Полицијата поднесе кривична пријава против поранешниот градоначалник на Кичево, Фатмир Дехари, поради сомнежи за злоупотреба на службената положба поврзана со проект за улично осветлување. Пријава е поднесена и против уште едно лице од општинската администрација.

Според информациите од полицијата, Дехари во периодот од април 2021 до ноември 2025 година, како градоначалник, презел повеќе дејствија при подготовка и спроведување на договор за јавно-приватно партнерство за модернизација на уличното осветлување во Кичево. Станува збор за договор потпишан во ноември 2021 година со конзорциум од три компании – две од Кичево и една од Гостивар.

Истрагата покажала дека при постапката биле прекршени одредби од законите за јавни набавки и за јавно-приватно партнерство, а договорот бил доделен на лица блиски до првопријавениот, со намера да се стекне имотна корист.

Според полицијата, со ваквите постапки е предизвикана штета на буџетот на Општина Кичево од околу 1,62 милиони евра, што одговара на исплатените месечни ануитети кон приватниот конзорциум до моментот на поднесување на пријавата.

Кривична пријава е поднесена и против второ лице, вработено во општинската администрација како раководител на секторот за финансии. Тој бил претседател на комисијата за спроведување на постапката за јавно-приватно партнерство и член на комисијата за следење на договорот. Според полицијата, во периодот од 2021 до 2025 година не извршил соодветен надзор и со тоа овозможил штета на општинскиот буџет.

По целосното расчистување на случајот, предметот е доставен до надлежното обвинителство.

The post НОВА КРИВИЧНА ЗА ЕКС-ГРАДОНАЧАЛНИКОТ ФАТМИР ДЕХАРИ Буџетот на Кичево е оштетен за 1,6 милиони евра appeared first on plusinfo.mk.

Поранешниот градоначалник на Кичево, Фатмир Дехари, заработи кривична пријава под сомнение дека со злоупотреба на службената положба го оштетил буџетот на општината за повеќе од 1,4 милиони денари.

Од полицијата информираат дека пријавата е поднесена против Дехари (52) од селото Србица, како и против уште две лица и едно правно лице, поради сомнежи за злоупотреби при вршење на комунални дејности.

Според истрагата, на 8 јануари 2025 година, Дехари како градоначалник донел план за јавни набавки спротивно на Законот за комунални дејности. Иако општината имала сопствено јавно комунално претпријатие, тој ги доверил сите комунални работи на приватна фирма од селото Длапкин Дол.

Со тоа, како што наведува полицијата, постоела намера да се обезбеди поголема имотна корист за правното лице на штета на општинскиот буџет.

Второпријавениот, кој бил одговорно лице за одржување на зелените површини, не извршил соодветен надзор и несовесно постапил во своите должности. Третопријавениот, пак, како управител на фирмата, свесно ги прекршил правилата во постапката за јавен повик.

Според пресметките, за одржување на зеленилото околу зградата на Општина Кичево биле исплатени вкупно 1.457.205 денари, сума за која се сомнева дека е на штета на општината.

По целосно документирање на случајот, против пријавените ќе следуваат соодветни постапки.

The post ЗЕЛЕНИЛОТО СКАПО ЈА ЧИНЕЛО ОПШТИНА КИЧЕВО Кривична пријава за ексградоначалникот Фатмир Дехари appeared first on plusinfo.mk.

Поранешниот градоначалник на Кичево, Фатмир Дехари, е пријавен за злоупотреба на службената положба, откако полицијата утврдила дека со години исплаќал плати на лица кои воопшто не оделе на работа, со што општинскиот буџет бил оштетен за околу 130 илјади евра.

Кривичната пријава ја поднела ОВР Кичево и опфаќа период од 2021 до 2025 година, кога Дехари ја извршувал функцијата градоначалник. Според полицијата, тој склучил договори за вработување со четири лица, спротивно на законските прописи, а потоа им дозволил со месеци, па и со години, да не се појавуваат на работното место, додека редовно земале плата и други надоместоци од општинската каса.

„Со пропуштање на должен надзор, осомничениот дозволил исплата на плати и придонеси, иако лицата не ги извршувале работните обврски“, наведуваат од полицијата.

