Спам-пораките, „ексклузивните“ попусти и понудите што не смеат да се пропуштат се во пораст околу 14 февруари, Денот на вљубените, бидејќи киберкриминалците го користат празникот за да ги намамат и измамат корисниците, се наведува во истражување на безбедносната фирма „Bitdefender“.

Според нивните наоди, 41 процент од спам-пораките за Денот на вљубените се насочени кон измама.

Меѓу техниките што најчесто ги користат киберкриминалците за кражба на лични и финансиски информации се фишинг, романтични измами, лажни наградни игри, барања за авансно плаќање и лажни анкети.

САД се земјата најпогодена од овие измами, со 55 проценти од пресретнатите пораки од овој тип, по што следуваат Германија (13 проценти), Ирска (8 проценти) и Обединетото Кралство (6 проценти). Следуваат Јапонија, Јужна Африка, Полска, Италија, Австралија, Франција и Канада.

САД, исто така, остануваат главна земја на потекло на измамничките кампањи за Денот на вљубените – 43 проценти од спамот. Следуваат Бразил, Хонг Конг, Кина, Италија, Јужна Африка, Полска, Индија, Франција и Унгарија.

Според истражувањето, околу 10 проценти од пораките користат мамки со тематика за запознавање, честопати со слики од профили генерирани со вештачка интелигенција.

Значителен дел од измамите за Денот на вљубените, исто така, се потпираат на лажно претставување на брендови, при што киберкриминалците се претставуваат како добро познати трговци на мало и луксузни брендови.

Истражувачите на „Bitdefender“ препорачуваат да се обрне посебно внимание на е-поштата, пораките на социјалните мрежи и СМС-пораките што ветуваат бесплатни подароци, награди или специјални понуди, како и да се проверат сите навидум неразумни понуди или пораки пред да се одговори на нив.

The post НЕ СЕКОЈА ЉУБОВНА ПОНУДА Е ИСКРЕНА Кибер-криминалците демнат за Денот на вљубените appeared first on plusinfo.mk.

Онлајн содржини што прикажуваат гушење или давење во сексуален контекст ќе станат кривично дело во Обединетото Кралство, според новите владини измени насочени кон борба против насилството врз жени и девојчиња, јави Би-Би-Си.

Анализа на владината комисија покажала дека сцени на гушење се присутни на повеќето водечки порнографски страници и дека нивната нормализација влијаела врз младите корисници. Според предложените измени во Законот за казнено правосудство и полиција, и поседувањето и објавувањето на вакви видеа ќе се третираат како кривично дело.

Платформите ќе имаат обврска проактивно да ги детектираат и отстрануваат тие содржини, во спротивно ќе бидат санкционирани од медиумскиот регулатор „Офком“.

Министерството за наука, иновации и технологија на Велика Британија соопшти дека давењето во порнографијата ќе биде класифицирани како „приоритетно кривично дело“ според Законот за онлајн безбедност, што значи дека ќе биде третирано како материјал за детска злоупотреба или тероризам.

Гнасно и опасно

Гледањето и споделувањето ваков материјал не е само вознемирувачко, туку и гнасно и опасно, вели министерката за технологија на Велика Британија Лиз Кендал.

– Тие што го објавуваат или го промовираат, учествуваат во создавање култура на насилство и злоупотреба што нема место во нашето општество.

Притоа, министерката повика на одговорност на технолошките компании, барајќи од нив да го сопрат таквиот материјал пред да стане достапен на јавноста.

Сериозен облик на насилство

Истражување на Би-Би-Си од 2019 година покажало дека 38% од жените на возраст меѓу 18 и 39 години доживеале гушење за време на сексуален однос. Берни Рајан, извршна директорка на Институтот за справување со давење, ја поздравила одлуката велејќи дека ваквите сцени испраќаат „збунувачки и штетни пораки“ за тоа што е прифатливо во интимните односи.

– Давењето е сериозен облик на насилство, често користен во семејно насилство за контрола и заплашување – истакна таа.

Директорката на Коалицијата за запирање на насилството врз жените, Андреа Сајмон, оцени дека измените се „клучен чекор“ против нормализацијата на насилството во дигиталните медиуми.

– Не постои „безбедно гушење“. Жените не можат да се согласат на долгорочна штета што ја предизвикува, како оштетување на мозочните функции и меморијата – додаде Сајмон.

Сомнежи во ефикасноста на законот

Активистката Фиона Мекензи, основачка на групата „We Can’t Consent To This“, сепак изрази сомнеж дека новите мерки ќе се спроведат ефикасно. Таа потсети дека и Законот за казнено правосудство и имиграција од 2008 година веќе го криминализира поседувањето екстремна порнографија, вклучувајќи и сцени опасни по живот, но во пракса ретко се применува.

– Повеќе од пет години младите жени ни велат дека социјалните мрежи го продаваат гушењето како нешто нормално, како израз на страст. Порнографските страници го прават тоа нормално за мажите – а ниту една од нив никогаш не почувствувала последици од законот – изјави Мекензи.

Таа додаде дека е можно овојпат владата навистина да преземе мерки, но предупреди дека без доследна примена, секој нов закон ќе остане само на хартија.

The post НЕМА ВЕЌЕ ПОРНО СО ДАВЕЊЕ, ПРЕСЕКОА БРИТАНСКИТЕ ВЛАСТИ Не постои „безбедно гушење“ appeared first on plusinfo.mk.