општа болница Archives - plusinfo.mk

ЗДРАВСТВЕНИТЕ РАБОТНИЦИ ВО КАВАДАРЦИ ДОБИВААТ НОВА МОЖНОСТ Почнаа стручните испити во болницата

МИА — Mon, 12 Jan 2026 15:24:29 +0000

Во јавната здравствена установа Општа Болница со проширена дејност Кавадарци, со почетокот на новата година, формирана е комисија за полагање стручни испити за здравствени работници, информираа денеска од оваа здравствена институција.

„Започнуваме со уште една значајна и позитивна иницијатива. Формирана е комисија за полагање на стручните испити за здравствените работници со завршено средно и високо стручно образование, што претставува важен чекор кон унапредување на професионалниот развој и квалитетот на здравствените услуги“, соопштија од болницата.

Формирани се комисии за образовните профили медицинска сестра со средно образование и дипломирана медицинска сестра, дипломиран радиолошки техничар со завршено високо стручно образование, фармацевтски техничар со завршено средно стручно образование, физиотерапевти со завршено средно и високо стручно образование, лаборанти со завршено средно и високо стручно образование.

-Оваа иницијатива е уште еден доказ за континуираната посветеност на болницата кон поддршка на здравствените работници, нивниот стручен напредок и унапредување на целокупниот здравствен систем во регионот, подвлекоа од установата.

The post ЗДРАВСТВЕНИТЕ РАБОТНИЦИ ВО КАВАДАРЦИ ДОБИВААТ НОВА МОЖНОСТ Почнаа стручните испити во болницата appeared first on plusinfo.mk.

НАДЛЕЖНИТЕ ВЛЕГОА ВО ОПШТИНА КОЧАНИ Истражителите копаат по документите се проверува законитоста на работењето на „Пулс“

МИА — Tue, 18 Mar 2025 11:06:17 +0000

Во моментот во зградата на Општина Кочани се влезени претставници од надлежните институции кои треба да ја подигнат потребната документација во врска со надлежностите на општинската администрација околу дозволите и работењето на дискотеката „Пулс“.

Од Министерството за внатрешни работи ја потврдуваат информацијата, но од Обвинителството засега нема официјална информација дали нивни обвинители се влезени во општинската зграда.

На сослушување во ОЈО Кочани во врска со трагедијата синоќа беше и градоначалникот на Кочани, Љупчо Папазов, и како што соопшти Обвинителството дополнително ќе биде донесена одлука за неговиот натамошен статус во постапката.

„Извршен е распит на градоначалникот кој даде определени појаснувања и сознанија. Таквиот исказ се споредува со доказниот материјал и надлежностите на општината, по што ќе биде донесена одлука за неговиот натамошен статус во постапката“, информираа вчера од Обвинителството.

Во дискотеката „Пулс“ во Кочани рано утринава во неделата во пожар загинаа 59 лица, а над 150 се повредени. Меѓу загинатите се и членови на бендот „ДНК“ кој настапувал таа вечер.

The post НАДЛЕЖНИТЕ ВЛЕГОА ВО ОПШТИНА КОЧАНИ Истражителите копаат по документите се проверува законитоста на работењето на „Пулс“ appeared first on plusinfo.mk.

ИТНИТЕ ПАЦИЕНТИ НА ЕДЕН ВЛЕЗ, А НЕИТНИТЕ НА ДРУГ Ќе се воведува ред во кумановската болница

МИА — Mon, 11 Nov 2024 14:18:44 +0000

Нови апарати, инфраструктурно доуредување и подобрување на кадровскиот потенцијал ќе добие кумановската Општа болница. Министерот за здравство, Арбен Таравари, при денешната посета на установата рече дека новата стратегија која ја подготвува Министерството ќе биде готова до крајот на наредната година и ќе ги утврди приоритетите за здравствените установи.