Покрај поранешниот градоначалник, пријавени се уште четири лица – Ф.А. (62) од Зајас, А.Н. (38) од Србица, Х.Б. (37) од Црвевци и Б.С. (36) од Стрелци, кои се товарат за перење пари и други приноси од казниво дело.

Според наодите, тие примиле вкупно околу 86 илјади евра, иако знаеле дека средствата се стекнати незаконски. Секој од нив добивал различен износ на својата лична сметка, без реално да работи во Општината.

Полицијата посочува дека работниот однос не им бил прекинат ниту по истекот на законскиот рок, што дополнително ја зголемило штетата за буџетот на Општина Кичево.

Кривичната пријава е доставена до надлежното обвинителство, кое треба да одлучи за понатамошните чекори во постапката.

The post НЕ ОДЕЛЕ НА РАБОТА, А ЗЕМАЛЕ ПЛАТА Екс-градоначалникот Дехари дозволил да „испарат“ 130.000 евра од општинската каса appeared first on plusinfo.mk.

Општина Кичево ги известува граѓаните дека на територијата на општината е евидентирана зачестена злоупотреба на издадените Одобренија за градење.

Во Одделението за инспекциски работи – Инспекторатот на Општина Кичево се водат постапки за објекти кај кои не е испочитувано Одобрението за градење, поради што статусот на тие објекти е доведен во прашање, а имотните листови на инвеститорите може да претрпат одредени измени.

Затоа, Општината апелира до граѓаните:

– При купување станови, особено на оние кои се изложени на продажба, пристапувајте со зголемено внимание.

Општината ги повикува граѓаните пред потпишување на било какви купопродажни договори да се обратат во просториите на Општина Кичево и да побараат подетални информации за конкретните објекти, со цел да бидат заштитени од евентуални манипулации и злоупотреби.

The post ПРВО РАСПРАШАЈ СЕ, ПА КУПИ СТАН ВО КИЧЕВО Општината предупредува на чести злоупотреби на одобренијата за градба appeared first on plusinfo.mk.

Градоначалникот Фатмир Дехари, вели дека како резултат на светската криза со електрична енергија, донеле одлука за воведување рестрикции.

– Во споредба со претходната година, во декември јавното осветлување беше трипати поскапо и се очекува сметката за јануари-февруари која ќе стигне за 10 дена да биде дури до шестпати повисока. Согласно овој тренд значи дека до месец јуни општината ќе „потоне“ во долгови и нема да може да ги реализира приоритетите на месните заедници, главните барања кои ги предвидовме во Буџетот на општината. По ова известување, сите се договоривме да почнеме да делуваме рационално, односно да го ставиме во прекин јавното осветлување во одреден период – изјави Дехари.

The post КИЧЕВО ВО ТЕМНИНА Воведени рестрикции на јавното осветлување appeared first on plusinfo.mk.

Кичево, 29 мај 2020 (МИА) – По информација за првиот резидентен случај во општина Кичево со коронавирус, која беше објавена од градоначалникот Фатмир Дехари, попладнево заседаваше Кризниот штаб кој донесе одлука да се преземат превентивни мерки во насока за изолирање на случајот.

Градоначалник Дехари, информираше дека по овој случај имал контакти со министерот за здравство, Институтот за јавно здравје во Битола и вработените во болницата, кои гарантирале дека сомнителните случаи се во изолација, како и дека сите членови кои имале контакти со заразениот со ковид-19 ќе бидат тестирани.

Градоначалникот на општина првиот резидентен случај во општина Кичево со коронавирус, изразувајќи благодарност до граѓаните кои скоро три месеци биле пример за сите други градови, апелира да не се занемари оваа состојба, особено сега по олеснувањето на мерките. Тој побара жителите на Општина Кичево да покажат трпеливост, зрелост и грижа како до сега.

Тој информира дека е во постојан контакт со сите институции, во својство на шеф на Кризниот штаб и дека најдобриот лек или доктор за оваа пандемија е самодисциплината на секој од нас.

The post Првиот случај со коронавирус во Кичево е изолиран appeared first on plusinfo.mk.