни чекори од американска страна за спроведување на привремениот договор. Дополнителна неизвесност внеле и новите израелски операции во Либан.

Иако врховниот лидер на Иран, ајатолахот Моџтаба Хамнеи, формално го поддржал меморандумот, тој предупредил дека преговорите нема да бидат лесни.

– Ако американската страна премногу бара, ние нема да го прифатиме – порача Хамнеи.

Потпретседателот, кој долго време важеше за противник на американските воени интервенции, го претставуваше договорот како шанса за завршување на непопуларниот конфликт и за отворање нова страница во односите со Техеран.

– Луѓето велат дека Иранците никогаш нема да го променат своето однесување. Можеби е така, но не вреди ли да се проба? – изјави Ди Венс само еден ден пред откажувањето на разговорите.

„Најлошата грешка во последните години“

Неуспехот на мировниот процес веќе отвори политички прашања во Вашингтон.

Републиканските „јастреби“ жестоко го нападнаа договорот, обвинувајќи ја администрацијата дека му попушта на Иран. Сенаторот Бил Касиди го нарече „најлошата грешка во надворешната политика во последните децении“, додека сенаторот Роџер Викер оцени дека договорот е спротивен на целите на Белата куќа.

Курт Милс, близок сојузник на Венс, предупреди дека потпретседателот може да плати висока политичка цена ако процесот пропадне.

– Ако договорот не успее и ако стане голем неуспех, Венс ќе биде жртвено јагне – изјави Милс.

Дополнителен проблем за Венс е што целиот процес се следи и низ призмата на претседателската трка во 2028 година, во која тој се смета за еден од најсериозните кандидати во Републиканската партија.

„Ако не функционира, ќе го обвинам Џ.Д.“

И самиот Доналд Трамп на свој начин ја опиша ситуацијата.

– Ако функционира, јас ќе ги преземам заслугите. Ако не функционира, ќе го обвинам Џеј Ди – се пошегува претседателот на САД.

Во меѓувреме, Трамп остави и порака што многумина ја протолкуваа како предупредување до Техеран.

– Ако не се направи за 60 дена, во ред е. Се враќаме на бомбардирање – рече тој.

Разговорите требало да се одржат во Обирген, само два дена по потпишувањето на меморандумот со кој беше отворен 60-дневен рок за постигнување траен договор за иранската нуклеарна програма и за пловидбата низ Ормускиот Теснец.

The post ДИ ВЕНС ВО ПОСЛЕДЕН МОМЕНТ ГО ОТКАЖАЛ ЛЕТОТ ЗА ШВАЈЦАРИЈА На најголемиот промотор на договорот лошо му се пишува? appeared first on plusinfo.mk.