– Куманово после Скопје е вториот по големина град во Македонија. Прв пат доаѓам во Општата болница во Куманово, изгледот е разочарувачки. Искрено не само во Куманово, во повеќето болници, со ретки исклучоци, изгледот е ваков и сериозно треба да седнеме и да разговараме што можеме во идниот период да направиме. Секако, немаме магично стапче за да кажеме од идната или од оваа година ние сè ќе средиме, бидејќи е невозможно, многу работи зависат од финансии, буџетот го наследивме, така како што наследивме и се обидуваме барем преку апаратура оваа година да помогнеме. Идната година да видиме ако успееме да започнеме две болници коишто се почнати да се градат во Македонија, едната од 1998 година во Кичево, втората во Штип, почната 2010/11. За Куманово треба да видиме што можеме да реновираме како што тоа го правиме во Битола, Гостивар, Тетово, Струга, Охрид… во одделенија каде што треба да се интеревенира наеднаш за што побргу да се подобрат условите – изјави министерот.

Министерството ќе утврди што е најважно и што е потребно да се инвестира во здравствената установа која го покрива североисточниот плански регион. Министерот Таравари вели дека е потребно да се инвестира и да се види што ќе покаже стратегијата која ресорното министерство ја подготвува со Светската здравствена организација.

– Инаку, генерално ја мислам како држава ни треба и стратегија. Куманово од Скопје е оддалечено 30-40 минути возење, тоа е една позитивна страна за Куманово, но сепак и овде треба да видиме што е најбитно што треба да се работи, каде треба да се инвестира. Да не правиме луксузи, не треба во сите градови да имаме секакви специјализации за покомплицирани случаи, за коишто реално и немаме човечки ресурси. Во стратегијата која веќе ја подготвуваме и треба да биде готова до крајот на следната година ќе видиме кои приоритети за инвестиции колку што можеме да ги сработиме – додаде министерот.

Директорот на болницата, Стефан Трајановски рече дека здравството е девастирано. За кумановци проблем е локацијата на ургентниот центар сместена во тесна улица каде често се создава сообраќаен метеж што дополнително ја отежнува состојбата со животозагрозувачки пациенти кои итно мора да се прегледаат. Тој најави дека пациентите со термини во иднина ќе се прегледуваат во таканаречената „сина зграда“, а итните во ургентниот дел.

– Наследивме девастирано здравство. Има само еден рендген апарат каде се сликаат и термински и итни случаи, над него е компјутерски томограф и таму исто се снимаат и термински и итни случаи. На излезот од болницата досега имаше непријатни случки кога санитетски возила со животозагрозувачки пациенти се заглавуваа зашто не можеа да пријдат во слепата улица поради метеж и неможност за разминување. Оваа болница е од павиљонски тип. На друго место можеа да бидат лоцирани терминските прегледи, а тука треба да бидат итните случаи. Тоа ќе ми биде основна заложба покрај техничката опременост и инфраструктурното распределување и организација на движењето на пациентите. Итните само тука, а со термин, односно неитните во сината зграда. Ќе купиме апарати, но кадарот не можеме да го направиме со магично стапче – вели Трајановски.

Тој кажа дека со министерот се согласиле да ги придвижат работите во позитивна насока.

The post ИТНИТЕ ПАЦИЕНТИ НА ЕДЕН ВЛЕЗ, А НЕИТНИТЕ НА ДРУГ Ќе се воведува ред во кумановската болница appeared first on plusinfo.mk.

НАЈМЛАДИОТ АНЕСТЕЗИОЛОГ ВО КУМАНОВО ИМА 60 ГОДИНИ Двајца ортопеди, тројца рендгенолози, на болницата очајно ѝ треба кадар

МИА — Wed, 24 Jul 2024 12:27:28 +0000

Нова опрема, прераспределување на простор за поголема достапност на пациентите, вложувања во здравствен кадар, се приоритети на кои ќе се посвети доктор Стефан Трајановски кој од неодамна е назначен за директор на кумановската општа болница.

Тој на денешната прес-конференција најави дека ќе се вложи целосно во разрешување на проблемите на установата која нуди здравствена услуга на шест општини од североистокот и се наоѓа на крстосница помеѓу двата коридорА.

– Мојата цел ќе биде подобрување во однос на организациската поставеност и нарушувањето во однос на кадровскиот потенцијал и просторниот потенцијал, наоѓање простор за амбулантска дејност, да се стават во функција на пружање на поквалитетна здравствена услуга. На пример, не може да се искористи простор на старо АТД. За доградување и проширување е потребна помош од централната власт – изјави Трајановски.

