Синоќа во Дебар Маало беше отворен централниот изборен штаб на кандидатот за градоначалник на Општина Центар од редовите на СДСМ, Горан Герасимовски. Настанот го посетија голем број граѓани и поддржувачи кои со своето присуство ја потврдија довербата во неговата кандидатура за втор мандат.

Во своето обраќање, Герасимовски нагласи дека ќе продолжи со работа посветена на граѓаните и за подобар квалитет на живот во Центар.

– Со гордост и со факти покажавме дека во над 90 проценти ја исполнивме нашата програма. Денеска Центар, по мислење на многумина, е најдобрата општина во државата. Воведовме нов начин на управување. Секогаш сме со граѓаните, слушаме, се консултираме и сме присутни на терен. Сè што правевме беше единствено за граѓаните на Центар што го сакаме. Затоа решив да продолжиме заедно, за Центар да биде уште подобар – истакна Герасимовски.

Тој додаде дека зад себе има резултати, програма, но и енергија и емоција за нови предизвици.

– Од срце ве повикувам на целосна мобилизација. Ве повикувам да бидеме дел од заедничкиот успех и заедничката победа за Центар што го сакаме. Да живее Центар, за победа! – порача кандидатот на СДСМ.

Денеска, Герасимовски ќе продолжи со средби со жителите на Центар на булевар Партизански одреди, каде ќе разговара за нивните потреби, идеи и предлози за идниот развој на општината.

The post „90% ОД ВЕТУВАЊАТА СЕ ИСПОЛНЕТИ, СЕГА ПРОДОЛЖУВАМЕ“ Герасимовски ги повика граѓаните на мобилизација за победа appeared first on plusinfo.mk.