Горлив проблем за болницата е службата за анестезија, најмладиот од нив има 60 години. Во моментов има лекари на специјализација, но Трајановски стравува дека може да се јави период да има недостиг на анестезиолози. Службата како што појасни е клучна не само за функционирање на хируршкото одделение, туку и за реанимација. Алармантен е бројот на рендгенолози, има само тројца.

– Сѐ има решение, ќе решаваме и ќе се бориме. Се надевам дека министерот и ресорното министерството се свесни дека кумановската болница не е само регионална туку се наоѓа на крстопат помеѓу двата коридора од европско значење, 10 и 8. Што значи дека кумановската болница мора секогаш да биде подготвена за масовен примен на повредени, трауматолошкиот дел мора да биде на високо ниво. Општа болница е од посебно значење за државата. Македонија мора да е свесна за потребите и значењето на болницата – рече Трајановски.

Тој додаде дека до крајот на годинава со сегашниот буџет ќе обезбеди поквалитетна здравствена услуга на сограѓаните.

– Во иднина имам за цел да донесам магнетна резонанца и друга опрема. Но, потребно е да се вложува во здравствен кадар – додава новиот директор кој ја презеде функцијата од досегашната директорка Биљана Ивановска.

Трајановски ќе продолжи да работи како ортопед, бидејќи само двајца се во болницата и поднел барање до Министерството да продолжи со дејноста.

Општа болница покрива територија на шест општини од североистокот и обезбедува секундарна здравствена заштита за Липково, Старо Нагоричане, Крива Паланка, Кратово и за Ранковце со приближно 200.000 граѓани.

The post НАЈМЛАДИОТ АНЕСТЕЗИОЛОГ ВО КУМАНОВО ИМА 60 ГОДИНИ Двајца ортопеди, тројца рендгенолози, на болницата очајно ѝ треба кадар appeared first on plusinfo.mk.

НОВА МЕДИЦИНСКА ОПРЕМА И ЛЕКОВИ ЗА КИЧЕВЦИ Видеолотарија се грижи за пациентите

плусинфо — Wed, 08 Feb 2023 11:54:26 +0000

Видеолотарија Касинос Австрија продолжува со својот активен придонес за унапредување на заедницата.

– Со директорот на ЈЗУ Општа болница Кичево, Станко Трпески го потпишавме договорот за донација во оваа болница. Парите од донацијата ќе бидат искористени за набавка на медицинска опрема и медицински материјал, неопходни за лекување на пациентите во оваа установа – велат од Видеолотарија.

Д-р Станко Трепески изрази благодарност до Видеолотарија Касинос Австрија за препознавањето на важноста на здравството и брзиот одговор на нивното барање.

– Видеолотарија Касинос Австрија го препознава здравството како еден од основите општествени столбови, па со оваа донација тоа го потврдивме уште еднаш. И во иднина ќе продолжиме да го негуваме трендот на општествено одговорна компанија, која грижливо придонесува за најранливите групи и највиталните сектори во нашата заедница – велат од Видеолотарија.

The post НОВА МЕДИЦИНСКА ОПРЕМА И ЛЕКОВИ ЗА КИЧЕВЦИ Видеолотарија се грижи за пациентите appeared first on plusinfo.mk.

Гинеколошко-акушерското одделение во Куманово почна да работи

плусинфо — Mon, 04 May 2020 11:00:54 +0000

Гинеколошко-акушерското одделение при Општата болница во Куманово од денеска почнува со редовна работа и ќе ги прима сите пациентки и родилки.

– Многу е важно да се почитуваат препораките. Родилките треба да доаѓаат со маски, да се почитуваат општите препораки, да доаѓаат пред одделението само со еден придружник, еден член од семејството – изјави директорката на Кумановската болница, Снежана Захариева.

Од денеска со редовна работа продолжува и кожната амбуланта во болницата. За рестартирањето на останатите одделенија од Болницата ќе чекаат препораки од Министерството за здравство.

The post Гинеколошко-акушерското одделение во Куманово почна да работи appeared first on plusinfo.mk.